Duꞌua kída sa kixi Espíritu Santu
2
Kuenta taꞌan kii Pentecostés,a nátaka tsa ndidaa tsa endini xichi. 2 San oni neꞌe vaxi en tachi kaꞌnu ntsaa andivi kuan, san oni ntsayu veꞌe xuku tsa ndidaa tsa; 3 danduu nanuu naa xama ñuꞌu lin, san ndiden ndiden sa kandodo d̶iki tsa ndidaa tsa. 4 San ndidaa tsa chítu Espíritu Santu, san kesaꞌa tsa kaꞌan tsa deen deen daꞌan, kuenta guaꞌa sáñaꞌan Espíritu sa kaꞌan tsa.5 Tiempu yukua Jerusalén io judiu, ñayii guaꞌa, ñayii kée ndidaa ndaꞌa ñuu io ñuyii. 6 San kii táꞌan jaꞌa san ndidaa ñayii nataka sa kunini, san oni sanaa tsa ndidaa tsa, kuan ndiden ndiden tsáku s-tsa daꞌan kaꞌan tsa. 7 San dayuꞌu ñaꞌan s-tsa, kuan ti oon tsaku s-tsa jaꞌa, san kachi tsa ndidaa tsa:
—Ntsaꞌa ni ndidaa ni ka, ndidaa tsa kaꞌan ku daꞌan ndo ya Adii kuu galileu kuu tsa ña? 8 Na modo kida tsa sa kaꞌan tsa daꞌan yaꞌa tu galileu kuu tsa. 9 Kuan sa xuku ndo ya io ñayii kée Partia, ñayii kée Media, ñayii kée Elam, ñayii kée Mesopotamia, ñayii kée Judea, ñayii kée Capadocia, ñayii kée Ponto, xiꞌin ñayii kée Asia, 10 ñayii kée Frigia, ñayii kée Panfilia, ñayii kée Egipto, ñayii kée Cirene ñuu io xiti Libia; ñayii io Roma io jaꞌa tuku, ñayii kuu raza Israel xiꞌin ñayii ti kuu raza Israel doko xininchisa sa xininchisa ñayii Israel; 11 ñayii io Creta xiꞌin ñayii io Arabia, tsaku kundo sa kaꞌan tsa ku daꞌan ndo ndidaa sa naꞌnu kída Ndios Duꞌua kachi tsa ndidaa tsa.
12 Ndidaa tsa yúꞌu san oni sanaa tsa ndidaa tsa, san ndatoꞌon tsa ndidaa tsa:
—Nasa nchukachi jaꞌa?
13 Doko dagua tsa sakuntsaa ñaꞌan tsa san kachi tsa:
—Xini tsa xan ndidaa tsa.
Pedru kaꞌan tsa xi ndidaa ñayii
14 Ndukuin Pedru xiꞌin ndi uxi en tsa ntsaka taꞌan xiꞌin tsa, san níꞌi ntseꞌe kaꞌan tsa san sadaa tsa:
—Ndidaa ñayii io Judea xiꞌin ndidaa ñayii io Jerusalén, kunini guaꞌa ni ndidaa ni na kaꞌan da ni. 15 Kuan kuadi xini ndidaa tsa yaꞌa kuenta sani-ini ni ndidaa ni, kuan dika ka éen datsa kuu. 16 Doko jaꞌa kuu sa taꞌan sa chídotuni Joel tsa kúu x-profeta Ndios:
17 Kii kixi duꞌua taꞌan kachi ia,
niꞌi ndidaa ñayii ku Espíritu Santu ntsu.
Ndidaa d̶aꞌa yee yo xiꞌin d̶aꞌa deꞌe yo kaꞌan nu ku toꞌon ntsu;
San ndidaa nu kuachi ya tuku tuku sa kini nu kada ntsu,
san ndidaa tsa savaꞌa sani tsa sa taꞌan;
18 Kachi ndaa ntsu, san ndidaa nu xinokuachi ku ntsu niꞌi nu ku Espíritu Santu ntsu nu yee xiꞌin nudeꞌe,
san kaꞌan nu ku toꞌon ntsu.
19 San kuaꞌa ntseꞌe sa naꞌnu kada ntsu andivi
san nuꞌu ya koo niñi,
ñuꞌu, yoko xiꞌin ñuꞌma;
20 San ora ya kuu naa,
san yoo ya nduu kuaꞌa niñi nika,
antika sa ndij ntsu ntsuꞌu tsa Toꞌo,
kii kaꞌnu, kii kini ndidaa ñayii sa tastuni ntsu.
21 Doko ndidaa ñayii na kininchisa sa nani ia kuu ku Toꞌo ndo nanitaꞌvi, duꞌua kachi Joel x-profeta Ndios.b
22 Xaguatata Israel, kunini ni toꞌon yaꞌa: Jesús nazarenu, ia kúu tsayee tsandaꞌa Ndios sa koo sa io ndo, kída ia kuaꞌa ntseꞌe milagru sa meni Ndios kuu kida, kuenta xíni mee ni ndidaa ni. 23 Ndios sa duꞌua sani-ini ia, sa na nachiꞌi ñaꞌan xi Jesús ndaꞌa ni ndidaa ni. San dini ndidaa ni nachiꞌi ni ia ndaꞌa ndidaa ñayii kuiꞌia ti seniꞌno ñaꞌan ndasa na katakaa ñaꞌan tsa cruz;c 24 San Ndios ndaneꞌe ñaꞌan ia xi Jesús, san nandoto iad kuan ti kachi kada muerte sa kendoo ia sa io. 25 David káꞌan tsa sa ku kuu Jesús san kachi tsa:
Ndidaa kii xu kini da S-toꞌo da jnu da,
san ma yuꞌu da kuan in ia j-ladu kuaꞌa da.
