Mateu 25

Toꞌon dadaguataꞌan sa kuu ndi uxi nu ndee ii

Sa tastuni Ndios ndidaa ñayii ndee uxi nudeꞌe ii teen x-kandil xi san kee nu ku natan nu novio. 2 Oꞌon nu kuu nu sani-ini, san oꞌon nu kuu nu ti kixi d̶iki xi. 3 Ndidaa nu ti kixi d̶iki xi teen nu x-kandil nu, san ti teen vaa nu aceite; 4 doko nu sani-ini choꞌon vaa nu aceite vidriu nu xiꞌin x-kandil nu. 5 San guaꞌani sa kukue novio, san ndidaa nuyaꞌa teen ñaꞌan viaꞌna nu san xidi nu. 6 San kuu dagua niñu tsaku sa kana: “¡Adi novio sa vaxi! ¡Naꞌa natan ñaꞌan nu!” 7 Danduu, ndidaa nudeꞌe ya ndukoo nu san danuu nu x-kandil nu. 8 San ndidaa nu ti kixi d̶iki xi sadaa nu xi ndidaa nu sani-ini: “Taxi taꞌa x-aceite nda xan ku ndi, kuan ku kandil ndi ya nchu ndaꞌua.” 9 Doko ndidaa nu kutuni xi sadaa nu: “Ñaꞌan, kuan na kada nandeꞌe ka ku ndi xiꞌin nandeꞌe ka nda tuku; guaꞌa ka kuaꞌan sa io ña diko san kueen sa kuj nda.” 10 San neni kuaꞌan nuyaꞌa ndidaa nu ku kueen nu, san saa novio; san ndidaa nu sa ntsatu kuyii nu xiꞌin novio xiti viko, san ndadi ndieꞌe. 11 Danduu nasaa ndi oꞌon ka nu ndee ku kueen aceite san sadaa nu: “¡Toꞌo, toꞌo, na kaan ni ndieꞌe ya!” 12 Doko tsa yaꞌa sadaa tsa: “Kachitoꞌon ndaa ntsu yo ndidaa yo sa ti xini ñaꞌan ntsu yo.”

13 San duꞌua sadaa Jesús:

—Ku nchito tuda, kuan ti xini yo nisa kii san nisa ora sa ndixi ia nduu ñayii ñuyii yaꞌa.

Toꞌon dadaguataꞌan tsayee kuaꞌan xika

14 Kuan sa tastuni Ndios ndidaa ñayii ndee sa kida en tsayee kuaꞌan xika, san antika sa kiꞌin tsa kana tsa ndidaa tsa kidachiion jnu tsa san sañaꞌan tsa ndidaa mediu io s-tsa.

15 En tsa saꞌa tsa oꞌon mil moneda, san enka tsa ubi mil, san enka tsa saꞌa tsa en mil. Ndiden ndiden sañaꞌan tsa ndaa kuu kadachiion tsa yaꞌa danduu kuaꞌan xika tsa. 16 San tsa ni oꞌon mil saꞌan tsa san kidachiion tsa xiꞌin san niꞌi tsa oꞌon ka tuku mil. 17 San duꞌua ni kida tsa niꞌi ubi mil san niꞌi tsa ubi ka tuku mil. 18 Doko tsa niꞌi en mil saꞌan tsa san satsa tsa nuꞌu san chiduj tsa s-tuini s-toꞌo tsa.

19 Yaꞌia kuaꞌa kuia, naxikokagua s-toꞌo ndidaa tsa kidachiion ya san xika tsa kuenta xi ndidaa tsa yaꞌa. 20 Saa tsa niꞌi oꞌon mil moneda neꞌe tsa oꞌon ka tuku mil moneda san sadaa tsa: “Toꞌo, táj ni oꞌon mil moneda d̶a; san niꞌi da oꞌon ka tuku mil.” 21 San s-toꞌo tsa sadaa tsa: “Guaꞌa kída yo nu guaꞌa kuu yo xiꞌin nu xinokuachi ndaa. Xiꞌin taꞌa dii ni tuini kidachiion guaꞌa yo, kukaꞌnu ini ñaꞌan ntseꞌe ka ntsu yo. Naꞌa san ku-iꞌni xiꞌin ntsu.” 22 San danduu saa tsa niꞌi ubi mil moneda, san sadaa tsa: “Toꞌo, taj ni ubi mil moneda d̶a; san niꞌi da ubi ka mil”. 23 S-toꞌo tsa sadaa tsa: “Guaꞌa kida yo, kuu yo ñayii guaꞌa xiꞌin nu xinokuachi ndaa. Ku yo ñayii kidachiion guaꞌa xiꞌin taꞌa dii ni, kukaꞌnu ini ñaꞌan ntseꞌe ka ntsu yo. Naꞌa san ku-iꞌni xiꞌin s-toꞌo yo ya.” 24 Doko danduu saa tsa niꞌi en mil moneda, san sadaa tsa: “Toꞌo, dan xini da sa kuu ni en ñayii ntsee xanaa xi, san nakeꞌen ni ami ti choꞌon ni xiꞌin nakeꞌen ni ami ti daka ni. 25 Juandiku yuꞌu da, san saꞌan da san chiduj d̶a s-tuini ni xiti nuꞌu. San adi yaꞌa.” 26 San s-toꞌo tsa kuaan sadaa tsa: “¡Nu kuiꞌia xiꞌin nu dusa! Tu xini yo sa nakeꞌen ntsu ami ti choꞌon ntsu xiꞌin nakeꞌen ntsu ami ti daka ntsu? 27 Guaꞌa tu chiꞌi yo ku tuini ntsu ya bancu naku, san ora na ndij ntsu, nakeꞌen ntsu ku tuini ntsu xiꞌin d̶aꞌa xi.” 28 San taꞌvichiion tsa: “Nakeꞌen tuini xan san na kuañaꞌan xi nu neꞌe uxi mil xan. 29 Kuan ndidaa nu io xi niꞌi ka nu, san koo baa ka nu; doko nu ti io xi, ntsa sa sani-ini nu sa koo nu dita nu. 30 Nu ti nandeꞌe xan kineꞌen nu ndikeꞌe sa naa xan. Juan ndaꞌyu nu xiꞌin kada ruꞌu j-nuꞌu nu.”

