Sa kída sa teñaꞌan tsa ndidaa tsa xi Jesús
26
Kuenta tuꞌu kaꞌan Jesús ya ndidaa toꞌon yaꞌa, san sadaa ia xi ndidaa tsa nchiko ñaꞌan xi ia:2 —Ubi nika kii kida sa kesaꞌa viko pascua,a san ia nduu ñayii ñuyii yaꞌa na chiñaꞌan nu ndaꞌa ñayii xini-uꞌu ñaꞌan nu san katakaa ñaꞌan jnu en cruz.
3 Kii yukua ndidaa dutu xiꞌin ndidaa tsa savaꞌa kunaꞌnu io ñuu, nátaka tsa xeꞌe dutu kunaꞌnu nani Caifás, 4 san ndatoꞌon tsa ndidaa tsa sa kada naꞌntsa tsa, ndasa na niꞌi dakuidokuachi tsa Jesús sa kaꞌni ñaꞌan tsa. 5 Doko kachi tsa:
—Makada ndo jaꞌa viko ya, kuan na naxikokagua ñayii ñuu ya ku kontra ndo.
En ñadeꞌe chido sa tami saꞌa Jesús
6 San io Jesús Betania, xeꞌe Simón tsa xu kuneꞌe en kueꞌe sa tsaꞌyuniꞌno x-koño xi, 7 kíxi en ñadeꞌe sa io ia, san neꞌe ña en frascu io d̶uku xi, san ñoꞌon ndutsa tami xaꞌvi ntseꞌe xi, san chído ña d̶iki ia neni intsaku ia jnu mesa.b 8 San xíni ndi uxi-uu tsa nchiko ñaꞌan xi ia san nadiko tsa san kachi tsa:
—Naku dativi duꞌua ña jaꞌa? 9 Kuan jaꞌa guaꞌa ni kuyaꞌvi vaa ntseꞌe tuini san nakua ñaꞌan xi ndidaa ñayii kundaꞌvi.
10 San tsáku xi Jesús, san sadaa ia:
—Naku kaꞌan kuiꞌia yo xi nudeꞌe yaꞌa? Kuan kida nu sa guaꞌa ku ntsu. 11 Kuan duꞌua ni koo ndidaa ñayii kundaꞌvi jnu yo ndidaa yo,c doko ntsuꞌu ma duꞌua ni koo ntsu. 12 Kuan sa chido nu ndutsa tami yaꞌa ku diki ntsu, san nuyaꞌa danuu nu sa yinduj ntsu. 13 Kachitoꞌon ndaa ntsu yo sa ami kuu mee nee ñuyii na kaꞌan toꞌon guaꞌa sa kuu ntsu, san nakani sa kída nudeꞌe yaꞌa, ndasa na nakaꞌan ñaꞌan nu.
Judas nakua ñaꞌan tsa Jesús xi ndidaa tsa xini-uꞌu ñaꞌan xi ia
14 Danduu en tsa nani Judas Iscariote tsa kuu en ndi uxi-uu tsa nchiko ñaꞌan xi Jesús, saꞌan tsa sa io dutu kunaꞌnu, 15 san sadaa tsa:
—Nadaa taj ni d̶a? San dan na na taj d̶a Jesús kuan jni? San tsa yaꞌa ndidaa tsa sáñaꞌan tsa oko uxi moneda plata; 16 san ntsa kii yukua nduku ichi Judas sa nakua ñaꞌan tsa Jesús xi ndidaa tsa xini uꞌu ñaꞌan xi ia.
Saj dini Jesús xiꞌin ndidaa tsa nchiko ñaꞌan xi ia antika sa kuu ia
17 Diꞌnanuu kii viko ndidaa ita-stila ti sa keꞌe levadura, ndi uxi-uu tsa nchiko ñaꞌan xi ia saꞌan tsa jnu Jesús san sadaa tsa:
—Ami nchoj ni sa na kadaguaꞌa da sa kaj ndo sa kadakaꞌnu ndo viko pascua ya?
18 San Jesús sadaa ia:
—Kuaꞌan ñuu, san kadaa yo xi en tsayee na naniꞌi taꞌan xiꞌin yo: “Ku Toꞌo ndo kachi tsa: Sa kuyachi kii sa taꞌan ntseꞌe ntsu, xeꞌe yo xan kadakaꞌnu ntsu viko pascua xiꞌin ndi uxi-uu tsa nchiko ñaꞌan kuntsu ya duꞌua kadaa yo.”
