Duꞌua taꞌan kuenta kachi Jesús sa kuu ia yuku tinchiꞌio
15
Ntsuꞌu kuu tu tinchiꞌio nchisa, san ku Tata ntsu kuu ia ntsaa 2 Tu dakaa ndaꞌa xi ti kee kuiꞌi san diti tsa, doko tu kee kuiꞌi san diti ndodo tsa ndasa na kee ka kuiꞌi. 3 Yoꞌo ndidaa yo sa io ndoo yo sa saꞌa toꞌon kaꞌan ntsu yo. 4 Kantsaa ñaꞌan ni kuntsu, san ntsuꞌu kantsaa ñaꞌan ntsu yo ndidaa yo. Kuan nisa en ndaꞌa tukuiꞌi ti kee kuiꞌi tu io deen, kuan nandeꞌe sa kantsaa taꞌan, san duꞌua ni yoꞌo ndidaa yo tuku, tu ma kantsaa ñaꞌan yo kuntsu ma koo x-kuiꞌi yo ndidaa yo.5 Ntsuꞌu kuu tu tinchiꞌio, san yoꞌo kuu ndaꞌa xi. Andu na kantsaa ñaꞌan kuntsu san ntsuꞌu na kantsaa ñaꞌan ntsu xi tuku, nuyaꞌa kee ntseꞌe x-kuiꞌi nu. Doko tu ma kantsaa ñaꞌan yo kuntsu, san ma kada yo nisadana. 6 Tu andu ma kantsaa ñaꞌan kuntsu san kineꞌen ñaꞌan nu san yichi nu kuenta taꞌan ndaꞌa yutu titsaa san dakayu ñaꞌan xi.
7 Tu na kantsaa ñaꞌan yo kuntsu san ku toꞌon ntsu na koꞌon xanaa yo, kaka nasa nchoj yo sa niꞌi yo. 8 San duꞌua kada sa kadakaꞌnu ñaꞌan xi ku Tata ntsu: Tu nakoo ntseꞌe x-kuiꞌi yo san ku kuu nchisa yo ñayii nchiko ñaꞌan ku ntsu ndidaa yo. 9 Ndaa xinimani ñaꞌan ku Tata ntsu kuntsu, duꞌua xinimani ñaꞌan ntsu yo; kuindaa xiꞌin sa xinimani ntsu ya. 10 Tu kida yo sa taꞌvichiion ntsu, san io yo xiꞌin sa xinimani ntsu, kuan duꞌua ntsuꞌu kida ntsu sa táꞌvichiion ku Tata ntsu xiꞌin io ntsu xiꞌin sa xinimani ia.
11 Ndidaa jaꞌa kaꞌan ntsu kuan ndasa na ku iꞌni ntseꞌe yo kuenta ku iꞌni ntsu.
12 Jaꞌa kuu sa taꞌvichiion ntsu: Sa na kinimani taꞌan yo ndidaa yo,a kuenta ntsuꞌu xinimani ñaꞌan ntsu yo. 13 Ti en xinimani ntseꞌe ka sa kuxi jaꞌa, sa kua ñaꞌan xuyii xi sa saꞌa ndidaa nu mani xiꞌin. 14 Yoꞌo ndidaa yo kuu nu mani xiꞌin ntsu, tu kida yo sa taꞌvichiion ntsu. 15 Ma danani ñaꞌan ka ntsu nu kidachiion yo ndidaa yo, kuan nu kidachiion ti xini nu sa kida s-toꞌo nu. Doko danani ñaꞌan ntsu nu mani xiꞌin ntsu yo, kuan kachi toꞌon ntsu ndidaa sa tsaku kuntsu sa kaꞌan ku Tata ntsu. 16 Yoꞌo ndidaa yo ti ndekaxaꞌan yo ku ntsuꞌu, ntsuꞌu ndekaxaꞌan yo ndidaa yo, san taꞌvichiion ntsu yo sa na kiꞌin yo san nakoo kuaꞌa ntseꞌe x-kuiꞌi yo, san nchoj ntsu kuu sa kuiꞌi yukua na kudii ntseꞌe. San duꞌua taxi ku Tata ntsu ndidaa sa na kaka yo xiꞌin sa tastuni ntsu. 17 San jaꞌa taꞌvichiion ntsu yo: Sa na kinimani taꞌan yo ndidaa mee yo.
Ñuyii yaꞌa xini-uꞌu ñaꞌan xi Jesús xiꞌin ndidaa ñayii kuu xaꞌan ia
18 Tu ñayii ñuyii yaꞌa xini uꞌu ñaꞌan yo, ntsaꞌa sa diꞌna ka ntsuꞌu xini-uꞌu ndidaa ñayii. 19 Ndidaa ñayii kuu xaꞌan ñuyii yaꞌa, san ñuyii ya xinimani ñaꞌan xi sa kuu kuenta ñuyii yaꞌa. Doko adii ka xaꞌan ñuyii ya ku yo, kuan ntsuꞌu ndekaxaꞌan yo; juandiku ñayii ñuyii yaꞌa ti xinimani ñaꞌan yo. 20 Nakaꞌan toꞌon kachi ntsu yo: “Nu kidachiion ti kunaꞌa nu ka nu sa kuxi s-toꞌo nu.”b Tu ntsuꞌu xini-uꞌu nu, san kini-uꞌu ñaꞌan nu yoꞌo ndidaa yo tuku. San tu sakunini sa kaꞌan ntsu san kunini nu sa kaꞌan yo tuku. 21 Doko ndidaa jaꞌa kada nu yo kuan xininchisa ñaꞌan yo kuu ntsu, kuan ti xini nu andu tsandaꞌa ñaꞌan kuntsu.
22 Tu ntsuꞌu ti kij ntsu san nisa ti kaꞌan ntsu yo ndidaa yo, ma koo x-kuachi yo; doko vita sa atuu ka sa kachi yo sa atuu x-kuachi yo. 23 Nu xini-uꞌu ñaꞌan kuntsu, xini-uꞌu ñaꞌan xi ku Tata ntsu. 24 Tu ti kída ntsu sa naꞌnu sa io ndidaa ñayii yaꞌa, ma en kuidokuachi. Doko xini yo ndidaa sa naꞌnu kida ntsu, san xini-uꞌu ñaꞌan yo kuntsu xiꞌin ku Tata ntsu san kuani xíni yo ndidaa sa naꞌnu yaꞌa. 25 Doko ndidaa jaꞌa táꞌan kuan na xinotaꞌan sa yodotuni s-tutu ii Ndios sa kuu ndidaa nuyaꞌa kuan kachi: “Xini-uꞌu ñaꞌan duꞌua nu kuntsu.”c