16
Ndidaa jaꞌa kachi ntsu yo ndasa ma dana yo sa xininchisa ñaꞌan yo ku ntsu. 2 San kineꞌen ñaꞌan tsa yo xiti veꞌe sinagoga, san kixi kii sa kaꞌni ñaꞌan tsa yo dakaa yo kuan xininchisa ñaꞌan yo kuntsu san kani-ini tsa sa kida tsa sa guaꞌa sa nchoxi Ndios. 3 Jaꞌa kada tsa kuan ti xini ñaꞌan tsa ku ntsu san nisa ku Tata ntsu ti xini tsa ndidaa tsa. 4 Kachi ntsu ndidaa jaꞌa yo kuan na taꞌan kii san nakaꞌan yo sa sakachi toꞌon ntsu yo.Ndidaa jaꞌa ti kaꞌan ntsu yo diꞌna, kuan xu ndikono ndo ndidaa ndo. 5 Doko vita nuꞌun ntsu sa io ia tsandaꞌa ñaꞌan kuntsu, san nisa en yo ti ndukutoꞌon: Ami kiꞌin ni? 6 kada ndidaa sa kaꞌan ntsu ya, kida sa ndaꞌvi ntseꞌe nduu xanaa yo ndidaa yo. 7 Doko kachitoꞌon ndaa ntsu: Guaꞌa ka tu na nuꞌun ntsu; kuan tu ma nuꞌun ntsu, san ia chintsee ñaꞌan makixi ia sa io yo ndidaa yo. San tu na nuꞌu ntsu, san tsandaꞌa ñaꞌan ntsu. 8 San kii na kixi ia, kadaa ndaa ia xi ndidaa ñayii nasa kuu sa nandeꞌe nchisa sa kada ñayii, xiꞌin sa vaxi sa ndakakuachi Ndios. 9 Espíritu Santu kada sa ndidaa ñayii na kini sa io x-kuachi xi kuan ti xininchisa ñaꞌan ku ntsu. 10 San kada sa ndidaa ñayii na kini sa Ndios kida ia sa ndaa: Kuan ntsuꞌu kuan nuꞌu ntsu sa io ku Tata ntsu san ma kini ñaꞌan ka yo kuntsu; 11 San dini Espíritu Santu kada sa na kukuituni xanaa ñayii sa Ndios kuu ia saꞌntsa ndaa kuachi, kuan sa da kuidokuachi ñaꞌan xi Diablu sa yeꞌe ndaꞌa xi ñuyii yaꞌa.
12 Kuaꞌa ntseꞌe ka io sa kachitoꞌon ntsu yo doko ma kukuituni xanaa yo vita. 13 San kii na kixi Espíritu kaꞌan ndaa, ia yaꞌa kuntsaka ñaꞌan yo kiꞌin sa io sandaa; kuan ma kaꞌan ia s-toꞌon mee ia, kaꞌan ia ndidaa sa tsaku xi ia san kachitoꞌon ia ndidaa sa kixi. 14 Kada sa na kadakaꞌnu ñaꞌan kuntsu, kuan teen ia sa kuu ku kiaꞌan ntsu san kachitoꞌon ia yo. 15 Ndidaa sa io xi Tata kuu ku kiaꞌan ntsu. Juandiku kachi ntsu sa Espíritu Santu teen ia sa kuu ku kiaꞌan ntsu san kachitoꞌon ia yo.
Ndidaa sa io ndaꞌvi xanaa ñayii nduu sa ku-iꞌni ntseꞌe ñayii
16 Saku nika san ma kini ñaꞌan ka yo kuntsu; Doko danduu sa kini ñaꞌan nituku yo kuntsu.
17 Danduu uu tsa nchiko ñaꞌan xi ia ndatoꞌon tsa ndidaa mee tsa: Nasa nchukachi tsa ku ndo sa duꞌua kaꞌan tsa ya kuan kachi tsa sa taꞌni ka tiempu san ma kini ñaꞌan ka ndo san kachi nituku tsa sa kini ñaꞌan nituku taꞌa ka tiempu, kuan kachi ntsa sa kiꞌin tsa sa io s-Tata tsa 18 Nasa kuu sa nchukachi tsa sa kachi tsa: saku nika? ti xini ndo nasa kuu sa nchukachi tsa.
