Toꞌon dadaguataꞌan sa kuu ñakee xiꞌin tsa saꞌntsa kuachi
18
En kii sadaa Jesús en toꞌon dadaguataꞌan sa nandeꞌe sa ma en xavi sa kakataꞌvi xi Ndios san ma en ku ñaña. 2 Sadaa ia:—En ñuu io en tsa kuu tsa saꞌntsa kuachi san ti xu kada tsa sa nchoxi Ndios san ti xu kunda-ini tsa ñayii. 3 San dini ñuu yukua io en ñakee tuku san noni noni xu kiꞌin ña jnu tsa san xu kadaa ña sa na kaꞌntsa tsa kuachi xi en tsayee xini-uꞌu ñaꞌan xan. 4 San keꞌen guelta ti se on tsa yaꞌa sa kaꞌntsa tsa kuachi, doko naꞌa san sani-ini tsa san kachi tsa: “Kuani ti kida ntsu sa nchoxi Ndios san nisa ti kunda-ini ntsu ñayii, 5 doko na kaꞌntsa ntsu kuachi xi ñakee yaꞌa, ndasa ma noni noni kij xan san dita ña tiempu ku ntsu.”
6 San sadaa Jesús:
—Kunini sa kachi tsa kuiꞌia yaꞌa. 7 San Ndios ma ndaka ndaa ia kuachi sa saꞌa ndidaa tsa ndekaxi ia tu nakaꞌan tsa nduu xiꞌi niñu ña? Kada ia sa na kuntsatu ndidaa ñayii yaꞌa ña? 8 Ntsuꞌu kachi ntsu sa ma kukue ia sa chintsee ñaꞌan ia, doko kii na ndixi ia nduu ñayii ñuyii yaꞌa, naniꞌi nu ñayii xininchisa ñaꞌan daa jnu ñuyii ya ña?
toꞌon dadaguataꞌan sa kuu ndidaa fariseu xiꞌin tsa teyaꞌvi tuini sa kuxi Roma
9 Uu tsa kukaꞌnu-ini mee san ti xinimani tsa ñayii, nakani ia toꞌon dadaguataꞌan yaꞌa:
10 —Ubi tsayee kuaꞌan tsa templu ku kakataꞌvi tsa. En tsa ku fariseu san enka tsa ku tsa teyaꞌvi tuini sa kuxi Roma. 11 San fariseu kuan duꞌua xikataꞌvi tsa: “Taxaꞌvi ñaꞌan jni Ndios kuan ti kuu da kuenta ndidaa ka ñayii: Ti kuu da ñaduꞌu, ti kuu da ñayii kuiꞌia, ti io da xiꞌin ñadeꞌe ti kuu d̶eꞌe da, sa nisa ti kuu da kuenta tsayee teyaꞌvi xan. 12 Sakoꞌon nchitsa da ubi kii semana, ndiden uxi sa niꞌi da san na taj da en sa ku xaꞌan ni.” 13 Doko tsa teyaꞌvi tuini sa kuxi Roma xika in tsa san nisa jnu tsa ti nchu ndaneꞌe tsa san kesaꞌa tsa kani tsa nchika tsa, san kachi tsa: “Ndios koo ni sakaꞌnu-ini, kuan ku da ñayii kuachi.” 14 Kachi ntsu yo san tsa teyaꞌvi ya kunuꞌu tsa xeꞌe tsa san sa io ndoo tsa jnu Ndios doko fariseu ya ñaꞌan. Kuan andu setoꞌon mee, san ma kuetoꞌon ñaꞌan Ndios xi, sa andu na kininchisa sa io x-kuachi xi san kadakaꞌnu ñaꞌan Ndios xi.
Jesús xikataꞌvi ia sa saꞌa ndidaa nuliin
15 San ndidaa ñayii ntsaka nuliin saꞌan jnu Jesús ndasa na kukoꞌon ñaꞌan ia jnu san na kakataꞌvi ia sa saꞌa nu, doko xini ndi uxi-uu tsa nchiko ñaꞌan xi ia, san dádaꞌan tsa xi ndidaa tsa ntsaka nuliin ya. 16 Doko Jesús sadaa ia:
—Kodaa nuliin xan nakij nu sa io ntsu san ma dadaꞌan yo nu, kuan ñayii xininchisa ñaꞌan xi Ndios ñayii yaꞌa tastuni Ndios xanaa xi. 17 Kachitoꞌon ndaa ntsu yo sa ñayii ti nchoxi sa tastuni ñaꞌan Ndios xi kuenta ndidaa nuliin xininchisa ñaꞌan xi s-tadeꞌe xi, san ma kiꞌin sa tastuni ñaꞌan Ndios xi.
En tsa kuika ndatoꞌon xiꞌin Jesús
18 Ndukutoꞌon en tsayee kunaꞌnu san sadaa tsa:
—Maestru guaꞌa ku ni, nasa kuu sa kada da ndasa na niꞌi da ñuyii ma ndeꞌe?
