En tsayee nani Zaqueu
19
San Jesús saa ia Jericó san yaꞌia ia ñuu yukua 2 San ñuu yukua io en tsayee kuika nani Zaqueu. Tsa yaꞌa ku tsa kunaꞌnu xi ndidaa tsa teyaꞌvi tuini sa kuxi Roma, 3 tsa yaꞌa nchu kini tsa Jesús doko kuaꞌa ntseꞌe ñayii io san tsa yaꞌa nuꞌu ntseꞌe kaa tsa. 4 Juandiku xino tsa kuaꞌan ntsa jnu xi, sa kusaa tsa en yutu ndasa na kini tsa Jesús, kuan ichi yukua io sa yaꞌia ia. 5 San kuenta yaꞌia Jesús ichi yukua san nantsaꞌa ntsaa ia san xíni ñaꞌan ia san sadaa ia:—Zaqueu, kama tinoo kuan vita kendoo ntsu xeꞌe yo.
6 San ora yukua noo tsa kama ntseꞌe san ku-iꞌni ntseꞌe tsa ntsaka ñaꞌan tsa xeꞌe tsa saꞌan. 7 Jaꞌa ti nataꞌan xanaa ndidaa tsa io jukua san kachi tsa kuaꞌan tsa xeꞌe en tsa io x-kuachi xi 8 san neni io ia xeꞌe Zaqueu, tsa yaꞌa ndukuin tsa san sadaa tsa:
—Toꞌo, na kuañaꞌan da dagua sa io d̶a ya xi ñayii kundaꞌvi, san tu duꞌu da xi dakaa ñayii san na nakuañaꞌan da kumi viaji vaaka.
9 San Jesús kachi ia:
—Vita tsayee yaꞌa niꞌi tsa sa nanitaꞌvi tsa, kuan kuu tsa j-raza Abraham kuaan tuku. 10 Kuan ia nduu ñayii ñuyii yaꞌa vaj nu nanduku nu xiꞌin sa kada na nanitaꞌvi ñayii ku xika xi Ndios.
Tsayee kuaꞌan sa ku kuu rey
11 San ndidaa ñayii nini, san káꞌan Jesús san sadaa ia en toꞌon dadaguataꞌan, kuan sa io yachi ia Jerusalén san ndidaa tsa yaꞌa sani-ini tsa sa sa tastuni Ndios ñayii sa io sa saa. 12 San sadaa ia:
—Ío en tsayee ku daꞌa en rey kuaꞌan tsa en ñuu xika ntseꞌe sa niꞌi tsa sa tastuni tsa san dandu naxikokagua tsa. 13 Doko antika ka sa kiꞌin tsa kana tsa uxi ñayii kidachiion jnu tsa san ndiden ndiden sañaꞌan tsa baa ntseꞌe mediu xi ndiden en tsayaꞌa san sadaa tsa; “Kadachiion xiꞌin mediu yaꞌa ntsa na ndij ntsu.” 14 Doko ñayii io ñuu yukua xini-uꞌu ñaꞌan tsa ndidaa tsa s-tsa yaꞌa, juandiku táꞌvichiion tsa xi uu ka ñayii sa na kunchiko ñaꞌan kiꞌin sa nakadaa tsa: “Ti nchoj da ndidaa da sa tsa yaꞌa tastuni ñaꞌan da.” 15 Doko tsa yaꞌa niꞌi tsa sa kúu tsa Rey san naxikokagua tsa kunuꞌu tsa xuun tsa san kii nasaa tsa, na kana tsa ndidaa tsa sañaꞌan tsa tuini xi, ndasa na kini tsa nada chido s-tuini tsa. 16 San saa tsa diꞌnanuu san sadaa tsa: “Toꞌo, mediu ni chido uxi viaji vaaka,” 17 San tsa yaꞌa sadaa tsa: “Guaꞌa ntseꞌe kida yo guaꞌa ñayii; kuu yo ñayii guaꞌa xiꞌin taꞌni, san vita na taj ntsu sa tastuni yo uxi ñuu.” 18 San saa tsa ku uu san sadaa tsa: Toꞌo, adi mediu ni yaꞌa chido oꞌon viaji vaaka. 19 San sadaa tsa s-tsa yaꞌa tuku: “Yoꞌo tuku oꞌon ñuu tastuni yo.” 20 San kixi enka tsa san sadaa tsa: “Toꞌo, adi mediu ni yaꞌa kuan naduku da en pañetu san soꞌnoguaꞌa da. 21 Kuan yuꞌu ñaꞌan da ni, kuan dini kuu ni en ñayii deen ntseꞌe, kuan nakeꞌen ni sa ti kuu xaꞌan ni san nachii ni ami ti dáka ni.” 22 Dandu sadaa Rey: “¡Yoꞌo nu kuiꞌia, xiꞌin s-toꞌon yo xan xini ñaꞌan ntsu na ñayii kuu yo! kuan tu xini yo sa kuntsu en ñayii deen ntseꞌe, kuan nakeꞌen ntsu sa ti kuu ku kiaꞌan ntsu san nachii ntsu ami ti dáka ntsu. 23 Naku ti saneꞌe yo ku mediu ntsu xan bancu kuan, kuan na nachido san nana taj xo kuntsu kii na ndij ntsu na naniꞌi ntsu xiꞌin d̶aꞌa xi?” 24 San sadaa tsa xi tsa xuku juan: “Dita tuini xan san kuañaꞌan xi nu niꞌi uxi viaji vaaka ka xan.” 25 San tsa yaꞌa ndidaa tsa sadaa tsa: “Toꞌo doko tsa yaꞌa sa io uxi viaji vaa ka s-tsa.” 26 San Rey sadaa tsa: “Kuan kachi ntsu yo sa andu io xi san koo ka xi san andu ti io xi san ntsa sa io xi dita. 27 San ndidaa ñayii ti nchoxi sa tastuni ñaꞌan ntsu xi kuaꞌan ku kuaka nu ndidaa nu jaꞌa san diti d̶uku nu ku nuu ntsu ya.”
