Duꞌua taꞌan kuenta nandoto Jesús
20
Diꞌnanuu kii semana datsañuꞌu ntseꞌe, naa ka kuaꞌan María Magdalena yavi san xíni ña sa yuu ntsadi ndieꞌe xíkasata. 2 Danduu xino ntseꞌe ña kunuꞌu sa io Simón Pedru xiꞌin sa io enka tsa nchiko ñaꞌan xi ia tsa kida-ini Jesús san sadaa ña:—Kineꞌen ña xikikoño ku Toꞌo ndo xiti yavi, san ti xini ndo ami sakituu ñaꞌan xan.
3 Kée Pedru xiꞌin enka tsa nchiko ñaꞌan xi Jesús san kuaꞌan tsa nduu tsa yavi. 4 Nduu tsa xino kuaꞌan san enuu nika xino tsa kuaꞌan, doko enka tsa kuan xíno ntseꞌe ka tsa kuan kama ka tsa sa kuxi Pedru san diꞌna ka tsa saa yavi kuan. 5 San xito niꞌni tsa san xini tsa ndidaa titsaa iduku yikikoño xuku juan; doko ti sayii tsa. 6 Danduu nchiko ñaꞌan ni Simón Pedru saa, san kuyii tsa yavi. San xíni tsa ndidaa titsaa xuku juan, 7 doko titsaa iduku d̶iki ia, ti katuu sa xuku dagua ka titsaa kuan tuniꞌno guaꞌa san katuu deen. 8 Danduu kuyii enka tsa nchiko ñaꞌan xi ia, tsa saa diꞌna nuu yavi, xíni tsa san xininchisa tsa sa nandoto Jesús. 9 Kuan vita kukuituni ka xanaa tsa sa yodotuni s-toꞌon Ndios sa kachi sa nandeꞌe sa nandoto Jesús. 10 San danduu nduu tsa yaꞌa naxikokagua tsa kunuꞌu tsa sa io ndidaa ka tsa nchiko ñaꞌan xi ia.
Jesús nanuu ia jnu María Magdalena
11 San María Magdalena kendoo ña jnu yavi ndaꞌyu ña. San neni ndaꞌyu ña, nantsaꞌa ña xiti yavi, 12 san xini ña ubi ángel sa niꞌno doꞌno kuixi kachi san intsaku nduu, san en intsaku ami katúu d̶iki ia san enka intsaku ami katúu saꞌa ia. 13 San sadaa xan:
—Dini ñadeꞌe naku ndaꞌyu ni?
san sadaa ña:
—Kuan neꞌe ña xikikoño s-Toꞌo da san ti xini da ami sákituu ña.
14 San tuꞌu kaꞌan ña toꞌon yaꞌa san na ntsaꞌa ña san xini ña Jesús in ia; doko ti nakini ñaꞌan ña sa Jesús kuu ia. 15 San sadaa ia:
—Yoꞌo nudeꞌe naku ndaꞌyu yo? Andu nanduku yo?
San sani-ini ña sa tsa ntsaa laguerta kuan kuu, san sadaa ña:
—Toꞌo, tu dini neꞌe yikikoño kuan kuaꞌan san kachitoꞌon ni ami kuu sa sakituu ñaꞌan ni san na kuneꞌe da nuꞌun.
16 Jesús sadaa ia:
—María, nantsaꞌa ña san sadaa ña, xiꞌin daꞌan hebreu:
—Ma teen ñaꞌan yo kuntsu, kuan vita nuꞌu ka ntsu sa io ku Tata ntsu; doko kuaꞌan sa io ndidaa ku kiani ntsu, san kadaa: Ntsuꞌu nuꞌun ntsu sa io ku Tata ntsu ia kuu s-Tata yo ndidaa yo tuku, ku Ndios ntsu ia kuu Ndios yo ndidaa yo tuku.
