Duꞌua táꞌan kuenta Jesús nda toꞌon ia xiꞌin en ñadeꞌe io ñuu nani Samaria
4
Kuenta nitoꞌon Jesús sa uu fariseu nitoꞌon tsa sa Jesús ya io kuaꞌa ka ñayii nchiko ñaꞌan xi ia xiꞌin dakuendutsa ia kuaꞌa ka ñayii sa kuxi Juan; 2 san nisa adi Jesús ku ia dakuendutsa kuan ndidaa tsa nchiko ñaꞌan xi ia kuu tsa dakuendutsa. 3 San kée ia Judea san kuaꞌan nituku ia Galilea.4 San kuenta kuaꞌan ia san nandeꞌe sa yaꞌia ia Samaria; 5 san saa ia en xuun Samaria sa nani Sicar, yachi sa kuu xuꞌun Jacob sa sáñaꞌan tsa xi d̶aꞌa tsa José.a 6 San jukua io en pozo sa kídaguaꞌa Jacob. Danduu xavi Jesús sa xika ia, san kukoo ia ndexavi ia jnu pozo. San kuu kuenta dagua kii.
7 Kíxi en ñadeꞌe kuu ñuu Samaria ki tagua ña ndutsa, san Jesús sadaa ia:
—Taxi taꞌa ndutsa na koꞌo ntsu. 8 Kuan ndidaa tsa nchiko ñaꞌan xi ia kuaꞌan tsa ñuu ku kuen tsa sa kaj s-tsa.
9 Danduu samaritana kuan sadaa ña:
—Doko dini ku ni ñuu Israel, san xika ni ndutsa sa koꞌo ni d̶a, xi dan ña io Samaria ña?
—Tu na kini yo sa guaꞌa nchu kada Ndios yo xiꞌin andu kuu nu xika ndutsa yo, san yoꞌo kaka yo ndutsa nu san nuyaꞌa taj nu ndutsa nchito xo.
11 San ñadeꞌe kuaan sadaa ña:
—Doko tu atuu sa neꞌe ni vaxi sa tagua ni, san pozo ya kono ntseꞌe. Ami niꞌi ni ndutsa kachi ni sa taj ni kuaan? 12 Ama kaꞌnu ka ni sa kuxi ndii ku tadeꞌe ndo Jacob ña dandoo pozo yaꞌa, ña xíꞌi ndutsa yaꞌa, xiꞌin d̶aꞌa ña xiꞌin ndidaa x-kititata ña?
13 San káꞌan Jesús san sadaa ia:
—Andu kuu mee sa na koꞌo ndutsa yaꞌa san yichi nituku; 14 Doko nu na koꞌo ndutsa sañaꞌan ntsuꞌu san ma yichi ka nu, kuan ndutsa kuañaꞌan ntsu kuu ndutsa kana sa taxi vida ma ndeꞌe.
15 Ñadeꞌe kuan sadaa ña:
—Taj ni ndutsa yukua d̶a ndasa ma yichi da ndutsa san ma kix ka da ntsa jaꞌa kitagua da.
16 Jesús sadaa ia:
—Kuaꞌan, ku kana xee yo san naꞌa jaꞌa.
17 San káꞌan ñadeꞌe san sadaa ña:
—Ti io xee da.
San sadaa Jesús:
—Sa ndaa kachi yo, sa ti io xee yo;
18 kuan oꞌon xee yo ío, san nu io xiꞌin yo vita adi xee yo kuu nu. Jaꞌa káꞌan ndaa yo.
19 Sadaa ñadeꞌe:
—Toꞌo, tuj da san dini kuu en ña tsandaꞌa Ndios. 20 Ndidaa ña kuu ñuu Samaria xu chiñuꞌu ña Ndios tinduu yaꞌa, san ndidaa dii ni ña kuu ñuu Israel kaꞌan ni sa Jerusalén na chiñuꞌu ñaꞌan xi Ndios.
21 Jesús sadaa ia:
—Kininchisa ñaꞌan ku ntsu kuan kuyachi kii sa nisa tinduu yaꞌa san nisa Jerusalén kiꞌin ku chiñuꞌu ñaꞌan xi Ndios. 22 Yoꞌo ndidaa yo ti xini yo andu chiñuꞌu yo; doko ndidaa ntsuꞌu ñayii Israel xini ntsu andu chiñuꞌu ntsu, kuan sa nanitaꞌvi kixi sa saꞌa ñayii kuu ñuu Israel. 23 Doko kii kixi sa saa vita, sa ndidaa ñayii chiñuꞌu ñaꞌan modo nchoxi ia, xiꞌin sa tastuni x-espíritu ia, kuan duꞌua nchoxi Ndios ia kuu ku Tata ndo sa na chiñuꞌu ñaꞌan xi ia. 24 Ndios kuu ia Espíritu; San ndidaa ñayii chiñuꞌu ñaꞌan nandeꞌe sa chiñuꞌu ñaꞌan modo nchoxi ia.
25 San sadaa ñadeꞌe kuan:
—Xini da sa kixi Mesías ña nani Cristu ia kida sa nanitaꞌvi. San kii na kixi ia yaꞌa san kachitoꞌon ndaa ña ndidaa jaꞌa.
26 San Jesús sadaa ia:
—Ntsuꞌu kuu, nu ndatoꞌon xiꞌin yo ya.
27 San nasaa ndidaa tsa nchiko ñaꞌan xi ia san sani-ini ntseꞌe tsa sa ndatoꞌon ia xiꞌin en ñadeꞌe, doko nisa en tsa ti kuyee sa ndukutoꞌon: Nasa ncho xan adi nasa nda toꞌon ia xiꞌin ña? 28 Danduu ñadeꞌe dandoo ña xoo ña, san kunuꞌu ña ñuu san sadaa ña xi ndidaa ñayii:
29 ¡Naꞌa ni! Ntsaꞌa ni en ñayee en ña kachi ndidaa sa kída da. Gua ña yaꞌa ku Cristu ia kida sa nanitaꞌvi ñayii?
