Duꞌua kída sa sañaꞌan ia sa kaxi kumi mil ñayii
8
Ndidaa kii yukua nataka nituku kuaꞌa ntseꞌe ñayii, san atuu dana sa kaxi ndidaa ñayii san kana Jesús ndi uxi-uu tsa nchiko ñaꞌan xi ia san sadaa ia:2 —Naku ntseꞌe da kunda-ini ntsu ndidaa ñayii yaꞌa kuan sa ku uni kii io ndo ndidaa ndo jaꞌa san atuu dana sa kaj nu. 3 San tu na naxikoneꞌe ñaꞌan ntsu nu san na nuꞌun nchitsa nu, san konaa nu ichi, kuan dagua nu xika ntseꞌe kee nu.
4 San sadaa ndi uxi-uu tsa nchiko ñaꞌan xi ia:
—Ami kee sa kaxi ndidaa ñayii yaꞌa, san atuu dana sa io jaꞌa.
5 San ndukutoꞌon ia:
—Nadaa ita-stila io?
san ndidaa tsa yaꞌa sadaa tsa:
—Usa.
6 San danduu táꞌvichiion ia sa na kukoo ndidaa ñayii. San teen ia ndi usa ita-stila san sañaꞌan ia taxaꞌvi xi Ndios, san taꞌvi ia san sañaꞌan ia xi ndi uxi-uu tsa nchiko ñaꞌan xi ia ndasa na dakaa nduu tsa ndidaa tsa. San dakaa nduu ndidaa tsa yaꞌa xi ndidaa ñayii. 7 San io ka uu chaka lin tuku. San sañaꞌan ia taxaꞌvi xi Ndios, san táꞌvichiion ia sa na dakaa nduu ñaꞌan ste tuku. 8 Saj s-tsa ndidaa tsa san nachitu ntseꞌe tsa, san nakeꞌen ka tsa usa yeka chitu pedasu ita-stila kendoo. 9 San ndaa kumi mil ñayii kuu sa sáxi. San danuꞌu ñaꞌan ia; 10 san danduu kunantsee ia barku xiꞌin ndi uxi-uu tsa nchiko ñaꞌan xi ia, san kuaꞌan ia ndaꞌa ñuu nani Dalmanuta.
Ndidaa Fariseu xika tsa señal xiꞌin sa naꞌnu na kada Jesús
11 San kee ndidaa fariseu san kesaꞌa tsa ndukutoꞌon tsa xi Jesús, san nchu kini tsa en señal andivi, kuan nchu kototuni ñaꞌan tsa. 12 San xita xanaa ia xiꞌin nduu ndaꞌvi x-espíritu ia san kachi ia:
—Naku xika ndidaa ñayii io ndidaa kii yaꞌa señal? Kachi ndaa ntsu sa ndidaa ñayii yaꞌa ma dadana ñaꞌan ntsu nisa en señal xi.
13 San dandoo ñaꞌan ia san kunantsee ia barku san kuaꞌan ia ichi enka ndodo ndutsa.
Jesús kaꞌan ia sa ndidaa sa dakuaꞌa ñaꞌan ndidaa fariceu kuu kuenta levadura
14 San dana ndi uxi-uu tsa nchiko ñaꞌan xi ia sa kuneꞌe tsa sa kaj s-tsa ndidaa tsa, san endii ita-stila neꞌe tsa kuaꞌan ndidaa tsa. 15 San táꞌvichiion ia, san sadaa ia:
—Ntsaꞌa ka; guaꞌa yo xiꞌin levadura ndidaa fariseu xiꞌin levadura Herodes.
16 San ndi uxi-uu tsa nchiko ñaꞌan xi ia ndatoꞌon tsa ndidaa mee tsa, san kachi tsa:
—Gua sa ti neꞌe ndo ita-stila juandiku da kachi tsa.
17 San xinituni ia san sadaa ia:
—Naku kada s-toꞌon ita-stila ndaa yo ndidaa yo? Ti sakuituni xanaa yo san nisa vita kinituni ka yo? Naku ntseꞌeda ntsee xanaa yo. 18 Io nduchinuu yo san ti tuu, io d̶oꞌo yo san ti tsaku xi? ama ti naꞌa yo ndidaa yo. 19 Kuenta taꞌvi ntsu ndi oꞌon ita-stila sa ío oꞌon mil tsayee, san nadaa ka yeka ita-stila dagua nachii yo?
san sadaa ndi uxi-uu tsa nchiko ñaꞌan xi ia:
—Uxi uu.
20 San kuenta taꞌvi ntsu usa ita-stila sa ío kumi mil ñayii, san nadaa yeka pedasu ita-stila nakeꞌen yo.
San sadaa ndidaa tsa yaꞌa:
—Usa.
21 San sadaa ia:
—Naku ti sakuituini xanaa yo tuda?
