Ndidaa xani Jesús ti xini nchisa ñaꞌan xi ia
7
San tuꞌu ndidaa jaꞌa, san Jesús ndinoo ia Galilea. Ti nchu ndinoo ia Judea, kuan ndidaa judiu nanduku ñaꞌan tsa sa kaꞌni ñaꞌan tsa. 2 San kuyachi viko nani viko veꞌe tuvixi xi ndidaa judiu.a 3 San sadaa ndidaa xani ia:—Ti kee jaꞌa san kuaꞌan Judea, kuan ndasa ndidaa tsa nchiko ñaꞌan xo na kini tsa sa kida yo. 4 Kuan ñayii nchoxi sa na kini ñaꞌan xi ti kida yuꞌu sa kida. Ndasa kida yo ndidaa jaꞌa san dadana ñaꞌan xi nee ñuyii.
—Vita taꞌan ka ku ora ntsu doko yoꞌo guaꞌa ni kiꞌin yo ora nchoj mee yo ndidaa yo 7 Ñayii ñuyii ya ti xini-uꞌu ñaꞌan yo ndidaa yo; doko ntsuꞌu san uꞌu ntseꞌe xini ñaꞌan ñayii ku ntsu kuan ntsuꞌu kaꞌan ntsu sa kida tsa ndidaa tsa, san ndidaa sa kida tsa kuu sa kuiꞌia. 8 Kuaꞌan ndidaa yo viko kuan. Ntsuꞌu ku kuee ka ntsu sa kiꞌin ntsu, kuan vita taꞌan ka ku kii ntsu.
9 San tuꞌu kaꞌan ia toꞌon yaꞌa san kendoo ia Galilea.
Jesús saꞌan ia viko sa kidaguaꞌa tsa ndidaa tsa veꞌe tuvixi
10 Ndidaa xani ia kuaꞌan tsa viko, danduu saꞌan ia tuku, doko saꞌan yuꞌu ia. 11 Ndidaa judiu kunaꞌnu naduku ñaꞌan tsa viko san kachi tsa ndidaa tsa: —Ami io nu yukua tan?
12 San kuaꞌa ntseꞌe ñayii ndaa s-toꞌon ia sa io ndidaa ñayii ío jukua. Dagua tsa kachi: Ñayii guaꞌa kuu tsa. Doko dagua ka tsa kachi: “Ñaꞌan, en nu dandaa ñaꞌan xi ndidaa ñayii io ñuu yaꞌa kuu nu.”
13 Doko nisa en tsa ti xu kadavaa kuan yuꞌu tsa ndidaa judiu.
14 San ku dagua viko kuan, saꞌan Jesús templu san kesaꞌa ia dakuaꞌa ñaꞌan ia. 15 Danduu ndidaa judiu sani-ini tsa san kachi tsa:
—Naku ntseꞌe da kutuni jnu san ti káꞌvi nu?
16 San Jesús kaꞌan ia san sadaa ia:
—Sa dakuaꞌa ñaꞌan ntsu adi ku diki ni mee ntsu kee, sa dakuaꞌa ñaꞌan ntsu kuu sa taꞌvichiion ia tsandaꞌa ñaꞌan ku ntsu. 17 Tu andu nchu kada sa nchoxi ia, san kini tu sa dakuaꞌa ñaꞌan ntsu kuu xaꞌan Ndios ña sa kee ku diki mee ntsu 18 Andu kaꞌan guaꞌa xi mee san nduku sa ndidaa ñayii na kadakaꞌnu ñaꞌan xi; doko tsa nduku sa na kadakaꞌnu ñaꞌan xi tsa tsandaꞌa ñaꞌan s-tsa, tsa yaꞌa kuu tsa io ndaa, san tsa yaꞌa ti ñoꞌon sa kuiꞌia xanaa tsa.
