Juan 5

Duꞌua taꞌan kuenta ndadaguaꞌa Jesús en tsayee ti kachi kaka

Kuenta taꞌan ndidaa sa duꞌua taꞌan ya ío en viko ndidaa judiu, san Jesús kuaꞌan ia Jerusalén. 2 San Jerusalén yachi ndieꞌe nani ndieꞌe ndikachi, io en tanki san daꞌan hebreu nani Betesda sa io oꞌon x-portico xi. 3 San jukua xu kuxuku kuaꞌa ntseꞌe tsa kuꞌu xi, tsa kuaa, tsa yakua, xiꞌin tsa nduteꞌe san ntsatu tsa sa na kani ndutsa. 4 Kuan en x-ángel Ndios xu noo kikii ni jnu ndutsa san xu da kani ndutsa kuan. Juandiku andu xu kee diꞌna nuu xiti ndutsa, san xu nduguaꞌa, kuani na kueꞌe ku mee sa taꞌan ñayii. 5 San juan io en tsayee kuꞌu xi san sa kúu oko saꞌun uni kuia kúꞌu s-tsa. 6 San xini Jesús sa katuu tsa yaꞌa jaꞌa san niꞌitoꞌon ia sa duꞌua kuaꞌa kuiꞌia yaꞌia, san ndúkutoꞌon ia:

—Nchu nduguaꞌa ni ña?

7 San tsa kuꞌu xi kuan sadaa tsa:

—Ayoo en io d̶a sa chintsee ñaꞌan d̶a sa na kee da xiti ndutsa ya ora kani; san neni nduku-ini da sa kee da, san enka tsa kee diꞌna ka sa kuj da.

8 Jesús sadaa ia:

—Ndukuin ni san nakeꞌen ni x-kamilla ni xan san kaka ni.

9 San noo noo ni tsayee nduguaꞌa tsa, tén tsa x-kamilla tsa san xíka tsa. San kii yukua kuu sábado. 10 San uu judiu sadaa tsa xi tsa nduguaꞌa:

—Kii yaꞌa kuu sábado san ti guaꞌa sa kunchido yo x-kamilla yo xan.

11 Doko tsa yaꞌa sadaa tsa:

—Tsa ndadaguaꞌa ñaꞌan d̶a, kachi tsa d̶a: “Nakeꞌen x-kamilla yo xan san kaka.”

12 San ndukutoꞌon tsa ndidaa tsa:

—Andu kuu tsa kachi: “Nakeꞌen x-kamilla yo xan san kaka”? 13 Doko tsa ndúguaꞌa ya ti xini tsa andu kuu tsa ndádaguaꞌa ñaꞌan s-tsa, kuan Jesús kée ia jukua, kuan ío kuaꞌa ntseꞌe ñayii jukua. 14 Danduu naniꞌi ñaꞌan Jesús s-tsa yaꞌa templu san sadaa ia:

—Vita sa ndúguaꞌa ni ntsaꞌa nika ma kada ka ni kuachi kuan na taꞌan ni enka sa kuiꞌia ka.

15 Ku nuꞌun tsayee san sadaa tsa xi ndidaa tsa tastuni sa Jesús kuu ia ndáda guaꞌa ñaꞌan s-tsa. 16 Sa saꞌa xi jaꞌa juandiku nánduku ñaꞌan ndidaa judiu tastuni xi Jesús sa kaꞌni ñaꞌan tsa, kuan ndádaguaꞌa ia tsa yaꞌa sábado. 17 Doko Jesús sadaa ia:

—Ku Tata ntsu ndikii kidachiion ia, san ntsuꞌu kidachiion ntsu tuku.

18 Juandiku ndidaa judiu tastuni on ka nchukaꞌni ñaꞌan tsa xi Jesús, kuan adii ni sábado ti xu choguaꞌa ia maska sa xu kaꞌan ia sa Ndios ku s-Tata ia tuku, xiꞌin xu kani toꞌon ia sa eni kuu ia xiꞌin Ndios.

Sa tastuni io xi D̶aꞌa Ndios

19 Jesús sadaa ia:

—Kachitoꞌon ndaa ntsu yo, sa D̶aꞌa Ndios ya ma kachi kada nu nisadana d̶iki mee nu; kuan kida nu sa xini nu sa kida s-Tata nu, ndidaa sa kida s-Tata nu juan kida Daꞌa kuaan tuku. 20 Kuan Tata xinimani ia D̶aꞌa ia, juandiku dadana ñaꞌan ia ndidaa sa kida ia; san dadana ñaꞌan ia kuaꞌa ka sa naꞌanu sa oni dayuꞌu ñaꞌan yo ndidaa yo. 21 Kuan duꞌua Tata kuaan ndaneꞌe ia ndii san kida ia sa na kunchito ni tuku ñayii, duꞌua D̶aꞌa ia tuku, kida nu sa na kunchito andu nchoj nu. 22 Kuan Tata ti da kuidokuachi ia nisa en ñayii, Kida ia sa mee D̶aꞌa ia na ndakakuachi 23 ndasa ndidaa ñayii na chiñuꞌu ñaꞌan xi Daꞌa ya kuenta chiñuꞌu ñayii Tata. Andu ti chiñuꞌu Daꞌa san ti chiñuꞌu ñaꞌan xi Tata ia tsandaꞌa ñaꞌan jnu vaxi.

