Duꞌua kída sa kaku Jesús
2
Ndidaa kii kúu Cesar Augusto tsa tastuni ntseꞌe Roma, táꞌvichiion tsa sa na natodotuni ndidaa ñayii io sa tastuni tsa. 2 Diꞌnanuu tutu yaꞌa ndukoo kuenta kuu Cireniu tsa tastuni Siria. 3 Ndiden ndiden xu nuꞌu ñayii ku natodotuni ami káku tsa. 4 Juandiku José kee tsa ñuu Nazaret, sa kuu xuun Galilea san kuaꞌan tsa Judea san saa tsa ñuu nani Belén sa káku rey David, kuan José kuu tsa j-raza David, 5 ndasa na natodotuni tsa xiꞌin María ñadeꞌe tándaꞌa xiꞌin tsa, san sa ñoꞌon ña daꞌa. 6 San ndidaa kii ío tsa Belén, saa kii sa kaku María daꞌyiki, 7 san káku ña diꞌna nuu daꞌayee yiki. Sa naduku ña nu, san sakituu ndodo ña nu jnu xi sa sa kodo sa saxi kititata, kuan ti niꞌi tsa nduu tsa en veꞌe kendoo tsa.Ndidaa tsa sadi ndikachi xíni tsa ndidaa x-ángel Ndios
8 Io tsa sadi ndikachi ñuu yukua ntsaa tsa ndikachi tsa yuku niñu yukua. 9 San kikii ni en x-ángel Ndios nanuu jnu tsa ndidaa tsa, san dayeꞌe Ndios jnu tsa, san ndidaa tsa yaꞌa yuꞌu ntseꞌe tsa. 10 Doko ángel kuan sadaa:
—Ma yuꞌu yo ndidaa yo, kuan neꞌe ntsu toꞌon guaꞌa sa kuxi nee ñuyii, san ku-iꞌni ntseꞌe ñayii: 11 San vita, Belén sa kuu xuun David, káku en tsa kada sa nanitaꞌvi yo Cristu ia kuu ku Toꞌo ndo. 12 San duꞌua kini yo sa sa ndaa kuu sa kaꞌan ntsu, kuan naniꞌi yo daꞌyiki duku nu titsaa san katuu ndodo nu xiti xi sa sakodo sa saxi kititata.
13 Kikii ni nanuu kuaꞌa ntseꞌe ángel io andivi kidakaꞌnu ñaꞌan xi Ndios san duꞌua kachi ndidaa:
14 ¡Kadakaꞌnu Ndios ntsaa sa io ia
san kadivini nakoo ndidaa ñayii kida sa nataꞌan xanaa ia!
15 Kuenta ndidaa ángel kunuꞌu andivi, san ndidaa tsa sadi ndikachi kachi tsa:
—Na kiꞌin ndo ntsa Belén ku ntsaꞌa ndo nasa kuu sa kachi Ndios kundo.
16 Kama ntseꞌe kuaꞌan tsa, san naniꞌi tsa José xiꞌin María san daꞌyiki katuu nu xiti xi sa sakoꞌon sa saxi kititata. 17 San xíni tsa daꞌyiki san nakani tsa sa sadaa ángel sa ku kuu nu. 18 Ndidaa tsa tsáku xi kíxi sa dayuꞌu ñaꞌan s-tsa sa tsaku s-tsa, sa kachi ndidaa tsa sadi ndikachi. 19 Doko María choꞌon ña xanaa ña san naꞌa vii ña ndidaa toꞌon yaꞌa. 20 Ndidaa tsa sadi ndikachi kunuꞌu tsa san xita tsa xiꞌin kidakaꞌnu tsa Ndios, kuan ndidaa sa xíni tsa xiꞌin ndidaa sa tsáku s-tsa duꞌua táꞌan ndaa sadaa ángel.
Ntsaka tsa Jesús kuaꞌan templu
21 úuu daꞌyiki kuaan una kii, san kída circuncidara tsa nu san danani ñaꞌan tsa Jesús nu, kuan duꞌua sadaa ángel sa kunani nu antika sa koꞌon María kuan nu.
22 San táꞌan kii sa ndundoo ña jnu Ndios kuan duꞌua chidotuni Moisés, san ntsaka tsa nduu tsa Jesús kuaꞌan ñuu Jerusalén sa nakua ñaꞌan tsa nu xi Ndios, 23 duꞌua kuenta yodotuni s-tutu ii Ndios: “Diꞌna nuu daꞌyiki na kaku, tu kuu nu nuyee san ku kuu nu xaꞌan Ndios” 24 san doko tsa kuan duꞌua chídotuni Moisés: Kuañaꞌan tsa ubi ndileu adi ubi data.
