Duꞌua taꞌan en tsa inani Ananías xiꞌin d̶eꞌe tsa Safira
5
Ío en tsayee nani Ananías, d̶eꞌe tsa nani ña Safira, díko tsa nduu tsa en ñuꞌu. 2 San ndatoꞌon tsa ndiaꞌan tsa, sa kendoo en tantu tuini s-tsa ndiaꞌan tsa san dagua ka juan saneꞌe tsa xi ndidaa tsa tsandaꞌa Jesús. 3 San sadaa Pedru:—Ananías, naku semani ni sa sayii sakakuiꞌia xanaa ni, san kida naꞌntsa ni xi Espíritu Santu, san teen ni dagua tuini? 4 Ama adii xaꞌan ni kúu nee ío jni ña, san kii díko ni, ama adii xaꞌan mee ni kuu tuini niꞌi ni, naku duꞌua kída ni, adi ñayii ñuyii ya kida naꞌntsa ni xi, Ndios kida naꞌntsa ni xi.
5 Danduu Ananías tsaku s-tsa toꞌon yaꞌa san ndugua tsa san xíꞌi tsa. San yuꞌu ntseꞌe ndidaa tsa tsáku xi. 6 Danduu ndukuin ndidaa nu kuachi san naduku ñaꞌan nu. San kíneꞌen ñaꞌan nu san ku chinduxaꞌan nu.
7 Yaꞌia kuenta uni ora san kuyii d̶eꞌe Ananías san nisa ti nitoꞌon ña sa taꞌan. 8 Danduu Pedru ndukutoꞌon tsa:
—Kachi toꞌon ni, duꞌua diko ni ñuꞌu kuaan ña, san sadaa ña:
—jon duꞌua kuyaꞌvi.
9 Pedru sadaa tsa:
—Naku ndatoꞌon ni ndiaꞌan ni sa xitotuni ñaꞌan ni xi x-espíritu Ndios? San adi ndidaa nu sa chinduxaꞌan xi xee ni xuku ndieꞌe xan, san kuntsaka ñaꞌan nu ni kiꞌin tuku.
10 San nonoo ni ndugua ña saꞌa tsa san xíꞌi ña. San kunayii ndidaa nu kuachi, san naniꞌi nu ndii; san kineꞌen ñaꞌan nu san sa chinduxaꞌan nu sa yenduxi xee ña. 11 San yuꞌu ntseꞌe congregación kuan xiꞌin ndidaa ñayii tsáku xi toꞌon yaꞌa.
Kuaꞌa ntseꞌe sa naꞌnu xiꞌin señal
12 San kuaꞌa ntseꞌe milagru xiꞌin señal xu kada ndidaa tsa tsandaꞌa Jesús, kuan Ndios xu chintsee ñaꞌan s-tsa ndidaa tsa, sa na kada tsa sa na nduguaꞌa ñayii. San ndidaa tsa xu nataka sa eni xu kani-ini tsa ndidaa tsa, xu nataka tsa en ndieꞌe kaꞌnu nani xaꞌan Salomón; 13 Doko nisa en ka ñayii ti xu kuyee sa kutaꞌan xiꞌin tsa ndidaa tsa, kuani kuaꞌa ntseꞌe ñayii xu kaꞌan guaꞌa s-tsa ndidaa tsa. 14 Kaya ntseꞌe ka tsa xu nakininchisa ñaꞌan xi Ndios, tantu tsiee duꞌua ñadeꞌe. 15 San oni xu kineꞌen tsa ndidaa tsa tsa kuꞌu xi ndikeꞌe san xu koꞌno ñaꞌan tsa xiti kamilla, ndasa nayaꞌia Pedru, san kuani x-kondati tsa nayaꞌia ndodo jnu ndidaa tsa kuꞌu xi. 16 Ntsandeꞌe ndidaa ñuu io yachi Jerusalén xu kuntsaka kuaꞌa ntseꞌe tsa kuꞌu xi, tsa neꞌe tachi kuiꞌia,a san ndidaa tsa xu nduguaꞌa.
Xiko ñaꞌan xi Pedru nduu tsa Juan
17 Danduu dutu kunaꞌnu xiꞌin ndidaa saduceu io jukua, kuu kuadu ntseꞌe tsa. 18 Téen ñaꞌan tsa xi ndidaa tsa tsa tsandaꞌa Jesús san chíñaꞌan tsa vekaa ñuu; 19 doko en x-ángel Ndios nakaan ndieꞌe vekaa kuan niñu san dayaꞌia ñaꞌan ndikeꞌe san sadaa:
20 —Kuaꞌan templu, san kaꞌan xi ñuu toꞌon guaꞌa ñuyii ma ndeꞌe.
21 San tsaku s-tsa toꞌon yaꞌa san yeꞌe ni kuaꞌan tsa templu sa dakuaꞌa ñaꞌan tsa xi ndidaa ñayii. Dutu kunaꞌnu xiꞌin ndidaa tsa ntsaka taꞌan xiꞌin tsa tsandaꞌa tsa sa na ku kana ñaꞌan xi ndidaa tonisaꞌnu tastuni io Israel.b San tsandaꞌa tsa sa na ku kuaka ñaꞌan xi tsa yeꞌe vekaa. 22 Doko saa ndidaa policia san ti na niꞌi ñaꞌan tsa xiti vekaa, san naxikokagua tsa ku kadaa tsa, 23 san kuenta nasaa tsa sadaa tsa:
—Saꞌan da doko vekaa kuaan ntsadi kutu, san ndidaa tsa ntsaa xuku tsaa ndieꞌe xi. Doko kuenta na kaan ndieꞌe sayii da doko ti naniꞌi ñaꞌan da s-tsa.