19 Jesús xíni ia sa nchu ndukutoꞌon tsa yaꞌa ndidaa tsa san sadaa ia:
—Yoꞌo ndidaa yo sani-ini yo san kachi ntsu sa taꞌni ka tiempu kini ñaꞌan danduu taꞌni ka tiempu sa ma kini ñaꞌan ka yo kuntsu? Jaꞌa nchu ndukutoꞌon yo ndidaa yo ña? 20 Kachi toꞌon ndaa ntsu yo sa ndaꞌyu yo xiꞌin ta-uꞌu yo ndidaa yo; doko ñuyii ya ku-iꞌni. Yoꞌo ndidaa yo ndaꞌvi ntseꞌe koo xanaa yo doko sa ndaꞌvi koo xanaa yo ya nduu sa ku-iꞌni yo ndidaa yo. 21 En ñadeꞌe, ora kaku ña daꞌa, san ndaꞌyu ña sa uꞌu kuan taꞌan kii kaku ña. Doko tuꞌu kaku ña daꞌa, san dana ña sa uꞌu, kuan kaku ña en daꞌyiki ñuyii yaꞌa. 22 San duꞌua ni yoꞌo ndidaa yo tuku io ndaꞌvi xanaa yo vita; doko ntsuꞌu kini ñaꞌan nituku ntsu yo. San ku-iꞌni ntseꞌe xanaa yo, san ma en kuu dita sa ku-iꞌni yo.
23 San kii yukua ma ndukutoꞌon ka yo nisadana kuntsu. Kachitoꞌon ndaa ntsu yo sa ndidaa sa na kaka yo xi ku Tata ntsu xiꞌin sa tastuni ntsu, taxi ia. 24 Ntsa vita, vita kaka ka yo nisadana xiꞌin sa nani ntsu. Kaka san niꞌi yo, ndasa na xino sa ku-iꞌni yo.
Jesucristu ia kidanar ñaꞌan xi ñuyii
25 Ndidaa sa xu kaꞌan ntsu yo, xu kaꞌan ntsu yo xiꞌin toꞌon dadaguataꞌan, doko taꞌan kii san ma kaꞌan ka ntsu yo duꞌua san kachi toꞌon ndaa ntsu yo nchakaa ku Tata ntsu Ndios. 26 Kii yukua kaka yo xiꞌin sa nani ntsu, doko ma nandeꞌe ka sa kakataꞌvi ntsu sa saꞌa yo, 27 Kuan ku Tata ntsu xinimani ñaꞌan ia yo, kuan yoꞌo ndidaa yo xinimani ñaꞌan yo kuntsu xiꞌin xininchisa yo san ntsuꞌu kée ntsu sa io Ndios. 28 Ntsuꞌu kée ntsu sa io ku Tata ntsu san vaj ntsu ñuyii yaꞌa; san dandoo ntsu ñuyii yaꞌa san nuꞌun ntsu sa io ku Tata ntsu.
29 Sadaa ndidaa tsa nchiko ñaꞌan xi ia:
—Vita kuu sa kaꞌan ndaa ni san ti kaꞌan ni xiꞌin toꞌon dadaguataꞌan. 30 San vita xini da sa dini kuu sa xini ndidaa, san ti nandeꞌe sa ndukutoꞌon ñayii ni kuan sa xini ni ndidaa. Juandiku xininchisa da ndidaa da sa kée ni ndaꞌa Ndios.
31 Jesús sadaa ia:
—Vita xininchisa yo ña? 32 Sa taꞌan kii, san vita taꞌan ora, sa taꞌntsadagua yo ndiden ndiden kiꞌin yo en ladu san dandoo ñaꞌan ni mee yo kuntsu. Doko adi meeni ntsu io, kuan ku Tata ntsu io ia xiꞌin ntsu. 33 Ndidaa toꞌon yaꞌa kachi ntsu yo kuan kadi ni na koo yo. Ñuyii ya taꞌan ntseꞌe yo, doko ¡ku yakui kuan ntsuꞌu kidanar ntsu ñuyii!