Jesús ku ichi kiꞌin ndo sa io Ndios
14
Ma kani-ini yo ndidaa yo. Kininchisa ñaꞌan xi Ndios san kininchisa ñaꞌan ku ntsuꞌu. 2 Xeꞌe ku Tata ntsu io kuaꞌa luguar kendoo ndo. Kuan tu adi sa ndaa kuu san sa kachitoꞌon ntsu yo. Nuꞌu ntsu ku danuu ntsu ami kendoo yo 3 San tu na nuꞌu ntsu ku danuu ntsu ami kendoo yo san ndij ni tuku ntsu san nakuaka ñaꞌan ntsu yo; ndasa ami io ntsu san juan koo yo ndidaa yo tuku. 4 San xini yo ami nuꞌu ntsu, san xini yo ichi.5 Sadaa Tomás:
—Toꞌo, ti xini da ndidaa da ami nuꞌu ni; Na modo kini da ichi?
6 Sadaa Jesús:
—Ntsuꞌu kuu ichi, ntsuꞌu kuu sa ndakuiti xiꞌin ntsuꞌu kuu tsa taxi ñuyii; sa saꞌa ni ntsuꞌu saa yo sa io Ndios. 7 Tu xini ñaꞌan yo ku ntsuꞌu, san kini yo ku Tata ntsu; san ntsaa vita kini ñaꞌan yo xiꞌin xíni ñaꞌan yo.
8 Sadaa Felipe:
—Toꞌo, dadana ñaꞌan ni s-Tata ni d̶a ndidaa da, juan ni nchoj da.
9 Sadaa Jesús:
—Felipe, naꞌa ntseꞌe io ntsu xiꞌin yo ndidaa yo sa ti xini ñaꞌan yo kuntsu ña. Nu xini ñaꞌan kuntsu san xini nu ku Tata ntsu. Naku kachi yo sa na dadana ñaꞌan ntsu ku Tata ntsu yo. 10 Ti xininchisa yo sa ntsuꞌu io ntsu xiꞌin ku Tata ntsu san ku Tata ntsu io ia xiꞌin ntsuꞌu ña? Sa kaꞌan ntsu ya ti kaꞌan ntsu ku toꞌon mee ntsu; kuan ku Tata ntsu ia io xiꞌin ntsu ia yaꞌa kida ia x-chiion ia sa saꞌa ntsu 11 Kininchisa sa ntsuꞌu io ntsu xiꞌin ku Tata ntsu, san ku Tata ntsu io ia xiꞌin ntsu; san tu ñaꞌan san kininchisa sa saꞌa ndidaa sa naꞌnu kída ntsu.
12 Kachitoꞌon ndaa ntsu yo sa nu xininchisa ñaꞌan kuntsu, nu yukua kada nu sa kida ntsu. San naꞌnu ka sa kada nu sa kuxi jaꞌa, kuan ntsuꞌu nuꞌu ntsu sa io ku Tata ntsu. 13 San ndidaa sa na kaka yo sa saꞌa sa xininchisa ñaꞌan yo kuntsu, juan kada ntsu, ndasa ku Tata ntsu na kadakaꞌnu ñaꞌan xi ia sa saꞌa D̶aꞌa ia 14 Tu nasa na kaka yo sa saꞌa sa tastuni ntsu, san ntsuꞌu kada ntsu.
Jesús kaꞌan ia sa tsandaꞌa ia Espíritu Santu
15 Tu xinimani ñaꞌan yo kuntsu san kada yo sa taꞌvichiion ntsu. 16 San ntsuꞌu kaka ntsu xi ku Tata ntsu san tsandaꞌa ia en ia na chintsee ñaꞌan yo, ndasa nakoo ia xiꞌin yo ndidaa kii. 17 Ia yaꞌa kuu Espíritu sakuntsaka ñaꞌan xi ñayii sa na kini sa ndaa, sa ti nchu teen ñuyii ya, kuan ti xini ñayii san nisa ti xini ñaꞌan ñayii. Yoꞌo ndidaa yo xini ñaꞌan yo, kuan io ia sa io yo ndidaa yo, san koo ia xanaa yo ndidaa yo.
