Xiꞌi Lazaro
11
Ío en nu yee nani Lazaro ñuu nani Betania xuun María xiꞌin Marta x-kuꞌu nu.a 2 María yaꞌa kuu nu chído ndutsatami saꞌa Jesús san ndada yichi nu xiꞌin xidi d̶iki nu. San Lázaro kuu x-kuaꞌa nu kuꞌuxi xi.b 3 San duꞌua nduu kuꞌu nuyaꞌa táꞌvichiion nu sa na kiꞌin ku kadaa xi Jesús:—Toꞌo kichi ntseꞌe da nchoj ni kuꞌu x-chi.
4 San tsaku xi Jesús ya san kachi ia:
—Kueꞌe yaꞌa adi kueꞌe kuu nu ku, kuan sa kadakaꞌnu ñaꞌan xi Ndios xiꞌin D̶aꞌa ia kuu jaꞌa.
5 Mani ntseꞌe Jesús xiꞌin ndi uni kuaꞌa nuyaꞌa. 6 Niꞌi toꞌon ia sa kuꞌu xi Lázaro, doko kendoo ka ia ubi ka kii sa io ia; 7 danduu sadaa ia xi ndidaa tsa nchiko ñaꞌan xi ia:
—Nakiꞌin nituku ndo ntsa Judea.
8 Sadaa ndidaa tsa nchiko ñaꞌan xi ia:
—Maestru, vita yaꞌia kuaꞌa kii sa ndidaa tsa tastuni io Judea nchu chidoyuu ñaꞌan tsa ni, san nchu kiꞌin ni tuku ni ña.
9 Sadaa Jesús:
—Adi uxi-uu hora io xi en kii ña? Tu andu ndikono nduu, san ma kukodama, kuan io sa dayeꞌe xi ñuyii yaꞌa; 10 Doko andu ndinoo niñu sakodama kuan ti io sa dayeꞌe xi.
11 Danduu kachi ia:
—Lázaro nu mani xiꞌin ndo xidi nu, doko na kiꞌin ntsu ku dandoto ñaꞌan ntsu jnu.
12 Danduu kachi ndidaa tsa nchiko ñaꞌan xi ia:
—Toꞌo, tu xidi nu, san nduguaꞌa nu.
13 Doko sa sadaa Jesús kuu sa sa xiꞌi Lazaro, sani-ini ndidaa tsa nchiko ñaꞌan xi ia sa xidi nu yaꞌa san ndexavi nu. 14 Juandiku sadaa ndaa Jesús:
—Lazaro sa xiꞌi nu: 15 San ku-iꞌni ntsu sa ti ío ndo ndidaa ndo juan kuan sa saꞌa yoꞌo ndidaa yo kida, ndasa na kininchisa ñaꞌan yo ndidaa yo ku ntsu. Doko nakiꞌin ndo kuntsaꞌa ndo nu.
16 Dandu Tomás tsa kuu tineꞌe, sadaa tsa xi dagua ka tsa nchiko ñaꞌan xi ia:
—Na kiꞌin ndo tuku, ndasa na kuu ndo xiꞌin tsa.
Jesús kidakaꞌnu ia xanaa x-kuaꞌa Lazaro
17 Sáa Jesús Betania, san niꞌi toꞌon ia sa sa kuu kumi kii ku yinduxi Lazaro. 18 Ñuu Betania io yachi jnu ñuu Jerusalén, ndaa uni kilometru, 19 san kuaꞌa ntseꞌe judiu saꞌan sa io Marta xiꞌin María ndasa na kadakaꞌnu nu xanaa nu sa xiꞌi x-kuaꞌa nu. 20 Danduu tsaku sa vaxi Jesús, san kee Marta sa natan ñaꞌan nu, doko María kendoo nu veꞌe intsaku nu. 21 Marta sadaa nu xi Jesús:
—Toꞌo, tu ío ni jaꞌa naku, san x-kuaꞌa da ma kuu chi. 22 Doko vita xini da sa ndidaa sa na kaka ni xi Ndios, Ndios taxi ia ni.
23 Jesús sadaa ia:
—X-kuaꞌa yo nandoto nu.
24 Marta sadaa nu:
—Dan xini da sa nandoto chi ndidaa kii ultimo.
25 Jesús sadaa ia:
—Ntsuꞌu kida sa nandoto ndii, xiꞌin ntsuꞌu sañaꞌan vida. Nu xininchisa ñaꞌan ku ntsu, kuani na kuu nu san kunchito nu. 26 Ndidaa ñayii nchito san xininchisa ñaꞌan ku ntsu san ma kuu nu. Xininchisa yo jaꞌa ña?
27 San sadaa nu:
—Jon xininchisa da Toꞌo, Dan xininchisa da sa dini kuu Cristu ia kida sa nanitaꞌvi, D̶aꞌa Ndios, ia tsandaꞌa Ndios ñuyii yaꞌa.
28 San tuꞌu kaꞌan nu toꞌon yaꞌa san saꞌan nu san kana nu María, san sadaa nu:
—Ku Maestru ndo io ña jaꞌa san kana ñaꞌan ña nda.
29 San tsáku xi María san xino nu ndukuin san xino ntseꞌe nu kuaꞌan sa io Jesús. 30 Kuan Jesús vita yii ka ia ñuu, in daa ia ndodo ichi ñuu ami nanitaꞌan ia xiꞌin Marta. 31 San ndidaa judiu xíni sa ndukuin María san sa kuita nchiko ñaꞌan tsa jnu, kuan sani-ini tsa sa kiꞌin nu sa yenduxi Lazaro ku ndaꞌyu nu.
