Jesús dadana ñaꞌan ia sa ti guaꞌa sa dandoo taꞌan tsayee xiꞌin d̶eꞌe tsa
10
San kee ia Capernaúm san kuaꞌan ia Judea xiꞌin ndidaa ñuu io yachi ichi enka ladu yutsa Jordán. San juan nataka nituku ndidaa ñayii san dakuaꞌa ñaꞌan ia kuan duꞌua xu kuenchiion ia. 2 San danduu kuyachi uu fariseu sa kototuni ñaꞌan tsa xi ia, san ndukutoꞌon tsa ndidaa tsa tu guaꞌani sa na dandoo taꞌan en tsayee xiꞌin d̶eꞌe tsa. 3 Doko sadaa ia:—Nasa yodotuni ley?
4 San ndidaa tsa yaꞌa kachi tsa:
—Sa chídotuni Moisés kachi sa na kadaguaꞌa en carta sa kachi sa dandoo taꞌan tsa xiꞌin ña, san na kuiko ñaꞌan tsa xan.
5 Doko Jesús sadaa ia:
—San ntsee xanaa yo ndidaa yo juandiku duꞌua chidotuni Moisés. 6 Doko ntsa kesaꞌa ñuyii ya Ndios kídaguaꞌa ia “tsie xiꞌin ñadeꞌe”. 7 “Juandiku tsie dandoo nu s-tata nu xiꞌin nana nu san kukoo nu xiꞌin d̶eꞌe nu; 8 san nduu nu ku kuu eni yikikoño.” San duꞌua adi ubi ka nu eni ka yikikoño kuu nu. 9 San sakintsaa taꞌan Ndios ma en ñayii dandentsaa taꞌan.
10 San kuenta naxikokagua ia veꞌe san ndi uxi-uu tsa nchiko ñaꞌan xi ia ndukutoꞌon ni tuku tsa, nasa nchu kachi sa dadana ñaꞌan ia xi ndidaa tsa yukua? 11 San sadaa ia:
—Andu dandoo d̶eꞌe xi san nakoo xiꞌin enka ñadeꞌe, xidokuachi sa kida kuachi xiꞌin ña. 12 San tu ñadeꞌe dandoo ña xee ña, san nakoo ña xiꞌin enka tsie, xidokuachi ña jnu Ndios tuku.
Jesús xika ia sa saꞌa ndidaa nuliin
13 Ndidaa ñayii ntsaka d̶aꞌa lin xi sa na kukoꞌon ñaꞌan ia jnu, doko ndi uxi-uu tsa nchiko ñaꞌan xi ia nadiko s-tsa san nduden tsa xi ndidaa ñayii ntsaka ñaꞌan jnu. 14 San xíni Jesús ndidaa jaꞌa san nadiko xi ia san sadaa ia:
—Kodaa nuliin xan nakij nu sa io ntsu, san ma dadaꞌan yo; kuan xaꞌan ndidaa ñayii kuu kuenta nulin yaꞌa kuu sa tastuni Ndios ñayii. 15 Kachi ndaa ntsu sa andu ti semani sa na tastuni Ndios vida xi kuenta en nuliin, ma koo nu sa tastuni Ndios ñayii.
16 San dandu nonontsaa ñaꞌan ia jnu san xika ia sa saꞌa nu ndidaa nu.
En tsayee kuika ntseꞌe ndatoꞌon xiꞌin Jesús
17 San kee ia sa kiꞌin ia enka xichi san kixi en tsayee xino ntseꞌe tsa san sakuinxiti tsa jnu ia san ndukutoꞌon tsa:
—Maestru guaꞌa kuu ni, nasa kada da ndasa na niꞌi da ñuyii ma ndeꞌe?
18 Doko sadaa Jesús:
—Naku kaꞌan yo sa guaꞌa ntsu, mee ni Ndios kuu ia guaꞌa. 19 Yoꞌo xini yo ndidaa ley: Ma koo s-tsani yo, ma kaꞌni yo ndii, ma duꞌu yo, ma da kuido yo kuachinañu ñayii, ma dandaa yo ñayii, san kininchisa ñaꞌan xi s-tadeꞌe yo.
20 Doko tsa yaꞌa sadaa tsa:
—Maestru, ndidaa jaꞌa kida da ntsa luchi da.