19 San Jesús sadaa ia:
—Naku kaꞌan ni sa guaꞌa da? nisa en ñayii ti guaꞌa meni Ndios kuu ia guaꞌa. 20 Xini ni ndidaa ley: “Ma koo s-tsani ni, ma kaꞌni ni ndii, ma duꞌu ni, ma da kuido ni kuachinañu ñayii, ku kuu yeñuꞌu ni jnu s-tadeꞌe ni.”
21 Danduu tsa yaꞌa sadaa tsa:
—ndidaa jaꞌa kida da ntsa luchi da.
22 San tsaku xi Jesús toꞌon yukua san sadaa ia:
—Kida ka en sa kada ni: diko ni ndidaa sa io ni san kuañaꞌan ni xi ñayii kundaꞌvi san ku kuika ni jnu Ndios san naꞌa ni sa kunchiko ñaꞌan ni da.
23 San tsa yaꞌa, tsaku s-tsa sa sadaa Jesús, san ta-uꞌu ntseꞌe tsa, kuan kuika ntseꞌe tsa. 24 San xíni Jesús sa nakuin ndaꞌvi xanaa tsa yaꞌa san kachi ia:
—Ntseꞌe vixi sa yii en tsa kuika sa tastuni Ndios ndidaa ñayii! 25 Kuan yachi ka sa yaꞌia en camellu jnu en yiki na kiku sa kuxi en tsa kuika sa yii tsa sa tastuni Ndios ñayii.
26 San ndidaa tsa tsaku xi toꞌon yaꞌa kachi tsa:
—Andu nanitaꞌvi tuda?
27 Jesús sadaa ia:
—Sa ti kachi kada ñayii ya san Ndios ku kida ia.
28 Danduu Pedru sadaa tsa:
—Dan ndidaa da dandoó da ndidaa sa io d̶a san nchiko ñaꞌan da jni.
29 San Jesús sadaa ia:
—Kachitoꞌon ndaa ntsu sa andu dandoo xeꞌe xi, d̶eꞌe xi, xani xi, s-tata xi, adi d̶aꞌa xi sa saꞌa sa tastuni Ndios ñayii, 30 níꞌi vaa ntseꞌe ka ñuyii yaꞌa, san ñuyii vaxi níꞌi nu vida ma ndeꞌe.
Jesús kaꞌan nituku ia sa ndeꞌe ia
31 Ndineꞌe deen ia ndi uxi-uu tsa nchiko ñaꞌan xi ia san sadaa ia:
—Na kiꞌin ndo Jerusalén vita kuan na xinotaꞌan ndidaa sa chidotuni ndidaa x-profeta Ndios sa taꞌan ia nduu ñayii ñuyii yaꞌa. 32 Kuan nayii nu ndaꞌa ndidaa ñayii ti kuu ñuu yaꞌa, san kuakuntsaa ñaꞌan nu sa kantseꞌe nu san tivide ñaꞌan nuu. 33 San kaniaꞌa tsa xiꞌin kaꞌni ñaꞌan tsa ndidaa tsa doko nduu uni kii nandoto nu.
34 Ndi uxi-uu tsa nchiko ñaꞌan xi ia ti sakuituni xanaa tsa ndidaa tsa nasa kaꞌan ia, kuan ntsadi diki tsa ndidaa tsa juandiku ti sakuituni xanaa tsa.
Jesús ndadaguaꞌa ia en tsa kuaa io en ñuu nani Jericó
35 San kuyachi Jesús en ñuu nani Jericó, san intsaku en tsa kuaa ndodo ichi, xika tsa obra. 36 San tsaku s-tsa sa kuvaa, san ndukutoꞌon tsa nasa kuu sa taꞌan. 37 San sadaa s-tsa sa Jesús io ñuu Nazaret yaꞌia. 38 Danduu tsa yaꞌa kana tsa san kachi tsa:
—Jesús, j-raza rey David kunda-ini ñaꞌan ni d̶a!
39 San ndidaa tsa ndodonuu ndudeen tsa sa na kadi tsa yaꞌa xuꞌu tsa, doko tsayee yaꞌa kana tsa niꞌi ntseꞌe ka:
—¡Jesús, j-raza rey David, kunda-ini ñaꞌan ni d̶a!
40 Dandu Jesús kukuin ia, san sadaa ia sa na ku kuaka ñaꞌan s-tsa yaꞌa; san kuenta saa tsa kuaa kuan jnu ia, san ndukutoꞌon ia:
41 —Nasa ncho jni sa kada da jni?
san tsa yaꞌa sadaa tsa:
—Toꞌo, nchoj da sa na ndadaguaꞌa ni nduchinuu da.
42 San Jesús sadaa ia:
—Na nduguaꞌa, sa xininchisa ñaꞌan ni da juan kída sa nduguáꞌa ni.
43 San nono ni natuu nduchinuu tsa, san nchiko ñaꞌan tsa xi Jesús kidakaꞌnu tsa Ndios san ndidaa ñayii xini jaꞌa kidakaꞌnu ñaꞌan xi Ndios.