Jesús kaꞌan ia sa natani templu
24
Kée Jesús templu san kuaꞌan ia, san kuyachi ndidaa tsa nchiko ñaꞌan xi ia san dádana ñaꞌan tsa nchakaa templu. 2 San Jesús sadaa ia:—Ntsaꞌa ndidaa jaꞌa ka. Kachindaa ntsu sa ma kendoo yuu sata yuu sa ma ndugua.
Nasa taꞌan antika ka sa ndeꞌe ñuyii ya
3 San intsaku ia tinduu nani Olivos, san ndi uxi-uu tsa nchiko ñaꞌan xi ia natuꞌua ñaꞌan tsa san ndukutoꞌon tsa:
—Kachitoꞌon ni, na kii taꞌan ndidaa jaꞌa? San na señal koo antika sa ndij ni xiꞌin ora sa io sa ndeꞌe ñuyii ya?
4 Káꞌan Jesús san sadaa ia:
—Ntsaꞌa sa ma en dandaa ñaꞌan yo; 5 kuan kuaꞌa ntseꞌe ñayii kixi kuenchiion sa nani ntsu san kachi: “Ntsuꞌu kuu Cristu tsa tsandaꞌa Ndios”; san kuaꞌan ntseꞌe ñayii dandaa tsa. 6 Tsaku yo sa ku vaa sa koo sa naa ñayii. Duꞌua ku vaa doko ma yuꞌu yo, kuan nandeꞌe sa duꞌua taꞌan; doko vitañaꞌa ka saa sa ndeꞌe ñuyii. 7 Kuan naa ñayii io en ñuu xiꞌin ñayii io enka ñuu, tsa tastuni en ñuu xiꞌin tsa tastuni enka ñuu. Ndidaa xichi koo kueꞌe, tama xiꞌin sa kanda ntseꞌe. 8 Kuan ndidaa jaꞌa kuu kuenta sa dika kesaꞌa sa uꞌu.
9 Danduu nachiꞌi ñaꞌan tsa ndaꞌa ñayii tastuni ñuu sa taꞌan ntseꞌe yo xiꞌin kaꞌni ñaꞌan yo, xiꞌin kini uꞌu ñaꞌan yo ndidaa ñuu kuan xininchisa ñaꞌan yo ku ntsu.a 10 San duꞌua kuaꞌa tsa xininchisa ñaꞌan ku ntsu kachi sa ti xini ñaꞌan ku ntsu; san nadiko taꞌan tsa ndidaa mee tsa jnu kustixa, san kini uꞌu taꞌan tsa ndidaa mee tsa. 11 Kuaꞌa ntseꞌe tsa naꞌntsa koo kuan kachi tsa sa Ndios tsandaꞌa ñaꞌan s-tsa doko kada naꞌntsa tsa, san dandaa tsa kuaꞌa ntseꞌe ñayii; 12 San sa ntseꞌe da kuaꞌa sa kuiꞌia koo san sa xinimani taꞌan tsa ndidaa tsa ma koo ka. 13 Doko ñayii nakuin ndaa ntsa nandeꞌe ndidaa san ñayii yaꞌa naniꞌi taꞌvi xi.b 14 San toꞌon guaꞌa yaꞌa kaꞌan xi nee ñuyii ndasa na tsaku xi ndidaa ñayii, san danduu kixi sa ndeꞌe ñuyii.
15 San duꞌua tu nakini yo sa kuiꞌia ntseꞌe kida kuiꞌia lugar ii templu, sa kaꞌan Daniel x-profeta Ndiosc —andu kaꞌvi toꞌon yaꞌa, san na kukuituni xanaa xi—, 16 danduu ñayii io Judea kama ntseꞌe na kiꞌin yuku. 17 Nu nakoo d̶iki xeꞌe xi ma nayii nu xeꞌe nu sa teen nu en sa teen nu, 18 san nu io xitu xi ma naxikokagua nu nakeꞌen nu d̶oo nu.d 19 ¡Ndaꞌvi ndidaa ñadeꞌe ñoꞌon daꞌa xiꞌin ñadeꞌe dakadi d̶aꞌyiki xi ndidaa kii yukua! 20 Kii kachi sa kono yo ndidaa yo kakataꞌvi xi Ndios kuan ndasa ma ku kuu ndidaa kii vixi ntseꞌe adi sábado;e 21 kuan taꞌan ntseꞌe nika ñayiif kuenta ti taꞌan ñayii ntsa kesaꞌa ñuyii ya xiꞌin ntsa vita, nisa ma duꞌua ka taꞌan. 22 Tu Ndios ti kída ia sa na ku kuiti ndidaa kii yukua, san nisa en ñayii ma naniꞌitaꞌvi xi; doko sa saꞌa ndidaa ñayii ndekaxi ia, juandiku kii yukua ku kuiti.