24 Kuenta tsaku xi dutu kunaꞌnu xiꞌin tsa tastuni ñaꞌan xi ndidaa tsa ntsaa templu san kíxi sa dayuꞌu ñaꞌan s-tsa san sani-ini tsa naku da kida ndidaa jaꞌa. 25 Doko kíxi en tsa sadaa toꞌon yaꞌa:
—Ndidaa tsa chiꞌi ni vekaa io tsa templu, dakuaꞌa ñaꞌan tsa xi ndidaa ñayii io juan.
26 Danduu saꞌan tsa tastuni ñaꞌan xi ndidaa tsa ntsaa templu xiꞌin ndidaa x-policia tsa; san teen ñaꞌan tsa, doko ti kaniaꞌa tsa, kuan yuꞌu tsa sa chidoyuu ñaꞌan ndidaa tsa ñuu xuku jukua. 27 Ntsaka ñaꞌan tsa saa, san sadaa tsa xi ndidaa tonisaꞌnu tastuni ñuu, san dutu kunaꞌnu ndukutoꞌon tsa s-tsa nduu tsa:
28 —Adi táꞌvichiion ntsu xo ndidaa yo sa ma dadana ñaꞌan ka yo sa kída tsa yukua ña. San vita ndidaa ñayii io Jerusalén chiꞌi yo d̶iki xi ndidaa sa kaꞌan yo san nchu da kuidokuachi ñaꞌan yo ndidaa yo j-niñi tsa yaꞌa kuntsu ndidaa ntsu.
29 Doko kaꞌan Pedru xiꞌin ndidaa ka tsa tsandaꞌa Jesús, san sadaa tsa:
—Xaꞌvi ka xi sa kueniꞌno ñaꞌan da xi Ndios adi sa kuxi ñayii. 30 Ndios ku tadeꞌe ndo ndidaa ndo, ndaneꞌe ñaꞌan xi Jesús, ia satakaa ni ndidaa ni en cruz.c 31 Jesús yaꞌa, kídakaꞌnu Ndios san tantsaku ñaꞌan ia ichi j-ladu kuaꞌa ia kuenta tsa kunaꞌnu ntseꞌe xiꞌin sa na kada ia sa na nata-uꞌu ndidaa ñayii kuu raza Israel san na koo ia sakaꞌnu-ini sa saꞌa ndidaa x-kuachi tsa. 32 San dan ndidaa da xini ndidaa jaꞌa, xiꞌin Espíritu Santu tuku sa sañaꞌan Ndios xi ndidaa ñayii xininchisa ñaꞌan xi ia.
33 Ndidaa tsa nini nádiko ntseꞌe s-tsa san nchukaꞌni ñaꞌan tsa xi ndidaa tsa yaꞌa. 34 Danduu ndukuin en tsa kunaꞌnu kuu jnu xi nani Gamaliel tsa kuu fariseu xiꞌin maestru dakuaꞌa ñaꞌan ley, san i-ntseꞌe kuaꞌa ñayii xiniguaꞌa ñaꞌan s-tsa ñuu yaꞌa, san táꞌvichiion tsa sa na kineꞌen ñaꞌan en taꞌa ndikeꞌe xi ndidaa tsa kaꞌan s-toꞌon Jesús. 35 Danduu sadaa tsa:
—Ndidaa dini tsa io ñuu Israel, guaꞌa ni xiꞌin sa nchukada ni xi ndidaa tsa yaꞌa. 36 Kuan ío en tsa inani Teudas, san xu kachi tsa sa kuu tsa en tsa ntseꞌe. San tsa yaꞌa kumi cientu ñayii inchiko ñaꞌan s-tsa. Doko kuenta saꞌni ñaꞌan s-tsa, san dana duꞌua ni ndidaa sa káchi sa kuu tsa. 37 Danduu ío enka tsa inani Judas tsa kúu galileu kii na kana ñaꞌan sa na todotuni ñayii, san kuaꞌa ntseꞌe ñayii dandaa tsa sa na kunchiko ñaꞌan s-tsa. Doko saꞌni ñaꞌan s-tsa tuku san ndidaa tsa inchiko ñaꞌan s-tsa dana duꞌua ni tsa ndidaa tsa.
38 San duꞌua ni jaꞌa tuku, kachi da jni: Kodaa ni ndidaa tsa yaꞌa nakiꞌin kadi tsa. Kuan tu jaꞌa ku s-toꞌon ñayii san ma kudii; 39 doko tu xaꞌan Ndios kuu san ma kachi dandeꞌe ni. Kuan na kada naa ni xiꞌin Ndios.
40 Sáa xanaa tsa kída Gamaliel, san kána tsa ndidaa tsa tsandaꞌa Jesús, san kaniaꞌa tsa. San sadaa tsa sa ma kaꞌan ka tsa ndidaa sa káꞌan Jesús, san dayaa ñaꞌan tsa.