En tsayee ntsa kaku tsa kuaa tsa san Jesús ndadaguaꞌa ia nduchinuu tsa
9
En kii xika ia kuaꞌan, san xíni ia en nuyee kuaa ntsa kaku nu, 2 san ndidaa tsa nchiko ñaꞌan xi ia ndúkutoꞌon tsa san sadaa tsa:Maestru, andu kida kuachi nu yaꞌa ña s-tata nu juandiku dakaa nu?
3 San sadaa Jesús:
—Adi nuyaꞌa kida kuachi, san nisa s-tadeꞌe nu. Ndasa na kini ndidaa ñayii sa naꞌnu kida Ndios juandiku duꞌua kaa nuyaꞌa. 4 Nandeꞌe sa kada ndo x-chiion ia neni kuu kii. Kuan ora naa san ti en kachi kadachiion. 5 Neni nakoo ntsu ñuyii ya, kuu ntsu sa dayeꞌe ñuyii.a
6 San tuꞌu kaꞌan ia jaꞌa, san chído ia deen nuꞌu, san kídaguaꞌa ia ntsaꞌyu xiꞌin deen san ntsaꞌyu yukua chído ia nduchinuu nu kuaa. 7 San sadaa ia:
—Kuaꞌan, san ndaꞌa nuu tanki nani Siloé —sa nchukachi, tsandaꞌa ñaꞌan xi.
San saꞌan nu kuaa san ndaꞌanuu nu, san naxikokagua nu san kuu ntsaꞌa nu. 8 Ndidaa tsa xu kini ñaꞌan jnu yaꞌa, xu kini tsa sa nu yaꞌa xu kaka nu obra, san kachi tsa ndidaa tsa:
—Adi nuyaꞌa kuu nu xu kaka obra kua ña?
9 Dagua tsa kachi:
—Nu yaꞌa kuu nu.
San uu ka tsa kachi:
—Ñaꞌan. Doko duꞌua kaa nu.
San nuyaꞌa kachi nu:
—Dan kuu da.
10 Danduu sadaa tsa ndidaa tsa:
—Nasa kída yo kuan kuu ntsaꞌa yo vita.
11 San sadaa tsa:
—Tsa nani Jesús kídaguaꞌa tsa ntsaꞌyu, san chido tsa nduchinuu da ya san kachi tsa: “Kuaꞌan tanki nani Siloé san ndaꞌa nuu.” San saꞌan da san ndaꞌa nuu da, san vita kuu ntsaꞌa da.
12 San sadaa tsa ndidaa tsa:
—Ami io nu yukua?
San nu yaꞌa sadaa nu:
—Ti xini da.
Ndidaa fariseu danaꞌma tsa nuyee nduguaꞌa nduchinuu xi
13 San ntsaka ñaꞌan tsa ndidaa tsa xi nu nduguaꞌa jnu xi jnu ndidaa fariseu, 14 kuan kii kída guaꞌa Jesús ntsaꞌyu san nákan nduchinuu nuyaꞌa kuu en sábado.b 15 Danduu ndidaa fariseu ndukutoꞌon tsa nasa kida sa nduguaꞌa nduchinuu nu, san nuyaꞌa sadaa nu:
—Tsa yukua chído tsa ntsaꞌyu nduchinuu da ya; san ndaꞌa nuu da san kúu ntsaꞌa da.
16 Dagua fariseu kachi tsa:
—Nu yaꞌa adi Ndios tsandaꞌa ñaꞌan jnu, kuan ti ndexavi nu sábado.c
San dagua ka tsa kachi:
—Ama guaꞌa ni kada en tsa io x-kuachi xi ndidaa sa naꞌnu yaꞌa ña?
San taꞌntsadagua ndidaa tsa yaꞌa kuan ti xininchisa taꞌan tsa. 17 Danduu ndukutoꞌon nituku tsa xi nu na tuu nduchinuu xi kuan:
—Yoꞌo kin, andu sani-ini yo sa kuu nu, kuan ndadaguaꞌa nu nduchinuu yo xan.
San nuyaꞌa kachi nu:
—En profeta kuu tsa.
18 Doko ndidaa judiu tastuni ti nchu kininchisa tsa sa nuyaꞌa kuu nu kuaa kuan, san vita tuu jnu nu, san kána tsa s-tadeꞌe nuyaꞌa, 19 san ndukutoꞌon tsa san sadaa tsa:
—Nu yaꞌa kuu d̶aꞌa ni ña, nu kachi ni sa duꞌua ni kuaa ntsa káku kuaan ña. Naku vita tuu jnu nu tuda?
