Duꞌua káꞌan Jesús kuenta io ia en tinduu
5
San kuenta xini ia ndidaa ñayii, san Jesús kusaa ia en tinduu; san kukoo ia, san ndidaa tsa nchiko ñaꞌan xi ia tuꞌua sa io ia. 2 San kesaꞌa ia dakuaꞌa ñaꞌan ia san sadaa ia:Andu kuu sa guaꞌadiko
3 Guaꞌadiko ndidaa nu nakininchisa sa nandeꞌe Ndios xi, kuan nu yukua tastuni Ndios xanaa xi.
4 Guaꞌadiko ndidaa nu ndaꞌyu,a kuan niꞌi nu toꞌon kaꞌnu-ini.
5 Guaꞌadiko ndidaa nu kaꞌnu xanaa xi,b kuan nuyaꞌa niꞌi ñuꞌu ya sa koo nu.
6 Guaꞌadiko ndidaa nu kida kuenta ñayii kuita xiꞌin yichi ndutsac sa kada nu sa nchoxi Ndios, kuan ndidaa nu yaꞌa kada nu.
7 Guaꞌadiko ndidaa nu kunda-ini, kuan ndidaa nuyaꞌa niꞌi nu sa kaꞌnu-ini tuku.
8 Guaꞌadiko ndidaa nu io ndoo xanaa xi,d kuan nuyaꞌa kini nu Ndios.
9 Guaꞌadiko ndidaa nu kida sa ndidaa ñayii na koo kadi, kuan nu yaꞌa kunani nu ndidaa nu d̶aꞌa Ndios.
10 Guaꞌadiko ndidaa nu xikoñaꞌa xi sa saꞌa xi sa ndaa,e kuan nu yaꞌa koo nu sa tastuni Ndios ñayii.
11 Guaꞌadiko yo ora kaꞌan kuiꞌia ñayii adi xikoñaꞌa ñayii xo adi kida naꞌntsa tsa san kaꞌan tsa ndidaa sa kuiꞌia xo sa saꞌa sa xininchisa ñaꞌan yo ku ntsu.f 12 Ku-iꞌni xiꞌin kukaꞌnu xanaa yo, kuan guaꞌa ntseꞌe sa niꞌi yo sa io ndidaa andivi; kuan duꞌua xíko nu ndidaa x-profeta Ndiosg, tsa io díꞌna ka sa kuj xo ndidaa yo.
Duꞌua kida ñée xiꞌin sa dayeꞌe io ñuyii
13 Yoꞌo ndidaa yo kuu yo kuenta ñée ñuyii yaꞌa. Doko ora ñée ti neꞌe diko ka, na modo nandeꞌe ka tuda? Ti nandeꞌe nisadana, sa kida kuu sa dakana ñaꞌan xi xiꞌin sañuniꞌno ñaꞌan xi.h
14 Yoꞌo ndidaa yo kuu yo kuenta sa dayeꞌe io ñuyii ya.i San kuu yo kuenta en ñuu indodo sata en tinduu sa ti kachi chiguaꞌa ñaꞌan xi. 15 Kuan ti en ton en kandil san chiguaꞌa ñaꞌan xi x-kaꞌa en makila, maska sa sani ndodo duku;j san duꞌua na dayeꞌe xi ndidaa ñayii io xiti veꞌe. 16 San duꞌua kada sa na dayeꞌe yo xi ndidaa ñayii, ndasa na kini tsa sa guaꞌa kida yo san na kadakaꞌnu tsa s-Tata yo ia io andivi.k
Jesús dadana ñaꞌan ia sa kuu ley
17 Ma kani-ini yo sa vaj ntsu dita ntsu ndidaa sa yodotuni ley xiꞌin ndidaa sa chídotuni ndidaa x-profeta ia. Ti vaj ntsu dita ntsu, maska sa vaj ntsu kada ntsu sa kachi. 18 Kachitoꞌon ndaa ntsu xo sa neni io nuꞌu ya xiꞌin andivi, ndidaa sa yodotuni ley xinotaꞌan san nisa en jota san nisa en tilde ma dita xi. 19 San duꞌua andu kuu mee ñayii na kuido ndagua sa kachi ley kuani daa luchi kaa san na kada sa enka ñayii duꞌua ni na kada tuku, ñayii yaꞌa ku kuu en tsa luchi ntseꞌe sa tastuni Ndios ñayii, doko nu na kada xiꞌin na dakuaꞌa ñaꞌan sa na kada ñayii ley ku kuu nu en nu kaꞌnu ntseꞌe io xiti sa tastuni Ndios ñayii. 20 Kachi ntsu xo ndidaa yo sa tu ti guaꞌa ka kida yo sa kuxi ndidaa fariseu xiꞌin ndidaa tsa dadana ñaꞌan ley san ma yii yo sa tastuni Ndios ñayii.
