Ndidaa sa kida kuiꞌia ñaꞌan xi ndidaa ñayii
7
San saꞌan yachi ndidaa fariseu sa io Jesús xiꞌin uu tsa dakuaꞌa ñaꞌan ley ndidaa tsa yaꞌa kee tsa Jerusalén. 2 Ndidaa tsa yaꞌa xíni tsa sa ndi uxi-uu tsa nchiko ñaꞌan xi Jesús saj s-tsa san ti ndaꞌa tsa modo taꞌvichiion ley sa ndaꞌa tsa antika sa kaj s-tsa. 3 Kuan ndidaa fariseu xiꞌin ndidaa ñayii ñuu Israel, tu ti kida tsa kuenta senchiion tsa sa ndaꞌa tsa, san ti saj s-tsa, kuan xininchisa ntseꞌe tsa sa táꞌvichiion ndidaa tsa io diꞌna. 4 San ora ndee tsa yaꞌvi san diꞌna ka guaꞌa ntseꞌe ndaꞌa tsa modo senchiion tsa dana kuu sa saj s-tsa, xiꞌin kuaꞌa ntseꞌe ka sa xu kininchisa tsa san kida tsa, kuenta sa nakatsa tsa sa kee sa xiꞌi tsa, ndidaa tindoꞌo xiꞌin ndidaa kidi kaa ku bronce xiꞌin ndidaa xito. 5 Ndukutoꞌon ndidaa fariseu xiꞌin ndidaa tsa dakuaꞌa ñaꞌan ley xi Jesús:—Naku ti xininchisa ndidaa nu nchiko ñaꞌan xo xan sa táꞌvichiion ndidaa tsa io díꞌna, kuan saj nu san ti ndáꞌa nu kuenta senchiion ndo ndidaa ndo?
6 San sadaa ia: Ndidaa yoꞌo ñayii uu jnu xi, ndaa xi Isaías x-profeta Ndios sa kachi tsa sa kuu yo, kuan duꞌua yodotuni:
Ñuu yaꞌa ñee xuꞌu ni nu kandodo toꞌon sa chiñuꞌu ñaꞌan nu ku ntsu,
doko xanaa nu io xika sa io ntsu.
7 San nisadana ti nandeꞌe sa chiñuꞌu ñaꞌan nu ku ntsu,
kuan dakuaꞌa ñaꞌan nu sa taꞌvichion ñayii.
8 San dána nu sa táꞌvichiion Ndios, san kida kuiño ka nu xi ndidaa sa táꞌvichiion ñayii: kuenta sa nakatsa nu tindoꞌo xiꞌin vasu xiꞌin kuaꞌa ntseꞌe ka sa kida nu kuenta jaꞌa. 9 San sadaa ia tuku: Ndiꞌi ntseꞌe ka xanaa yo sa dakuaꞌa ñaꞌan ñayii san dandoo yo en ladu sa táꞌvichiion Ndios. 10 Kuan ley kachi: “Chiñuꞌu s-tadeꞌe yo”, san “nu na kaꞌan kuiꞌia xi s-tadeꞌe xi san na kaꞌni ñaꞌan nu.” 11 Doko yoꞌo ndidaa yo kaꞌan yo sa en ñayii guaꞌani kadaa xi s-tadeꞌe xi “ma kada sa chintsee ñaꞌan da ni kuan ndidaa sa io da ya ku Corban” (sa nchukachi, sa doko xi Ndios) 12 San yoꞌo kaꞌan yo san nu duꞌua kaꞌan, ti nandeꞌe ka sa chintsee nu s-tadeꞌe nu. 13 San duꞌua dandoo yo en ladu ndidaa yo sa táꞌvichiion Ndios, san kida yo ndidaa sa táꞌvichiion ñayii. Xiꞌin kuaꞌa ka sa kida yo ndidaa yo.
14 Danduu kana ñaꞌan Jesús xi ndidaa ñayii san sadaa ia:
—Ku nini ndidaa yo san kani-ini. 15 Jnu Ndios atuu nisadana sa yii ichi xuꞌu ñayii sa kada sa ku kuiꞌia ñayii. Doko sa kida kuiꞌia ñaꞌan xi ñayii jnu Ndios kuu ndidaa sa kana xanaa ñayii. 16 Tu andu io d̶oꞌo xi sa kunini san na ku nini.