26 Juandiku ku-iꞌni ntseꞌe da, san xita da xiꞌin ku-iꞌni ntseꞌe da,
san kukaꞌnu xanaa da.
27 Kuan ma dandoo ni x-alma da sa io ndidaa ndii,
san nisa ma kuemani ni sa tsaꞌyu xikikoño ia kuu ia ii.
28 Dádana ñaꞌan ni ichi niꞌi da ñuyii;
san ku-iꞌni ntseꞌe da kuan io ni xiꞌin da.e
29 Xanii, sa ndakuiti kuu, sa ku tata ndo David xíꞌi tsa san ku yinduj s-tsa, san ntsaa vita io nidaa sa yenduj s-tsa sa io ndo ya. 30 Doko David kúu tsa en x-profeta Ndios san sadaa ia san en xayii David ku kuu rey,f 31 san niꞌi toꞌon David kuaan tuku antika sa taꞌan san kachi tsa sa ti dandoo ñaꞌan xi Jesús ia kuu Cristu xiti sa io ndidaa ndii, san nisa xikikoño ia ti tsaꞌyu. 32 ¡Jesús yaꞌa ndaneꞌe Ndios, san ndidaa jaꞌa xíni da juan kaꞌan ndaa da. 33 San vita, intsaku ia ichi j-ladu kuaꞌa Ndios, san niꞌi ia Espíritu Santu, sa sadaa Ndios sa kuañaꞌan ia, san jaꞌan kuu sa táxi ia d̶a ndidaa da kuenta guaꞌa xíni ni xiꞌin tsaku ni. 34 David ti saa tsa andivi; san duꞌua kachi tsa tuku:
Ku Toꞌo ntsu Ndios sadaa ia xi ku Toꞌo ntsu:
“Kukoo ichi ku ladu kuaꞌa ntsu ya,
35 Ntsa na taxuku ntsu ndidaa nu xini-uꞌu ñaꞌan yo saꞌa yo.”g
36 Ntsaꞌa ni ndidaa ni, jaꞌa kuu sa ndakuiti, ndidaa dini ñayii io Israel, Jesús tsa satakaa ni ndidaa ni, Ndios kida ñaꞌan ia, tsa Toꞌo xiꞌin Cristu xi ia.
37 Danduu tsaku s-tsa ndidaa tsa toꞌon yaꞌa, san nata-uꞌu tsa ndidaa tsa, san sadaa tsa xi Pedru xiꞌin ndidaa ka tsa tsandaꞌa Jesús:
—Xanii, nasa kada da ndidaa da?
38 Pedru sadaa tsa xi ndidaa tsa yaꞌa:
—Nata-uꞌu ni ndidaa ni, san kuendutsa ni xiꞌin sa nani Jesús san duꞌua Ndios koo ia sa kaꞌnu-ini sa saꞌa x-kuachi ni; san niꞌi ni Espíritu Santu. 39 San ndidaa sa kachi da kuu sa kachi Ndios sa taxi ia, san ndidaa jaꞌa kuu xaꞌan ni tuku, sa kuu xaꞌan ndidaa d̶aꞌa ni, xiꞌin ndidaa ñayii io xika, xiꞌin sa kuxi ndidaa ñayii na kana Ndios ia kuu ku Toꞌo ndo.
40 Xiꞌin kuaꞌa ka toꞌon kaꞌan tsa san sadaa tsa:
—Guaꞌa ni xiꞌin ndidaa ñayii kuiꞌia io ndidaa kii yaꞌa.
41 San ndidaa tsa xíninchisa toꞌon séndutsa tsa; san ndaa uni mil ñayii nataꞌan xiꞌin ndidaa tsa nchiko ñaꞌan xi Jesús kii yukua. 42 San xu ndukuntsee tsa sa kada tsa ndidaa sa xu dadana ñaꞌan ndidaa tsa tsandaꞌa Jesús, san xu nataka tsa ndidaa tsa sa kaj s-tsa ita-stila xiꞌin xu kakataꞌvi tsa xi Ndios.
Duꞌua io ndidaa tsa xininchisa ñaꞌan diꞌna nuu xi Jesús
43 Sani-ini ntseꞌe ndidaa ñayii io jukua; kuan xu kini tsa ndidaa milagru xiꞌin señal xu kada ndidaa tsa tsandaꞌa Jesús. 44 San ndidaa tsa xu kininchisa xu nataka tsa ndidaa tsa, san ndidaa sa io s-tsa ndidaa tsa xu ku kuu xaꞌan tsa ndidaa tsa;h 45 san xu diko tsa xuꞌun tsa xiꞌin ndidaa sa xu koo s-tsa san xu nakaꞌntsa tsa ndidaa tsa, ndiden ndiden kuenta guaꞌa xu nandeꞌe s-tsa.i 46 San ti xu dandoo tsa sa nataka tsa templu, san duꞌua ni xu kada tsa veꞌe xiꞌin veꞌe, xu nataka tsa xiꞌin en taꞌa taꞌa sa kaj s-tsa xu kuneꞌe tsa san kadi ni xu kaj s-tsa ndidaa tsa, 47 san xu kadakaꞌnu tsa Ndios, kuan xu kiniguaꞌa ñaꞌan ndidaa ñayii ñuu. San Ndios ndikii xu dakaya ia ñayii nanitaꞌvi.