21 San nantsaꞌa ñaꞌan Jesús s-tsa yaꞌa san kunda-ini ñaꞌan ia san vii ni sadaa ia:
—Io ka en sa kada yo: Kuaꞌan san diko ndidaa sa io xo san kuañaꞌan xi ndidaa ñayii kundaꞌvi san koo sa kuika yo andivi. Danduu naꞌan san kunchiko ñaꞌan ku ntsu.
22 Doko tsa yaꞌa ta-uꞌu ntseꞌe tsa sa tsaku s-tsa toꞌon yaꞌa, san ndaꞌvi ntseꞌe ku nuꞌu tsa, kuan kuika ntseꞌe tsa.
23 San danduu Jesús ntsáꞌa ia ndidaa xichi san sadaa ia xi ndi uxi-uu tsa nchiko ñaꞌan xi ia:
—Vixi ntseꞌe sa yii en ñayii kuika sa tastuni Ndios ñayii.
24 Sani-ini ntseꞌe ndi uxi-uu tsa nchiko ñaꞌan xi ia sa tsaku s-tsa toꞌon yaꞌa, doko sadaa nituku Jesús:
—Daa, naku ntseꞌe da vixi sa yii ñayii kuika sa tastuni Ndios. 25 Yachi ka yaꞌia en camellu jnu en yiki na kiku, sa kuxi en tsa kuika sayii tsa sa tastuni Ndios.
26 Doko ndidaa tsa yaꞌa sáni-ini ntseꞌe ka tsa san kachi tsa ndidaa mee tsa:
—Andu kuu sa niꞌi ñuyii ma ndeꞌe tuda?
27 Danduu Jesús na ntsaꞌa ñaꞌan ia s-tsa ndidaa tsa, san sadaa ia:
—Sa ti kachi kada ñayii; guaꞌa ni kada Ndios. Kuan atuu sa ma kachi kada ia.
28 San danduu Pedru kesaꞌa tsa kachi tsa:
—Dan ndidaa da nasa niꞌi da kuan dandoo da ndidaa san nchiko ñaꞌan da jni.
29 Sadaa Jesús:
—Kachitoꞌon ndaa ntsu xo san ndidaa nu dandoo xeꞌe xi, xani xi adi x-kuaꞌa xi, j-nana xi, s-tata xi, d̶aꞌa xi, xuꞌun xi, sa saꞌa ntsuꞌu xiꞌin sa saꞌa toꞌon guaꞌa, 30 naniꞌi nu en cientu viaji vaaka sa dandoo nu: Tu kuu veꞌe, xani nu, x-kuaꞌa nu, j-nana nu, d̶aꞌa nu xiꞌin xuꞌun nu, san kuani na taꞌan ntseꞌe nu san vida vaxi niꞌi nu vida ma ndeꞌe. 31 Doko kuaꞌa ntseꞌe nu ku jnu xi ku kuu nu danduu, san nu danduu ku kuu nu jnu xi.
Jesús kaꞌan nituku ia sa kuu ia
32 Kuaꞌan tsa ndidaa tsa Jerusalén, san Jesús ndodo nu ia jnu tsa ndidaa tsa kuaꞌan. San ndi uxi-uu tsa nchiko ñaꞌan xi ia sani-ini tsa xiꞌin ndidaa ka ñayii nchiko ñaꞌan kuaꞌan yuꞌu tsa ndidaa tsa. Danduu kineꞌen ñaꞌan deen ia xi ndi uxi-uu tsa nchiko ñaꞌan xi ia, san kesaꞌa ia sadaa ia ndidaa sa taꞌan ia. 33 San sadaa ia:
—Vita nakiꞌin ndo Jerusalén, kuan ia nduu ñayii ñuyii yaꞌa nachiꞌi ñaꞌan nu ndaꞌa ndidaa dutu kunaꞌnu xiꞌin ndidaa tsa dadana ñaꞌan ley. San da kuidokuachi ñaꞌan sa na kuu nu, san na chiñaꞌan nu ndaꞌa ndidaa ñayii ti kuu ñuu Israel. 34 San kuakuntsaa ñaꞌan jnu, tivi deen ñaꞌan jnu, kaniaꞌa ñayii jnu xiꞌin kaꞌni ñaꞌan jnu; doko nduu uni kii nandoto nu.
Santiagu xiꞌin Juan xika tsa en sa xika tsa xi Jesús
35 Danduu Santiagu xiꞌin Juan d̶aꞌa Zebedeu, saꞌan yachi tsa sa io ia san sadaa tsa:
—Maestru, nchoj da sa na taj ni sa na kaka da jni.
