Duꞌua taꞌan en tsayee xiꞌi d̶uku ndaꞌa xi
3
San kuyii nituku ia veꞌe sinagoga, san juan io en tsayee xiꞌi d̶uku ndaꞌa xi san ti kani. 2 San ndidaa tsa xini-uꞌu ñaꞌan xi ia ntsaꞌa tsa ndidaa tsa tu na ndadaguaꞌa ñaꞌan ia sábado kuan s-tsa yaꞌa, san duꞌua na da kuidokuachi ñaꞌan tsa ndidaa tsa xi ia jnu ndidaa tsa tastuni. 3 Danduu sadaa ia xi tsayee kuꞌu xi d̶uku ndaꞌa xi ya:—Ndukuin san kuaꞌan dagua dagua kuin yo.
4 San sadaa ia xi ndidaa tsa yaꞌa:
—Ncha sani-ini ni ndidaa ni, guaꞌa ni sa kada ndo sa guaꞌa sábado ya ña sa kada ndo sa kuiꞌia? Kada ndo sa na kunchito ñayii ña kada ndo sa na kuu ñayii? Doko ndidaa tsa yaꞌa ti káꞌan tsa. 5 San ntsaꞌa ñaꞌan ia san nadiko xi ia san ta-uꞌu ia kuan i-ntseꞌe ntsee d̶iki tsa ndidaa tsa, san sadaa ia xi tsayee:
—Dakaa ndaꞌa yo xan.
San tsa yaꞌa dakaa tsa ndaꞌa tsa san nduguaꞌa tsa. 6 San kee ndidaa fariseu san kesaꞌa tsa ndatoꞌon tsa xiꞌin ndidaa ñayii xiniguaꞌa ñaꞌan xi rey Herodes nasa kada tsa sa kaꞌni tsa Jesús.
Kuaꞌa ntseꞌe ñayii xuku ntsaa ndodo mar
7 Jesús kuaꞌan ia xiꞌin ndidaa tsa nchiko ñaꞌan xi ia ichi ndodo mar san kuaꞌa ntseꞌe ñayii io ndaꞌa ñuu Galilea xiꞌin ndaꞌa ñuu Judea nchiko ñaꞌan kuaꞌan xi ia. 8 San nitoꞌon tsa ndidaa sa kída Jesús, san kuaꞌa ntseꞌe ka ñayii saꞌan sa ntsaꞌa ñaꞌan xi ia, ñayii kee Judea, Jerusalén, Idumea, ndidaa ñayii io enka ndodo yutsa Jordán xiꞌin ñuu Tiro xiꞌin ñayii kee Sidón. 9 Juandiku xíka Jesús xi ndidaa tsa kuaꞌan xiꞌin ia sa na danuu tsa en barku ndasa ma chotaꞌvi ñaꞌan ndidaa ñayii xi ia; 10 Kuan ndadaguaꞌa ia kuaꞌa ntseꞌe ñayii, juandiku ndidaa ñayii nchu kukoꞌon ñaꞌan xi ia 11 San ndidaa tachi kuiꞌia, xu kini ñaꞌan xi ia san xu kukuinxiti tsa neꞌe tachi kuiꞌia ya san xu kana tsa:
—¡Yoꞌo ku D̶aꞌa Ndios!