25 San Jerusalén io en tsayee inani Simeon en tsa xinokuachi xi Ndios san xu kada tsa sa xu táꞌvichiion ia; san ntsatu tsa sa na nanitaꞌvi ñuu Israel, san Espíritu Ndios io xiꞌin tsa. 26 Tsa yaꞌa sadaa Espíritu Santu s-tsa sa ma kuu tsa ntsa na kini tsa Cristu ia tsandaꞌa Ndios sa kada sa nanitaꞌvi ñayii. 27 San kuaꞌan tsa templu kída Espíritu. San kuenta kuyii s-tadeꞌe Jesús sa kada tsa sa saꞌa nu kuenta taꞌvichiion ley, 28 Simeon nonontsaa tsa daꞌyiki kuan san kidakaꞌnu tsa Ndios san kachi tsa:
29 Vita sa xinotaꞌan ndidaa sa kachi ni,
guaꞌa ni kuu kadi da vita;
30 kuan vita sa xini da xiꞌin nduchinuu da ia tsándaꞌa ni, sa kada sa nanitaꞌvi ñayii,
31 san ndidaa ñuu kini sa kada ni.
32 Nuyiki yaꞌa ku kuu sa dayeꞌe xi ndidaa ñayii ti kuu ñuu Israel xiꞌin
nu kada sa chiñuꞌu ñaꞌan xi Israel.
33 José xiꞌin María sani-ini tsa nduu tsa ndidaa sa kachi tsa yaꞌa sa ku kuu nuyiki yaꞌa. 34 San Simeon káꞌan guaꞌa tsa xi daꞌyiki xiꞌin j-nana nu, san sadaa tsa xi María:
—Ntsaꞌa ka, nuu yiki yaꞌa kada nu sa kuaꞌa ntseꞌe tsa ndukoo xiꞌin kuaꞌa ntseꞌe tsa ndugua, nuu yaꞌa dadana ñaꞌan nu sa Ndios tsandaꞌa ñaꞌan jnu san kuaꞌa ntseꞌe ñayii kini uꞌu ñaꞌan jnu 35 ndasa na ketuu ndidaa sa sani-ini xiꞌin sa ñoꞌon xanaa ñayii. Doko ndidaa jaꞌa ku kuu na en yuchi sa yii xanaa yo.
36 Io en ñadeꞌe nani ña Ana jukua tuku, ña yaꞌa kuu ña d̶aꞌa Fanuel san xu kaꞌan ña toꞌon xu kadaa Ndios xan, san Fanuel kúu tsa s-tribu Aser, ña yaꞌa sa savaꞌa ntseꞌe ña, san ío ña usa kuia xiꞌin xee ña; 37 san sa kúu kumidiko kumi kuia kendoo kee ña, sa ti xu kee ña templu, xu koo ña nduu xiꞌi niñu xu kakataꞌvi ña xiꞌin xu koo nchitsa ña. 38 San ora yukua kesaꞌa ña sañaꞌan ña taxaꞌvi xi Ndios, san kakuneꞌe ña Jesús xi ndidaa ñayii nsatu xi ia kada sa nanitaꞌvi Jerusalén.
Naxikokagua tsa kunuꞌu tsa ñuu nani Nazaret
39 Tuꞌu kída José xiꞌin María ndidaa sa táꞌvichiion Ndios sa yodotuni xi Moisés, sa naxikokagua tsa kunuꞌu tsa Galilea xuun Nazaret. 40 San nuyee yiki ntsee vaxkuaꞌnu ndaꞌa-saꞌa nu, xiꞌin kutuni ntseꞌe jnu; san j-gracia Ndios xu koo xiꞌin nu.
Nu yee yiki nani Jesús io nu templu
41 San ndiden kuia xu kiꞌin s-tadeꞌe Jesús Jerusalén viko nani Pascua. 42 San io Jesús uxi-uu kuia, san kuaꞌan nu xiꞌin s-tadeꞌe nu Jerusalén, kuan duꞌua xu kuenchiion tsa sa kiꞌin tsa viko. 43 Tuꞌu viko, kunuꞌu tsa xeꞌe tsa, doko Jesús kendoo nu Jerusalén, san s-tadeꞌe nu ti nitoꞌon tsa. 44 Sani-ini tsa sa Jesús kunuꞌu nu naꞌma ndidaa ñayii kunuꞌu, san kúu en kii xika tsa, san nanduku tsa sa io xayii tsa xiꞌin jnu ndidaa ñayii mani xiꞌin tsa. 45 Doko ti naniꞌi ñaꞌan tsa jnu, san naxikokagua nituku tsa ku nanduku ñaꞌan tsa ntsaa Jerusalén.
46 Kúu uni kii sa naniꞌi ñaꞌan tsa templu jnu, intsaku nu j-naꞌma ndidaa ñayii dakuaꞌa ñaꞌan ley, san nini ñaꞌan nu xiꞌin ndukutoꞌon nu s-tsa. 47 Ndidaa tsa nini ñaꞌan sani-ini ntseꞌe tsa sa ntseꞌe da kutuni jnu xiꞌin ndidaa toꞌon naxikoneꞌe nu. 48 San kuenta xíni ñaꞌan tsa jnu yuꞌu tsa nduu tsa san j-nana nu sadaa ña:
—Da, Naku dakuu nda kuan kida nda jaꞌa ku ndi? Ntsuꞌu xiꞌin s-tata nda ya nanduku ñaꞌan ndi nda san sani-ini ntseꞌe ndi.
49 Danduu sadaa nu:
—Naku nanduku ñaꞌan ni? Ti xini ni sa x-chiion s-Tata da nandeꞌe sa koo da ña?
50 Doko ti sákuituni xanaa tsa nduu tsa toꞌon kaꞌan nu.