Juan tsa dakuendutsa ñaꞌan io tsa desiertu
3
Kuia ku saꞌun tastuni Tiberiu Cesar, kuu Poncio Pilatu tsa tastuni Judea, Herodes tastuni tsa nee Galilea, xani tsa Felipe tastuni nee Iturea nee Traconite san Lisanias kuu tsa tastuni nee Abilinia; 2 ndidaa kii yukua dutu kunaꞌnu ntseꞌe kuu Anás xiꞌin Caifás, Ndios káꞌan ia ntsa desiertu xi Juan d̶aꞌa Zacarías. 3 Danduu Juan ndinoo tsa ndidaa ñuu io yachi jnu yutsa Jordán, xu kaꞌan tsa sa na nata-uꞌu ndidaa ñayii, ndasa na koo sa kaꞌnu-ini sa saꞌa x-kuachi tsa, san na kuendutsa tsa ndidaa tsa, 4 kuenta yodotuni tutu chidotuni Isaías x-profeta Ndios, sa kachi:En tsa kana desiertu:
Danuna xichi tsa Toꞌo;
Ndada ndaa ichi.
5 Ndidaa yodo nachitu, xiꞌin ndidaa tinduu xiꞌin tikoꞌo kono ndu ndaa.
Ichi yoꞌo nduu ichi ndaa;
san ichi nchii yavi, nachitu;
6 san nee ñuyii kini ia tsandaꞌa Ndios sa kada sa naniꞌitavi ndo.
7 Juan sadaa tsa xi ndidaa ñayii xu kiꞌin sa niꞌi ndutsa:
—¡Ndidaa dini ñayii kuiꞌia kuu kuenta koo! Andu kachitoꞌon tuku d̶ini sa ma taꞌan ka ni sa uꞌu vaxi tsandaꞌa Ndios? 8 Kada ni sa guaꞌa san oni na danaꞌa sa na ta-uꞌu nchisa ni san ma kesaꞌa ni kachi ni ndidaa ni: Abraham kuu ku tadeꞌe ndo. Kuan dan kachi da sa yuu yaꞌa guaꞌani kineꞌen Ndios ñayii ku kuu d̶aꞌa Abraham 9 Sa ntsatu vii kaa sa diti xoꞌo yutu, juandiku, ndidaa yutu ti kee kuiꞌi guaꞌa, kaꞌntsa ñaꞌan xi san dakananiꞌno ñaꞌan xi xiti ñuꞌu.
10 Ndidaa ñayii ndukutoꞌon san sadaa:
—Nasa nandeꞌe sa kada da tuda?
11 San sadaa tsa:
—Andu io ubi d̶oꞌno xi san na kuañaꞌan en s-tsa ti io xi, san andu io sa kaxi san duꞌua ni na kada tuku.
12 Saa uu tsa teyaꞌvi tuini sa kuxi Roma sa kuendutsa tsa tuku san ndukutoꞌon tsa:
—Maestru, nasa kada da ndidaa da?
13 San Juan sadaa tsa:
—Ma teen yaꞌvi ni vaaka sa taꞌvichiion jni.
14 Uu soldadu ndukutoꞌon tsa tuku san sadaa tsa:
—San mee da kin, nasa kada da ndidaa da?
Sa tsa yaꞌa sadaa tsa:
—Ma dita ni nisadana xi ñayii san tu dakuidokuachi ñaꞌan ni san ma dakuido ni kuachi nañu ñayii, san ma dita ka ni tuini xi ñayii san ku iꞌni ni xiꞌin xaꞌvi ni.
15 San ndidaa ñayii ñuu yukua nsatu xi Cristu san ndidaa tsa sáni-ini tu Juan kuu ia, 16 Doko Juan sadaa tsa xi ndidaa ñayii io jukua:
—Sa ndaa, dan dakuendutsa ñaꞌan da xiꞌin ndutsa. Doko tsa nchiko vaxi, nisa ti nitaꞌvi da sa dandatsa da xen nchisa tsa, kuan kaꞌnu ntseꞌe ka tsa sa kuj d̶a. Tsa yaꞌa taj s-tsa sa tastuni Espíritu Santu xiꞌin ñuꞌu. 17 Nundaꞌa tsa s-tutindagua tsa sa ndadandoo tsa s-trigu tsa san nachoꞌon guaꞌa tsa, san dakayu tsa paja xiꞌin ñuꞌu ti ndaꞌua.
