Ndi uxi-uu tsa nchiko ñaꞌan xi ia saꞌntsa tsa yoko trigu kii yodotuni sa ndexavi tsa ndidaa tsa
6
En sábado, yaꞌia Jesús xiti trigu, san ndidaa tsa nchiko ñaꞌan xi ia saꞌnu tsa d̶iki trigu san kiñi tsa san saj s-tsa. 2 San ndukutoꞌon uu fariseu:—Naku kida nu sa ti guaꞌa sa kada nu sabado ya?
3 San Jesús sadaa ia:
—Ama ti káꞌvi ni nasa kída David kuenta kuíta tsa xiꞌin ndidaa ka tsa ntsaka taꞌan xiꞌin tsa ña? 4 Sayii tsa xeꞌe Ndios, san teen tsa ita-stila sa ti guaꞌa sa teen tsa, kuan dutu ni kuaan nitaꞌvi sa teen sa kaxi. San téen tsa san saj s-tsa xiꞌin ndidaa tsa kuaꞌan xiꞌin tsa.
5 San sadaa ia tuku:
—Nu nduu ñayii ñuyii yaꞌa tastuni ñaꞌan nu xi kii sábado ya tuku.
Tsayee nduteꞌe ndaꞌa xi
6 Enka kii sábado, sayii ia veꞌe sinagoga, san dakuaꞌa ñaꞌan ia. San jukua io en tsayee kuꞌu xi ndaꞌa kuaꞌa tsa san ti kani. 7 San ndidaa fariseu xiꞌin ndidaa tsa dadana ñaꞌan ley ntsaꞌa tsa tu na ndadaguaꞌa ñaꞌan ia sábado san duꞌua na da kuidokuachi ñaꞌan tsa. 8 Doko Jesús, xinituni ia sa sani-ini ndidaa tsa yaꞌa, san sadaa ia xi tsa kuꞌu xi ndaꞌa xi:
—Ndukuin ni san kuaꞌan ni dagua dagua kuan kuin ni.
—Nasa kachi ni ndidaa ni: Guaꞌa ni kada ndo sábado ya sa guaꞌa ña sa kuiꞌia? Na chintsee ndo sa na kunchito ñayii ña kada ndo sa na kuu ñayii?
10 San ntsaꞌa ia jnu ndidaa ñayii xuku jukua, san sadaa ia xi tsa kuꞌu xi:
—Dakaa ni ndaꞌa ni xan.
San tsa yaꞌa duꞌua kída tsa, san ndaꞌa tsa nduguaꞌa. 11 San ndidaa tsa yaꞌa nadiko ntseꞌe s-tsa sa na toꞌon tsa ndidaa ni ka mee tsa, san ndatoꞌon tsa nasa kada tsa xi Jesús.
Duꞌua kída sa ndekaxi Jesús ndi uxi-uu tsa nchiko ñaꞌan xi ia
12 Ndidaa kii yukua saꞌan Jesús en tinduu sa kaꞌan ia xiꞌin Ndios, san nee niñu kaꞌan ia xi Ndios. 13 San yeꞌe, san kána ia ndidaa tsa nchiko ñaꞌan xi ia san ndekaxi ia uxi-uu tsa yaꞌa, san danani ñaꞌan ia x-apóstol ia: 14 en tsa kuu Simón tsa danani ia Pedru, xiꞌin Andrés xani Simón; Jacobo xiꞌin Juan, Felipe xiꞌin Bartolomé; 15 Mateu xiꞌin Tomás; Jacobo d̶aꞌa Alfeu, xiꞌin Simón tsa kuu Zelote; 16 Judas xani Jacobo, xiꞌin Judas Iscariote, tsa díko ñaꞌan xi Jesús.
Jesús dadana ñaꞌan ia xi kuaꞌa ntseꞌe ñayii
17 Noo ia tinduu san kukuin ia en yodo, xiꞌin ndidaa tsa nchiko ñaꞌan xi ia xiꞌin kuaꞌa ntseꞌe ka ñayii kée Judea xiꞌin Jerusalén xiꞌin ñayii io Tiro xiꞌin Sidón, tsa kíxi sa kunini ñaꞌan xiꞌin sa nduguaꞌa xi x-kueꞌe xi, 18 san ndidaa tsa neꞌe tachi kuiꞌia nduguaꞌa tsa, 19 san ndidaa ñayii nchu kukoꞌon ñaꞌan xi Jesús; kuan tastuni ia sa ndadaguaꞌa ia ñayii.