19 Ndidaa tsa nchiko ñaꞌan xi ia kída tsa sa táꞌvichiion Jesús san kídaguaꞌa tsa sa kaj s-tsa sa kadakaꞌnu tsa pascua.
20 San kuenta kunaa, Jesús intsaku ia jnu mesa xiꞌin ndi uxi-uu tsa nchiko ñaꞌan xi ia, 21 san neni saj tsa, san sadaa ia:
—Kachitoꞌon ndaa ntsu xo ndidaa yo sa en yo kuu sa na chiñaꞌan kuntsu ndaꞌa ndidaa tsa xini-uꞌu ñaꞌan kuntsu.
22 Ta-uꞌu ntseꞌe tsa yaꞌa ndidaa tsa, san kesaꞌa tsa da en da en tsa ndukutoꞌon:
—Ama dan kuu ña Toꞌo?
23 Danduu káꞌan Jesús san sadaa ia:
—Andu na dakendaꞌa koꞌo ya xiꞌin ntsu, san nuyaꞌa kuu nu na chiñaꞌan kuntsu ndaꞌa ndidaa tsa xini uꞌu ñaꞌan ku ntsu. 24 Sa ndaa sa ia nduu ñayii ñuyii yaꞌa taꞌan nu kuenta yodotuni s-tutu ii Ndios sa taꞌan nu.d Doko ndaꞌvi nu duꞌua na kada xi ia nduu ñayii ñuyii yaꞌa guaꞌa ka tu ti kaku nu.
25 San Judas, tsa duꞌua kada, sadaa tsa:
—Dan kuu sa duꞌua kada kuan ña Toꞌo?
San sadaa Jesús:
—Mee yo kachi.
26 San neni saj s-tsa yaꞌa ndidaa tsa, Jesús teen ia ita-stila san sañaꞌan ia taxaꞌvi xi Ndios; san taꞌvi ia, san sañaꞌan ia xi ndi uxi-uu tsa nchiko ñaꞌan xi ia, san sadaa ia:
—Teen sa kaxi; jaꞌa kuu ku kikikoño ntsu.
27 Teen ia copa sa ñoꞌon vinu tuku, san tuꞌu sañaꞌan ia taxaꞌvi xi Ndios, san sañaꞌan ia, san sadaa ia:
—Koꞌo jaꞌa ndidaa yo; 28 Kuan jaꞌa kuu ku niñi ntsu,e sa kuu tratu saa kachi ntsu sa kada ntsu,f san niñi yaꞌa kee ndasa na ndoo x-kuachi kuaꞌa ntseꞌe ñayii. 29 Doko kachi ntsu xo vita sa ma koꞌo ka ntsu ndutsa tinchiꞌio ya, ntsa kii na koꞌo nituku ntsu xiꞌin yo ndidaa yo sa tastuni ku Tata ntsu.
Jesús kaꞌan ia sa Pedru kaꞌan tsa sa ti xini ñaꞌan tsa xi ia
30 San tuꞌu xíta tsa himno ndidaa tsa xiꞌin ia, san kee ia kuaꞌan ia tinduu nani Olivos xiꞌin tsa ndidaa tsa. 31 Danduu Jesús sadaa ia:
—Niñu yaꞌa dandoo ñaꞌan yo ndidaa yo kuntsu, kuan yodotuni s-tutu ii Ndios: “Da takueꞌe ntsu tsa sadi ndikachi, san ndidaa ndikachi taꞌntsadagua te.”g 32 Doko na nandoto ntsu san kundodonuu ntsu jnu yo kiꞌin ntsa Galilea.h
33 San sadaa Pedru:
—Kuani ndidaa tsa yaꞌa na dandoo ñaꞌan tsa jni doko dan ma dandoo ñaꞌan da jni.
34 Jesús sadaa ia:
—Kachitoꞌon ndaa ntsu yo sa niñu yaꞌa, antika sa kana liꞌi san sa kida naꞌntsa yo uni guelta sa ti xini ñaꞌan yo kuntsu.
35 Pedru sadaa tsa:
—Kuani na kuu da xiꞌin ni, doko ma dandoo ñaꞌan da jni.
San ndidaa ka tsa nchiko ñaꞌan xi ia duꞌua ni kachi tsa tuku.
Jesús kaꞌan ia xiꞌin Ndios xiti laguerta nani Getsemani
36 Danduu saa Jesús xiꞌin ndidaa tsa yaꞌa en laguerta nani Getsemaní, san sadaa ia xi tsa nchiko ñaꞌan xi ia:
—Kukoo jaꞌa neni na kiꞌin ntsu ntsa juan sa kaꞌan ntsu xiꞌin Ndios.
37 Ntsaka ia Pedru kuaꞌan xiꞌin nduu d̶aꞌa Zebedeu, san kesaꞌa ia ku ndaꞌvi xanaa ia xiꞌin ta-uꞌu ntseꞌe ia. 38 Danduu sadaa ia:
—Ndaꞌvi ntseꞌe kuu ntsu tuj ntsu sa sa xiꞌi ntsu. Kendoo jaꞌa doko kunchito ma kudu yo.
