Toꞌon dadaguataꞌan sa kuu ndidaa tsa kidachiion
20
Kuan sa tastuni Ndios ndidaa ñayii ndee sa kída en tsayee, kuu s-toꞌo en ñuꞌu, san kee tsa kuiꞌi ka ku nduku tsa ñayii na kadachiion xitu tsa. 2 Ndatoꞌon tsa xiꞌin ndidaa tsa na kadachiion sa chaꞌvi ñaꞌan tsa ndaa kuu en kii san semani ndidaa tsa yaꞌa, san tsandaꞌa ñaꞌan tsa xitu tsa. 3 San yaꞌia uu ka hora san kee ni tuku s-toꞌo ñuꞌu kuaan san xini tsa uu ka tsa intsaku jnu xaꞌvi san ti io x-chiion tsa, 4 San sadaa tsa: “Kuaꞌan ku kadachiion ku kuitu ntsu san chaꞌvi ñaꞌan ntsu yo.” San ndidaa tsa yaꞌa kuaꞌan tsa. 5 San s-toꞌo ñuꞌu kee tsa ndaa kavixuu san kee nituku tsa ka uni sa ñini san tsandaꞌa tsa uu ka tsa na kadachiion xitu tsa. 6 San ndaa ka oꞌon sa ñini kee nituku tsa san naniꞌi tsa uu ka ñayii io juan, san ndukutoꞌon tsa: “Naku xuku yo nee nduu ndidaa yo sa ti kidachiion yo.” 7 San sadaa ndidaa tsa yaꞌa: “Kuan nisa en ñayii ti nduku ñaꞌan d̶a.” San sadaa s-toꞌo ñuꞌu kuaan: “Kuaꞌan kadachiion ku kuitu ntsu.” 8 Sa kundaꞌvi kuaꞌan, sadaa s-toꞌo ñuꞌu xi en tsa kidachiion jnu tsa: “Kana ndidaa tsa kídachiion xana san chaꞌvi diꞌna ka nu kuyii danduu san danduu chaꞌvi yo nu kuyii diꞌna.” 9 Danduu saa ndidaa tsa kuyii ka oꞌon sa ñini, san ndidaa tsa teyaꞌvi ndaa kuu en kii. 10 Danduu yaꞌia ndidaa tsa ku yii diꞌna, san sani-ini tsa sa vaaka teyaꞌvi tsa; doko ndiden ndiden niꞌi tsa xaꞌvi tsa ndaa kuu en kii. 11 San teen tsa xaꞌvi tsa san kaꞌan kuiꞌia tsa xi s-toꞌo ñuꞌu, 12 sa kachi tsa: “Ndidaa tsa kuyii danduu kidachiion tsa en ora, san eni chaꞌvi ñaꞌan ni s-tsa ndidaa tsa nda chaꞌvi ñaꞌan ni d̶a ndidaa da, san dan nee nduu taꞌan da sa iꞌni.” 13 Doko s-toꞌo ñuꞌu sadaa tsa: “Xanii, ti kida ntsu nisa en sa kuiꞌia yo. Adi ndatoꞌon ndo sa duꞌua chaꞌvi ñaꞌan ntsu yo ndaa kuu en kii ve? 14 Teen ndaa ku xaꞌvi yo xan san kunuꞌu. Doko ntsuꞌu nchu chaꞌvi ntsu nu kuyii danduu ya ndaa taj ntsu yo. 15 San guaꞌani kada ntsu sa nchoj ntsu xiꞌin sa kuu ku kiaꞌan ntsu? Ña diko-ini ñaꞌan yo kuan kuu ntsu ñayii guaꞌa?” 16 San duꞌua kuaꞌa ntseꞌe ñayii kunaꞌnu ñuyii yaꞌa nduu ñayii ti xaꞌvi xi, san kuaꞌa ntseꞌe ñayii ti xaꞌvi xi ñuyii yaꞌa ku kuu ñayii xaꞌvi xi jnu Ndios.bJesús kaꞌan nituku ia sa kuu ia
17 Neni kuaꞌan Jesús Jerusalén, san ndineꞌe deen ia ndii uxi-uu tsa nchiko ñaꞌan xi ia san sadaa ia:
18 —Vita na kiꞌin ndo Jerusalén, kuan juan na chiñaꞌan ndaꞌa ndidaa dutu kunaꞌnu xiꞌin ndidaa tsa dadana ñaꞌan ley xi ia nduu ñayii ñuyii yaꞌa, san dakuidokuachi ñaꞌan tsa jnu, san ndidaa tsa ndatoꞌon sa kaꞌni ñaꞌan jnu. 19 San na chiñaꞌan tsa ndaꞌa ndidaa ñayii juera jnu san kuakuntsaa ñaꞌan tsa, kaniaꞌa tsa xiꞌin katakaa ñaꞌan tsa en cruz, doko nduu uni kii nandoto nu.