Jesús dadana ñaꞌan ia nasa kuu sa nadiko xi
21 Tsaku xo sa sadaa xi ndidaa ñayii ío kidaa: “Ma kaꞌni yo ndii;l san tu andu na kaꞌni ndii, kuidokuachi san ndakakuachi xi.” 22 Doko ntsuꞌu kachi ntsu xo sa ndidaa nu na dadiko-ini taꞌan xiꞌin xani xi ndakakuachi jnu tuku. San andu na kaꞌan tukueꞌe xi xani xi san kuidokuachi tsa jnu ndidaa tsa kunaꞌnu, san ñayii na kastadi ñaꞌan xi xani xi san nitaꞌvi sa kiꞌin antsaya sa xiko ñuꞌun.
23 Juandiku tu neꞌe yo sa doko yo jnu x-altar Ndios, san juan nakaꞌan yo sa ti io mani yo xiꞌin xani yo, 24 dandoo sa doko yo jnu x-altar Ndios, san kuaꞌan, san kaka sa kaꞌnu-ini xi xani yo, san danduu ndij xo san kuañaꞌan yo sa doko yo.
25 Kada ndaa xiꞌin tsa naa xiꞌin yo neni niꞌno ichi yo kuaꞌan nduu yo; kuan na kada na chiꞌiñaꞌan tsa ndaꞌa tsa saꞌntsa kuachi xo, san tsa saꞌntsa kuachi na chiñaꞌan tsa ndaꞌa policia, san chiñaꞌan tsa vekaa xo. 26 Kachitoꞌon ndaa ntsu yo sa ma kee yo ntsa na chaꞌvi yo ndidaa.
Jesús dadana ñaꞌan ia sa ma koo ñayii xiꞌin ñayii ti tandaꞌa xiꞌin
27 Tsaku yo ndidaa yo sa táꞌvichiion sa kachi: “Ma koo s-tsani yo.” 28 Doko ntsuꞌu kachi ntsu sa andu na ntsaꞌa en ñadeꞌe san sani-ini sa katuu xiꞌin ña san xidokuachi ñaꞌan xan kuani ti katuu tsa nduu tsa kuan sa kída tsa kuachi xiꞌin sa sani-ini tsa.m
29 Juandiku tu kida yo ndidaa yo kuachi xiꞌin nduchinuu yo ladu kuaꞌa, tagua san xika kuan xika dakana. Kuan guaꞌa ka tu ma koo nee yo, san adii sa nee yo kiꞌin xiti antsaya.n 30 San tu kida yo kuachi xiꞌin ndaꞌa kuaꞌa yo, diti san dakana. Kuan guaꞌa ka tu ma koo nee yo, san adii sa nee yo kiꞌin xiti antsaya.o
Jesús dadana ñaꞌan ia nasa ku sa dandoo taꞌan xiꞌin d̶eꞌe xi
31 San duꞌua kachi tuku: “Dakaa tsiee nchu dandoo taꞌan xiꞌin d̶eꞌe xi, san nakua ñaꞌan en carta sa na kachi sa dandoo taꞌan nduu.”p 32 Doko ntsuꞌu kachi ntsu sa ndidaa nu dandoo taꞌan xiꞌin d̶eꞌe xi, tu ti kuu sa saꞌa xi sa io nu xiꞌin enka tsiee, kida nu sa na kikagua nuyaꞌa sa koo nu xiꞌin enka tsie. San andu tandaꞌa xiꞌin ñadeꞌe dandoo taꞌan, kida kuachi kuan io xiꞌin ñadeꞌe ti kuu d̶eꞌe xi.q
Jesús dadana ñaꞌan ia sa ma chonaꞌa ndo