18 San ndidaa toꞌon yaꞌa káꞌan Juan xiꞌin kuaꞌa ntseꞌe ka sa sadaa tsa, sa kuu toꞌon guaꞌa. 19 Herodes kuan io tsa xiꞌin d̶eꞌe xani tsa Felipe ña nani Herodias juandiku nduden Juan kuan s-tsa kuan kuaꞌa ntseꞌe ka sa kuiꞌia kida tsa, 20 san kída tsa enka sa kuiꞌia: Chiñaꞌan tsa vekaa xi Juan.
Sendutsa Jesús
21 Kuenta dakuendutsa ñaꞌan Juan xi ndidaa ñayii, san kixi Jesús sa kuendutsa ia tuku. San neni kaꞌan ia xi Ndios, nakaan andivi, 22 san Espíritu Santu noo x-chio ia kuenta en data. Danduu tsaku en tsa kaꞌan andivi san kachi:
—Yoꞌo kuu ku Daꞌa ntsu; nu xinimani ntsu xiꞌin taꞌan-ini ntsu.
Xayii Jesús
23 San kesaꞌa ia xiꞌin x-chiion ia, Jesús io ia kuenta oko uxi kuia. Jesús ya ku ia d̶aꞌa José duꞌua xu kani-ini ñayii, José kuu tsa d̶aꞌa Elí, 24 d̶aꞌa Matat, d̶aꞌa Leví, d̶aꞌa Melqui, d̶aꞌa Jana, d̶aꞌa José, 25 d̶aꞌa Matatías, d̶aꞌa Amos, d̶aꞌa Nahum, d̶aꞌa Esli, d̶aꞌa Nagai, 26 d̶aꞌa Maat, d̶aꞌa Matatías, d̶aꞌa Semei, d̶aꞌa José, d̶aꞌa Judá, 27 d̶aꞌa Johanán, d̶aꞌa Resa, d̶aꞌa Zorobabel, d̶aꞌa Salatiel, d̶aꞌa Neri, 28 d̶aꞌa Melqui, d̶aꞌa Adi, d̶aꞌa Cosam, d̶aꞌa Elmodam, d̶aꞌa Er, 29 d̶aꞌa Josué, d̶aꞌa Eliezer, d̶aꞌa Jorim, d̶aꞌa Matat, 30 d̶aꞌa Leví, d̶aꞌa Simeon, d̶aꞌa Judá, d̶aꞌa José, d̶aꞌa Jonán, d̶aꞌa Eliaquim, 31 d̶aꞌa Melea, d̶aꞌa Mainán, d̶aꞌa Matata, d̶aꞌa Natán, 32 d̶aꞌa David, d̶aꞌa Isaí, d̶aꞌa Obed, d̶aꞌa Booz, d̶aꞌa Salmón, d̶aꞌa Naasón, 33 d̶aꞌa Aminadab, d̶aꞌa Aram, d̶aꞌa Esrom, d̶aꞌa Fares, d̶aꞌa Judá, 34 d̶aꞌa Jacob, d̶aꞌa Isaac, d̶aꞌa Abraham, d̶aꞌa Taré, d̶aꞌa Nacor, 35 d̶aꞌa Serug, d̶aꞌa Ragau, d̶aꞌa Péleg, d̶aꞌa Héber, d̶aꞌa Sala, 36 d̶aꞌa Cainán, d̶aꞌa Arfaxad, d̶aꞌa Sem, d̶aꞌa Noé, d̶aꞌa Lámec, 37 d̶aꞌa Matusalén, d̶aꞌa Enoc, d̶aꞌa Jared, d̶aꞌa Mahalaleel, d̶aꞌa Cainán, 38 d̶aꞌa Enós, d̶aꞌa Set, d̶aꞌa Adán, d̶aꞌa Ndios.