Xitotuni ñaꞌan xi Jesús
4
Danduu Jesús chítu ia Espíritu Santu, kée ia yutsa Jordán san ntsaka ñaꞌan Espíritu xi ia kuaꞌan desiertu, 2 ubi diko kii xitotuni ñaꞌan sakakuiꞌia xi ia. San ti sáxi ia nisadana ndidaa kii yukua; san xínotaꞌan ndidaa kii yukua, san kuíta ia. 3 Danduu sakakuiꞌia sadaa:—Tu nchisa sa kuu yo D̶aꞌa Ndios, san kadaa xi yuu xan sa na nduu ita-stila.
4 Jesús sadaa ia:
—Yodotuni s-tutu ii Ndios: Adii ni xiꞌin ita-stila ku nchito ñayii, maska sa xiꞌin ndidaa toꞌon kee xuꞌu Ndios. 5 San ntsaka ñaꞌan sakakuiꞌia xi ia kuaꞌan en tinduu duku ntseꞌe, san dadana ñaꞌan ndidaa ñuu tastuni xiꞌin ndidaa sa io ñuyii, 6 san sakakuiꞌia sadaa:
—Taj ntsu sa tastuni yo, xiꞌin ndidaa sa xaꞌvi xi io jaꞌa; kuan ntsuꞌu niꞌi jaꞌa, san kuañaꞌan ntsu xi andu nchu kuaꞌa ntsu. 7 Juandiku tu na kukuinxiti yo san na chiñuꞌu ñaꞌan yo ku ntsu, san ndidaa ku kuu xaꞌan yo.
8 Káꞌan Jesús, san sadaa ia:
—Kuaꞌan juan yoꞌo sakakuiꞌia kuan yodotuni s-tutu ii Ndios: S-toꞌo yo Ndios chiñuꞌu yo, san ia yaꞌa ni kuinokuachi yo jnu xi.
9 San ntsaka ñaꞌan kuaꞌan Jerusalén san sani ndodo ñaꞌan ntsaa d̶iki laviꞌi templu, san sadaa sakakuiꞌia:
—Tsandaꞌa ia x-ángel ia sa na kuntsaa ñaꞌan xo ndasa ma taꞌan yo nisadana,
11 san xiꞌin ndaꞌa nu ku ntsaka ñaꞌan nu xo,
ndasa ma kukodama yo yuu.
12 Kaꞌan Jesús san sadaa ia:
—Duꞌua ni yodotuni s-tutu ii Ndios tuku: “Ma kototuni yo s-Toꞌo yo Ndios.”
13 San tuꞌu xitotuni ñaꞌan sakakuiꞌia, san dandoo ñaꞌan xi Jesús kuan ti kachi kadanar ñaꞌan san ntsatu san ñoꞌon ini ñaꞌan.
Jesús kesaꞌa ia xiꞌin x-chiion ia distritu nani Galilea
14 Jesús chitu ia sa tastuni Espíritu Santu nasaa ia Galilea san ndidaa ñayii io yachi jukua kaꞌan sa naꞌnu kida ia xiꞌin sa dakuaꞌa ñaꞌan ia. 15 Jesús dakuaꞌa ñaꞌan ia xiti veꞌe sinagoga, san ndidaa ñayii kidakaꞌnu sa kuu ia.
Jesús io ia Nazaret
16 Kunuꞌu ia Nazaret, ñuu saꞌnu ia, san kuenta senchiion ia, en sábado sayii ia veꞌe sinagoga, san ndukuin ia sa kaꞌvi ia. 17 San sañaꞌan xi ia en tutu natuu sa chidotuni Isaías x-profeta Ndios; san dandatsa ia tutu, san naniꞌi ia sa yodotuni:
18 Espíritu Ndios io ku ntsu kuan,
táxi ia sa tastuni ntsu sa na kaꞌan ntsu toꞌon guaꞌa xi ñayii ndaꞌvi;
táꞌvichiion ia sa na ndada guaꞌa ntsu ñayii io ndaꞌvi xanaa xi xiꞌin sa na dayaa ntsu ñayii yentsadi
xiꞌin sa na nakaan ntsu nduchinuu ndidaa tsa kuaa;
xiꞌin sa na dayaa ñaꞌan ntsu xi ñayii taꞌan ntseꞌe.
19 Xiꞌin sa na kaꞌan ntsu sa x-kuia guaꞌa Ndios sa saa.
20 San natuu ia tutu san nakua ñaꞌan ia xi tsa kidachiion veꞌe sinagoga, san kukoo ia. San ndidaa tsa intsaku jukua ntsaꞌa ñaꞌan ntseꞌe tsa xi ia. 21 Danduu sadaa Jesús:
—Vita xínotaꞌan san yodotuni tutu yaꞌa jnu ni ndidaa ni.
22 Ndidaa tsa kaꞌan guaꞌa xi Jesús ya san sani-ini ntseꞌe tsa sa i-ntseꞌe vili kaꞌan ia, san kachi tsa:
—Adi d̶aꞌa José kuu nuyaꞌa ña?
23 San Jesús sadaa ia:
—Xini da sa kachi ni toꞌon yaꞌa ndidaa ni: tsa ndada guaꞌa ñayii, ndadaguaꞌa ni meni. Niꞌitoꞌon da sa kuaꞌa ntseꞌe sa kída ni Capernaúm; kada ni juan xuun ni ya tuku.
