Nandoto Jesús
16
San yaꞌia sábado, san María Magdalena, María jnana Jacobo xiꞌin Salomé seen ña ndutsatami sa chido ñaꞌan ña xi ia. 2 San datsa ntseꞌe, diꞌna nuu kii semana, yeꞌe ndaa saꞌan ña yavi, 3 san ndatoꞌon ña ndi uni ña ichi kuaꞌan:—Andu dakanda yuu sa yii ndo yavi kuaan.
4 Doko kuenta saa ña jukua, xíni ña sa yuu kaꞌnu kuan xíkasata. 5 San kuyii ña ndi uni ña xiti yavi, san xini ña en nu kuachi intsaku nu ichi ladu kuaꞌa, san niꞌno nu en doꞌno kani san kuixi kachi, san yuꞌu ña ndidaa ña. 6 Doko sadaa:
—Ma yuꞌu yo. Nanduku yo Jesús Nazaret ia satakaa tsa cruz kuan ña? Nandoto ia. Ayoo ia jaꞌa. Ntsaꞌa sa kátuu ia. 7 Doko kunuꞌu san kadaa xi Pedru, xiꞌin ndidaa ka tsa inchiko ñaꞌan xi ia sa ndodonuu ia kuaꞌan Galilea. San juan naniꞌi taꞌan nu xiꞌin ia kuenta sadaa ia.
8 Danduu kee ña ndidaa ña xiti yavi san oni kidi ñaꞌan xan san yuꞌu ntseꞌe ña. San ti en kaꞌan xiꞌin ña ichi, kuan yuꞌu ntseꞌe ña ndi uni ña.
Jesús nanuu ia jnu María Magdalena
9 Kuenta nandoto Jesús, san datsa ñuꞌu ntseꞌe diꞌnanuu kii semana nanuu ia jnu María Magdalena, ña kineꞌen ia usa tachi kuiꞌia xi. 10 San ña yaꞌa saꞌan ña san sadaa ña xi ndidaa tsa xu ndinoo xiꞌin Jesús, ndidaa tsa yaꞌa ndaꞌvi ntseꞌe io xanaa tsa san ndaꞌyu tsa ndidaa tsa. 11 Doko kuenta tsaku s-tsa sa nchito ia xiꞌin sa xíni ñaꞌan ña xi ia, san ti xíninchisa ñaꞌan tsa xan.
Jesús nanuu ia jnu ubi tsa nchiko ñaꞌan xi ia
12 San danduu nanuu ia xi ubi tsa yaꞌa neni xika tsa kuaꞌan ichi yuku. 13 San tsa yaꞌa nduu tsa sadaa tsa xi ndidaa ka tsa yukua, doko nisa duꞌua ti xíninchisa ñaꞌan tsa ndidaa tsa.
Sa xika ia xi ndidaa tsa tsandaꞌa ia
14 Danduu nanuu ia xi ndi uxi en tsa inchiko ñaꞌan xi ia neni intsaku tsa saj s-tsa, san kantseꞌe ia s-tsa kuan ti xininchisa tsa xiꞌin sa ntseꞌeda ntsee xanaa tsa, kuan ti xíninchisa ñaꞌan tsa xi ndidaa tsa xíni sa nandoto ia. 15 San sadaa ia:
—Kuaꞌan nee ñuyii san kaꞌan toꞌon guaꞌa sa kaꞌan sa kuu ntsu xi ndidaa ñayii. 16 Nu na kininchisa san na kuendutsa, niꞌi nu vida ma ndeꞌe; doko nu ti xininchisa san koo ni x-kuachi nu sa ma en koo sa kaꞌnu-ini sa saꞌa nu. 17 San nu xininchisa ku toꞌon guaꞌa ntsu niꞌi nu sa kada nu señal kuan xiꞌin sa nani ntsu kuiko nu tachikuiꞌia, kaꞌan nu enka daꞌan ti dakuaꞌa nu, 18 san tu na teen nu koo, na koꞌo nu venenu atuu dana sa taꞌan nu. San sata ñayii kuꞌu xi kakindodo nu ndaꞌa nu, san nduguaꞌa ñayii.
Jesús kundaa ia andivi
19 Kuenta tuꞌu kaꞌan ia xi ndidaa tsa nchiko ñaꞌan xi ia, san Jesús kundaa ia andivi san kukoo ia ichi j-ladu kuaꞌa Ndios. 20 San ndidaa tsa yaꞌa kee tsa sa kaꞌan tsa s-toꞌon Ndios ndidaa xichi, san xu chintsee ñaꞌan Ndios s-tsa, san xu kada ia kuaꞌa ntseꞌe sa naꞌnu, ndasa na kini sa ndidaa toꞌon kaꞌan ndidaa tsa yaꞌa kuu sa ndaa.