Sa ndakakuachi xi ndidaa ñuu

31 Kii na ndixi ia nduu ñayii ñuyii yaꞌa xiꞌin sa sandutsa nu xiꞌin ndidaa ángel xinokuachi nu, danduu na kuntsaku nu sa tastuni nu xiꞌin sa kunaꞌnu nu; 32 San ndidaa ñuu nataka jnu nu. San nuyaꞌa ndekaxaꞌan nu, kuenta kida tsa sadi kititata ndineꞌe tsa ndidiꞌyu xiꞌin ndikachi; 33 san taxuku tsa ndikachi ichi ladu kuaꞌa, san ndidiꞌyu ichi ladu ichi. 34 Danduu Rey yukua kadaa tsa xi tsa xuku ichi ladu kuaꞌa: “¡Naꞌa, ndidaa yoꞌo nu taꞌan-ini xanaa ku Tata ntsu! Naꞌa koo sa tastuni ntsu ndidaa ñayii, sa kuguaꞌa sa kuj yo ntsa kesaꞌa ñuyii ya. 35 Kuan kuíta ntsu, san taj yo sa saj ntsu; yíchi ntsu ndutsa, san taj yo sa xíꞌi ntsu; kúu ntsu ñayii niꞌno ichi san taj yo ami kéndoo ntsu; 36 Ti ío ku doꞌno ntsu, san dakuiꞌno ñaꞌan yo kuu ntsu; kúꞌu ku ntsu san kikotoñaꞌan yo ku ntsu; yeꞌe ntsu vekaa, san kíj yo ki koto ñaꞌan yo ku ntsu.” 37 Danduu ndidaa nu kuu ñayii guaꞌa kachi nu: “Toꞌo, na kii xini ñaꞌan da xiꞌin doko ni san táj d̶a sa saj ni, adi yíchi ni ndutsa san táj d̶a sa xíꞌi ni. 38 Ña, na kii xini ñaꞌan da sa niꞌno ichi ni san taj d̶a lugar kéndoo ni, adi na kii xini da sa ti io d̶oꞌno ni san dakuiꞌno ñaꞌan da ni. 39 Na kii xini ñaꞌan da sa kuꞌu ni, ña yeꞌe ni vekaa san saꞌan da sa koto ñaꞌan da ni.” 40 San kaꞌan Rey san kachi tsa: “Kachitoꞌon ndaa ntsu yo sa sa kída yo jaꞌa xi en ku kiani ntsu nu kundaꞌvi ka ya, san ntsuꞌu kída yo xi.” 41 Danduu kadaa tsa xi ndidaa tsa yuku ichi ladu ichi: “Xiko kuin sa io ntsu, yoꞌo ñayii kuiꞌia, kuaꞌan xiti ñuꞌu sa kuguaꞌa sa kuxi sakakuiꞌia xiꞌin ndidaa ángel xinokuachi xi. 42 Kuan kuíta ntsu, san ti táj yo sa kaj ntsu; yíchi ntsu ndutsa, san ti táj yo ndutsa koꞌo ntsu; 43 Kuu ntsu ñayii niꞌno ichi, san ti táj yo lugar kéndoo ntsu; ti ío ku doꞌno ntsu san ti dakuiꞌno ñaꞌan yo ku ntsu; kuꞌu ku ntsu xiꞌin yéꞌe ntsu vekaa, san ti sa koto ñaꞌan yo ku ntsu.” 44 San kii yukua kadaa ndidaa tsa yaꞌa: “Toꞌo, na kii xíni ñaꞌan da ndidaa da ni san kuíta ni, adi yíchi ni ndutsa, adi kuu ni ñayii niꞌno ichi, adi ti ío d̶oꞌno ni, adi kuꞌu ni, adi yeꞌe ni vekaa, san ti chintsee ñaꞌan da ndidaa da ni? 45 Danduu kaꞌan tsa san kachi tsa: Kachitoꞌon ndaa ntsu yo, sa ti kída yo xi en nu kundaꞌvi ya, san ti kída yo ku ntsuꞌu tuku.” 46 Danduu ndidaa nuyaꞌa taꞌan ntseꞌe nu san ma ndeꞌe sa taꞌan nu, Doko ñayii io ndaa jnu Ndios niꞌi nu vida ma ndeꞌe.