Jesús ndadaguaꞌa ia en tsa kuaa io ñuu nani Betsaida
22 Saa Jesús en ñuu nani Betsaida, san sa ntsaka tsa ndidaa tsa en tsa kuaa san sakondaꞌvi tsa sa na kukoꞌon ñaꞌan ia. 23 San danduu teen ia ndaꞌa tsa kuaa, san kineꞌen ñaꞌan ia ñuu yukua. San chido ia deen jnu tsa yaꞌa san sakindodo ñaꞌan ia ndaꞌa ia san ndukutoꞌon ia: Tuu jnu yo ña? 24 San ntsaꞌa tsayee yaꞌa san kachi tsa:
—Tuu doko yaa yaa xini da ndidaa ñayii xan, doko kuenta kaa yutu kaa tsa san xika.
25 Danduu sakindodo nituku ia ndaꞌa ia jnu tsayee, san guaꞌa ntseꞌe na tuu jnu tsa. San nduguaꞌa nduchinuu tsa san guaꞌa ntseꞌe natuu san xika xu kini. 26 Danduu Jesús sadaa ia sa na nuꞌu tsa xeꞌe tsa, san sadaa ia tuku:
—Ma kadavaa yo ndidaa ñuu xan.
Sa naꞌma Pedru
27 San danduu saa Jesús xiꞌin ndi uxi-uu tsa nchiko ñaꞌan xi ia, ñuu nani Cesarea xuun Filipos, san ichi kuaꞌan ia ndukutoꞌon ia xi ndi uxi-uu tsa nchiko ñaꞌan xi ia:
—Andu kachi ñayii sa kuu ntsu?
28 San sadaa ndidaa tsa yaꞌa:
—Dagua ñayii kaꞌan sa kuu ni Juan tsa dakuendutsa ñaꞌan; san dagua ñayii kaꞌan sa kuu ni Elías, san dagua ñayii kaꞌan sa kuu ni dakaa en x-profeta Ndios.
29 Danduu ndukutoꞌon ia:
—San yoꞌo ndidaa yo kin, andu kachi yo sa kuu ntsu?
San sadaa Pedru:
—Dini kuu Cristu tsa tsandaꞌa Ndios, sa kada sa na nanitaꞌvi ñayii.
30 San sadaa ia sa nisa en ñayii ma nakani tsa xi.
Jesús kaꞌan ia sa ndeꞌe ia
31 San kesaꞌa ia dakuaꞌa ñaꞌan ia sa ia nduu ñayii ñuyii yaꞌa taꞌan ntseꞌe nu, san ma kini mani ñaꞌan ndidaa tsa nisaꞌnu jnu, ndidaa dutu kunaꞌnu xiꞌin ndidaa tsa dakuaꞌa ñaꞌan ley, san kaꞌni ñaꞌan jnu, doko nandoto nu nduu uni kii. 32 San sadaa ndaa ia. Danduu Pedru kineꞌen ñaꞌan deen tsa san kesaꞌa tsa nduden tsa naku da sanitoꞌon ia. 33 Doko naxikokagua ia san nantsaꞌa ia jnu ndidaa tsa nchiko ñaꞌan xi ia, san nduden ia xi Pedru san sadaa ia:
—Xikokuin sa io ntsu ya yoꞌo kuan kuenta kaꞌan sakakuiꞌia kaꞌan yo, kuan ti sani-ini yo sa ku xaꞌan Ndios, sani-ini yo kuenta ñayii ñuyii yaꞌa.
34 San kána ia ndidaa ñayii xiꞌin ndi uxi-uu tsa nchiko ñaꞌan xi ia, san sadaa ia:
—Tu andu nchu kunchiko ñaꞌan ku ntsu, san nandeꞌe sa kaꞌntsa-ini mee, na kuido x-cruz xi san na kunchiko ñaꞌan ku ntsu. 35 Kuan nu nchoxi vida xi san dakuita nu, doko nu na dakuita vida xi sa saꞌa ntsu xiꞌin sa saꞌa toꞌon guaꞌa niꞌi nu vida ma ndeꞌe.a 36 Kuan nasa niꞌi ñayii tu nee ñuyii na niꞌi san na dakuita nu vida nu oni oni? 37 Kuan atuu dana sa io ñuyii yaꞌa sa xaꞌvi ka sa kuxi vida ma ndeꞌe. 38 Kuan nu na kukaꞌan jnu xi sa saꞌa ntsu xiꞌin ku toꞌon ntsu, jnu ndidaa ñayii ndee ñadeꞌe chitaꞌan xiꞌin enka tsie, san ia nduu ñayii ñuyii yaꞌa kukaꞌan jnu nu ñayii duꞌua na kada, ora na ndij nu xiꞌin ndidaa sa sandutsa s-Tata nu xiꞌin ndidaa x-ángel nu.