36 San sadaa ia:
—Nasa nchoj xo sa na kada ntsu sa saꞌa yo?
37 San sadaa tsa yaꞌa nduu tsa:
—Kuemani ni sa sa tastuni ni, na kuntsaku da nduu da xiꞌin ni, en da ichi j-ladu kuaꞌa ni san enka da ichi j-ladu ichi ni.
38 San sadaa Jesús:
—Ti xini yo nasa xika yo. Guaꞌa ni koꞌo yo copa sa ñoꞌon sa ugua koꞌo ntsu ña, ña guaꞌani kuendutsa yo xiꞌin sa kuendutsa ntsu xiꞌin ndidaa sa taꞌan ntsu ña?
39 San tsa yaꞌa nduu tsa kachi tsa:
—Guaꞌa ni kada da.
San sadaa Jesús:
—Guaꞌa ni koꞌo yo copa koꞌo ntsu san guaꞌa ni kuendutsa yo xiꞌin sa kuendutsa ntsu xiꞌin ndidaa sa taꞌan ntsu. 40 Doko sa kuntsaku yo ku ndaꞌa kuaꞌa ntsu adi ku ndaꞌa ichi ntsu san adi ntsuꞌu taxi, meni ndidaa nu na kachi Ndios.
41 Tsaku xi ndi uxi ka tsa nchiko ñaꞌan xi ia, san nadiko s-tsa kida Santiagu xiꞌin Juan. 42 Doko kana ñaꞌan Jesús san sadaa ia:
—Xini yo san ndidaa tsa kunaꞌnu tastuni tsa ndidaa ñayii, san ndidaa tsa kunaꞌnu ntseꞌe ka dayaꞌia nika tsa kunaꞌnu tsa xi ndidaa ñayii. 43 Doko ma duꞌua kada sa io yo ndidaa yo. Guaꞌa ka tu andu nchu ku naꞌnu sa io yo ndidaa yo san na ku kuu en nu xinokuachi, 44 san andu nchu ku kuu nu diꞌna nuu sa io yo ndidaa yo san na ku kuu nu xinokuachi yo ndidaa yo. 45 Kuan ia nduu ñayii ñuyii yaꞌa ti vaj nu sa chiñuꞌu ñaꞌan nu, vaj nu kuinokuachi nu xiꞌin sa kuañaꞌan nu vida nu sa saꞌa kuaꞌa ntseꞌe ñayii xiꞌin sa taꞌan nu sa nandeꞌe sa taꞌan ñayii io x-kuachi xi.
Jesús ndadaguaꞌa ia en tsayee kuaa nani Bartimeu
46 Danduu saa ia Jericó. San kuenta kee ia ñuu Jericó xiꞌin ndidaa tsa nchiko ñaꞌan xi ia xiꞌin kuaꞌa ntseꞌe ñayii, san tsa kuaa nani Bartimeu, d̶aꞌa en tsa inani Timeu, intsaku tsa ichi. 47 San tsaku s-tsa sa Jesús nazarenu ku ia vaxi ichi yukua san kesaꞌa tsa kana tsa san kachi tsa:
—¡Jesús, j-raza rey David kunda-ini ñaꞌan ni d̶a!
48 San kuaꞌa ntseꞌe ñayii nduden s-tsa sa na kadi tsa xuꞌu tsa, doko niꞌi ntseꞌe ka kana tsa:
—¡Jesús, j-raza rey David kunda-ini ñaꞌan ni d̶a!
49 Dandu kukuin ia san táꞌvichiion ia:
—kana ñaꞌan s-tsa.
San kána tsa ndidaa tsa tsa kuaa san sadaa tsa:
—kadakaꞌnu xanaa yo san ndukuin kuan kana ñaꞌan tsa xo.
50 San danduu tsa yaꞌa dakana tsa d̶oo tsa san ndukuin tsa san kuaꞌan tsa sa io Jesús. 51 San sadaa Jesús:
—Nasa nchoj xo sa kada ntsu xo?
san sadaa tsa kuaa:
—Maestru, nchoj da sa na nduguaꞌa nduchinuu da.
52 San sadaa Jesús:
—Guaꞌa ni nuꞌu yo. Sa xíninchisa ñaꞌan yo ku ntsu kída sa nduguaꞌa yo.
San nono ni natuu jnu tsa yaꞌa, san nchiko ñaꞌan tsa xi Jesús kuaꞌan.