19
Danduu teen ñaꞌan Pilatu xi Jesús san táꞌvichiion tsa sa na kaniaꞌa xi ia. 2 Ndidaa soldadu kídaguaꞌa tsa en yetu iñu san choꞌon tsa d̶iki Jesús. San chodaꞌa ñaꞌan tsa en titsaa kuu púrpura, 3 san sákuntsaa ñaꞌan tsa ndidaa tsa san sadaa tsa:—¡Na kukaꞌnu j-rey ndidaa ñayii Israel ya!
San kátu tsa jnuu ia.
4 Pilatu kée tsa enka guelta san sadaa tsa:
—Ntsaꞌa ka, kíneꞌe ntsu nu kuan ndasa na kini yo ndidaa yo, sa nisa en kuachi ti nániꞌi ntsu jnu.
5 Danduu kee Jesús xiꞌin yetu iñu ñoꞌon d̶iki ia xiꞌin ñodaꞌa ia titsaa kuu púrpura. San Pilatu sadaa tsa:
—¡Adi nu yaꞌa!
6 Xíni ñaꞌan ndidaa dutu ku jnuu xi xiꞌin ndidaa tsa ntsaa templu, san kána tsa san sadaa tsa:
—¡Katakaa ñaꞌan ni jnu, katakaa ñaꞌan ni jnu!
San sadaa Pilatu:
—Teen ñaꞌan mee yo jnu ndidaa yo, san katakaa ñaꞌan, kuan ntsuꞌu ti nániꞌi ntsu nisa en kuachi jnu.
7 San ndidaa judiu sadaa tsa:
—Dan ndidaa da io en j-ley da, san jukua kachi sa nuyaꞌa nandeꞌe sa kuu nu, kuan kachi nu sa kuu nu D̶aꞌa Ndios.
8 San tsáku xi Pilatu kuan toꞌon yaꞌa, san yuꞌu ntseꞌe ka tsa. 9 Sanayii nituku tsa palaciu san sadaa tsa xi Jesús:
—Ami kuu xuun yo?
san Jesús ti kaꞌan ia.
10 Dandu sadaa Pilatu:
—Naku ti kaꞌan yo ku ntsu? Ama ti xini yo sa ntsuꞌu tastuni san guaꞌa ni dayaa ñaꞌan ntsu xo xiꞌin guaꞌa ni katakaa ñaꞌan ntsu xo ña?
11 Sadaa Jesús:
—Atuu sa tastuni ni sa kada ni sa nchoj ni da tu ma taꞌvichiion ntsa nino yukua. Juandiku nu nachiꞌi ñaꞌan da ndaꞌa ni kaꞌnu ntseꞌe ka kuachi io nu.
12 San ntsa ora yukua nchu dayaa ñaꞌan Pilatu xi Jesús. Doko ndidaa judiu kána tsa san kachi tsa:
—Tu na dayaa ni nu xan san ti kuu ni tsa mani xiꞌin Cesar tsa tastuni ntseꞌe ka. Kuan ndidaa nu nchu ku kuu rey san ti xiniguaꞌa taꞌan nu xiꞌin Cesar.
13 San tsaku xi Pilatu ndidaa toꞌon yaꞌa, san ntsaka tsa Jesús ndikeꞌe san ku koo tsa sa sakuntsaku tsa sa saꞌntsa tsa kuachi sa daꞌan hebreu nani Gabata sa nchu kachi piso sa kuguaꞌa xiꞌin yuu. 14 Kuu kii kidaguaꞌa ñayii sa kadakaꞌnu viko pascua, kuenta dagua kii. Pilatu sadaa tsa xi ndidaa ñayii Israel:
—Adi j-rey yo ndidaa yo yaꞌa.
15 Doko ndidaa tsa yaꞌa kána tsa san kachi tsa: Na kuu nu, Na kuu nu. ¡Katakaa ni nu, Pilatu sadaa tsa:
—Katakaa ntsu j-rey yo ndidaa yo ya ña? San sadaa ndidaa dutu ku jnuu xi:
—Ti io enka j-rey da ndidaa da, meni César.
16 Nakua ñaꞌan Pilatu Jesús sa na katakaa ñaꞌan tsa ndidaa tsa san nakuaka ñaꞌan ndidaa soldadu san ntsaka ñaꞌan tsa kuaꞌan.
Satakaa ñaꞌan tsa ndidaa tsa xi Jesús
17 San kée ia nchido ia x-cruz ia san kuaꞌan ia en luguar nani yiki d̶iki ndii, san daꞌan hebreu nani Gólgota. 18 San juan satakaa ñaꞌan tsa, xiꞌin ubi ka tsayee satakaa tsa, en tsa ndiden din ia, san Jesús nchita kaa ia dagua dagua. 19 Pilatu chidotuni tsa en tabla san táꞌvichiion tsa sa na chintsaku d̶iki cruz: “Jesús j-Rey ndidaa judiu.” 20 Kuaꞌa ntseꞌe judiu káꞌvi sa yodotuni tabla kuan, kuan luguar satakaa tsa Jesús io yachi jnu ñuu, san tabla kuan todotuni uni daꞌan, hebreu, latin xiꞌin griegu. 21 Ndidaa tsa ku dutu jnuu xi sadaa tsa xi Pilatu:
—Ma chidotuni ni: J-Rey ndidaa judiu, chidotuni ni sa kachi nu: Ntsuꞌu kuu j-rey ndidaa judiu.