18 Ma dandoo ñaꞌan ntsu yo na en daꞌa ndaꞌvi; ndij ntsu sa io yo ndidaa yo. 19 Taꞌni ka, san ñuyii ya ma kini ñaꞌan ka kuntsu; doko yoꞌo kini ñaꞌan yo kuntsu. Kuan ntsuꞌu nchito ntsu, sa kunchito yo tuku. 20 Kii na nandoto ntsu kini yo sa ntsuꞌu io ntsu xiꞌin ku Tata ntsu, san yoꞌo xiꞌin mee ntsu, san ntsuꞌu xiꞌin mee yo. 21 Nu xinimani ñaꞌan kuntsu, kuu nu sa kunini ku toꞌon ntsu san kida nu sa taꞌvichiion ntsu, san nu xinimani ñaꞌan kuntsu kinimani ñaꞌan ku Tata ntsu xi, san ntsuꞌu kinimani ñaꞌan ntsu nu tuku san kada ntsu sa na kini ndaa nu andu kuntsu.
22 Sadaa Judas, doko adi tsa kuu Iscariote:
—Toꞌo, naku dan ni ndidaa da kini ñaꞌan jni san ndidaa ñayii ñuyii ya ñaꞌan?
23 Kaꞌan Jesús san sadaa ia:
—Tu andu xinimani ñaꞌan kuntsu, san kida sa kachi ntsu. San ku Tata ntsu kinimani ñaꞌan ia, san kij ntsu xiꞌin ku Tata ntsu san koo ntsu xiꞌin nu. 24 Nu ti xinimani ñaꞌan kuntsu san ti kida nu sa kachi ntsu. San toꞌon káꞌan ntsu sa tsáku yo adi ku toꞌon mee ntsu kuu, s-toꞌon ku Tata ntsu ia tsandaꞌa ñaꞌan kuntsu kuu.
25 Ndidaa toꞌon yaꞌa kaꞌan ntsu neni io da ntsu xiꞌin yo ndidaa yo. 26 Doko ia chintsee ñaꞌan yo, ia kuu Espíritu Santu, ia tsandaꞌa ku Tata ntsu xiꞌin sa nani ntsu, ia yaꞌa dadana ñaꞌan ndidaa xiꞌi kada ia sa na nakaꞌan yo ndidaa sa kachi ntsu ya.
27 Sa koo kadi na dandoo ntsu yo, san jaꞌa kuu sa koo kadi taj ntsu. Adi kuenta sa taxi ñuyii yaꞌa, ma kani-ini yo san nisa ma yuꞌu yo 28 Sa tsaku yo sa kachi ntsu, sa nuꞌu ntsu sa ndij nituku ntsu san koo ndo. Tu nchisa sa xinimani ñaꞌan yo kuntsu san ku-iꞌni yo, sa nuꞌu ntsu sa io ku Tata ntsu, kuan ia yaꞌa kunaꞌnu ka ia sa kuj ntsu. 29 Kachitoꞌon da oon ntsu yo kuan kii na taꞌan san na kininchisa yo ku toꞌon ntsu.
30 Ma ndatoꞌon ntseꞌe ka ntsu xiꞌin yo ndidaa yo, kuan vaxi nu yeꞌe ndaꞌa xi ñuyii yaꞌa. San kuani ti io sa tastuni ñaꞌan nu kuntsu. 31 Doko ndasa na kini ñuyii ya sa xinimani ntsu ku Tata ntsu san ku Tata ntsu tsandaꞌa ñaꞌan ku ntsu, san kada ntsu sa taꞌvichiion ku Tata ntsu Ndios. Ndukuin, na kiꞌin kadi ndo.