Pedru xiꞌin Juan ntsaka ñaꞌan s-tsa nduu tsa jnu ndidaa tsa tastuni io ñuu
4
San neni kaꞌan Pedru xiꞌin Juan xi ñayii ñuu, san saa ndidaa dutu xiꞌin tsa tastuni ndidaa tsa ntsaa templu xiꞌin uu saduceu, 2 diko ntseꞌe s-tsa kuan Pedru xiꞌin Juan dadana ñaꞌan tsa sa nandoto Jesús xi ndidaa ñayii ñuu. 3 Téen ñaꞌan tsa san chíntsadi ñaꞌan tsa vekaa, ntsaa ndu enka kii, kuan sa ñíni kii yukua. 4 Doko kuaꞌa tsa tsáku xi toꞌon yaꞌa xíninchisa tsa, san kuu tsa ndaa oꞌon mil tsayee.5 Ndu enka kii, nataka ndidaa tsa tastuni, ndidaa tsa nisaꞌnu xiꞌin ndidaa tsa dadana ñaꞌan ley nataka tsa ndidaa tsa Jerusalén; 6 san dutu kunaꞌnu ku Anás xiꞌin Caifás, Juan xiꞌin Alejandru xiꞌin kuaꞌa ka xayii dutu kunaꞌnu. 7 San danduu sa kuaka ñaꞌan xi nduu tsa xininchisa ñaꞌan xi Jesús san ndukutoꞌon s-tsa nduu tsa:
—Andu taxi sa tastuni yo xiꞌin nasa nani tsa táꞌvichiion sa ndada guaꞌa yo tsa kuꞌu xi?
8 Pedru ñoꞌon tsa Espíritu Santu, san sadaa tsa:
—Tsa tastuni ñuu yaꞌa, ndidaa dini tsa ta nisaꞌnu: 9 Vita nchoj ni sa na naꞌma da kuan nduguaꞌa en tsa kuꞌu xi, san ndukutoꞌon ni nasa kída sa nduguaꞌa tsa, 10 Ntsaꞌa ni ndidaa ni, san na kini ndidaa ñayii io Israel ya, sa saꞌa sa nani Jesús nazarenu,a ia satakaa ni cruz ia ndaneꞌe Ndios xiti ndidaa sa io ndii. Sa saꞌa Jesús juan juandiku tsayee yaꞌa in tsa jnu ni ndidaa ni. 11 Jesucristu kuu ia kaꞌan sa yodotuni s-tutu ii Ndios sa kachi: yuu ti taꞌan-ini ndidaa tsa dama saꞌa veꞌe, yuu yaꞌa kuu yuu jnu xi vita.b 12 San nisa en ñayii ti taxi sa nanitaꞌvi ndo, kuan Jesús tsandaꞌa Ndios ñuyii yaꞌa, meni ia yukua taxi sa na nanitaꞌvi ndo.
13 San xíni tsa san ti dayuꞌu ñaꞌan xi Pedru xiꞌin Juan, san xini tsa sa ti kachi tsaa tsa xiꞌin ti kachi kaꞌvi tsa san kixi sa yuꞌu-ini tsa san xinituni tsa sa ndínoo tsa yaꞌa nduu tsa xiꞌin Jesús. 14 Kída ka xíni tsa in tsayee nduguaꞌa, san atuu dana sa dakuidokuachi ñaꞌan tsa. 15 Danduu táꞌvichiion sa na kee tsa jnu junta,c san kesaꞌa tsa ndatoꞌon tsa ndidaa mee tsa. 16 San kachi tsa:
—Nasa kuu sa kada ndo xiꞌin ndidaa tsa yaꞌa? Kuan san ndaa kuu sa ndidaa ñayii io Jerusalén ya xini sa kida tsa yaꞌa ndidaa sa naꞌnu yaꞌa, san ma kachi chiguaꞌa ndo. 17 Doko ndasa ma kuu vaa ka toꞌon yaꞌa nee ñuu, san na kadaa ndo sa ndaꞌvi kuj s-tsa tu na kaꞌan ka tsa sa nani Jesús.
18 Danduu kána ñaꞌan tsa san nduden tsa san táꞌvichiion tsa sa nisa en ka ñayii ma kaꞌan tsa xi, xiꞌin ma dakuaꞌa ñaꞌan ka tsa sa kída Jesús. 19 Doko sadaa Pedru xiꞌin Juan:
—Kachi toꞌon ni tu xaꞌvi ka xi sa kueniꞌno ñaꞌan da ni diꞌna ka sa kuxi Ndios. 20 Kuan ma dandoo da nduu da sa kaꞌan da sa xíni da xiꞌin sa tsáku da.
