Duꞌua taꞌan kuenta nanitaꞌan Jesús xiꞌin Nicodemu
3
Ío en tsayee kuu̱ tsa fariseu nani tsa Nicodemu, en tsa kunaꞌnu xi ndidaa judiu. 2 Tsa yaꞌa sáꞌan tsa en kunaa sa io Jesús san sadaa tsa:—Rabí, xini da ndidaa da sa tsandaꞌa ñaꞌan Ndios jni kuenta maestru; kuan nisa en ñayii ti kida sa naꞌnu kida ni, enika tu Ndios io xiꞌin tsa yaꞌa.
3 Káꞌan Jesús san sadaa ia:
—Kachitoꞌon ndaa ntsu yo, sa nu ma kaku saa ma kini nu sa tastuni Ndios.
4 Nicodemu sadaa tsa:
—Ama kuu kaku saa en ñayii sa yée? Ama guaꞌani nayii nituku tsa xiti j-nana tsa san kaku nituku tsa ña?
5 San sadaa Jesús:
—Kachitoꞌon ndaa ntsu yo, tu ma kaku yo xiꞌin ndutsa xiꞌin ma kaku saa yo xi Espíritu Santu san ma yii yo sa tastuni Ndios. 6 Ndidaa ñayii kaku xi s-tadeꞌe xi san yikikoño kuu san ñayii kaku xi Espíritu Santu xaꞌan Espíritu Santu kuu. 7 Ma yuꞌu yo sa duꞌua kachi ntsu ya: “Nandeꞌe sa kaku saa yo.” 8 Espíritu Santu ku na tachi sa kana ami ichi nchoxi. Yoꞌo guaꞌani tsaku yo tachi doko ti xini yo ami kee san ami saꞌan duꞌua kuu ñayii kaku xi Espíritu Santu.
9 San sadaa Nicodemu:
—Namodo kida?
10 Jesús sadaa ia:
—Yoꞌo kuu Maestru Israel ya, san ti xini yo jaꞌa ña? 11 Kachitoꞌon ndaa ntsu yo, sa kaꞌan ntsu ndidaa sa xini ntsu; san nakani ntsu ndidaa sa xíni ntsu. Doko yoꞌo ndidaa yo ti nchu kininchisa yo sa na kani ntsu. 12 Tu ti xininchisa yo sa na kani ntsu sa io nuꞌu ya, Vika tuku sa io andivi kininchisa yo?
13 Nisa en ñayii ti saa andivi, meni tsa nóo andivi, ia nduu ñayii ñuyii yaꞌa. 14 San duꞌua kuenta Moisés ndanéꞌe tsa koo kuguaꞌa xiꞌin bronce desiertu,a duꞌua nandeꞌe sa ndaneꞌe ñaꞌan xi ia nduu ñayii ñuyii yaꞌa, 15 ndasa ndidaa ñayii na kininchisa ñaꞌan nu, ma kuita, maska sa na niꞌi nu vida ma ndeꞌe xi.
Duꞌua xinimani ñaꞌan Ndios xi ñayii ñuyii yaꞌa
16 Kuan Ndios xinimani ia ñayii io ñuyii ya juandiku tsandaꞌa ia uniko D̶aꞌa ia, ndasa ndidaa ñayii na kininchisa ñaꞌan ma kuita, maska sa na niꞌi vida ma ndeꞌe. 17 Kuan ti tsandaꞌa ia D̶aꞌa ia sa da kuidokuachi nu ñayii ñuyii, maska sa sa saꞌa nuyaꞌa na naniꞌi taꞌvi ñayii.
18 Ñayii xininchisa ñaꞌan ti xidokuachi; doko ñayii ti xininchisa ñaꞌan sa xidokuachi, kuan ti xininchisa ñaꞌan xi uniko D̶aꞌa Ndios. 19 San jaꞌa ku sa xidokuachi: Sa sa dayeꞌe ya saa ñuyii yaꞌa, san ndidaa ñayii táꞌan ka xanaa xi sa naa sa kuxi sa dayeꞌe, kuan ndidaa sa kida ñayii kuu sa kuiꞌia. 20 Kuan ndidaa ñayii kida sa kuiꞌia ti taꞌan xanaa ñayii sa dayeꞌe, san ti nchu kiꞌin ñayii sa io sa dayeꞌe ya, kuan ndasa ma ketuu sa kuiꞌia kida ndidaa ñayii. 21 Doko ñayii kida sa ndaa tuꞌua sa io sa dayeꞌe, kuan ndasa ndidaa sa kida ñayii na danaꞌa, kuan kida ñayii sa nchoxi Ndios.