39 San kuaꞌan ia en taꞌa ka kanduu, san sakuinxiti ia, san káꞌan ia xi Ndios san sadaa ia:
—Ta, tu guaꞌani, nayaꞌia copa ugua sa kuu sa taꞌan ntseꞌe da. Doko ma kada sa kachi da, na kada ndaa kachi mee ni.
40 Naxikokagua ia sa io tsa nchiko ñaꞌan xi ia, san naniꞌi ia tsa yaꞌa xidi tsa, san sadaa ia xi Pedru:
—Ti kída sa ku nchito yo kuani en hora xiꞌin ntsu ña? 41 Kunchito san kakataꞌvi xi Ndios, ndasa ma en kototuni ñaꞌan yo. Yakui ntseꞌe x-espíritu yo doko xikikoño yo ti yakui.
42 San viaji ku uu kee deen ia, san xíkataꞌvi nituku ia xi Ndios, san sadaa ia:
—Ta, tu guaꞌani nayaꞌia copa ugua sa kuu sa taꞌan ntseꞌe da doko na kuu sa kachi mee ni.
43 San naxikokagua nituku ia, san naniꞌi ia ndidaa tsa yaꞌa sa xidi nituku tsa, kuan nduchinuu tsa ñoꞌon ntseꞌe viaꞌna. 44 San dandoo ñaꞌan ia san kee deen nituku ia san xikataꞌvi ia guelta ku uni xi Ndios, san dini toꞌon yukua kachi nituku ia. 45 Danduu naxikokagua ia jnu ndidaa tsa nchiko ñaꞌan xi ia, san sadaa ia:
—Ama xidi ni daa yo ndidaa yo? kuan sa taꞌan ora, san ia nduu ñayii ñuyii yaꞌa nachiꞌi ñaꞌan jnu ndaꞌa ndidaa ñayii io x-kuachi xi. 46 Ndukoo ndidaa yo! kuan sa kuyachi nu nachiꞌi ñaꞌan kuntsu ndaꞌa ñayii xini-uꞌu ñaꞌan kuntsu.
Teen ñaꞌan tsa ndidaa tsa xi Jesús
47 San neni kaꞌan daa ia, sáa Judas, tsa kuu en ndi uxi-uu tsa xu kunchiko ñaꞌan xi ia, san kuaꞌa ntseꞌe ñayii sáa xiꞌin tsa, ñayii neꞌe espada xiꞌin tunduku, kuan duꞌua táꞌvichiion ndidaa dutu kunaꞌnu xiꞌin ndidaa tsa savaꞌa kunaꞌnu io ñuu. 48 San Judas ndátoꞌon tsa xiꞌin ndidaa tsa kuaꞌan xiꞌin tsa na modo nakuaꞌa ñaꞌan tsa Jesús san sadaa tsa:
Tsa na tsayuꞌu da x-koño jnuu xi, tsa yukua kuu tsa. San tsa yukua teen ni ndidaa ni.
49 San kuyachi tsa jnu Jesús san sadaa tsa:
—¡Kaꞌan da jni Maestru!
—Kada sa vaj xo kada yo. Danduu ndidaa tsa yaꞌa kuyachi tsa san téen tsa Jesús.
51 San en tsa ntsaka taꞌan xiꞌin Jesús dakaa tsa ndaꞌa tsa san kineꞌen tsa x-espada tsa, san datakueꞌe tsa en tsa kidachiion xi dutu kunaꞌnu san diti tsa d̶oꞌo tsa. 52 Danduu Jesús sadaa ia:
—Koꞌno guaꞌa x-espada yo xan, kuan ndidaa ñayii teen espada, xiꞌin espada ndeꞌe ñayii. 53 Ña ama sani-ini yo sa ma kachi kaka ntsu xi ku Tata ntsu, san na tsandaꞌa tsa kuaꞌan ntseꞌe ángel vitakulii? 54 Doko tu duꞌua na kada ntsu namodo xino sa yodotuni kuaan tuda nandeꞌe sa duꞌua taꞌan?
55 San sadaa Jesús xi ndidaa ñayii yukua:
—Naku ñaduꞌu vaj xo ki teen yo juandiku neꞌe yo espada xiꞌin tunduku ña? Ndikii ío ntsu templu xu dadana ñaꞌan ntsu,i san ti teñaꞌan yo ku ntsu. 56 Doko ndidaa jaꞌa yaꞌia kuan na xinotaꞌan sa chídotuni ndidaa x-profeta Ndios.