21 Tuꞌu nduden tsa, san dayaa ñaꞌan tsa, kuan yuꞌu tsa ndidaa ñayii ñuu san ti kída sa kaniaꞌa tsa. Kuan ndidaa tsa ñuu ya kidakaꞌnu tsa Ndios sa saꞌa ndidaa sa táꞌan, 22 kuan tsayee nduguaꞌa sa io tsa ndaa ubi diko kuia.
Ndidaa ñayii xininchisa ñaꞌan xi Jesús xika sa na chintsee ñaꞌan Ndios
23 San dayaa ñaꞌan tsa xi Pedru xiꞌin Juan, san kunuꞌu tsa sa io ndidaa ka tsa mani xiꞌin tsa san nakani tsa sa sadaa ndidaa dutu kunaꞌnu xiꞌin ndidaa tsa nisaꞌnu. 24 Tsáku xi ndidaa tsa yaꞌa toꞌon yaꞌa, san eni káꞌan tsa ndidaa tsa xi Ndios san sadaa tsa:
—Taa, Toꞌo, dini kuu ia kídaguaꞌa andivi ya xiꞌin nuꞌu ya xiꞌin kídaguaꞌa ni mar xiꞌin ndidaa sa io ñuyii, 25 duꞌua kaꞌan ni sa na kachi Espíritu Santu sa kaꞌan David tsa xínokuachi jni:
Naku ntseꞌe da nadiko xi ndidaa ñayii,
naku ntseꞌe da sani-ini tsa sa kada tsa sa ti nandeꞌe.
26 Nadiko xi ndidaa tsa tastuni nuꞌu ya
san ndidaa tsa ndatoꞌon
sa naa tsa xiꞌin tsa Toꞌo ya xiꞌin x-Cristu ia.d
27 Kuan sa ndaa kuu sa Herodes, Poncio Pilatu xiꞌin ndidaa ñayii ti kuu ñuu Israele xiꞌin nee ñuu Israel nataka tsa ndidaa tsa ñuu yaꞌa sa naxikokagua tsa xi Jesús ia kida ii ni. 28 San duꞌua kída tsa ndidaa tsa ndasa na xinotaꞌan sa sani-ini ni. 29 San vita, Toꞌo, ntsaꞌa ni sa kida tsa, nchu dayuꞌu ñaꞌan tsa doko kada ni sa ndidaa tsa xinokuachi jnu ni nisadana ma yuꞌu tsa sa kaꞌan tsa s-toꞌon ni. 30 Kada ni sa guaꞌa ni na ndadaguaꞌa da ñayii xiꞌin dadana ñaꞌan ni sa meni ni kuu kida xiꞌin milagru sa saꞌa d̶aꞌa ni ia ii kuu Jesús.
31 Tuꞌu xikataꞌvi tsa, san sa xuku tsa kánda, san ñoꞌon tsa Espíritu Santu. San ti yuꞌu tsa san kaꞌan tsa s-toꞌo Ndios.
Ndidaa sa xu koo s-tsa ndidaa tsa xu ku kuu xaꞌan tsa ndidaa tsa
32 Ndidaa tsa xininchisa eni sani-ini tsa san eni xu tuj s-tsa. Nisa en tsa ti xu kachi sa kuu tsa xaꞌan mee tsa nisa sa xu koo s-tsa, kuan ndidaa tsa xu nakaꞌntsa. 33 San ndidaa x-apóstol Jesucristu guaꞌa ntseꞌe xu nakani tsa ndidaa tsa sa nándoto ia, san xu chintsee ñaꞌan ntseꞌe Ndios s-tsa ndidaa tsa. 34 Ti io nisa en tsa xu nandeꞌe xi sa io tsa yaꞌa ndidaa tsa, kuan ndidaa tsa io xuꞌun xi adi xeꞌe xi san xu diko tsa, san xu kuneꞌe tsa tuini xu niꞌi tsa 35 san xu nachiꞌi tsa ndaꞌa ndidaa tsa tsandaꞌa Jesús. San xu kuañaꞌan kuenta guaꞌa io nisidaa s-tsa. 36 José, tsa nani Bernabé kuan duꞌua danani ñaꞌan ndidaa tsa tsandaꞌa Jesús, (san sa nani tsa yaꞌa nchukachi toꞌon kaꞌnu-ini) tsa kuu tribu Leví doko io tsa Chipre, 37 ío en xuꞌun tsa, san díko tsa, san neꞌe tsa tuini san sañaꞌan tsa xi ndidaa tsa tsandaꞌa Jesús.