12 Doko xu kadi ia xuꞌu xi ndasa ma kaꞌan nisadana.
Jesús ndekaxi ia uxi-uu tsa ku kuu ndaꞌa saꞌa ia
13 San danduu kusaa ia yuku san kana ia tsa nchoxi ia sa na kunchiko ñaꞌan xi ia, san ndidaa tsa yaꞌa nchiko ñaꞌan tsa saa yuku kuan. 14 San ndekaxi ia uxi-uu tsa, san danani ñaꞌan ia ndaꞌa saꞌa ia, ndasa na kunchiko ñaꞌan tsa xi ia, xiꞌin sa na kiꞌin tsa ku kaꞌan tsa toꞌon guaꞌa 15 xiꞌin sa na tastuni tsa sa kuiko tsa tachi kuiꞌia xiꞌin sa ndadaguaꞌa tsa ñayii kuꞌu xi. 16 San tsa yaꞌa kuu ndi uxi-uu tsa ndekaxi ia: Tsa nani Simón tsa danani ia Pedru, 17 xiꞌin Jacobo d̶aꞌa Zebedeu, xiꞌin Juan xani Jacobo san tsa yaꞌa ndiani tsa danani ia Boanerges, sa nchukachi tsa kama ntseꞌe sa kaꞌan, 18 xiꞌin Andrés, xiꞌin Felipe, xiꞌin Bartolomé, xiꞌin Mateu, xiꞌin Tomás, xiꞌin Jacobo tsa kuu d̶aꞌa Alfeu, Tadeu tuku, xiꞌin Simón tsa kuu Zelote, 19 xiꞌin Judas Iscariote tsa nakuañaꞌan xi Jesús xi ndidaa ñayii xini-uꞌu ñaꞌan xi ia.
Uu ñayii da kuidokuachi ñaꞌan xi Jesús sa xiko ia tachi kuiꞌia xiꞌin sa tastuni sakakuiꞌia
20 Danduu kuyii ia en veꞌe san kuaꞌa ntseꞌe ñayii taka san nisa ti kida sa kaxi ia ita-stila xiꞌin ndidaa tsa kuaꞌan xiꞌin ia. 21 San nitoꞌon xayii ia sa io ia veꞌe yaꞌa san saꞌan tsa ndidaa tsa sa nakuaka ñaꞌan tsa kuan sani-ini tsa sa ndukueꞌe ia.
22 San ndidaa tsa dakuaꞌa ñaꞌan ley kee Jerusalén kachi tsa: s-tachi Beelzebú sa tastuni ndidaa tachi kuiꞌia, juan neꞌe nu san sa saꞌa xi jaꞌa kineꞌen nu tachi kuiꞌia.
23 San Jesús kana ñaꞌan deen ia san sadaa ia en toꞌon dadaguataꞌan:
—Ama guaꞌa ni kineꞌen ñaꞌan sakakuiꞌia kuan xi mee? 24 Tu tsa tastuni en ñuu naa tsa ndidaa mee tsa san ma kudii tsa. 25 Tu ñayii io en veꞌe na naa ndidaa mee san ñayii io veꞌe yukua ma koo mani. 26 San duꞌua tuku tu sakakuiꞌia naa ndidaa mee san ma kada ka sa koo ntsee san jaꞌa nchukachi sa sa ndeꞌe x-kii xi.
27 Nisa en ñayii ti yii xeꞌe en tsa ntsee ntseꞌe san duꞌu tsa ndidaa sa io, diꞌna ka nchoxi sa kiꞌni ñaꞌan s-tsa. San duꞌua kuu duꞌu tsa ndidaa sa io veꞌe.
28 Sa ndaa kachi ntsu yo sa ndidaa kuachi xiꞌin sa naꞌntsa xiꞌin nasa ka kuu mee, Ndios guaꞌa ni koo ia sakaꞌnu-ini sa saꞌa xi. 29 Doko andu nakaꞌan kuiꞌia xi Espíritu Santu ma koo sakaꞌnu-ini sa saꞌa xi, san duꞌua ni koo x-kuachi nu.
30 Kachi ia toꞌon yaꞌa kuan kachi ndidaa tsa yaꞌa: Tachi kuiꞌia neꞌe nu.
Saa nana Jesús xiꞌin ndidaa x-kuaꞌa ia xiꞌin xani
31 San danduu saa j-nana ia xiꞌin ndidaa xani ia, san ntsatu ña ndikeꞌe, san tsandaꞌa ña sa na ku kana ñaꞌan xi ia. 32 Kuaꞌa ntseꞌe ñayii xuku yachi sa io ia, sadaa:
—Toꞌo, j-nana ni xiꞌin ndidaa xani ni xiꞌin ndidaa x-kuaꞌa ni kaꞌan ña jni ndikeꞌe kuan.
33 San sadaa ia:
—Na kachitoꞌon ntsu andu kuu nchisa ku nana ntsu xiꞌin ku kiani ntsu.
34 San ntsaꞌa ia jnu ndidaa ñayii intsaku juan san kachi ia: