Jesús nakatsa ia saꞌa ndidaa tsa nchiko ñaꞌan xi ia
13
Kida ka uu kii sa kuu viko pascua, xini Jesús sa sataꞌan x-kii ia sa dandoo ia ñuyii yaꞌa san nuꞌu ia sa io s-Tata ia, ndikii xínimani ia ndidaa ñayii xu kunchiko ñaꞌan xi ia io ñuyii ya ntsa kii ndeꞌe ia, san duꞌua kída-ini ntseꞌe ia tsa ndidaa tsa.2 San neni saj dini ia xiꞌin tsa ndidaa tsa, sakakuiꞌia sa duꞌua choꞌon xanaa Judas d̶aꞌa Simón Iscariote sa na nakua ñaꞌan tsa Jesús xi ndidaa ñayii xini uꞌu ñaꞌan xi ia. 3 San xini Jesús sa ndidaa sa io nachiꞌi Ndios ndaꞌa ia xiꞌin xini ia sa ndaꞌa Ndios kée ia san juan nuꞌun ia, 4 saj daa ndidaa tsa yaꞌa san ndukuin Jesús san dita ia d̶oo ia san teen ia en titsaa san xiꞌni ndodo ia j-nuyiki ia. 5 Danduu choꞌon ia ndutsa en yaxi san kesaꞌa ia nakatsa ia saꞌa ndidaa tsa nchiko ñaꞌan xi ia xiꞌin ndada yichi ia xiꞌin titsaa nuꞌni ndodo ia.
6 Danduu saa ia sa intsaku Simón Pedru, san tsa yaꞌa sadaa tsa:
—Toꞌo, dini nakatsa ni saꞌa da ya ña?
7 Kaꞌan Jesús san sadaa ia:
—Sa kida ntsu, ti sakuituni xanaa yo vita, doko kuee ka kukuituni xanaa yo.
8 Sadaa Pedru:
—¡Ma kueon da sa nakatsa ni saꞌa da!
san sadaa Jesús:
—Tu ma nakatsa ntsu saꞌa yo, san ma ku kuu yo nu xininchisa ñaꞌan ku ntsu.
9 Sadaa Simón Pedru:
—Toꞌo, tu duꞌua kuu san ma nakatsa ni ni saꞌa da ya, nakatsa ni ndaꞌa da xiꞌin d̶iki da ya tuku.
10 Sadaa Jesús:
—Nu dika túꞌu xichi ti nandeꞌe sa ndoo ka nu meni ka saꞌa nu nandeꞌe sa ndoo, kuan nee nu sa io ndoo. Yoꞌo ndidaa yo sa io ndoo yo, doko adi ndidaa yo.
11 Kuan xini ia andu nachiꞌi ñaꞌan xi ia ndaꞌa tsa xini uꞌu ñaꞌan xi ia, juandiku kachi ia: “Adii ndidaa yo io ndoo.”
12 San tuꞌu nakatsa ia saꞌa tsa yaꞌa ndidaa tsa, nakodaꞌa ia d̶oo ia, san na kuntsaku ia san sadaa ia:
—Sakuituni xanaa yo sa kída ntsu ya ña? 13 Yoꞌo danani ñaꞌan yo s-toꞌo yo xiꞌin Maestru yo kuntsu; san kaꞌan ndaa yo, kuan juan ku nchisa ntsu. 14 Doko tu ntsuꞌu kuu ntsu tsa Toꞌo xiꞌin Maestru yo ndidaa yo, nakatsa ntsu saꞌa yo ndidaa yo, duꞌua kida ntsu ndasa duꞌua na kada yo tuku 15 Duꞌua nchoxi sa kada yo ndidaa yo tuku, sa xíni yo sa kída ntsu.a 16 Kachitoꞌon ndaa ntsu yo sa tsa kidachiion ti kunaꞌnu ka tsa sa kuxi s-toꞌo tsa,b nisa tsa tsandaꞌa ñaꞌan xi, ti kunaꞌnu tsa sa kuxi tsa tsandaꞌa ñaꞌan s-tsa. 17 Tu na kukuituni xanaa yo ndidaa jaꞌa san na kada yo, san ku-iꞌni.
18 Adi kaꞌan ntsu sa ndidaa yo kuu. Ntsuꞌu xini ntsu andu kana ntsu; doko ndasa na xinotaꞌan sa yodotuni s-toꞌon Ndios: “Nu saxi ita-stila xiꞌin ntsu nuyaꞌa naxikokagua ku ntsu.”c 19 Ntsa vita kachi ntsu jaꞌa yo antika sa taꞌan, kuan ora na taꞌan, san na kininchisa yo sa ntsuꞌu kuu tsa duꞌua ni kuu. 20 Kachitoꞌon ndaa ntsu yo sa andu taꞌan-ini nu tsandaꞌa ntsu san taꞌan-ini ñaꞌan ku ntsuꞌu, san taꞌan-ini nu tsa tsandaꞌa ñaꞌan kuntsu.d
Jesús kaꞌan ia sa judas na chiñaꞌan xi ia ndaꞌan tsa xini uꞌu ñaꞌan xi ia
21 Tuꞌu kaꞌan ia toꞌon yaꞌa san ta-uꞌu ntseꞌe x-espíritu ia san kaꞌan ia:
—Kachitoꞌon ndaa ntsu yo sa en yo diko ñaꞌan kuntsu.
22 Danduu ndidaa tsa nchiko ñaꞌan xi ia kesaꞌa tsa na ntsaꞌa taꞌan tsa, san sani-ini tsa andu kuu tsa duꞌua kada ya. 23 En tsa nchiko ñaꞌan xi ia tsa nchoj ntseꞌe ia, intsaku ntsaa ñaꞌan tsa xi ia. 24 San dakuiko ndaꞌa Simón Pedru jnu tsa sa na ndukutoꞌon tsa andu kuu tsa kachi Jesús ya sa duꞌua kada. 25 San kuyachi ka tsa ntsa jnu Jesús san sadaa tsa:
—Toꞌo, andu kuu sa duꞌua kada.
26 Jesús sadaa ia:
—Nu na chotoo ntsu en taꞌa ita-stila san nakua ñaꞌan ntsu xi nu yukua kuu nu.
San chotoo ia taꞌa ita-stila san sañaꞌan ia xi Judas, d̶aꞌa Simón Iscariote. 27 San tuꞌu saxi Judas kuan ita-stila, sakakuiꞌia kuyii xanaa tsa. San Jesús sadaa ia s-tsa:
—Kada ni sa kada yo kuan.
28 Nisa en tsa intsaku saxi kuan ti sakuituni xanaa xi naku duꞌua sadaa ia; 29 kuan Judas kuu tsa xu keꞌe tuini ndaꞌa xi, san sani-ini tsa ndidaa tsa sa sadaa Jesús: Kuen sa nandeꞌe ku ndo viko adi sa na kuañaꞌan tsa xi tsa kundaꞌvi. 30 Tuꞌu saj s-tsa ita-stila, san kée kono tsa kuaꞌan tsa; san sa kunaa.
Ntsuꞌu nuꞌu ntsu sa io ku Tata ntsu
31 Yaꞌia Judas kuan kuaꞌan tsa san sadaa Jesús:
—Vita sa saa tiempu sa kadakaꞌnu ñaꞌan xi ia nduu ñayii ñuyii yaꞌa, xiꞌin kadakaꞌnu ñaꞌan xi Ndios sa saꞌa nu. 32 San na tuꞌu kadakaꞌnu ñaꞌan xi Ndios sa saꞌa d̶aꞌa ia san kada ia sa na kadakaꞌnu ñaꞌan xi d̶aꞌa ia san taꞌa ni ka kida. 33 Daa, ma koo naꞌa ka ntsu xiꞌin yo ndidaa yo, san nanduku ñaꞌan yo, doko sa sadaa ntsu xi ndidaa judiu tastuni duꞌua ni kachi ntsu yo tuku: Ami na kiꞌin ntsu san yoꞌo ma kachi kiꞌin yo.e 34 En toꞌon saa taꞌvichiion ntsu yo ndidaa yo: Sa na kinimani taꞌan yo ndidaa mee yo;f duꞌua kuenta xinimani ñaꞌan ntsu yo, duꞌua kinimani taꞌan ndidaa mee yo. 35 Tu xinimani taꞌan yo en yo xiꞌin en yo, san nee ñuyii kini sa kuu yo nu nchiko ñaꞌan ku ntsu.
Jesús kaꞌan ia sa Pedru kada naꞌntsa tsa sa ti xini ñaꞌan tsa xi ia
36 Simón Pedru sadaa tsa:
—Toꞌo, ami kiꞌin ni?
Sadaa Jesús:
—Ami na kiꞌin ntsu san yoꞌo ma kachi kiꞌin yo vita; doko kuee ka kunchiko ñaꞌan yo kiꞌin.
37 Pedru sadaa tsa:
—Toꞌo. Naku vita ma kachi kunchiko ñaꞌan da jni. Kuañaꞌan da xuyii da sa saꞌa ni.
38 Jesús sadaa ia:
Xuyii yo taj yo kuntsu ña. Kachitoꞌon ndaa ntsu yo sa antika sa kana liꞌi san uni viaji kida naꞌntsa yo sa ti xini ñaꞌan yo kuntsu.