Duꞌua taꞌan kuenta nandoto Jesús
24
Diꞌna nuu kii semana datsañuꞌu ntseꞌe kuaꞌan ndidaa ñadeꞌe yukua xiꞌin uu ka ñadeꞌe yavi kuan kuneꞌe ña ndidaa sa tami kídaguaꞌa ña. 2 San kuenta saa ña ndidaa ña yuu ntsadi yavi kuan díta ñaꞌan xi; 3 san kuyii ña ndidaa ña, doko ti naniꞌi ña xikikoño Jesús. 4 San neni sani-ini ña ndidaa ña nasa kuu sa taꞌan, kikii ni xíni ña ubi tsayee sa io ña san oni sandutsa d̶oꞌno tsa yaꞌa nduu tsa. 5 San yuꞌu ntseꞌe ña san sakuinxiti ña doko tsa yaꞌa sadaa tsa:—Naku nanduku yo sa io ndidaa ndii ya tsa nchito? 6 Ayoo tsa jaꞌa, nandoto tsa nakaꞌan ndidaa yo sa kachi ia kuenta io daa ia Galilea, 7 sa kachi ia: Nandeꞌe sa duꞌua taꞌan ia nduu ñayii ñuyii yaꞌa, kuan nayii nu ndaꞌa ñayii io x-kuachi xi san katakaa ñaꞌan jnu en cruz doko nduu uni kii nandoto nu.
8 Danduu nakaꞌan ña sa kachi Jesús. 9 San kunuꞌu ña san sadaa ña xi ndi uxi en tsa i-nchiko ñaꞌan xi ia xiꞌin ndidaa ka ñayii xu kunchiko ñaꞌan xi ia. 10 Ndidaa ña saneꞌe toꞌon yaꞌa xi ndidaa tsa i-nchiko ñaꞌan xi ia kuu, María Magdalena, Juana, María j-nana Jacobo xiꞌin ndidaa ka ñadeꞌe ntsaka taꞌan xiꞌin ña 11 San sáni-ini tsa ndidaa tsa sa ndukueꞌe ña san ti xíninchisa ñaꞌan tsa ndidaa tsa xan.
12 Doko Pedru ndukuin tsa sa xino ntseꞌe tsa saꞌan sa koto tsa yavi. Kuenta saa tsa, ntsaꞌa tsa xiti xi, san xíni tsa titsaa iduku ia san naxikokagua tsa sa kunuꞌu tsa xeꞌe tsa, san sani-ini ntseꞌe tsa nasa kuu sa taꞌan.
Duꞌua taꞌan ichi kuaꞌan ñuu nani Emaús
13 San dini kii yukua ubi tsa í-nchiko ñaꞌan xi ia kuaꞌan tsa ndu tsa en ñuu nani Emaús, sa io uxi en kilometru sa io ñuu Jerusalén. 14 San ndaa tsa toꞌon nduu tsa ndidaa sa taꞌan. 15 San neni ndatoꞌon tsa nduu tsa, san naniꞌi ñaꞌan Jesús san kuaꞌan dágua ia xiꞌin tsa yaꞌa nduu tsa. 16 Doko kuani daa ntsaꞌa ñaꞌan tsa san ti nakini ñaꞌan tsa kuan ti kida sa nakini ñaꞌan tsa juandiku ti nakini ñaꞌan tsa xi Jesús. 17 San Jesús ndukutoꞌon ia:
—Nasa kuu sa ndatoꞌon toꞌon yo nduu yo neni xika yo xan? San kukuin tsa yaꞌa san ndaꞌvi ntseꞌe io xanaa tsa nduu tsa.
18 San sadaa en tsa nani Cleofas:
—Meni ka dini kuu tsa io Jerusalén ti xini ni sa taꞌan ndidaa kii yaꞌa?
19 San ndukutoꞌon ia:
—Nasa taꞌan?
San tsa yaꞌa sadaa tsa:
—Sa taꞌan Jesús Nazaret, Jesús kúu en profeta, kuaꞌa ntseꞌe sa guaꞌa xu kada ia xiꞌin guaꞌa ntseꞌe s-toꞌon ia jnu Ndios xiꞌin ndidaa ñuu; 20 nachiꞌi ñaꞌan tsa xi Jesús ya ndaꞌa ndidaa dutu kuu jnu xi xiꞌin ndidaa tonisaꞌnu san dakuidokuachi ñaꞌan tsa san na katakaa ñaꞌan s-tsa en cruz san sáꞌni ñaꞌan tsa. 21 San dan ndidaa da ntsatu da, sa ia yaꞌa ku ia kineꞌen ñaꞌan xi ñuu Israel ya ndaꞌa ndidaa romanu, doko sa ku uni kii xíꞌi ia. 22 San ntseꞌe sani-ini da kída uu ñadeꞌe io sa io da, kuan datsa ntseꞌe sa koto ña yavi kuan. 23 San ti nániꞌi ña yikikoño, san naxikokagua ña veꞌe nataka da ndidaa da, san nakani ña sa xíni ña ubi ángel, san sadaa xan sa Jesús nchito ia. 24 San uu tsa io sa io da saꞌan tsa yavi kuan san ti naniꞌi tsa yikikoño, duꞌua kuenta sani toꞌon ndidaa ñadeꞌe kuan.
