Sa kida kuiꞌia ñaꞌan xi ñayii
15
Danduu uu fariseu xiꞌin uu tsa dadana ñaꞌan ley kee Jerusalén saꞌan tsa jnu Jesús, san ndukutoꞌon tsa:2 —Naku ti xininchisa ndidaa tsa nchiko ñaꞌan jni xan ndidaa sa dakuaꞌa ñaꞌan ndidaa ndii ku tadeꞌe ndo? Kuan ti ndaꞌa tsa modo taꞌvichiion ley sa ndaꞌa tsa, antika sa kaj s-tsa.
3 San kaꞌan Jesús san sadaa ia:
—Naku yoꞌo dandoo yo ndidaa yo sa táꞌvichiion Ndios san chodoꞌo ka yo ndidaa yo sa dakuaꞌa ñaꞌan ndidaa s-tadeꞌe yo? 4 Kuan Ndios kachi ia: “Chiñuꞌu s-tadeꞌe yo”,a san “Andu nakaꞌan kuiꞌia xi s-tadeꞌe xi san nandeꞌe sa kuu.”b 5 Doko yoꞌo kaꞌan yo sa tu dakaa ñayii na kadaa xi s-tadeꞌe xi: “Ndidaa sa chintsee ñaꞌan da ni sañaꞌan da ndidaa xi Ndios”; 6 tu andu duꞌua nakada san kuani ma chintsee ñaꞌan ka xi s-tadeꞌe xi segun me yo ndidaa yo. San duꞌua ti xininchisa yo s-toꞌon Ndios sa saꞌa xi sa dadana ñaꞌan s-tadeꞌe yo 7 ¡yoꞌo ñayii uu jnu xi! Káꞌan ndaa Isaías x-profeta Ndios sa kuu yo ndidaa yo, kuenta kachi tsa:
8 Ñuu yaꞌa ñee xuꞌu ni nu kandodo toꞌon kaꞌan nu sa chiñuꞌu ñaꞌan nu ku ntsu,
doko xanaa nu io xika sa io ntsu.
9 San ti xaꞌvi xi sa chiñuꞌu ñaꞌan nu,
kuan sa dadana ñaꞌan nu ku sa taꞌvichiion ñayii.c
10 Danduu Jesús kána ia ndidaa ñayii san sadaa ia:
—¡Ku nini san na kukuituni xanaa yo! 11 Sa saxi ñayii ti kida kuiꞌia ñaꞌan xi ñayii jnu Ndios; ndidaa sa kana xanaa ñayii, juan kida kuiꞌia ñaꞌan xi ñayii jnu Ndios.
12 Danduu kuyachi ndidaa tsa nchiko ñaꞌan xi ia san sadaa tsa:
—Xíni ni sa ndidaa fariseu kuan ti nátaꞌan xanaa tsa sa duꞌua sadaa ni kuan ña?
13 Doko Jesús sadaa ia:
—Ndidaa tu tata ti na choꞌon ku tata ntsu ia io andivi toꞌon ia ntsa xoꞌo xi. 14 Kodaa nu ndidaa nu. Kuan kuaa nu ndidaa nu san ntsaka nu, nu kuaa. Tu nu kuaa ntsaka nu nu kuaa, nduu nu kikagua niꞌno xiti en yavi.d
15 San kaꞌan Pedru san sadaa tsa:
—Kachitoꞌon ni nasa nchukachi toꞌon dadaguataꞌan yaꞌa.
16 San Jesús sadaa ia:
—Nisa yoꞌo ndidaa yo ti sakuituni xanaa xi ña? 17 Ama ti xini yo sa ndidaa sa saj ndo saꞌan ku xiti ndo, san danduu kee ora saꞌan ndo sa tavi-ini ndo. 18 Doko sa kana xuꞌu ñayii juan ñoꞌon xanaa ñayii,e san juan kida kuiꞌia ñaꞌan xi ñayii jnu Ndios. 19 Kuan xanaa ñayii kana ndidaa sa saꞌni ndii, sa sakoo xiꞌin ñadeꞌe ti kuu d̶eꞌe xi, ndidaa sa kuiꞌia ñoꞌon d̶iki ñayii, sa duꞌu, sa naꞌntsa, sa da kuidokuachi ñaꞌan xi enka ñayii xiꞌin sa kaꞌan kuiꞌia xi Ndios. 20 Ndidaa jaꞌa kuu sa kida kuiꞌia ñaꞌan xi ñayii jnu Ndios, doko ñayii ti ndaꞌa modo taꞌvichiion antika sa kaxi ita adii juan kida kuiꞌia ñaꞌan xi ñayii jnu Ndios.