22 Pilatu sadaa tsa:
—Sa chidotuni ntsu, sa yodotuni.
23 Kuenta satakaa tsa Jesús, san kineꞌen tsa d̶oꞌno ia san teen tsa san diti tsa kumi pedasu, en en xi ndiden soldadu. San teen tsa d̶oo ia, doko doo ti kikuntsaa taꞌan; kuan eni kiku nee. 24 Juandiku ndátoꞌon ndidaa soldadu:
—Ma ndata ndo, guaꞌa ka na choꞌon ndo suerte andu na niꞌi.
Jaꞌa táꞌan ndasa na xinotaꞌan sa yodo s-toꞌon Ndios sa kachi: Nakaꞌntsa nu ndidaa nu ku doo ntsu san sata ku doꞌno ntsu chóꞌon nu suerte.a San duꞌua kída ndidaa soldadu.
25 Saꞌa cruz in j-nana ia xiꞌin x-kuꞌu ña, María d̶eꞌe Cleofas xiꞌin María Magdalena. 26 San kuenta xíni Jesús j-nana ia xiꞌin tsa xu kunchiko ñaꞌan xi ia tsa kida-ini ntseꞌe ia, in tsa sa io ña, san sadaa ia xi j-nana ia:
—Dini ñadeꞌe, adi d̶aꞌa ni xan.
27 Danduu sadaa ia xi tsa nchiko ñaꞌan xi ia:
—Adi j-nana yo xan.
San ntsa kii yukua ntsaka ñaꞌan tsa yukua xan kunuꞌu xeꞌe tsa.
Xiꞌi Jesús
28 Tuꞌu ndidaa jaꞌa san Jesús xini ia sa ndidaa chiion taꞌvi sa kada ia xíno, ndasa na xinotaꞌan sa yodotuni s-tutu ii Ndios, kachi ia:
—Yichi ntsu ndutsa.
29 San jukua io en tindoꞌo ñoꞌon vinagre. Chotoo tsa en esponja san saki ntsaa tsa xuꞌu ia. 30 San tiꞌvi Jesús vinagre, san kachi ia:
—Sa xinotaꞌan ndidaa!
san kotaj d̶iki ia san xíꞌi ia.
En soldadu kaan xikinaꞌa Jesús xiꞌin en lanza
31 En kii antika sa ku kuu kii pascua san ndidaa judiu ti nchoj s-tsa sa na ku nchitakaa yikikoño cruz sábado,b kuan kii yukua kuu en kii ii ntseꞌe, juandiku xíka tsa xi Pilatu sa na kaꞌnu tsa saꞌa ndidaa tsa nchita kaa cruz ndasa na kuu kama tsa kuan na noneꞌe ni tsa yikikoño kuan cruz. 32 Danduu saꞌan soldadu san saꞌnu tsa saꞌa tsa diꞌna nuu nchitakaa cruz, san duꞌua ni kída tsa xi enka tsa nchitakaa kuan. 33 Doko saa tsa sa io Jesús, san xíni tsa sa sa xiꞌi ia, san ti saꞌnu tsa saꞌa ia.
34 Doko en soldadu káan tsa xiki naꞌa ia xiꞌin en lanza, san kée ndutsa xiꞌin niñi. 35 Tsa xíni xiꞌin nduchinuu xi kuu tsa kaꞌan ndidaa jaꞌa, san ndidaa sa kaꞌan ya kuu sa ndaa. San sa ndakuiti kuu jaꞌa, kuan ndasa yoꞌo ndidaa yo na kininchisa yo tuku. 36 Kuan ndidaa jaꞌa táꞌan ndasa na xinotaꞌan sa yodotuni s-toꞌon Ndios sa kachi: “Nisa en xiki nu ma taꞌnu.”c 37 San kachi s-toꞌon Ndios tuku: “Na ntsaꞌa ñaꞌan jnu káan xiki naꞌa xi.”d
Chiduj tsa Jesús
38 San tuꞌu taꞌan ndidaa jaꞌa, José tsa io ñuu nani Arimatea, tsa kuu en tsa xininchisa ñaꞌan xi Jesús, tsa yaꞌa xu kunchiko yuꞌu tsa ia kuan xu yuꞌu tsa ndidaa judiu, xíka tsa xi Pilatu sa na nakeꞌen tsa xikikoño Jesús. San Pilatu semani tsa. Juandiku José nakeꞌen tsa yikikoño. 39 Xiꞌin Nicodemu, tsa kuu tsa saꞌan yuꞌu sa ntsaꞌa ñaꞌan xi Jesús en niñu,e kuaꞌan tsa san neꞌe tsa ndaa oko uxi kilo sa saꞌan tami, dakaa taꞌan mirra xiꞌin yavi ndiꞌvi. 40 Téen tsa nduu tsa xikikoño Jesús san naduku tsa xiꞌin en titsaa xiꞌin ndidaa sa tami, kuan duꞌua sechiion ndidaa judiu sa kada tsa xi ndii antika sa kuntsaka ñaꞌan tsa yavi. 41 San luguar satakaa tsa ndidaa tsa ia io yachi en laguerta, san laguerta yukua io en yavi saa, en yavi sa nisa en ndii vitayii ka. 42 San yavi yukua sakituu tsa xikikoño Jesús, kuan yavi yukua io yachi, san sa io sa kuu sábado.