32 Danduu saa María sa io Jesús san xini ñaꞌan nu, san sa kuinxiti nu saꞌa ia san sadaa nu:
Toꞌo tu io ni jaꞌa san ma kuu x-kuaꞌa da.
33 Dandu xini Jesús ya sa ndaꞌyu nu xiꞌin ndidaa judiu ntsaka taꞌan xiꞌin nu vaxi, ta-uꞌu ntseꞌe ia san ndaꞌvi ntseꞌe nduu xanaa ia san kunda-ini ñaꞌan ia 34 San sadaa ia:
—Ami sakituu yo nu.
San sadaa tsa ndidaa tsa:
—Toꞌo, naꞌa ni ki ntsaꞌa ni.
—Ntsaꞌa ni sa ntseꞌe da nchóxaꞌan tsa jnu.
37 Doko dagua tsa kachi:
—Nu ndádaguaꞌa jnuu nu kuaa, ti káchi kada nu sa ma kuu Lazaro ya tuku ña?
Duꞌua kída sa nandoto Lazaro
38 Jesús ndu ndaꞌvi ntseꞌe nituku xanaa ia san kuaꞌan ia yavi kuan. En yavi kuu san ntsadi en yuu kaꞌnu. 39 Sadaa Jesús:
—Dita yuu xan.
Marta, x-kuaꞌa ndii kuan, sadaa nu:
—Toꞌo gua sa saꞌan chi kuan sa kuu kumi kii xiꞌi chi.
40 Jesús sadaa ia:
—Adi káchi ntsu xo sa tu na kininchisa ñaꞌan yo ku ntsu san kini yo sa tastuni Ndios.
41 Danduu dita tsa ndidaa tsa yuu, san ndaneꞌe Jesús jnu ia ichi andivi san kaꞌan ia:
—Taa, taxaꞌvi jni kuan tsáku jni toꞌon káꞌan da. 42 Dan xini da sa ndidaa ora nini ñaꞌan ni d̶a; doko duꞌua kachi da sa saꞌa ndidaa ñayii xuku jaꞌa, ndasa na kininchisa tsa sa dii ni tsandaꞌa ñaꞌan d̶a.
43 San tuꞌu káꞌan ia toꞌon yaꞌa, san kána ia niꞌi ntseꞌe:
—Lazaro ti kee.
44 San nu xiꞌi kée nu, san duku saꞌa nu xiꞌin ndaꞌa nu xiꞌin en titsaa duku jnuu nu. San sadaa Jesús:
—Dandatsa ñaꞌan jnu san kodaa nu na kiꞌin nu.
Ndatoꞌon tsa sa kaꞌni tsa Jesús
45 Keꞌen judiu kíxi sa io María kuenta xíni tsa ndidaa sa kída Jesús, san xíninchisa ñaꞌan tsa xi ia. 46 Doko dagua tsa yaꞌa saꞌan tsa sa io ndidaa fariseu san sadaa tsa sa kída Jesús. 47 Danduu ndidaa dutu kunaꞌnu xiꞌin fariseu nadataka tsa ndidaa ka tsa kunaꞌnu san kachi tsa:
—Nasa kada ndo? Kuan nuyaꞌa kida nu kuaꞌa ntseꞌe sa naꞌnu. 48 Tu ma kada ndo nisadana, san kuaꞌa ntseꞌe ñayii kininchisa ñaꞌan jnu; san kixi ndidaa romanu san datani tsa ku templu ndo xiꞌin kaꞌni tsa ñayii ku kiun ndo.
49 Doko Caifás tsa kuu dutu kunaꞌnu kuia yukua, sadaa tsa:
—Yoꞌo ndidaa yo ti xini yo nisadana; 50 kuan ti xini yo san guaꞌa ka tu na kuu eni ñayii sa saꞌa ñuu ya san adi sa nee ñuu ya na ndeꞌe.
51 Doko Caifás ya ti káꞌan tsa sa sani-ini mee tsa kuan Ndios kída sa duꞌua na káꞌan tsa, kuan tsa yaꞌa kuu dutu kunaꞌnu ntseꞌe tiempu yukua, san káꞌan tsa sa Jesús kuu ia sa saꞌa ñuu; 52 san adi ni sa saꞌa meni ñuu judiu ya kuu ia, kada ia sa na nataka ndidaa tsa kuu d̶aꞌa Ndios nchitsa niꞌno enka xichi 53 san duꞌua, ntsa kii yukua ndatóꞌon tsa sa kaꞌni tsa Jesús.
54 Juandiku, Jesús ya ti ndeꞌe ka xu ndinoo ia jnu ndidaa judiu, san kee ia kuaꞌan ia desiertu, en ñuu nani Efraín; san juan kendoo ia xiꞌin ndidaa tsa nchiko ñaꞌan xi ia.
55 Sa kuyachi viko pascua ndidaa judiu, san kuaꞌa ñayii ñuu ya saꞌan Jerusalén antika sa kesaꞌa viko pascua saꞌan tsa sa ndu ndoo tsa jnu Ndios. 56 San nanduku ñaꞌan tsa xi Jesús san ndatoꞌon tsa ndidaa mee tsa, xuku tsa ndikeꞌe templu:
—Ncha tuj yo ndidaa yo kij nu viko ya ña ñaꞌan.
57 Ndidaa fariseu xiꞌin ndidaa dutu kunaꞌnu táꞌvichiion tsa sa tu andu na kini ñaꞌan xi ia, san na kiꞌin ku kadaa s-tsa ndasa na teen ñaꞌan tsa ndidaa tsa.