20 San kaꞌan s-tadeꞌe nu san sadaa tsa:
—Xini da sa nuyaꞌa kuu d̶aꞌa da san ntsa kaku nu kuaa nu; 21 doko ti xini da naku vita tuu jnu nu, san nisa ti xini da andu ndadaguaꞌa ñaꞌan nu. Ndukutoꞌon ni xi mee nu kuan sa savaꞌanu san mee nu na kachitoꞌon.
22 s-Tata nuyaꞌa duꞌua sadaa tsa kuan yuꞌu tsa ndidaa tsa tastuni kuu judiu, kuan ndidaa tsa yaꞌa ndátoꞌon tsa sa kineꞌen ñaꞌan tsa veꞌe sinagoga xi ndidaa ñayii na kininchisa ñaꞌan xi Jesús sa kuu ia Mesías. 23 Juandiku sadaa s-tadeꞌe nu: “Ndukutoꞌon ni xi mee nu kuan sa savaꞌa nu.”
24 San kána nituku tsa ndidaa tsa nuyee ndúguaꞌa kuan san sadaa tsa:
—Chiñuꞌu Ndios san kachitoꞌon ndaa ku ntsu. Ntsuꞌu ndidaa ntsu xini ntsu sa nuyaꞌa ku en nu io x-kuachi xi.
25 San nuyaꞌa sadaa nu:
—Tu kuu tsa en tsa io x-kuachi xi, dan ti xini da. Sa xini da kuu sa kuaa da naku, san vita tuu jnu da.
26 Danduu sadaa tsa ndidaa tsa:
—Nasa kída nu xo? Nasa kida nu sa tuu nduchinuu yo xan?
27 San sadaa nu tuu jnu xi kuan:
—Sa kachitoꞌon da jni ve, doko ti nchu kininchisa ni. Naku nchoj ni sa na kachitoꞌon nituku da. Ña ama nchu kunchiko ñaꞌan ni tuku ña?
28 Danduu nduden tsa yaꞌa ndidaa tsa jnu:
—Yoꞌo nchiko yo nuyaꞌa, doko ntsuꞌu ndidaa ntsu nchiko ntsu Moisés. 29 Ntsuꞌu xini ntsu sa Ndios káꞌan ia xi Moisés, doko nuyaꞌa ti xini ntsu ami kée nu.
30 Nuyee yaꞌa sadaa nu:
—Naku da kachi ni. Ti xini ni ami kee tsa, san dan ndadaguaꞌa tsa nduchinuu da. 31 Xini ndo sa Ndios ti sakunini ia ñayii io x-kuachi xi; doko sakunini ñaꞌan ia xi ñayii chiñuꞌu ñaꞌan xi ia xiꞌin ñayii kida sa nchoxi ia. 32 Ti on tsaku sa en ñayii ndadaguaꞌa jnu en nu kuaa ntsa kaku. 33 San tu Ndios ti tsandaꞌa ñaꞌan s-tsa yaꞌa, san ma kachi kada tsa nisadana.
34 San sadaa ndidaa fariseu:
—Yoꞌo kuaꞌa kuaꞌa x-kuachi yo io, san nchu dakuaꞌa ñaꞌan yo kuntsu ndidaa ntsu ña? San kineꞌen ñaꞌan tsa jnu yaꞌa xiti veꞌe sinagoga.
Ndidaa ñayii kuaa espíritu xi
35 Jesús niꞌitoꞌon ia sa kineꞌen ñaꞌan xi nuyee yaꞌa xiti veꞌe sinagoga; san naniꞌi ñaꞌan ia san sadaa ia:
—Yoꞌo xininchisa yo d̶aꞌa Ndios kuaan ña?
36 San nu yaꞌa sadaa nu:
—Toꞌo kachitoꞌon ni andu kuu tsa kuan na kininchisa ñaꞌan da s-tsa.
37 Jesús sadaa ia:
—Sa xíni ñaꞌan yo, ntsuꞌu ku ntsu, tsa ndatoꞌon xiꞌin yo ya.
38 Danduu nu yee sakuixiti nu jnu Jesús san sadaa nu:
—Toꞌo xininchisa ñaꞌan da jni.
39 San sadaa Jesús:
—Ntsuꞌu vaj ntsu ñuyii yaꞌa sa kada ntsu sa na ketuu ndidaa sa ñoꞌon xanaa ñayii, ndasa na tuu jnu tsa kuaa, xiꞌin ndasa ndidaa tsa tuu jnu xi ma tuu jnu tsa.
40 Uu fariseu io jukua tsaku s-tsa toꞌon yaꞌa, san ndukutoꞌon tsa:
—Ama ntsuꞌu ndidaa ntsu kuaa ntsu ña?
41 Jesús sadaa ia:
—Tu yoꞌo kuaa yo ndidaa yo san ma koo x-kuachi yo; doko kachi yo sa tuu jnu yo, juandiku io x-kuachi yo.