Sa kida sa ku-iꞌni xiꞌin sa kida sa na ta-uꞌu
20 San ntsaꞌa ia jnu ndidaa tsa nchiko ñaꞌan xi ia, san kachi ia:
—Guaꞌadiko ndidaa ñayii kundaꞌvi, kuan Ndios tastuni xanaa tsa ndidaa tsa.
21 Guaꞌadiko ndidaa ñayii kuita vitakulii, kuan nachitu ñayii.
Guaꞌadiko dini ndidaa ni ñayii ndaꞌyu, kuan kuáku ni.
22 Guaꞌadiko ni ndidaa ni ora ndidaa ñayii xini-uꞌu ñaꞌan jni, ora xiko ñaꞌan ndidaa ñayii adi kaꞌan kuiꞌia ñayii jni, san ti taꞌan-ini ñayii ntsa sa nani ni kuenta ñayii kuiꞌia, sa saꞌa sa xininchisa ni ia nduu ñayii ñuyii yaꞌa. 23 Ku-iꞌni ni kii yukua, san kuiꞌini ntseꞌe ni, kuan kaꞌnu ntseꞌe en sa niꞌi ni andivi; kuan duꞌua kida s-tadeꞌe tsa ndidaa tsa xi ndidaa xprofeta Ndios.
24 Doko ¡ndaꞌvi ndidaa tsa kuika xan! Kuan sa niꞌi tsa sa nchoj s-tsa.
25 Ndaꞌvi ndidaa dini, tsa ñoꞌon chitu kuan taꞌan ni doko.
Ndaꞌvi ndidaa dini, tsa saku kuan ta uꞌu ni san ndaꞌyu ni.
26 ¡Ndaꞌvi ni ndidaa ni, tu ndidaa ñayii na kaꞌan guaꞌa ni! Kuan duꞌua kida s-tadeꞌe tsa xi ndidaa tsa naꞌntsa ío xu kada naꞌntsa sa kaꞌan sa ndaa.
Sa na nchoxaꞌan xi ndidaa tsa xini-uꞌu ñaꞌan
(Mt 5.38-48; 7.12)
27 Doko ndidaa dini tsa nini, kachi da xi: Kinimani ni ndidaa ñayii xini-uꞌu ñaꞌan ni san kada ni sa guaꞌa xi ndidaa ñayii ti xiniguaꞌa ñaꞌan ni; 28 kaꞌan guaꞌa ni xi ñayii kaꞌan kuiꞌia ni san kaka xi Ndios sa saꞌa ñayii kaꞌan kuiꞌia ni. 29 Ñayii na katu en ladu x-koño jnuu ni san kuañaꞌan ni enka ladu xan; san ñayii na dita d̶oꞌno ni, kuañaꞌan ni x-koton ni xan tuku. 30 Andu na kaka en sa nandeꞌe xi, san kuañaꞌan ni; san andu na teen sa kuu xaꞌan ni, ma nandaka ni sa na naxikoneꞌe ni. 31 Sa nchoj ni sa na kada ñayii ni, duꞌua kada ni xi ñayii tuku.
32 Kuan tu nchoj ni ni ñayii nchoxaꞌan ni, Nasa guaꞌa kuu juan? Duꞌua ni kida ndidaa ñayii kida kuachi. 33 San tu kida ni sa guaꞌa xi ndidaa ñayii kida sa guaꞌa ni, nasa guaꞌa ku juan? Ndidaa ñayii kida kuachi kida juan tuku. 34 San tu sañaꞌan noo ni xi ñayii xini ni sa na taxi, Nasa guaꞌa kuu juan? Duꞌua ni kida ndidaa ñayii kida kuachi kuan sañaꞌan noo tsa xi ndidaa ka ñayii io x-kuachi xi san sakuntsatu tsa sa na naniꞌi vaa ka tsa. 35 Guaꞌa ka, kinimani ñaꞌan ni xi ñayii xini-uꞌu ñaꞌan ni kada ni sa guaꞌa s-tsa ndidaa tsa, san kuañaꞌan noo ni sa ma kuntsatu ni sa naniꞌi vaa ka ni. Kuan tu duꞌua kida ni san guaꞌa ka en sa niꞌi ni taxi Ndios, san kada ni sa kida d̶aꞌa Ndios ia io duku ntseꞌe; kuan ia yukua kuu ia guaꞌa, san sañaꞌan ia xi tsa kuiꞌia xiꞌin tsa sa ini. 36 Ku kuu ni ñayii kunda-ini, kuenta Ndios ia kuu ku Tata ndo, kuu ia kunda-ini.