En ñadeꞌe kuu enka ñuu, xininchisa ñaꞌan xi Jesús
21 Kee Jesús jukua, san kuaꞌan ia región io ñuu nani Tiro xiꞌin Sidón. 22 San danduu en ñadeꞌe io en ñuu nani Caná kée ñuu yukua, san kaꞌan ña san sadaa ña:
—Toꞌo, j-raza David, ¡kunda-ini ñaꞌan ni d̶a! D̶aꞌa deꞌe da kida ñaꞌan ntseꞌe en tachi kuiꞌia x-chi.
23 Jesús ti kaꞌan ia nisadana. Danduu kuyachi ndidaa tsa nchiko ñaꞌan xi ia san sakondaꞌvi tsa san sadaa tsa:
—Kadaa ni sa na nuꞌu ña, kuan kana ntseꞌe ña vaxi.
24 San Jesús sadaa ia:
—Ndios táꞌvichiion ia sa nakiꞌin ntsu ku nanduku ntsu ndidaa ñayii xita na ndikachi ñuu Israel.
25 Danduu ki xan san sa kuinxiti ña jnu ia san sadaa ña:
—Toꞌo, ¡chintsee ñaꞌan ni d̶a!
26 San Jesús sadaa ia:
—Ti guaꞌa sa teen xita nuliin san kuañaꞌan xi ina.
27 San ña yaꞌa sadaa ña:
—Jon dii vi Toꞌo. Doko ntsandeꞌe ina saxi ndidaa sa koꞌio x-kaꞌa mesa s-toꞌo te.
28 Danduu Jesús kaꞌan ia san sadaa ia:
—¡Xininchisa ñaꞌan ntseꞌe yo ku ntsu! Na kada sa xika yo.
San d̶aꞌa ña nduguaꞌa ni nu.
Jesús ndada guaꞌa ia kuaꞌa ntseꞌe ñayii kuꞌu xi
29 San kee Jesús jukua, san kuaꞌan yachi ia sa io mar Galilea, san kusaa ia en tinduu san kukoo ia jukua. 30 Kuaꞌa ntseꞌe ñayii nataka sa io ia san ntsaka tsa tsa yakua, tsa kuaa, tsa yakua ndaꞌa xi, tsa ñeꞌe, xiꞌin kuaꞌa ka tsa kuꞌu xi. San taxuku tsa ndidaa ñayii kuꞌu xi ya jnu Jesús sa na ndadaguaꞌa ñaꞌan ia; 31 san duꞌua ndidaa ñayii xuku jukua oni sanaa tsa ndidaa tsa, sa kaꞌan ndidaa tsa ñeꞌe, ndidaa tsa yakua ndaꞌa xi kani, tsa yakua xika tsa xiꞌin tsa kuaa tuu jnu tsa. San kidakaꞌnu tsa Ndios Israel.
Jesús sañaꞌan ia sa kaxi kumi mil tsayee
32 Jesús kána ia ndi uxi-uu tsa nchiko ñaꞌan xi ia san sadaa ia:
—Kunda-ini ntsu ndidaa ñayii ya, kuan sa kuu uni kii ndinoo ndo ndidaa ndo jaꞌa san atuu sa kaj nu ndidaa nu. San ti nchu danuꞌu duꞌua ntsu nu kuan na kada konaa nu ndidaa nu ichi.
33 Danduu ndi uxi-uu tsa nchiko ñaꞌan xi ia sadaa tsa:
—Ami niꞌi ndo ndidaa ndo sa kaxi ndidaa ñayii yaꞌa, san jaꞌa atuu dana sa io, ndasa na nachitu ndidaa ñayii yaꞌa.
34 Jesús ndukutoꞌon ia:
—Nada ita-stila neꞌe yo?
San sadaa ndidaa tsa yaꞌa:
—Usa xiꞌin umiꞌi chaka yiki.
35 Danduu táꞌvichiion ia sa na kukoo tsa ndidaa tsa nuꞌu. 36 San teen ia ndi usa ita-stila xiꞌin ndidaa chaka yiki, san sañaꞌan ia taxaꞌvi xi Ndios san taꞌvi ia san dayaꞌia ia xi ndi uxi-uu tsa nchiko ñaꞌan xi ia san ndidaa tsa yaꞌa sañaꞌan tsa xi ndidaa ñayii. 37 Ndidaa tsa saxi san nachitu tsa, san danduu nakeꞌen tsa usa yeka chitu pedasu kéndoo. 38 Ndidaa tsa saxi kuu tsa kumi mil tsayee, san ti en kachi ñadeꞌe xiꞌin nuliin. 39 Danduu tuꞌu kunuꞌu ndidaa ñayii, san kundaa ia barku san kuaꞌan ia región Magdala.