30 Danduu kée tsa ndidaa tsa ñuu san saꞌan tsa sa io ia. 31 San neni ndidaa tsa nchiko ñaꞌan xi ia sakondaꞌavi tsa jnu ia san sadaa tsa:
—Rabí, kaj ni.
32 Doko sadaa ia:
—Ntsu io en sa kaj ntsu san yoꞌo ndidaa yo ti xini yo.
33 San danduu kesaꞌa ndidaa tsa nchiko ñaꞌan xi ia ndatoꞌon tsa ndidaa mee tsa:
—Andu kíxi kineꞌen sa kaj tsa?
34 Jesús sadaa ia:
—Sa kaj ntsu ku sa na kada ntsu sa nchoxi ia tsandaꞌa ñaꞌan ku ntsu xiꞌin na daxino ntsu x-chiion ia. 35 Yoꞌo ndidaa yo kachi sa kida ka kumi yoo sa nakeꞌen ndidaa tata io itu? San ntsuꞌu kachi ntsu: “¡Ndaneꞌe jnu yo san ntsaꞌa sa ndidaa itu xan sa io sa nakeꞌen kuan sa yichi!” 36 Ndios kuañaꞌan ia xaꞌvi ndidaa ñayii na na keꞌen tata sa kuu ndidaa ñayii, kuan ndidaa ñayii yaꞌa niꞌi vida ma ndeꞌe san duꞌua ndidaa ñayii choꞌon xiꞌin ndidaa ñayii nakeꞌen eni ku-iꞌni tsa ndidaa tsa. 37 Kuan kachi ndaa dicho: En nu kuu nu choꞌon san enka nu kuu nu nakeꞌen. 38 Ntsuꞌu táꞌvichiion ntsu yo, sa na nakeꞌen yo ñuꞌu ti kidachiion yo. Enka ñayii kídachiion, san yoꞌo kuyii yo x-chiion tsa yaꞌa.
39 Kuaꞌa ntseꞌe ñayii ío Samaria xíninchisa ñaꞌan xi Jesús sa saꞌa s-toꞌon ñadeꞌe káꞌan san kachi: “Káchitoꞌon ña ndidaa sa kída da.” 40 Danduu, kuenta saa ndidaa samaritanu sa io ia, san sakondaꞌvi tsa ndidaa tsa sa na kendoo ia xiꞌin tsa, san kendoo ia ubi kii ñuu yukua. 41 San kuaꞌa ntseꞌe ka ñayii xíninchisa ñaꞌan xi ia sa saꞌa s-toꞌon ia. 42 Ndidaa tsa yaꞌa sadaa xi ñadeꞌe:
—Adii ni sa kaꞌan ni xan xininchisa da, kuan ndidaa ndo tsáku xi, san xini ndo ndidaa ndo sa ia yaꞌa kuu ia dita x-kuachi ñuyii ya.
Jesús ndadaguaꞌa ia en d̶aꞌa en tsa kuu tsa kidachiion jnu en rey
43 Yaꞌia uu kii, kée ia san kuaꞌan ia Galilea, 44 kuan duꞌua kachi mee ia, en x-profeta Ndios ti xiniguaꞌa ñaꞌan s-tsa xuun tsa.c 45 Danduu kuenta kuyii ia Galilea, ndidaa ñayii io jukua semani sa na yii ia ñuu kuan, kuan xíni tsa ndidaa sa kída ia Jerusalén kii viko;d kuan ndidaa tsa yaꞌa sáꞌan tsa viko kuan tuku.
46 Jesús naxikokagua ia Caná en xuun Galilea, ndaꞌa ñuu ndada ia ndutsa vinu tinchiꞌio. San Capernaúm io en tsayee io chiion naꞌnu san d̶aꞌa tsa kúꞌu jnu. 47 San tsaku s-tsa sa ndee Jesús Judea, san saa ia Galilea, san saꞌan tsa sa ntsaꞌa ñaꞌan tsa san sakondaꞌvi tsa jnu Jesús ya sa na kiꞌin ia xeꞌe tsa yaꞌa san na ndadaguaꞌa ia d̶aꞌa tsa kuan sa io sa kuu nu. 48 Jesús sadaa ia:
—Yoꞌo ndidaa yo ti xininchisa yo tu ma kini yo en señal adi en milagru.
49 San tsa kidachiion xi rey sadaa tsa:
—Yachi ni kuan na kuu d̶aꞌa da.
50 Jesús sadaa ia:
—Kunuꞌu, kuan d̶aꞌa yo sa nduguaꞌa nu. Tsayee xíninchisa tsa toꞌon sadaa Jesús san tén ichi tsa kunuꞌu tsa. 51 San neni kunuꞌu tsa xeꞌe tsa, ndidaa tsa kidachiion jnu tsa yaꞌa kée tsa sa natañaꞌa tsa san sadaa tsa:
—D̶aꞌa ni sa nduguaꞌa nu.
52 San ndúkutoꞌon tsa na ora ku sa kesaꞌa nu na ten-ini nu, san sadaa tsa:
—Iku, ka usa sa ñini kuaꞌan kaꞌni kuan.
53 San s-tata nuyee nakaꞌan tsa sa ora yukua kuu sa sadaa Jesús: “D̶aꞌa yo sa nduguaꞌa nu”; san xíninchisa tsa xiꞌin ndidaa tsa io xeꞌe tsa.
54 Jaꞌa kuu guelta ku uu kída Jesús ya milagru san ndée ia Judea san nasaa ia Galilea.