Jesús xikataꞌvi ia sa saꞌa ndidaa tsa nchiko ñaꞌan xi ia
17
Ndidaa toꞌon yaꞌa kaꞌan Jesús, san na ntsaꞌa ntsaa ia andivi san kachi ia:—Ta, sa saa ora vita. Kada ni sa na kadakaꞌnu ñaꞌan xi d̶aꞌa ni ya kuan na kada nu sa nakada kaꞌnu ñaꞌan xi mee ni tuku, 2 Kuan dini sañaꞌan sa na tastuni nu xi ndidaa ñayii, ndasa na kuañaꞌan nu ñuyii ma ndeꞌe xi ndidaa nu sañaꞌan ni jnu. 3 San niꞌi ni sa koo nu ndidaa tiempu sa nakini ñaꞌan ndaa nu jni, sa dini kuu Ndios nchisa xiꞌin na kininchisa nu Jesucristu ia tsándaꞌa ni.
4 Na kadakaꞌnu ñaꞌan ni ntsa nuꞌu ya, kuan dandeꞌe da chiion táꞌvi ni sa kada da. 5 Vita vi Ta, kadakaꞌnu ñaꞌan ni da sa na koo da jnu ni xan duꞌua kuenta xu kadakaꞌnu ñaꞌan da kuenta ío da jnu ni xan antika sa kukagua ñuyii ya.
6 Sadaa da andu kuu ni xi ndidaa ñayii taj ni da ñuyii yaꞌa. Xaꞌan ni kuu nu, san taj ni nu da; san sa kida nu sa kachi ni. 7 San vita xini nu sa ndidaa sa taj ni da kuu xaꞌan ni; 8 Kuan sadaa da toꞌon kachi ni da, san ndidaa nu semani san xini ndaa nu sa sa io ni kée da, san xíninchisa nu san mee ni tsándaꞌa ñaꞌan da.
9 Dan xika da sa saꞌa nu yaꞌa ndidaa nu. Adi xika da sa saꞌa ñayii kuu ñuyii yaꞌa, maska sa saꞌa nu taj ni da; kuan xaꞌan ni kuu nu tuku. 10 Ndidaa sa kuu xaꞌan da kuu xaꞌan ni, san ndidaa sa kuu xaꞌan ni kuu xaꞌan da; san kidakaꞌnu ñaꞌan da sa saꞌa nuyaꞌa ndidaa nu.
11 Dan ma koo ka da ñuyii ya doko nuyaꞌa ndidaa nu koo nu ñuyii ya, san dan ndij da sa io ni xan. Ta choguaꞌa ni nu xiꞌin sa tastuni ni sa taj ni da, ndasa na ku kuu nu eni ndidaa nu, duꞌua ndaa mee ni xiꞌin mee da eni ku ndo. 12 Ndidaa kii ío da xiꞌin nu ñuyii yaꞌa, san xu koꞌno guaꞌa ñaꞌan da xiꞌin sa tastuni ni. San xito ñaꞌan da, en dini nu xita nu kuu nu nandeꞌe sa kuita, san nisa en ka nu ti xita, ndasa na xino sa yodotuni S-tutu ii ni.a
13 Doko vita ndij da sa io ni doko kaꞌan da jaꞌa neni io daa da ñuyii ya, ndasa na ku-iꞌni ntseꞌe nu ndidaa nu. 14 Dan kaꞌan da s-toꞌon ni nu, san ñayii kuu ñuyii yaꞌa xini-uꞌu ñaꞌan nu; kuan adi xaꞌan ñuyii ya kuu nu, san nisa dan ti kuu da xaꞌan ñuyii ya tuku. 15 Ti xika da sa na dita ni nu ñuyii ya, xika da sa na koꞌno guaꞌa ni nu xi sa kuiꞌia. 16 Ti kuu nu xaꞌan ñuyii ya, kuenta dan ti kuu da xaꞌan ñuyii ya. 17 Kada ni sa na koo ndoo nu, na koo nu modo nchoj mee ni sa saꞌa toꞌon ndaa; s-toꞌon ni kuu sa ndaa. 18 Duꞌua kuenta mee ni tsándaꞌa ñaꞌan ni da ñuyii ya, duꞌua dan tsandaꞌa da nu ñuyii ya. 19 Dan na táj da xuyii da ni, ndasa nuyaꞌa ndidaa nu na koo nu modo nchoj ni sa saꞌa xi sa ndaa.
20 Doko adi sa saꞌa ndidaa nuyaꞌa ni xika da, xika da sa saꞌa ndidaa nu dika kininchisa ñaꞌan da sa saꞌa nuyaꞌa ndidaa nu; 21 Ta ndasa eni ka na nduu nu ndidaa nu duꞌua kuenta mee ni xiꞌin mee da eni ku ndo, duꞌua na ku kuu nu xiꞌin ndo; ndasa na kininchisa ñayii ñuyii yaꞌa sa mee ni tsándaꞌa ñaꞌan da. 22 Dan sañaꞌan da sa tastuni taj ni da, ndasa na ku kuu nu eni, duꞌua kuenta ntsoo kuu ndo eni. 23 Ndidaa nuyaꞌa xiꞌin mee da eni kuu da xiꞌin nu, san dini xiꞌin dan eni kuu ndo, san duꞌua eni kuu ndo ndidaa ndo ndasa na kini ndidaa ñayii io ñuyii ya sa mee ni tsandaꞌa ñaꞌan da, san xinimani ntseꞌe ni ndidaa nu xininchisa ñaꞌan da duꞌua ndaa xinimani ñaꞌan ni xi mee da.
24 Ta xínimani ñaꞌan ni da ntsa diꞌna ka sa kukagua ñuyii ya, san nchoj da sa ndidaa ñayii xininchisa ñaꞌan da nakoo nu sa koo da ndasa na kini nu ndidaa sa tastuni taj ni da. 25 Ta ia guaꞌa kuu ni, ñuyii ya ti xini ñaꞌan ni, doko dan xini ñaꞌan da ni, san ndidaa nuyaꞌa xini nu sa mee ni tsandáꞌa ñaꞌan da. 26 Dan dadana ñaꞌan da nu andu kuu ni san chintsee ñaꞌan ka da nu kuan na kukuituni xanaa nu andu kuu ni. Kuan ndasa na kinimani nu kuenta xinimani ñaꞌan mee ni da san duꞌua na ku kuu nu eni xiꞌin mee da.