18 Danduu María núꞌun ña sa kádaa ña toꞌon guaꞌa yaꞌa xi ndidaa tsa nchiko ñaꞌan xi ia: ¡Xini da ku Toꞌo ndo! san sadaa ña ndidaa toꞌon sadaa Jesús.
Jesús nanuu ia jnu ndidaa tsa nchiko ñaꞌan xi ia
19 San dii ni kii yukua doko sa kunaa, diꞌnanuu kii semana nataka ndidaa tsa nchiko ñaꞌan xi ia san nakadi tsa ndieꞌe, kuan yuꞌu tsa ndidaa judiu tastuni, Jesús kuyii ia san kaꞌan ia s-tsa ndidaa tsa san sadaa ia:
—¡Kaꞌan ntsu xo ndidaa yo!
20 Tuꞌu sadaa ia toꞌon yaꞌa, san dadana ñaꞌan ia ndaꞌa ia xiꞌin xikinaꞌa ia. Ndidaa tsa nchiko ñaꞌan xi ia ku-iꞌni ntseꞌe tsa sa xíni tsa Jesús. 21 Danduu sadaa nituku Jesús:
—¡Kaꞌan ntsu yo ndidaa yo! Kuenta tsandaꞌa ñaꞌan ku Tata ntsu kuntsu duꞌua tsandaꞌa ñaꞌan ntsu yo ndidaa yo sa kaꞌan yo ku toꞌon ntsu.
22 San tuꞌu kaꞌan ia toꞌon yaꞌa san tívintsaa ñaꞌan ia s-tsa ndidaa tsa san sadaa ia:
—Teen Espíritu Santu ya. 23 Nu nakoo yo sakaꞌnu-ini sa saꞌa x-kuachi xi san koo sa kaꞌnu-ini nu sa saꞌa x-kuachi nu; san nu ma koo yo sa kaꞌnu-ini sa saꞌa x-kuachi xi san ma niꞌi nu sa kaꞌnu-ini. a
Tomás xini tsa ia nandoto
24 Doko Tomás, tsa kaꞌan tsa tineꞌe xi, en tsa kuu ndi uxi-uu tsa nchiko ñaꞌan xi ia, ti io tsa juan kuenta kíxi Jesús. 25 San ndidaa ka tsa nchiko ñaꞌan xi ia sadaa tsa:
—¡Xíni ntsu ku Toꞌo ndo!
Doko tsa yaꞌa sadaa tsa:
—Tu ma kini ntsu sa takueꞌe kída clavu san ma chiꞌi ntsu ku dikindaꞌa ntsu sa takueꞌe xiꞌin tu ma kitu ntsu xikinaꞌa tsa, san ma kininchisa ntsu.
26 Yaꞌia una kii san nataka ni tuku ndidaa tsa nchiko ñaꞌan xi ia xiti veꞌe, san Tomás io tsa juan xiꞌin tsa ndidaa tsa. San ntsadi kutu ndieꞌe, san Jesús kuyii ia san kukuin ia dagua dagua san sadaa ia:
—¡Kaꞌan ntsu yo ndidaa yo!
27 San sadaa ia xi Tomás:
—Taxi dikindaꞌa yo xan jaꞌa san ntsaꞌa ku ndaꞌa ntsu ya; taxi ndaꞌa yo xan jaꞌa san kitu ku kikinaꞌa ntsu ya; san ma ku kuu yo en ñayii ti xininchisa ku kuu en ñayii xininchisa ñaꞌan ku ntsu.
28 Dandu Tomás kaꞌan tsa san sadaa tsa:
—¡Di ni kuu S-toꞌo da, Di ni kuu Ndios da!
29 San sadaa Jesús:
—Tomas sa xíni ñaꞌan yo kuntsu juandiku xininchisa yo ña? ¡Na ku-iꞌni nu ti xini ñaꞌan san xininchisa ñaꞌan nu kuntsu!
Naku todotuni tutu yaꞌa