24 Duꞌua kachi ia tuku:
—Kachi ndaa da jni, sa nisa en x-profeta Ndios ti xiniguaꞌa ñaꞌan s-tsa xuun tsa. 25 Kachi da jni tuku sa ío ntseꞌe ña kee Israel tiempu ío Elías, san andivi ndádi uni yodo kuia, san ío en doko nee ñuu Israel ya; 26 san ti tsandaꞌa ñaꞌan Ndios xi Elías sa chintsee tsa ndidaa ñakee io Israel, saꞌan tsa sa chintsee tsa en ñakee ío Sarepta xuun Sidón. 27 Ío kuaꞌa ntseꞌe tsa kuꞌu xi tsaꞌyu niꞌno x-koño xi Israel tiempu ío Eliseu kuan tuku, doko nisa en tsa ti nduguaꞌa, meni Naamán tsa ío Siria tsa yukua ni nduguaꞌa.
28 Kuenta tsaku xi ndidaa tsa xuku veꞌe sinagoga toꞌon yaꞌa, san nadiko ntseꞌe s-tsa, 29 san ndukuin tsa san kineꞌen ñaꞌan tsa xi Jesús ñuu yaꞌa. San ntsaka ñaꞌan tsa ntsaa d̶iki tinduu sa indodo ñuu, san nchu dakana niꞌno ñaꞌan tsa. 30 Doko Jesús yaꞌia ia dagua dagua san kuaꞌan ia.
Jesús ndada guaꞌa ia en tsayee neꞌe tsa tachi kuiꞌia
31 Jesús kuaꞌan ia Capernaúm, en xuun Galilea, san xu dakuaꞌa ñaꞌan ia ndidaa sábado. 32 San oni sanaa ndidaa ñayii yaꞌa kuan dadana ñaꞌan ia kuenta tsa tastuni nchisa.
33 San io en tsayee veꞌe sinagoga ñoꞌon tsa tachi kuiꞌia, sa tsa yaꞌa kána tsa niꞌi ntseꞌe:
34 —Dandoo ñaꞌan ku ntsu ndidaa ntsu, nasa nchoj xo xiꞌin ntsu Jesús nazaret? Vaj xo datani ñaꞌan yo kuntsu ndidaa ntsu ña? ntsuꞌu xini ntsu andu kuu yo: ¡ia ii tsandaꞌa Ndios!
35 Jesús taꞌvichiion ia sa na kadi xuꞌu xi, san sadaa ia:
—¡Kadi xuꞌu yo san ti kee jnu xan!
San tachi kuiꞌia kee, san dakana ñaꞌan s-tsa yee yaꞌa dagua dagua sa io ndidaa ñayii, doko atuu dana sa kída s-tsa yaꞌa. 36 Ndidaa ñayii yúꞌu ntseꞌe san sani-ini tsa san ndatoꞌon tsa ndidaa mee tsa:
—Na toꞌon ku jaꞌa, kuan tastuni ñaꞌan tsa xi ndidaa tachi kuiꞌia ya, san kee?
37 Sa kída Jesús kuu vaa ntseꞌe ndidaa luguar io yachi.
Jesús ndadaguaꞌa ia nana xido Pedru
38 Jesús kée ia veꞌe sinagoga, san kuyii ia xeꞌe Simón. San jnana xido Simón kuꞌu xan san ñoꞌon ntseꞌe ña kaꞌni, san sakondaꞌvi tsa jnu Jesús sa na chintsee ñaꞌan ia xan. 39 San sakuinxiti ia ichi io ña san táꞌvichiion ia xi kaꞌni sa na kiꞌin, san kuaꞌan; san danduu nduguaꞌa ni ña, san ndukoo ña, san danuu ña sa kaj s-tsa ndidaa tsa.
Jesús ndadaguaꞌa ia kuaꞌa ntseꞌe ñayii kuꞌu xi
40 San kuenta sákandodo ora, ndidaa ñayii io jukua ntsaka ñayii kuꞌu xi kuaꞌan jnu Jesús, ñayii neꞌe nadataꞌan nadatuꞌu kueꞌe, san xu kukoꞌon ñaꞌan ni Jesús, san xu nduguaꞌa tsa ndidaa tsa. 41 San kuaꞌa ntseꞌe tsa xu kee tachi kuiꞌia xi, san xu kana san xu kachi:
—¡Yoꞌo kuu d̶aꞌa Ndios!
Doko Jesús xu nduden ia xi, san ti xu kachi ia sa kaꞌan, kuan ndidaa tachi kuiꞌia ya xu kini sa kuu ia Cristu.
Jesús kaꞌan ia ndidaa veꞌe sinagoga
42 Kuenta yeꞌe, kee Jesús san kuaꞌan ia en luguar ayoo en dana io, san kuaꞌa ntseꞌe ñayii nanduku ñaꞌan xi ia. Sa nániꞌi ñaꞌan tsa ndidaa tsa, san teñaꞌan tsa, kuan ti nchoj s-tsa sa dandoo ñaꞌan Jesús s-tsa ndidaa tsa. 43 Doko Jesús sadaa ia:
—Nandeꞌe sa kaꞌan ntsu toꞌon guaꞌa sa tastuni Ndios ñayii xi ndidaa ka ñuu ya tuku, kuan juandiku tsandaꞌa ñaꞌan ku ntsu vaj ntsu.
44 San xu kiꞌin ia ku kaꞌan ia ndidaa veꞌe sinagoga io Galilea.