Sa xíka nana Santiagu xiꞌin Juan
20 Danduu tuꞌua ñaꞌan j-nana ndidaa d̶aꞌa Zebedeu xiꞌin nduu d̶aꞌa ña, san sakuinxiti ña jnu Jesús. 21 San nduku toꞌon ia:
—Nasa nchoj xo?
San ña yaꞌa sadaa ña:
—Taꞌvichiion ni sa tastuni ni nduu d̶aꞌa da ya na kuntsaku chi en chi ndaꞌa kuaꞌa ni san enka chi ndaꞌa ichi ni.
22 San danduu kaꞌan Jesús san sadaa ia:
—Ti xini yo ndidaa yo sa xika yo. Guaꞌani kuyakui yo ndidaa yo sa taꞌan yo ndidaa sa kuiꞌia taꞌan ntsu ña?
nduu tsa yaꞌa sadaa tsa:
—Jon, guaꞌa ni.
23 San Jesús sadaa ia:
—Sa ndaa ku sa taꞌan yo; doko sa kuntsaku yo ku ladu kuaꞌa ntsu adi ku ladu ichi ntsu san adi ntsuꞌu kuu sa taꞌvichiion juan, meni Ndios ia kuu ku Tata ntsu kuan ia yukua danuu.
24 San tsaku xi ndi uxi ka tsa nchiko ñaꞌan xi ia toꞌon yaꞌa, san nadiko s-tsa kída ndiani tsa yaꞌa. 25 Danduu kána ñaꞌan Jesús s-tsa san sadaa ia:
—Xini yo san ndidaa tsa kunaꞌnu tastuni tsa ndidaa ñayii, san ndidaa tsa kunaꞌnu ntseꞌe dayaꞌia nika tsa kunaꞌnu tsa xi ndidaa ñayii. 26 Doko sa io yoꞌo ndidaa yo ti nandeꞌe sa duꞌua koo,c guaꞌa ka, andu nchu kunaꞌnu sa io yo ndidaa yo na kuinokuachi yo; 27 San andu nchu ku kuu naꞌnu, san na ku kuu nu xinokuachi yo;d 28 Kuan duꞌua, ia nduu ñayii ñuyii yaꞌa ti vaj nu keñuꞌu nu, vaj nu kuinokuachi nu xiꞌin sa taj nu vida nu sa saꞌa kuaꞌa ntseꞌe ñayii nandeꞌe sa taꞌan sa saꞌa x-kuachi xi.
Jesús ndada guaꞌa ia nduchinuu ubi tsa kuaa
29 San kée ia Jericó san nchiko ñaꞌan kuaꞌa ntseꞌe ñayii xi ia. 30 San intsaku ubi tsa kuaa ichi kuan, tsaku s-tsa sa Jesús yaꞌia ia ichi yukua san kána tsa san kachi tsa:
—¡Toꞌo, j-raza rey David, kunda-ini ñaꞌan ni d̶a nduu da!
31 Ndidaa ñayii kantseꞌe s-tsa sa na kadi tsa xuꞌu tsa, doko tsa yaꞌa kána tsa niꞌi ntseꞌe ka san kachi tsa:
—¡Toꞌo, j-raza rey David, kunda-ini ñaꞌan ni d̶a nduu da!
32 Jesús ku kuin ia, san kána ñaꞌan ia, san sadaa ia:
—Nasa nchoj xo sa kada ntsu xo nduu yo?
33 San sadaa tsa nduu tsa:
—Toꞌo, na tuu nduchinuu da nduu da.
34 Danduu Jesús, kunda-ini ñaꞌan ia, san kukoꞌon ia nduchinuu tsa yaꞌa nduu tsa; san nono ni na ntsaꞌa tsa nduu tsa, san sakuita nchiko ñaꞌan tsa kuaꞌan.