8
Doko Jesús kuaꞌan ia tinduu nani Olivos, 2 san datsañuꞌu ntseꞌe kunuꞌu ia templu. San kuaꞌa ntseꞌe ñayii io ñuu xu kixi sa io ia, san intsaku ia dakuaꞌa ñaꞌan ia. 3 Danduu uu tsa dadana ñaꞌan ley xiꞌin uu fariseu ntsaka tsa en ñadeꞌe naniꞌi tsa katuu ña xiꞌin tsa ti kuu xee ña; san sani ñaꞌan tsa dagua dagua, 4 san sadaa tsa:—Maestru, naniꞌi ñaꞌan xi ñadeꞌe yaꞌa katuu ña xiꞌin tsa ti kuu xee ña. 5 Sa chídotuni Moisés kachi sa na chidoyuu ñaꞌan xi ndidaa ña duꞌua kida.a Mee ni kin nasa kachi ni?
6 Jaꞌa kachi tsa ndasa nchu kototuni ñaꞌan tsa, ndasa na niꞌi da kuidokuachi ñaꞌan tsa. Doko Jesús, nantsaꞌa ia ichi nuꞌu san kesaꞌa ia tsaa ia nuꞌu xiꞌin dikindaꞌa ia. 7 San ndukutoꞌon ni on tsa, san ndaneꞌe ia jnu ia san sadaa ia:
—Da yo ti io x-kuachi xi san na kua ñaꞌan diꞌna nuu yuu jnu yaꞌa. 8 San noneꞌe ni tuku ia jnuu ia san tsaa ni on ia nuꞌu. 9 Doko tsaku s-tsa yaꞌa ndidaa tsa, san eni tsa eni tsa kunuꞌu san diꞌna ka ndidaa tsa nisaꞌnu kunuꞌu. San meeni ka Jesús xiꞌin ñadeꞌe in da jukua. 10 Danduu ndukuin ia san ndukutoꞌon ia:
—Ami io tsa ndidaa tsa tan? Ti en dakuidokuachi ñaꞌan yo ña?
11 San ña yaꞌa kachi ña:
—Nisa en ña, Toꞌo.
Danduu Jesús sadaa ia:
—Nisa ntsuꞌu ti dakuidokuachi ñaꞌan ntsu yo. Kunuꞌu san ma kada ka yo kuachi.
Jesús kuu sa dayeꞌe ñuyii
12 Kaꞌan ni tuku Jesús xi ndidaa fariseu san sadaa ia:
—Ntsuꞌu ku sa dayeꞌe xi ndidaa ñayii ñuyii ya.b Andu na kunchiko ñaꞌan kuntsu san ma ndinoo sa naa, kuan koo sa dayeꞌe xi sa kuu sa taxi vida.
13 Danduu ndidaa fariseu sadaa tsa:
—Yoꞌo kaꞌan guaꞌa yo xi mee yo; san sa kaꞌan yo xan ti xaꞌvi xi.c
14 Jesús sadaa ia:
—Tu kaꞌan guaꞌa ntsu ku mee ntsu, san sa ndaa kuu, kuan xini ntsu ami kee ntsu san xini ntsu ami kiꞌin ntsu. Doko yoꞌo ti xini yo ami kee ntsu san nisa ti xini yo ami kiꞌin ntsu. 15 Yoꞌo dakuidokuachi ñaꞌan yo ku ntsu kuenta ñayii ñuyii yaꞌa, doko ntsuꞌu ti dakuidokuachi ntsu nisa en ñayii. 16 San tu ntsuꞌu na dakuidokuachi ñaꞌan ntsu san sa dakuidokuachi ntsu ku kuu sa ndaa; kuan adi mee ni ntsuꞌu kuu, Kuan ku Tata ntsu io ia xiꞌin ntsu ia tsandaꞌa ñaꞌan ku ntsu. 17 Sa chidotuni Moisés kachi sa tu ubi ñayii kaꞌan eni toꞌon san juan kuu sa ndaa. 18 Ntsuꞌu kaꞌan ntsu andu kuu ntsu, san duꞌua ni ku Tata ntsu ia tsandaꞌa ñaꞌan ku ntsu kaꞌan ia andu kuu ntsu.
19 Danduu sadaa tsa ndidaa tsa:
—Ami io s-Tata yo?
San sadaa Jesús:
—Nisa ntsuꞌu ti xini yo, san nisa ku Tata ntsu. Tu na kini ñaꞌan yo kuntsu san kini yo ku Tata ntsu.
20 Ndidaa toꞌon yaꞌa káꞌan Jesús ndikeꞌe templu san in yachi ia sa kee tuini doko xi Ndios; san nisa en ñayii ti kuyee sa teen ñaꞌan xi ia, kuan vita saa ka kii xi ia.