19 Ama adi Moisés ku tsa chidotuni ley kuan ña? san nisa en yo ti kida sa yodotuni. Naku nchu kaꞌni ñaꞌan yo ku ntsu?
20 Ndidaa ñayii yaꞌa káꞌan:
—Sakakuiꞌia ñoꞌon xanaa yo. Andu nchu kaꞌni ñaꞌan xo?
21 Jesús kaꞌan ia san sadaa ia:
—En dii ni señal kída ntsu, san ndidaa yo sani-ini ntseꞌe. 22 Doko Moisés chidotuni sa na kada circuncidar byo, doko adi Moisés táꞌvichiion, juan sani saꞌa ndidaa tsa nisaꞌnu io diꞌna sa kuj ndo ndidaa ndo, san yoꞌo ndidaa yo kida circuncidar yo en nuyee yiki kuani kuu sábado. 23 San vita ndasa ma yaꞌia ndodo yo ley san kida circuncidarc yo kuani sabado kuu, Naku nadiko yo sa ndáda guaꞌa ntsu en tsa kuꞌu xi nee xikikoño xi kii sabado ya tuda?d 24 Diꞌna ka ntsaꞌa nasa kuu san danduu kodondaꞌa yo ñayii san ma kodondaꞌa duꞌua yo ñayii, guaꞌa ka kaꞌan sa kuu sa ndaa.
Jesús kuu Cristu ia kida sa nanitaꞌvi kuaan ña
25 Kachi uu tsa io Jerusalén:
—Adi nuyaꞌa kuu sa nanduku tsa sa kaꞌni tsa kuan ña? 26 ¡Kuan adi nu in yaꞌa, san kaꞌan nu, san ti en kaꞌan jnu! ña ama ndidaa tsa kunaꞌnu nakininchisa tsa sa nuyaꞌa ku Cristu? 27 Kuan nuyaꞌa xini ndo ami kée nu; doko ora na kixi ia kuu Cristu, nisa en ñayii ma kini ami kee ia.
28 Dandu Jesús niꞌi ntseꞌe kaꞌan ia xiti templu san kachi ia:
—Ndidaa yo xini ñaꞌan ku ntsu san xini yo ami kee ntsu. Doko ntsuꞌu ti vaj ni mee ntsu; kuan io en tsa tsandaꞌa ñaꞌan ku ntsu sa na kij ntsu, ia ti xini yo ndidaa yo, ia yaꞌa kuu ia kuu sa ndaa. 29 Ntsuꞌu xini ñaꞌan ntsu xi ia, kuan ia yaꞌa tsandaꞌa ñaꞌan ku ntsu vaxi, sa kaꞌan ntsu s-toꞌon ia.
30 Juandiku nchu téen ñaꞌan tsa doko nisa en tsa ti kuyee, kuan vita taꞌan ka kii xi ia. 31 Kuaꞌa ntseꞌe tsa ñuu xíninchisa ñaꞌan xi ia san kachi tsa:
—Kii na kixi Cristu kuan, kada tsa kuaꞌaka señal sa kuj s-tsa yaꞌa ña?
Ndidaa fariseu tsandaꞌa tsa ndaꞌa saꞌa tsa sa na ku teen tsa Jesús
32 Ndidaa fariseu nitoꞌon tsa sa kaꞌan ndidaa ñayii yaꞌa xi Jesús ya, san ndidaa dutu ku jnuu xi xiꞌin ndidaa fariseu tsandaꞌa tsa, tsa ntsaa templu sa na teen tsa Jesús. 33 Danduu sadaa Jesús:
—Uu ka kii koo ntsu xiꞌin yo ndidaa yo; sa nuꞌun ntsu sa io tsa tsandaꞌa ñaꞌan ku ntsu. 34 Nanduku ñaꞌan yo san ma naniꞌi ñaꞌan yo, san ami nakoo ntsu ma en yo kachi kiꞌin.