25 Danduu Jesús sadaa ia:
—¡Naku ti sani-ini yo naku ntseꞌe da kuee tediki yo ndidaa sa kachi ndidaa x-profeta Ndios! 26 Ama adi nandeꞌe sa taꞌan ntseꞌe Cristu kuaan ña, san danduu kiꞌin tsa sa kadakaꞌnu ñaꞌan s-tsa ña?
27 San danduu sadaa ia ndidaa sa yodotuni sa kaꞌan nasa ku kuu ia, ntsaa ley xiꞌin ndidaa ka sa tsaa ndidaa x-profeta Ndios.
28 San kuyachi tsa ñuu kuaꞌan tsa, san Jesús kída ia sa kuaꞌan xika ia. 29 Doko tsa yaꞌa sakondaꞌvi tsa san sadaa tsa:
—Na kendoo ndo, kuan sa ñíni, san sa io sa daꞌvi ora. San kuyii ia veꞌe san kendoo ia xiꞌin tsa yaꞌa nduu tsa. 30 San kuenta intsaku tsa, teen ia ita-stila san sañaꞌan ia taxaꞌvi xi Ndios san taꞌvi dagua ia san sañaꞌan ia s-tsa yaꞌa. 31 San danduu nakaan nduchinuu tsa yaꞌa nduu tsa san nakini ñaꞌan tsa doko nduñuꞌu Jesús san ti xini ñaꞌan ka tsa xi ia. 32 San kachi tsa nduu tsa:
—Juandiku ntseꞌe da ku iꞌni ku kuanaa ndo sa nakani tsa san yodotuni s-tutu ii Ndios kuenta niꞌno ichi ndo xiꞌin tsa vaxi.
33 San ti intsatu ka tsa naxikokagua ni tsa kunuꞌu tsa nduu tsa Jerusalén san naniꞌi tsa ndi uxi en tsa i-nchiko ñaꞌan xi ia xiꞌin kuaꞌa ka ñayii io jukua, 34 san duꞌua sadaa tsa xi nduu tsa yaꞌa:
—¡Sa ndaa kuu nchisa ku Toꞌo ndo nandoto ia kuan nanuu ia jnu Simón ya!
35 San danduu tsa yaꞌa nduu tsa nákani tsa sa taꞌan ichi kuaꞌan tsa xiꞌin sa nakini ñaꞌan tsa kuenta táꞌvi Jesús ita-stila.
Jesús nanuu ia sa io ndidaa tsa nchiko ñaꞌan xi ia
36 San neni nakani tsa yaꞌa sa taꞌan, Jesús nanuu ia dagua dagua san sadaa ia:
—Kada kaꞌnu xanaa yo ndidaa yo.
—Naku yuꞌu yo ndidaa yo? Naku sani-ini yo sa adi mee ntsu ku? 39 Ntsaꞌa ku ndaꞌa ntsu ya xiꞌin ku saꞌa ntsu ya. Ntsuꞌu kuntsu kitu ñaꞌan kuntsu sa kini yo kuan en tachi ti io xikikoño xi kuenta ntsuꞌu.
40 San sadaa ia jaꞌa, san dadana ñaꞌan ia ndaꞌa ia xiꞌin saꞌa ia. 41 San ndidaa tsa nchiko ñaꞌan xi ia ku-iꞌni ntseꞌe tsa san ti xininchisa tsa, san Jesús ndukutoꞌon ia:
—Io sa kaj ndo jaꞌa ña?
42 San sañaꞌan tsa en taꞌa chaka chiꞌio xi ia. 43 San saxi ia kitiaꞌa jnu ndidaa tsa yaꞌa. 44 Danduu sadaa ia:
—Sa táꞌan ntsu ya ku sa xu kaꞌan ntsu yo sa xinotaꞌan san yodotuni ndidaa ley xiꞌin ndidaa sa chidotuni ndidaa x-profeta Ndios xiꞌin ndidaa Salmo.
45 San danduu kída ia sa na kukuituni xanaa tsa yaꞌa ndidaa tsa sa yodotuni s-tutu ii Ndios, 46 san sadaa ia:
—Yodotuni sa Cristu kuu tsa doko nduu uni kii nandoto tsa; 47 san ntsa vita na kaꞌan xi ndidaa ñuu io ñuyii san na kesaꞌa ntsaa Jerusalén san na nata-uꞌu ñayii xiꞌin na naxiko kagua ñayii jnu Ndios kuan nakoo sakaꞌnu-ini sa saꞌa x-kuachi ñayii. 48 San yoꞌo ndidaa yo kuu sa kaꞌán ndaa ndidaa sa xíni yo. 49 San ntsuꞌu tsandaꞌa ntsu sa kachi ku Tata ntsu sa taxi ia doko kendoo Jerusalén ya ntsaa na niꞌi yo sa tastuni kixi andivi.
Jesús ndaa ia andivi
50 San ntsaka ñaꞌan tsa ntsaa ñuu nani Betania, san ndaneꞌe ia ndaꞌa ia san kída ii ñaꞌan ia xi ndidaa tsa yaꞌa. 51 San neni kida ii ñaꞌan ia san kée ia jnu ndidaa tsa yaꞌa san kundaa ia andivi. 52 San ndidaa tsa yaꞌa tuꞌu chiñuꞌu ñaꞌan tsa san kunuꞌu tsa Jerusalén ku-iꞌni ntseꞌe tsa; 53 san xu koo tsa nduu ni nduu ni templu xu kadakaꞌnu tsa Ndios.