Ami kiꞌin ntsu san yoꞌo ma kachi kiꞌin yo
21 Danduu sadaa ni tuku ia:
—Ntsuꞌu kiꞌin ntsu, san nanduku ñaꞌan yo; doko xiti x-kuachi yo xan kuu yo. Ami kiꞌin ntsu, san yoꞌo ma kachi kiꞌin yo.
22 Danduu kachi ndidaa judiu tastuni:
—Ama kaꞌni nu mee nu ña? Kuan kachi nu: Ami kiꞌin ntsu, yoꞌo ma kachi kiꞌin yo.
23 San sadaa ia:
—Yoꞌo ndidaa yo kuu yo ñayii ñuyii yaꞌa; ntsuꞌu kee ntsu nino yukua. Yoꞌo kuu yo xaꞌan ñuyii yaꞌa; san ntsuꞌu ti kuu ntsu xaꞌan ñuyii yaꞌa. 24 Juandiku kachi ntsu yo sa kuu yo xiti ndidaa x-kuachi yo; kuan ti xininchisa yo sa NTSUꞌU KUU, san kuu yo xiti x-kuachi yo.
25 San sadaa tsa ndidaa tsa:
—Yoꞌo Andu kuu yo?
Danduu Jesús sadaa ia:
—Di ni nu kaꞌan ntsu sa kuu ntsu ntsa diꞌna. 26 Kuaꞌa ntseꞌe sa io sa kaꞌan ntsu xiꞌin sa da kuidokuachi ñaꞌan ntsu yo ndidaa yo. Doko ia tsandaꞌa ñaꞌan ku ntsu kuu ia sa ndaa; san ntsuꞌu, san kaꞌan ntsu yo jaꞌa ku sa tsaku ku ntsu sa kachi ia san jaꞌa kaꞌan ntsu xi ñayii ñuyii ya.
27 Doko ti sakuituni xanaa tsa ndidaa tsa sa káꞌan ia sa kuu Ndios ia kuu Tata. 28 Juandiku sadaa Jesús:
—Kii na ndaneꞌe yo ia nduu ñayii ñuyii yaꞌa, san ora yukua kini yo sa NTSUꞌU KUU, san nisadana ti kida ntsu ku diki mee ntsu; ndidaa sa kaꞌan ntsu ya, kaꞌan ntsu ndaa táꞌvichiion ku Tata ntsu. 29 Kuan ia tsandaꞌa ñaꞌan ku ntsu, io ia xiꞌin ntsu. Ku Tata ntsu ti dandoo ñaꞌan ia ku ntsu, kuan ntsuꞌu kida ntsu ndidaa sa nchoxi ia.
30 Neni kaꞌan ia ndidaa toꞌon yaꞌa, san kuaꞌa ntseꞌe ñayii xininchisa ñaꞌan xi ia.
Ndidaa d̶aꞌa Ndios xiꞌin ndidaa d̶aꞌa kuachi
31 Jesús sadaa ia xi ndidaa judiu xininchisa ñaꞌan xi ia:
—Tu yoꞌo na kuin ndaa yo xiꞌin ku toꞌon ntsu ya, ku kuu nchisa yo tsa xininchisa ñaꞌan ku ntsu; 32 san kini yo sa ndaa, san sa ndaa ya kada sa na dayaa ñaꞌan sa tastuni ñaꞌan yo.
33 Sadaa tsa ndidaa tsa:
—Xayii Abraham kuu ntsu ndidaa ntsud san ti en tastuni ñaꞌan. Namodo kachi yo: Naku kachi yo sa dita ñaꞌan xi sa tastuni ñaꞌan kuntsu?
34 Jesús sadaa ia:
—Kachitoꞌon ndaa ntsu yo san ndidaa nu kida kuachi san kuachi tastuni ñaꞌan jnu. 35 Nu kidachiion xi en tsa toꞌo, ma koo nu oni xeꞌe s-toꞌo nu; doko daꞌa kuu sa io ndikii. 36 San duꞌua, tu D̶aꞌa Ndios na dita sa tastuni ñaꞌan kuachi yo san Ndios nduu nchisa s-toꞌo yo 37 Xini ntsu sa kuu yo j-raza Abraham; doko nchukaꞌni ñaꞌan yo ku ntsu, kuan ti taꞌan xanaa yo sa kaꞌan ntsu. 38 Ntsuꞌu kaꞌan ntsu sa dadana ñaꞌan ku Tata ntsu ku ntsu, san yoꞌo kida yo sa tsaku yo sa kida s-tata yo.
39 Ndidaa tsa yaꞌa sadaa tsa:
—Ku tadeꞌe ntsu ndidaa ntsu kuu Abraham.
Jesús sadaa ia:
—Tu kuu nchisa yo d̶aꞌa Abraham, kada yo ndidaa sa xu kada tsa. 40 Doko ntsuꞌu kaꞌan ntsu sa ndaa táꞌvichiion Ndios ku ntsu san yoꞌo ndidaa yo kada nchu kaꞌni ñaꞌan yo ku ntsu. Doko Abraham ti duꞌua xu kada tsa. 41 San yoꞌo kida yo sa kida s-tata yo.