23 Tu andu kachi yo: “Ntsaꞌa adi Cristu tsa kida sa nanitaꞌvi ya yaꞌa”, ña “adi tsa yukua”, Ma kininchisa ñaꞌan yo. 24 Kuan koo tsa dandaa ñaꞌan sa kuu tsa Cristu xiꞌin tsa dandaa ñaꞌan sa tsandaꞌa ñaꞌan Ndios xi, san kada tsa sa yuꞌu ini ñayii xiꞌin señal san dandaa ñaꞌan tsa, san ii io sa ntsa ndeꞌe tsa ndekaxi Ndios dandaa tsa. 25 Ntsaꞌa ka, sa kachitoꞌon ndaa ntsu yo antika sa taꞌan. 26 San duꞌua tu na kachi yo, “Ntsaꞌa adi tsa kuu Cristu kuan io desiertu” san ma kee yo ña tu na kachi, “adi tsa io xiti veꞌe”, ma kininchisa yo. 27 Kuan duꞌua kuenta kida sa sandutsa ntsa saꞌa andivi tuu nee andivi, duꞌua kada sa ndixi ia nduu ñayii ñuyii yaꞌa.g 28 Kuan ami katuu ndii, juan taka ndixii.h
Sa ndixi ia nduu ñayii ñuyii yaꞌa
29 Tuꞌu san táꞌan ntseꞌe ndidaa kii yaꞌa san ora ndunaa, san yoo ma dayeꞌe ka. Koꞌio ndidaa chodini io andivii xiꞌin ndidaa sa io andivi kanda. 30 Danduu nanuu ndidaa señal sa kundixi ia nduu ñayii ñuyii yaꞌa ntsa andivi, san yuꞌu ntseꞌe ndidaa ñayii io ñuyii ya san ndaꞌyu tsa ndidaa tsa, san kini ñaꞌan tsa xi ia nduu ñayii ñuyii yaꞌa ndij nu ntsa xiti vikoj xiꞌin sa tastuni nu xiꞌin sa sandutsa nu. 31 Tsandaꞌa nu x-ángel nu san niꞌi ntseꞌe ndaꞌyu trompeta, san na dataka ndidaa ñayii ndekaj nu ndi kumi ladu kana tachi, ntsa en ladu saꞌa andivi xiꞌin ntsa enka ladu saꞌa andivi.
32 Ntsaꞌa sa kida tu tichikaꞌakuxi: Sa nduu yutsa ndaꞌa xi san kee vixi kuii xi, san xini yo san kuyachi sa ndixi davi. 33 Duꞌua yoꞌo tuku, tu nakini yo ndidaa jaꞌa, kunaꞌa san ia nduu ñayii ñuyii yaꞌa sa io vii sa ndij nu. 34 Kachi ndaa ntsu yo sa taꞌan ndidaa jaꞌa antika sa kuu ndidaa ñayii yaꞌa. 35 Andivi ya xiꞌin nuꞌu ya yaꞌia, doko ku toꞌon ntsu ya ma yaꞌia.
36 Doko kii xiꞌin ora ti en xini sa taꞌan ndidaa jaꞌa; nisa ndidaa ángel io andivi, nisa Daꞌa ya, meni ku Tata ntsu naꞌa.
37 Kuan duꞌua kuenta táꞌan kii ío Noé,k duꞌua kada ora ndixi ia nduu ñayii ñuyii yaꞌa. 38 Kuan kii yukua kuenta vita kesaꞌa ka sa kixi davi ntseꞌe, saj s-tsa xiꞌi tsa, tandaꞌa ñayii xiꞌin da tandaꞌa ñaꞌan xi ñayii ntsa kii kunayii Noé barku, 39 san ti xinituni tsa ntsa kesaꞌa davi ntseꞌe san oño odini ntsaka ñaꞌan s-tsa ndidaa tsa,l duꞌua kada sa ndixi ia nduu ñayii ñuyii yaꞌa tuku. 40 San kii yukua ubi tsayee koo yuku; en tsa kuntsaka Ndios kiꞌin san enka tsa kendoo. 41 Ubi ñadeꞌe nchiko; en ña kuntsaka Ndios kiꞌin san enka ña kendoo.
42 Kunchito kuan ti xini yo na kii ndixi s-toꞌo yo. 43 Doko kunaꞌa toꞌon yaꞌa: Tu s-toꞌo veꞌe xini tsa na ora kiꞌin ñaduꞌu, san ku nchito tsa san ma kachi tsa sa kaan ñaduꞌu ndieꞌe tsa. 44 Juandiku kunchito ndidaa yo, kuan kii ti sani-ini yo, ndixi ia nduu ñayii ñuyii yaꞌa.m
Tsa xinokuachi ndaa xiꞌin tsa ti xinokuachi ndaa
45 ¡Na kachi toꞌon ntsu andu kuu tsa xinokuachi ndaa xiꞌin tsa kutuni xi? tsa dandoo s-toꞌo xi san na kuntsaka ñaꞌan xi dagua ka tsa kidachiion, ndasa ma yaꞌia ora kaj tsa. 46 Guaꞌadiko tsa kidachiion ya tu na ndixi s-toꞌo tsa, san na naniꞌi ñaꞌan s-tsa san kida tsa yaꞌa sa táꞌvichiion s-tsa. 47 Kachitoꞌon ndaa ntsu yo sa kukaꞌnu-ini ñaꞌan s-toꞌo tsa xi ndidaa sa io tsa. 48 Doko tu tsa kidachiion en tsa kuiꞌia kuu tsa san sani-ini tsa: Ku toꞌo ntsu ku kuee tsa; 49 san kesaꞌa tsa kani tsa ndidaa ka tsa kidachiion xiꞌin tsa, san kesaꞌa tsa saj tsa xiꞌi tsa xiꞌin ndidaa tsa xini, 50 san s-toꞌo tsa kidachiion ya ndij s-tsa kii ti yeꞌe d̶iki tsa yaꞌa xiꞌin ora ti sani-ini tsa, 51 san kuiꞌia ntseꞌe kuiko ñaꞌan tsa san tantsaku ñaꞌan tsa xiꞌin tsa kuiꞌia s-tsa. San juan ndaꞌyu tsa xiꞌin ku ruꞌu j-nuꞌu tsa.