Danduu ndidaa tsa nchiko ñaꞌan xi ia dandoo ñaꞌan tsa san xíno tsa.
Ntsaka tsa ndidaa tsa Jesús kuaꞌan jnu ndidaa tsa savaꞌa kunaꞌnu
57 Ndidaa tsa teñaꞌan xi Jesús ntsaka ñaꞌan tsa kuaꞌan jnu Caifás, dutu kunaꞌnu, sa nataka ndidaa tsa dadana ñaꞌan ley xiꞌin ndidaa tsa nisaꞌnu. 58 Doko Pedru xika ni xika ni nchiko ñaꞌan tsa, ntsa saa tsa ndikeꞌe dutu kunaꞌnu. San kuyii tsa san sakuntsaku tsa xiꞌin ndidaa tsa ntsaa veꞌe ndasa na kini tsa na modo tuꞌu ndidaa jaꞌa.
59 Ndidaa dutu kunaꞌnu, xiꞌin ndidaa tsa nisaꞌnu xiꞌin ndidaa tsa io junta nduku tsa sa naꞌntsa sa dakuidokuachi ñaꞌan tsa xi Jesús, ndasa na kaꞌni ñaꞌan xi ia. 60 Doko ti naniꞌi tsa nisadana, kuani daa io tsa kída naꞌntsa. San danduu nika saa ubi tsayee dakuidokuachi ñaꞌan tsa xi ia doko tsa naꞌntsa kuu tsa, 61 san kachi tsa:
Tsa yaꞌa kachi tsa: Guaꞌani dandugua ntsu templu san ndadaguaꞌa ntsu uni ni kii.j
62 Ndukuin dutu kunaꞌnu san sadaa tsa:
—Atuu dana sa naxikoneꞌe yo xi ndidaa sa dakuidokuachi ñaꞌan yo ña?
63 Doko Jesús ti kaꞌan ia. San dutu kunaꞌnu sadaa tsa:
—¡Na chonaꞌa ntsu Ndios nchito sa na kachitoꞌon yo tu yoꞌo kuu Cristu, nu kuu D̶aꞌa Ndios!
64 Jesús sadaa ia:
—Yoꞌo kachi. San kachi ntsu yo sa ntsa vita ntsaꞌa yo ia nduu ñayii ñuyii yaꞌa kuntsaku nu j-ladu kuaꞌa Ndios sa tastuni ia, san ndij nu xiti viko andivi.k
65 Danduu dutu kunaꞌnu ndáta tsa d̶oꞌno tsa san kachi tsa:
—¡Kaꞌan kuiꞌia yo xi Ndios! Ti nandeꞌe ka sa nanduku ndo ñayii na kaꞌan ndaa? san jaꞌa vitakulii tsaku yo ndidaa yo toꞌon kuiꞌia yaꞌa. 66 Nasa sani-ini ni ndidaa ni sa kada ndo xiꞌin nuyaꞌa?
San ndidaa tsa yaꞌa kachi tsa:
—¡Nandeꞌe sa kuu nu!l
67 Danduu tivi deen ñaꞌan tsa ndidaa tsa xi Jesús san katu ñaꞌan tsa xi ia, san dagua ka tsa kátu tsa x-koño jnu ia,m 68 san sadaa tsa:
—Yoꞌo nu kuu Cristu, kachitoꞌon ku ntsu ndidaa ntsu andu kuu sa kaniaꞌa xo?
Pedru kida naꞌntsa tsa sa ti xini ñaꞌan tsa xi Jesús
69 Pedru intsaku tsa ndikeꞌe, san kuyachi en ñadeꞌe kidachiion juan san sadaa ña:
—Dini kuu en ña nchiko ñaꞌan xi Jesús ña kuu galileu.
70 Doko Pedru ti nakininchisa tsa jnu ndidaa ñayii xuku jukua san sadaa tsa:
Ti xini da nasa kaꞌan ni.
71 Doko kee tsa ndieꞌe, san enka ña kidachiion juan xíni ñaꞌan ña san sadaa ña xi ndidaa tsa io jukua:
—Ndeꞌe ndeꞌe ña yaꞌa kuu ña nchiko ñaꞌan xi Jesús ña io Nazaret.
72 San ti nakininchisa nituku tsa san oni chonaꞌa tsa:
—Dan ti xini da tsa yaꞌa.
73 San danduu kuyachi uu tsa io jukua san sadaa tsa xi Pedru:
—Sa ndaa kuu sa yoꞌo kuu yo en tsa xan, kuan kaꞌan yo kuenta kaꞌan ñayii io ndaꞌa ñuu Galilea.
74 Danduu kesaꞌa tsa kaꞌan kuiꞌia tsa xiꞌin na chonaꞌa tsa:
—¡Ti xini da tsayee xan!