24 Kachitoꞌon ndaa ntsu yo, sa andu tsaku xi ku toꞌon ntsu ya san xininchisa ñaꞌan xi ia tsandaꞌa ñaꞌan ku ntsu, san niꞌi nu vida ma ndeꞌe. San nuyaꞌa ma kuidokuachi ka nu, san ma kuu nu maska sa niꞌi nu vida ma ndeꞌe. 25 Kachitoꞌon ndaa ntsu yo, sa kii kixi, sa sáa vita, sa ndidaa ndii tsaku xi s-tachi D̶aꞌa Ndios, san nu na kininchisa, ku nchito nu. 26 Kuan Tata kuu ia vida, san sañaꞌan ia xi D̶aꞌa ia sa na ku kuu nu vida tuku, 27 sáñaꞌan ia sa tastuni nu xiꞌin sa ndaka nu kuachi, kuan nuyaꞌa kuu ia nduu ñayii ñuyii yaꞌa. 28 Ma yuꞌu yo sa tsáku yo ndidaa jaꞌa; kuan kixi kii sa ndidaa ndii yenduxi tsaku xi s-tachi ia nduu ñayii ñuyii yaꞌa. 29 San nandoto ndidaa tsa kída sa guaꞌa ndasa nakoo vida s-tsa, doko ndidaa tsa kída sa kuiꞌia nandoto tsa san kiꞌin tsa sa uꞌu sa ndaꞌvi.

Sa tastuni Jesús

30 Ntsuꞌu ma kachi kada ntsu nisadana ku diki mee ntsu. Ntsuꞌu ndakakuachi ntsu ndaa tsaku ku ntsu xi ku Tata ntsu; san sa dakuidokuachi ntsu io ndaa, kuan ti kida ntsu ku diki mee ntsu kida ntsu sa nchoxi ku Tata ntsu, ia tsandaꞌa ñaꞌan kuntsu. 31 Kuan tu ntsuꞌu kaꞌan ntsu sa kuu mee ntsu san toꞌon kaꞌan ntsu ti xaꞌvi xi. 32 Doko io enka ia kaꞌan andu kuu ntsu, san xini ntsu sa sa kaꞌan ia sa kuu ntsu kuu sa ndakuiti. 33 Yoꞌo tsandáꞌa yo ñayii sáꞌan sa ndukutoꞌon xi Juan tsa dakuendutsa ñaꞌan, san ndidaa sa káꞌan nuyaꞌa kuu sa ndaa. 34 Doko ntsuꞌu ti nandeꞌe sa kaꞌan enka ñayii nasa kuu ntsu, doko kachi ntsu jaꞌa kuan ndasa na nitaꞌvi yo ndidaa yo. 35 Juan ya kuu̱ na en kandil xiko san xu dayeꞌe, san yoꞌo ndidaa yo nchu ku-iꞌni yo xiꞌin taꞌa dii ni sa dayeꞌe yukua. 36 Doko io enka sa kaꞌan sa kuu ntsu san xaꞌvi ka xi sa kuxi sa káꞌan Juan, kuan ndidaa sa táꞌvichiion ku Tata ntsu sa na kada ntsu, xiꞌin ndidaa sa kida ntsu ya kaꞌan sa kuu ntsu san jaꞌa nchu kachi sa ku Tata ntsu tsandaꞌa ñaꞌan ku ntsu 37 San ku Tata ntsu ia tsandaꞌa ñaꞌan ku ntsu kaꞌan andu kuu ntsu. Doko ti tsaku yo s-tachi ia, san nisa ti xini yo nchakaa ia. 38 San nisa s-toꞌon ia ti ñoꞌon xanaa yo ndidaa yo; kuan yoꞌo ndidaa yo ti xininchisa yo nu tsandaꞌa ia. 39 Guaꞌa ntseꞌe kaꞌvi yo ndidaa yo sa yodotuni xi Ndios, kuan sani-ini yo sa juan kada sa naniꞌi yo vida ma ndeꞌe, doko juan yodotuni sa kuu mee ntsu. 40 Doko yoꞌo ndidaa yo ti nchu kunchiko ñaꞌan yo ku ntsu ndasa na niꞌin yo vida.

41 Ti nduku ntsu sa kadakaꞌnu ñaꞌan ndidaa ñayii ñuyii yaꞌa ku ntsu. 42 Doko ntsuꞌu xini ntsu sa ti xinimani yo Ndios ndidaa yo. 43 Ntsuꞌu vaj ntsu xiꞌin s-toꞌon ku Tata ntsu, san ti xinimani ñaꞌan yo ku ntsu. San tu enka ñayii nakixi xiꞌin s-toꞌon mee xi, sa ñayii yukua xinimani yo ndidaa yo. 44 Ma kachi kininchisa ñaꞌan yo ku ntsu kuan ndidaa ni mee yo kidakaꞌnu taꞌan san ti nchoj yo sa na kadakaꞌnu ñaꞌan Ndios xo. 45 Ma kani-ini yo sa ntsuꞌu dakuidokuachi ñaꞌan yo jnu ku Tata ntsu. Kuan io tsa da kuidokuachi ñaꞌan xo: Moisés tsa kukaꞌnu-ini yo ndidaa yo tsa yukua dakuidokuachi ñaꞌan xo. 46 Kuan tu yoꞌo xininchisa yo Moisés, san kininchisa ñaꞌan yo ku ntsuꞌu tuku; kuan sa kuu ntsuꞌu chídotuni tsa. 47 Doko tu ti xininchisa yo sa chídotuni tsa, Na modo kininchisa yo ku toꞌon ntsu ya tuda?