Duꞌua kída sa nduguaꞌa en tsa yakua
3
Ndidaa kii yukua Pedru xiꞌin Juan kuaꞌan tsa templu ku kakataꞌvi tsa xi Ndios ndaa ka uni sa ñini. 2 San uu tsayee sa ntsaka tsa en tsayee ti kachi kaka ntsa kaku tsa. San nduni nduni xu tantsaku ñaꞌan s-tsa ndieꞌe templu sa nani ndieꞌe vili, sa na kaka tsa tuini xi ndidaa ñayii yii templu. 3 San tsa yaꞌa kuenta xíni tsa Pedru xiꞌin Juan sa sa io sa yii tsa templu, sakondaꞌvi tsa sa nakua ñaꞌan en tuini s-tsa. 4 Danduu Pedru xiꞌin Juan ntsaꞌa ñaꞌan guaꞌa tsa s-tsa san sadaa tsa:—Ntsaꞌa ni ka.
5 San na ntsaꞌa ñaꞌan tsa, kuan sani-ini tsa sa kuañaꞌan tsa en tuini s-tsa. 6 Doko Pedru sadaa tsa:
—Atuu nisa plata san nisa oro da, doko sa io da taj da ni. Jesucristu ia ío Nazaret kida sa na nduguaꞌa ni, ndukuin ni san kaka ni.
7 San teen tsa ndaꞌa tsa yaꞌa ichi ladu kuaꞌa san ndaneꞌe ñaꞌan tsa. San ora yukua ni nduguaꞌa xiꞌin nduntsee saꞌa tsa xiꞌin d̶uku saꞌa tsa, 8 kikii ni ndukuin tsa san kesaꞌa tsa ndinoo tsa. San kuyii tsa ndi uni tsa xiti templu, san xika tsa san sandagua tsa san kidakaꞌnu tsa Ndios.
9 Nee ñuu xíni sa xika tsa xiꞌin sa kidakaꞌnu tsa Ndios. 10 Ndidaa ñayii xu kini sa duꞌua xu kagua tsayee yaꞌa sani-ini tsa ndidaa tsa, kuan xu kini tsa sa tsayee yaꞌa xu kuntsaku tsa kaka tsa tuini ndieꞌe nani sa vili kaa.
Kaꞌan Pedru xi ndidaa ñayii xuku templu
11 Doko tsa nduguaꞌa ti nchu dandoo ka tsa Pedru xiꞌin Juan, san ndidaa ñayii sani-ini san kee kono tsa ndidaa tsa kuaꞌan tsa ndieꞌe nani xaꞌan Salomón. 12 San xíni Pedru kuan jaꞌa san sadaa tsa xi ndidaa ñayii nataka jukua:
—Ndidaa dini ñayii io Israel, naku sani-ini ni ndidaa ni sa duꞌua taꞌan ya? Naku ntsa ñaꞌan ni d̶a nduu da, ma duꞌua kani-ini ni kuan adi sa guaꞌa da nduu da kída sa nduguaꞌa tsa yaꞌa 13 Ndios chiñuꞌu ndidaa ku tadeꞌe ndo Abraham, Isaac xiꞌin Jacob “Ndios ku tadeꞌe ndo” kidakaꞌnu ia Jesús D̶aꞌa ia, ia na kuañaꞌan ni xiꞌin ti taꞌan-ini ni ia jnu Pilatu, kuenta tsa yaꞌa nchu dayaa ñaꞌan tsa xi ia. 14 Doko dini ti taꞌan-ini ni ia xu kaꞌan sa ndaa xiꞌin ia xu kada sa guaꞌa; san xika ni sa na dayaa tsa en tsa saꞌni ndii, 15 san saꞌni ni ia taxi ñuyii, ia yaꞌa ndaneꞌe Ndios. San kaꞌan ndaa da sa xini ndidaa juan. 16 San dini ndidaa ni xiꞌin jnu ni xini ni sa nduguaꞌa tsayee yaꞌa kuan Jesús kida sa nduguaꞌa tsa san adi dan nduu da kida, san taxaꞌvi xi Ndios kuan taxi ia sa xininchisa.
17 Vita vi xanii, xini da sa sa kída ni xi Jesús kída ni kuan ti xini ni andu kuu ia, san duꞌua ni kída ndidaa tsa tastuni ñuu yaꞌa tuku. 18 Doko Ndios daxino ia modo yaꞌa sa kaꞌan ia xi ndidaa x-profeta ia sa na kaꞌan tsa ku ndo, sa x-Cristu ia taꞌan ntseꞌe ia. 19 San vita nata-uꞌu ni sa saꞌa ndidaa x-kuachi ni san kininchisa ni Ndios san Ndios koo ia sakaꞌnu-ini sa saꞌa x-kuachi ni san kukaꞌnu xanaa ni. 20 Kuan na tsandaꞌa ia Jesucristu, ia sa io sa ndikuaka ñaꞌan. 21 Nandeꞌe sa koo Jesucristu andivi ntsaa na ndundaa ndidaa sa io jaꞌa, sa káꞌan Ndios xi ndidaa tsa tsandaꞌa ia kixi naku vita. 22 Kuan kachi Moisés: Tsa Toꞌo, kuu Ndios ni ndidaa ni, kada ia sa ndukoo en tsa kaꞌan s-toꞌon ia duꞌua kuenta dan. San kininchisa ñaꞌan ni s-tsa.a 23 Tu andu ti xininchisa ñaꞌan s-tsa yaꞌa sa kineꞌen ñaꞌan oni oni s-tsa xuun Ndios.b
24 Samuel xiꞌin ndidaa ka tsa kaꞌan s-toꞌon Ndios ío danduu, ndidaa tsa káꞌan sa taꞌan ndidaa kii yaꞌa. 25 Di ni ndidaa ni kuu ni j-niñi ndidaa tsa kaꞌan s-toꞌon Ndios, san dini kuu ndidaa ñayii kachi Ndios sa kaku xi ndidaa s-tadeꞌe ni, san sadaa ia xi Abraham: Ndidaa ñayii nchikovaxi niꞌi bendición sa saꞌa ndidaa d̶aꞌa yo.c 26 Kuenta kída Ndios sa nandoto ia xinokuachi, ia kuu Jesucristu, Ndios tsandaꞌa ñaꞌan ia diꞌna ka sa io ni ndidaa ni, ndasa na taxi ia sa guaꞌa san na dandoo ni ndidaa sa kuiꞌia kida ni.