17 San tuꞌu kunuꞌu ndidaa ñayii san kunayii ia veꞌe, san ndukutoꞌon ndi uxi-uu tsa nchiko ñaꞌan xi ia nasa nchukachi toꞌon dadaguataꞌan yaꞌa. 18 San sadaa ia:
—Nisa yoꞌo ndidaa yo ti sakuituni xanaa xi ña? Ti sakuituni xanaa yo sa nisa en kosa sa kee ichi xiti ñayii ti kida kuiꞌia ñaꞌan xi ñayii jnu Ndios? 19 Kuan ti kée xanaa ñayii maska sa xiti ñayii kee san kee ora saꞌan ñayii sa tavi-ini ñayii.
—Sa kana xanaa ñayii juan ku sa kida kuiꞌia ñaꞌan xi ñayii jnu Ndios. 21 Kuan xanaa ñayii kana ndidaa sa kuiꞌia sani-ini ñayii, sa sakoo ñayii xiꞌin ñayii ti kuu d̶eꞌe adi xee xi, sa sakoo ñayii xiꞌin ñayii vita tandaꞌa ka xiꞌin, sa saꞌni ndii, 22 sa duꞌu ñayii, sa nchoxi ñayii sa koo ntseꞌe s-tuini ñayii xiꞌin sa koo sa koo xi ñayii ñuyii yaꞌa, sa naꞌntsa, sa kuadu, sa sa kodondaꞌa taꞌan, sa kaꞌan kuiꞌia xi Ndios, sa ntseꞌe nchu kunaꞌnu, sa xini uꞌu taꞌan, sa ti xini nasa kuu sa guaꞌa adi sa kuiꞌia. 23 Ndidaa sa kuiꞌia yaꞌa kana xanaa ñayii san kida kuiꞌia ñaꞌan xi ñayii jnu Ndios.
Duꞌua taꞌan kuenta ndada guaꞌa ñaꞌan Jesús xi d̶aꞌa en ñadeꞌe
24 San kuaꞌan Jesús ñuu Tiro xiꞌin Sidón. San kuyii ia en veꞌe san ti nchoxi ia sa na nitoꞌon ñayii, doko ti kida sa kuinodaꞌvi ia. 25 San nitoꞌon en ñadeꞌe sa juan io ia, san io en d̶aꞌa deꞌe ña neꞌe nu en tachi kuiꞌia juandiku saꞌan ña sa io ia san sakuinxiti ña jnu ia. 26 Ñadeꞌe yaꞌa ti kuu ña ñuu Israel, kuan sirofenicia kuu ña san sakundaꞌvi ña sa na kuiko ia tachi kuiꞌia xi d̶aꞌa ña. 27 Doko Jesús sadaa ia:
—Kuntsatu na tuꞌu kaxi ndidaa daꞌa, kuan ti guaꞌa sa teen xita nu ndidaa nu san dakana jnu ina.
28 San sadaa ña deꞌe:
—Dii vi, Toꞌo; doko ndidaa ina saj ste ndidaa xuchi ita-stila koꞌio xi kichi yiki lin kuan tuku.
29 San danduu sadaa Jesús:
—Guaꞌa ntseꞌe kachi yo, kunuꞌu kuan tachi kuiꞌia sa kee xi d̶aꞌa yo.
30 San kuenta nasaa ña xeꞌe ña, san naniꞌi ña d̶aꞌa deꞌe ña katuu nu jnu xito nu san ti neꞌe ka nu tachi kuiꞌia.
Jesús ndadaguaꞌa ia en nuyee doꞌo san tsatsa nu
31 San ndee ia ñuu nani Tiro, san yaꞌia ia ichi Sidón xiꞌin ndidaa ñuu Decápolis san saa ia mar io Galilea. 32 San juan ntsaka tsa ndidaa tsa en nu doꞌo xiꞌin tsatsa nu, san sakundaꞌvi tsa sa na kukoꞌon ñaꞌan ia jnu kuan na nduguaꞌa nu. 33 San kineꞌen ñaꞌan deen ia sa io ndidaa ñayii jnu san chiꞌi ia dikindaꞌa ia d̶oꞌo nu, san teen ia d̶en ia san chido ia xaa nu. 34 San nantsaꞌa ia andivi san xíta xanaa ia san kachi ia:
—Efata, sa nchukachi: Nakaan.
35 San nonoo ni nakaan d̶oꞌo nu xiꞌin nayaa xaa nu, san kesaꞌa nu kaꞌan nu. 36 San táꞌvichiion Jesús xi ñayii sa ma en kaꞌan ndidaa jaꞌa; doko jaꞌa kuu sa xu kuvaa ntseꞌe ka xi ndidaa ñayii. 37 San xu kani-ini ntseꞌe ñayii san xu kachi tsa ndidaa tsa:
—Ndidaa kuu sa guaꞌa ni kida tsa, kida tsa sa na tsaku xi ndidaa ñayii doꞌo xiꞌin sa na kaꞌan ñayii ñeꞌe.