35 Danduu ndidaa judiu kunaꞌnu ndatoꞌon tsa ndidaa mee tsa:
—Ami kiꞌin nuyaꞌa, sa ntsoo ma naniꞌi ñaꞌan ndo? Ama kiꞌin nu sa io ndidaa judiu nchitsa niꞌno sa io ndidaa griegu kuaan san dakuaꞌa ñaꞌan nu xi ndidaa griegu kuaan tuku ña? 36 Nasa nchukachi toꞌon kaꞌan nu: “Nanduku ñaꞌan yo san ma na niꞌi ñaꞌan yo, san kachi nu tuku, sa ma kachi kiꞌin ndo ami koo nu”?
Yutsa kana ndutsa nchito
37 Meru kii kaꞌnu viko yukua san kii yukua ndeꞌe viko kuan,endukuin Jesús san niꞌi ntseꞌe kaꞌan ia:
—Tu andu yichi ndutsa, nakixi sa io ntsu ya san na koꞌo. 38 Andu xininchisa ñaꞌan ku ntsu, san kuenta yodotuni s-tutu ii Ndios, ndutsa nchito kaka xanaa ñayii.f
39 Xiꞌin toꞌon yaꞌa nchukachi Jesús ya sa ndidaa ñayii na kininchisa ñaꞌan xi ia niꞌi Espíritu Santu; doko Espíritu Santu vita kixi ka kuan vitañaꞌa ka xinotaꞌan chiion vaxi ia kada ia xiꞌin vita kadakaꞌnu ñaꞌan ka xi ia andivi.
Ndidaa ñayii taꞌntsadagua
40 Danduu tsaku xi uu tsa io sa io ndidaa ñayii yukua toꞌon yaꞌa san kachi tsa:
—¡Sa ndaa kuu nchisa tsa yaꞌa kuu tsa ntsatu ndo ndidaa ndo!
41 Dagua tsa kachi:
—Tsa yaꞌa kuu Cristu kida sa nanitaꞌvi.
Doko dagua ka tsa kachi:
—Ama distritu Galilea kee Cristu kuan ña? 42 Adii kachi s-toꞌon Ndios sa Cristu ku kuu tsa xayii David san kee tsa ñuu Belén,g ñuu kúu xuun rey David kuan ña?
43 San duꞌua kuaꞌa ñayii taꞌntsadagua sa saꞌa Jesús. 44 Dagua tsa nchu teen tsa Jesús, doko nisa en tsa ti kuyee sa teen ñaꞌan tsa.
Ndidaa tsa tastuni ti xininchisa tsa Jesús
45 Danduu ndidaa tsa ntsaa templu kunuꞌu tsa sa io ndidaa dutu kunaꞌnu xiꞌin ndidaa fariseu san ndidaa tsa yaꞌa sadaa tsa:
—Naku ti ntsaka yo nu vaxi?
46 Ndidaa tsa ntsaa templu sadaa tsa:
—¡Ti en káꞌan kuenta kaꞌan tsa yaꞌa!
47 Danduu ndidaa fariseu sadaa tsa:
—Ama ntsa ndeꞌe yoꞌo dandaa ñaꞌan nu xi tuku ña? 48 Ama xininchisa ñaꞌan dakaa en tsa kunaꞌnu ya ña dakaa fariseu ya xininchisa ñaꞌan nu ña? 49 Doko ñayii ti xini ley san taꞌnu ntsatu.
50 Nicodemu, en fariseu sa ntsaꞌa ñaꞌan xi Jesús ya en niñu sadaa tsa:h
51 —Ku ley ndo kachi sa ma dakuidokuachi duꞌua ndo en ñayii, maska sa diꞌna ka na kunini ndo xiꞌin na ntsaꞌa ndo nasa kída tsa?
52 San sadaa tsa:
—Yoꞌo ku yo en nu io Galilea kuan tuku ña? Nanduku ndidaa sa yodotuni sa Galilea ma kixi en x-profeta Ndios.
Ñadeꞌe ndetuu xiꞌin tsa ti kuu xee ña
53 San ndiden ndiden kunuꞌu tsa xeꞌe tsa.