Saa Jesús ñuu nani Jerusalén
28 San tuꞌu kaꞌan Jesús, san xika ia kuaꞌan ichi Jerusalén. 29 San kuyachi ia jnu ñuu Betfagé xiꞌin Betania yachi sa io en yuku nani Olivos san tsa ndaꞌa ia ubi tsa nchiko ñaꞌan xi ia, 30 San sadaa ia:
—Kuaꞌan ñuu io yachi xan san saa yo san kini yo en burru luchi san nisa en ñayii vita kodo ka te, dañu te sa kuntsaka yo te kixi. 31 San tu andu na ndukutoꞌon yo: Naku dañu yo te? san duꞌua kadaa yo: Kuan nandeꞌe te xi tsa Toꞌo.
32 San kuaꞌan tsa san naniꞌi tsa kuenta sadaa ia. 33 San neni dañu tsa burru luchi, s-toꞌo te kuan sadaa tsa:
—Naku dañu yo burru luchi xan?
34 San tsa yaꞌa sadaa tsa:
—Kuan na ndeꞌe te xi ku Toꞌo ndo.
35 San ntsaka tsa te saa jnu Jesús san sakindodo tsa d̶oo tsa sata te san dakaa tsa Jesús sata te. 36 San neni xika te xiꞌin Jesús, ndidaa ñayii io jukua sáki doo xi ichi. 37 San kuyachi tsa sa nonoo tsa yuku nani Olivos san ndidaa ñayii nchiko ñaꞌan s-tsa ku-iꞌni ntseꞌe san kana tsa ndidaa tsa kidakaꞌnu tsa Ndios sa saꞌa ndidaa sa naꞌnu xíni tsa. 38 San ndidaa tsa kachi:
—¡Na kukaꞌnu rey vaxi xiꞌin sa tastuni Ndios! ¡Paz nakoo andivi xiꞌin na kukaꞌnu Ndios ntsaa nino yukua!
39 San uu fariseu io jukua sadaa tsa xi Jesús:
—Maestru, kadaa ni xi ndidaa ñayii xan na kadi tsa xuꞌu tsa.
40 San Jesús sadaa ia:
—Tu ndidaa nuyaꞌa nakadi nu xuꞌu nu san ndidaa yuu xan kana.
41 San kuu yachi ia jnu ñuu Jerusalén, san xíni ia ñuu san Jesús ndaꞌyu ia sa saꞌa xi 42 sa kachi ia:
—¡Tu kii yaꞌa na na kininchisa yo ndidaa yo sa taxi sa kookadi yo doko jaꞌa yedaꞌvi jnu yo ndidaa yo san ti kida sa kukuintuni xanaa yo! 43 Kuan kixi kii kuiꞌia yo san ndidaa ñayii xini-uꞌu ñaꞌan yo chikorra ñaꞌan yo san ndidaa ladu kada uꞌu yo. 44 San datani ñaꞌan nu yo, san kaꞌni nu ndidaa ñayii io yo. San ma dandoo nu yuu sata enka yuu kuan ti xínituni yo kii kíxi Ndios ki koto ñaꞌan ia yo.
Jesús xiko ñaꞌan ia xi ndidaa tsa diko io xiti templu
—Yodotuni: “¡Ku kueꞌe ntsu kuu veꞌe sa kakataꞌvi” san yoꞌo ndidaa yo ndáda yo xeꞌe ñaduꞌu!