33 Xini yo ndidaa yo sa sadaa xi ndidaa ñayii ío kidaa: “Ma chonaꞌa yo Ndios san danduu ma kada yo sa káꞌan yo;r maska sa kada yo sa chonaꞌa yo xi Ndios.”s 34 Doko ntsuꞌu kachi ntsu: Ma chonaꞌa yo nisa dana;t nisa sa saꞌa andivi, kuan juan kuu sa intsaku Ndios;u 35 nisa sa saꞌa nuꞌu ya, kuan jaꞌa kuu sa indodo saꞌa ia;v nisa sa saꞌa Jerusalén, kuan juan kuu xuun Rey kaꞌnu tastuni ntseꞌe.w 36 Ma chonaꞌa yo sa saꞌa d̶iki yo, kuan ti kachi kada yo sa en idi d̶iki yo na nduu kuixi adi na nduu toon. 37 San stoꞌon yo na ku oon tu oon san ñaꞌan tu ñaꞌan. Kuan ndidaa ka toꞌon na kaꞌan yo kuu xaꞌan sa kuiꞌia.
Jesús dadana ñaꞌan ia sa na kadai-ni ndo ñayii ti xinimani ñaꞌan ku ndo
(Lc 6.27-28, 32-36)
38 Tsaku xo ndidaa yo sa sadaa xi ndidaa ñayii ío kidaa: “Tu tágua nu nduchinuu yo san tagua nduchinuu nu tuku, tu tágua nu jnuꞌu yo san tagua jnuꞌu nu tuku.”x 39 Doko ntsuꞌu kachi ntsu xo: Ma naa yo xiꞌin nu kida sa kuiꞌia xo. Guaꞌa ka tu andu na katu en ladu x-koño jnu yo xan san kataneꞌe enka ladu x-koño jnu yo xan tuku. 40 San tu andu nchu dita d̶oꞌno yo kuañaꞌan x-koton yo xan tuku. 41 San tu andu taꞌvichiion sa na kuido yo en sa vee en kilometro san kuaꞌan ubi kilometro xiꞌin. 42 San andu xika sa kuu xaꞌan yo kuañaꞌan; san andu xika noo xo, kuañaꞌan ndaa na ndeꞌe jnu.
43 Tsaku xo ndidaa yo sa kachi: “Kada ini nu kida ini ñaꞌan xo,y san kini-uꞌu nu xini-uꞌu ñaꞌan xo.” 44 Doko ntsuꞌu kachi ntsu: Kada ini ñaꞌan xi nu xini-uꞌu ñaꞌan xo, kaꞌan guaꞌa xi ndidaa nu kaꞌan kuiꞌia xo, kada sa guaꞌa xi ndidaa nu xini uꞌu ñaꞌan xo, san kaka xi Ndios sa saꞌa nu kida sa taꞌan yo xiꞌin nu xiko ñaꞌan xo; 45 kuan ndasa na danaꞌa sa kuu yo d̶aꞌa S-tata yo ia io andivi, kuan ia yaꞌa kida sa na kee x-chikanchii ia sa io ñayii kuiꞌia xiꞌin ñayii guaꞌa, san kida ia sa koon davi xi ñayii guaꞌa xiꞌin ñayii kuiꞌia. 46 Kuan tu nchoj ni yo nu nchoxaꞌan xo, nasa guaꞌa niꞌi yo xiꞌin juan? Ama ti xini yo sa duꞌua kida ndidaa tsa teyaꞌvi tuini sa kuxi Roma kuaan tuku ña? 47 San tu kaꞌan ni yo xi xani yo, nasa vaa kuu sa kida yo, ti xini yo sa duꞌua kida ndidaa ñayii ti xininchisa ñaꞌa xi Ndios ña? 48 Ku kuu ndaa ndidaa yo, kuenta S-tata yo ia io andivi kuu ia ndaa.z