Ma kodondaꞌa ñayii
(Mt 7.1-5)
37 Ma kodondaꞌa ni enka ñayii, ndasa Ndios ma kodondaꞌa ñaꞌan ia ni, ma da kuidokuachi ni ñayii san Ndios ma da kuidokuachi ñaꞌan ia ni, koo ni sakaꞌnu-ini san Ndios koo ia sakaꞌnu-ini sa saꞌa ni. 38 Kuañaꞌan ni sa nandeꞌe xi enka ñayii, san Ndios taxi ia vaa ka chitu ntseꞌe oni xitsaniꞌno sa taxi Ndios. Kuan modo chikuꞌua mee ni, duꞌua ni chikuꞌua ñaꞌan xi mee ni.
39 San danduu sadaa ia en toꞌon dadaguataꞌan:
—Ama guaꞌani kuntsaka ñaꞌan en tsa kua xi enka tsa kua ña? Ma ndugua niꞌno tsa nduu tsa xiti en yavi ña? 40 Tsa kutuꞌua ti kunaꞌnu ka tsa sa kuxi tsa dakuaꞌa ñaꞌan s-tsa, doko tsa na kutuꞌua guaꞌa san guaꞌa ni ku kuu tsa kuenta tsa dakuaꞌa ñaꞌan s-tsa.
41 Naku ntsaꞌa ni miꞌin yiki kaniꞌno nduchinuu xani ni xan san ti ntsaꞌa ni tinduꞌu kaꞌnu kaniꞌno nduchinuu mee ni xan? 42 Ncha kadaa ni xi xani ni xan: Kuntsatu na tagua ntsu miꞌin yiki kaniꞌno nduchinuu yo xan xanii, san ti ntsaꞌa ni tinduꞌu kaꞌnu kaniꞌno nduchinuu mee ni xan? ¡Ñayii uu jnu xi! tagua ni diꞌna ka tinduꞌu kaniꞌno nduchinuu mee ni xan, san duꞌua tuu guaꞌa ka sa tagua ni miꞌin yiki kaniꞌno nduchinuu xani ni xan.
Sa saꞌa x-kuiꞌi tukuiꞌi nakini ñaꞌan xi na tukuiꞌi kuu
43 Adii tukuiꞌi guaꞌa kuu sa kee kuiꞌi kuiꞌia, nisa tukuiꞌi kuiꞌia ti kachi kee kuiꞌi guaꞌa. 44 Kuan ndiden tukuiꞌi nakini ñaꞌan xi sa saꞌa x-kuiꞌi xi; kuan ti nakeꞌen tichikaꞌakuxi ndidaa tu iñu nisa yuku ndikodo ti kee tinchiꞌio. 45 Ñayii guaꞌa, sa guaꞌa ñoꞌon xanaa ñayii, san sa guaꞌa yukua kaꞌan ñayii; san ñayii kuiꞌia, sa kuiꞌia ñoꞌon xanaa ñayii, juan kaꞌan ñayii. Kuan sa ñoꞌon xanaa ñayii juan kaꞌan ñayii.
Tuku tuku dama saꞌa en veꞌe
46 Naku kaꞌan ni: Toꞌo, Toꞌo, san ti kida ni sa taꞌvichiion da? 47 Na kachitoꞌon da andu ndee ñayii kixi sa io da san sakunini s-toꞌon da ya, san kida. 48 Ndee ñayii en tsayee kídaguaꞌa en veꞌe sa satsa kono tsa san dama tsa saꞌa xi sata totoxio. San kixi en ndutsa ñuꞌu san daꞌvi, ndutsa niꞌi ntseꞌe ñani ntsaa saꞌa veꞌe doko ti kanda, kuan guaꞌa ntseꞌe kuguaꞌa sata totoxio. 49 Doko ñayii tsaku xi s-toꞌon da ya san ti kida, ñayii yaꞌa ndee tsayee kídaguaꞌa xeꞌe xi jnu nuꞌu ni, san ti dama saꞌa xi. San ndutsa niꞌi ntseꞌe ñani saꞌa xi, san ndugua, san kuaꞌa ntseꞌe xita s-tsa yaꞌa.