San ndidaa tsa yaꞌa sadaa tsa:
—Ntsuꞌu ndidaa ntsu adi daꞌa daka kuu ntsu. San Ndios kuu endini ku tata ntsu.
42 San danduu sadaa Jesús:
—Tu Ndios kuu s-tata yo san kinimani ñaꞌan yo ku ntsu; kuan jnu Ndios kée ntsu, san adi ku diki mee ntsu vaj ntsu kuan Ndios tsandaꞌa ñaꞌan ku ntsu sa vaj ntsu. 43 Naku ti sakuituni xanaa yo sa kaꞌan ntsu? doko ti san ti nchukunini yo ku toꞌon ntsu. 44 s-Tata yoꞌo ndidaa yo kuu sakakuiꞌia; san xaꞌan xi juan kuu yo, san nchu kada yo sa nchoxi jukua. Kuan diablu kuaan kuu en sa saꞌni ndii ntsa diꞌna nuu. San ti kaꞌan sa ndaa. Kuan ti kaꞌan sa ndaa kaꞌan sa kuu mee, kuan kuu sa naꞌntsa, xiꞌin xoꞌo ndidaa sa naꞌntsa kuu. 45 Doko ntsuꞌu kaꞌan ntsu sa ndaa, san yoꞌo ndidaa yo ti xininchisa yo. 46 Nasa kuu kuachi kachi yo ndidaa yo sa io ku ntsu? San tu kaꞌan ntsu sa ndaa, naku ti xininchisa ñaꞌan yo ku ntsu tuda? 47 Ñayii kuu xaꞌan Ndios sakunini s-toꞌon Ndios. Doko yoꞌo ti kuu yo xaꞌan Ndios, kuan ti nchu kunini yo ndidaa sa kaꞌan ntsu xo.
Jesús kaꞌan ia andu kuu ia
48 Káꞌan ndidaa judiu san sadaa tsa:
—Kachi ndaa ntsu sa yoꞌo kuu yo en tsa io ñuu Samaria san ñoꞌon yo tachi kuiꞌia.
49 San sadaa Jesús:
—Nisa en tachi kuiꞌia ti neꞌe ntsu. Sa kida ntsu kuu sa kida kaꞌnu ntsu ku Tata ntsu, doko yoꞌo ndidaa yo kada sakuntsaa ñaꞌan yo kuntsu. 50 Ntsuꞌu ti nduku ntsu sa na kadakaꞌnu ñaꞌan kuntsu; kuani io en ia nchoxi sa na kadakaꞌnu ñaꞌan yo, doko ia yaꞌa ndaka kuachi. 51 Kachitoꞌon ndaa ntsu xo sa tu andu na kada sa kachi ntsu, san ma ndeꞌe.
52 San sadaa ndidaa judiu:
—Vita ku sa xini ntsu ndidaa ntsu sa tachi kuiꞌia ñoꞌon yo. Abraham xiꞌin ndidaa tsa kaꞌan x-kuenta Ndios ndeꞌe tsa san yoꞌo kachi yo: “Andu na kada sa kachi yo san ma ndeꞌe.” 53 Ama kaꞌnu ka yo sa kuxi ku tata ntsu Abraham xiꞌin ndidaa tsa kaꞌan x-kuenta Ndios san ndidaa tsa yaꞌa ndeꞌe tsa? Andu sani-ini yo sa kuu yo?
54 Jesús sadaa ia:
—Tu ntsuꞌu kidakaꞌnu ntsu mee ntsu sa jaꞌa ti xaꞌvi xi. Andu kidakaꞌnu ñaꞌan kuntsu kuu ku Tata ntsu, ia kachi yo ndidaa yo sa kuu Ndios yo. 55 San ti xini ñaꞌan yo xi ia. Doko ntsuꞌu ku sa xini ñaꞌan ntsu. Tu na kachi ntsu sa ti xini ñaꞌan ntsu, san kuu ntsu en nu naꞌntsa kuenta yoꞌo ndidaa yo. Doko xini ñaꞌan ntsu san kida ntsu sa kachi ia. 56 Abraham, s-tata yo ku-iꞌni ntseꞌe tsa sa kini tsa kuu kii ntsu. San xíni tsa san ku-iꞌni tsa.
57 Danduu sadaa ndidaa judiu:
—Nisa daguacientu kuia ti io yo. San kachi yo sa xíni yo Abraham ña?
58 Sadaa Jesús:
—Kachitoꞌon ndaa ntsu xo sa antika sa koo Abraham, NTSUꞌU KUU.
59 Danduu ten tsa yuu ndidaa tsa sa kua ñaꞌan tsa, doko xíno daꞌvi Jesús, danduu kée yuꞌu ia templu.