Ndidaa fariseu xiꞌin saduceu xika tsa en señal
16
San kuyachi uu fariseu xiꞌin uu saduceu nchu kototuni ñaꞌan tsa xi ia san xíka tsa sa na kada Jesús en señal ntsaa andivi. 2 Doko Jesús sadaa ia:—Yoꞌo ndidaa yo ntsaꞌa yo andivi ora sa ñini, san kaꞌan yo: “Koo guaꞌa ñuyii, kuan andivi ya nduu kuaꞌa”; 3 San datsa ya tu kaa viko yaa san kaꞌan yo: “Vita kuiꞌia kagua kii kuan andivi ya ku kuaꞌa san kaa viko.” San tu yoꞌo xiniguaꞌa yo ncha kagua kii kuan na kinituni yo sa kaa andivi, naku ti sakuituni xanaa yo ndidaa sa naꞌnu taꞌan ndidaa kii yaꞌa. 4 Ñayii kuiꞌia ñayii ndee ñadeꞌe chitaꞌan xiꞌin enka tsie, kuenta kida ñayii yaꞌa kida yo ndidaa yo kuan xika yo en señal kada ntsu,a doko sa kini yo kuu señal táꞌan Jonás.b
San dandoo ñaꞌan ia san kuaꞌan ia.
Jesús dadana ñaꞌan ia sa sa kuiꞌia dadana ñaꞌan ndidaa fariseu kuu kuenta levadura
5 San yaꞌia ia xiꞌin ndidaa tsa nchiko ñaꞌan xi ia enka ladu ndutsa san dána tsa sa kuneꞌe tsa ita-stila kiꞌin. 6 Danduu Jesús sadaa ia:
—Ntsaꞌa ka, guaꞌa yo xiꞌin j-levadura ndidaa fariseuc xiꞌin saduceu.
7 Tsa yaꞌa kesaꞌa tsa ndatoꞌon tsa ndidaa mee tsa san kachi tsa:
—Sa ti neꞌe ndo ita-stila juandiku duꞌua kachi tsa.
8 Doko Jesús xínituni ia sa kaꞌan tsa ndidaa tsa san sadaa ia:
—Naku sani-ini yo ndidaa yo sa ti neꞌe yo ita-stila, ndidaa yoꞌo nu taꞌa dii xininchisa ñaꞌan ku ntsu? 9 Vita tediki ka yo, san nisa ti na kaꞌan yo ndi oꞌon ita-stila sa na kaya sa saxi ndi oꞌon mil ñayii,d xiꞌin nada ka yeka nakeꞌen yo? 10 Nisa ti naꞌa yo ndi usa ita-stila sa saxi ndi kumi mil ñayiie san nada ka yeka nakeꞌen yo? 11 Naku ti tediki yo sa ti kaꞌan ntsu sa saꞌa ita-stila? ¡Doko guaꞌa yo xiꞌin levadura ndidaa fariseu xiꞌin saduceu! 12 Danduu tediki tsa ndidaa tsa sa ti kaꞌan ia sa saꞌa levadura, kuan sa nchu kachi ia kuu sa na ntsaꞌa tsa ndidaa sa naꞌntsa dadana ñaꞌan ndidaa fariseu xiꞌin saduceu.
Sa naꞌma Pedru
13 Taꞌan sa saa Jesús Cesarea Filipo, san ndukutoꞌon ia xi ndidaa tsa nchiko ñaꞌan xi ia:
—Andu kachi ndidaa ñayii sa kuu ntsu?
14 San ndidaa tsa yaꞌa sadaa tsa:
—Uu tsa kachi sa Juan tsa dakuendutsa ñaꞌan kuu ni; san dagua tsa kachi sa Elías kuu ni; san uu ka tsa kachi sa Jeremías adi dakaa x-profeta Ndios.f
15 San sadaa ia:
—Doko yoꞌo kin, Andu kachi yo sa kuu ntsu?
16 Kaꞌan Simón Pedru san sadaa tsa:
—Dini kuu Cristu, ia kida sa nanitaꞌvi ñayii, D̶aꞌa Ndios nchito.g
17 Danduu Jesús kaꞌan ia san sadaa ia:
—Ndios taxi ia sa guaꞌa yaꞌa yo, Simón d̶aꞌa Jonás, kuan adi ñayii kuu koño xiꞌin niñi kachitoꞌon jaꞌa yo, maska sa Ndios ia kuu ku Tata ntsu ia io andivi kachitoꞌon yo. 18 San ntsuꞌu kachi ntsu sa yoꞌo kunani yo Pedru sa nchukachi yuu;h san sata yuu yaꞌai kadaguaꞌa ntsu ku congregación ntsu, san sa tastuni antsaya ma kadanar ñaꞌan xi. 19 San yoꞌo taj ntsu sa tastuni yo ndidaa ñayii tastuni Ndios. San ndidaa sa na kiꞌni yo nuꞌu ya san ntsuꞌu kiꞌni ntsu andivi san ndidaa sa na dayaa yo nuꞌu ya san ntsuꞌu dayaa ntsu andivi.j
20 San danduu táꞌvichiion ia xi ndidaa ka tsa nchiko ñaꞌan xi ia sa ma kadaa tsa xi nisa en ñayii, sa kuu ia Cristu.
Jesús kaꞌan ia sa ndeꞌe ia
21 San ntsa kii yukua, kesaꞌa Jesús sadaa ia xi ndidaa tsa nchiko ñaꞌan xi ia sa nandeꞌe sa kiꞌin ia Jerusalén san taꞌan ntseꞌe ia kada ndidaa tsa nisaꞌnu, xiꞌin ndidaa dutu kunaꞌnu xiꞌin tsa dakuaꞌa ñaꞌan ley, san kaꞌni ñaꞌan xi ia, doko nandoto ia nduu uni kii. 22 Danduu Pedru kineꞌen ñaꞌan deen tsa san kesaꞌa tsa nduden tsa:
—Toꞌo, Ndios ma kachi ia sa duꞌua taꞌan ni.
23 Doko Jesús sadaa ia xi Pedru:
—¡Kuaꞌa jukua, kuan kuenta kuu sakakuiꞌia ku yo! Kuan ini yo chodaka yo, kuan ti sani-ini yo sa sani-ini Ndios, sani-ini yo sa sani-ini ñayii ñuyii yaꞌa.
24 Danduu sadaa Jesús xi ndidaa tsa nchiko ñaꞌan xi ia:
—Tu andu nchu kunchiko ñaꞌan ku ntsu, san na koo listo sa taꞌan kuenta taꞌán ntsu cruz.k 25 Kuan andu choguaꞌa ntseꞌe vida xi dakuita, san andu na dakuita vida xi sa saꞌa ntsu san na niꞌi.l 26 Kuan nasa guaꞌa niꞌi ñayii tu nakoo ndidaa sa io nee ñuyii s-tsa ndidaa tsa san kuu tsa jnu Ndios. Kuan atuu enka sa xaꞌvi ntseꞌe ka xi sa kuxi vida ma ndeꞌe. 27 Kuan ia nduu ñayii ñuyii yaꞌa ndij nu xiꞌin sandutsa sa dayeꞌe ntseꞌe xiꞌin sa sandutsa s-tata nu xiꞌin ndidaa x-ángel nu,m san duꞌua kuañaꞌan nu xi ndiden en ñayii nasa kuu sa kída ñayii.n 28 Kachi ndaa ntsu yo sa dagua tsa io jaꞌa, ma ndeꞌe tsa ntsa na kini tsa ia nduu ñayii ñuyii yaꞌa na ndij nu xiꞌin sa tastuni nu.