Juan tsa dakuendutsa ñaꞌan kaꞌan nituku tsa andu kuu Jesús
22 San tuꞌu jaꞌa san kuaꞌan Jesús xiꞌin ndidaa tsa nchiko ñaꞌan xi ia ntsa Judea; san kendoo ia jukua xiꞌin tsa ndidaa tsa xiꞌin xu dakuendutsa ia. 23 Juan io tsa dakuendutsa tsa ñayii ñuu Enón yachi ñuu Salim, kuan jukua io ntseꞌe ndutsa; san kuaꞌa ntseꞌe ñayii xu kiꞌin ku kuendutsa, 24 Ndidaa jaꞌa taꞌan antika sa chiñaꞌan tsa vekaa xi Juan.b
25 Danduu natoꞌon tsa nchiko ñaꞌan xi Juan xiꞌin en judiu sa saꞌa na modo ndundoo tsa jnu Ndios. 26 Ndidaa tsa nchiko ñaꞌan xi Juan sáꞌan tsa sa io tsa yaꞌa san sadaa tsa:
—Rabí, tsa in xiꞌin ni enka ndodo yutsa Jordán, tsa kachi ni sa kuu Cristu tsa kida sa nanitaꞌvi, ¡Tsa yaꞌa dakuendutsa tsa san kuaꞌa ntseꞌe ñayii saꞌan sa io tsa!
27 San sadaa Juan:
—Nisa en ñayii ma niꞌi nisadana enika tu na kuañaꞌan Ndios ia io andivi. 28 Yoꞌo ndidaa yo tsáku xi sa kachi ntsu, adii ntsuꞌu kuu Cristu,c kuan en tsa ndodo nu ni jnu ia vaxi ku ntsu. 29 Nu ntsaka ñaꞌan xi nudeꞌe tandaꞌa kuan kuu xee nu; san nu mani xiꞌin nuyee tandaꞌa ya in nu nini ñaꞌan nu san ku-iꞌni ntseꞌe nu sa tsaku jnu ndidaa toꞌon kaꞌan nuyaꞌa. San duꞌua ntsuꞌu ku-iꞌni ntseꞌe ntsu tuku. 30 San nandeꞌe sa nuyaꞌa kunaꞌnu nu san ntsuꞌu na kuu luchi ntsu.
Andu kee andivi
31 Ia kée andivi kunaꞌnu ntseꞌe ia sa kuxi ndidaa ñayii. Kuan ñayii io nuꞌu ya nuꞌu ya kaku, san ñayii yaꞌa kaꞌan sa io ñuyii yaꞌa. Doko ia kée andivi tastuni ka sa kuxi ndidaa ñayii. 32 San kaꞌan ia sa xíni ia xiꞌin sa tsáku xi ia, san nisa en ñayii ti xininchisa toꞌon yaꞌa. 33 Doko andu xininchisa toꞌon yaꞌa jaꞌa nchukachi sa Ndios ku ia kaꞌan sa ndaa. 34 Kuan tsa tsándaꞌa Ndios kaꞌan tsa toꞌon sadaa ia sa na kaꞌan tsa, kuan Ndios sañaꞌan ia ndidaa sa tastuni Espíritu 35 Tata xinimani ia D̶aꞌa ia san ndidaa náchoꞌon ia ndaꞌa D̶aꞌa ia.d 36 Andu xininchisa ñaꞌan xi Daꞌa ya san io ñuyii ma ndeꞌe xi; doko andu ti xininchisa ñaꞌan xi Daꞌa ya san ma kini ñuyii ma ndeꞌe, sa kini kuu sa deen Ndios.