Jesús kaꞌan ia sa natani templu
13
Kee Jesús templu san ndi uxi-uu tsa nchiko ñaꞌan xi ia, en tsa sadaa:—Maestru, ¡ntsaꞌa ni! yuu ntseꞌe da vili ndaa ya xiꞌin ndidaa veꞌe naꞌnu io sa io templu.
2 San sadaa Jesús:
—Ntsaꞌa ndidaa veꞌe naꞌnu io sa io templu, kachi ndaa ntsu sa ma kendoo yuu sata enka yuu sa ma ndugua.
Na señal koo antika ka sa ndeꞌe ñuyii
3 San intsaku ia tinduu nani Olivo, san Pedru, Jacobo, Juan xiꞌin Andrés vii ni ndukutoꞌon tsa:
4 Kachitoꞌon ni, nasa taꞌan ora na xino taꞌan ndidaa jaꞌa?
5 San kesaꞌa Jesús sadaa ia:
—Ntsaꞌa sa ma en dandaa ñaꞌan xo. 6 Kuaꞌa ntseꞌe ñayii kixi kuenchiion sa nani ntsu sa kachi nu: Ntsuꞌu kuu Cristu tsa tsandaꞌa Ndios sa taxi ñuyii, san kuaꞌa ntseꞌe ñayii dandaa nu.
7 Doko tu na tsaku yo sa naa ñayii adi kuvaa sa naa ñuu xiꞌin enka ñuu, ma yuꞌu yo ndidaa yo. Kuan nandeꞌe sa duꞌua taꞌan, doko vita ñaꞌan ka saa sa ndeꞌe ndidaa. 8 Kuan naa tsa tastuni en ñuu xiꞌin enka tsa tastuni enka ñuu. Koo sa kanda ndidaa xichi. Koo tama. San jaꞌa ku sa dika kesaꞌa sa taꞌan nee ñuyii.
9 Doko guaꞌa yo ndidaa yo ntsaꞌa sa saꞌa yo. Kuan nachiꞌi ñaꞌan yo ndaꞌa kustixa san ndoꞌo yo xiti veꞌe sinagoga. Sa saꞌa ntsuꞌu kuntsaka ñaꞌan yo jnu ndidaa tsa naꞌnu tastuni xiꞌin jnu ndidaa rey, duꞌua taꞌan ndasa na kaꞌan yo sa kuu ntsu xi ndidaa tsa yaꞌa 10 Doko nandeꞌe sa ndidaa toꞌon guaꞌa kaꞌan sa kuu ntsu na kaꞌan xi ndidaa ñuu. 11 Doko tu na kuntsaka ñaꞌan yo kiꞌin sa na naꞌma yo ma kani-ini yo nasa kaꞌan yo, kaꞌan nasa na kixi d̶iki yo na kada Ndios; kuan adi mee yo ku sa kaꞌan, kuan Espíritu Santu kaꞌan sa saꞌa yo ndidaa yo. 12 Kuaꞌa ntseꞌe ñayii na kuañaꞌan xani xi sa nakaꞌni ñaꞌan xi, san tata na kuañaꞌan tsa daꞌa tsa. San daꞌa naxikokagua nu xi s-tadeꞌe nu san kaꞌni ñaꞌan nu. 13 San ma en kiniguaꞌa ñaꞌan yo ndidaa yo kuan xininchisa ñaꞌan yo ku ntsu. Doko andu na kuyakui ntsa na tuꞌu ndidaa san nuyaꞌa nanitaꞌvi.
14 Doko tu na kini yo ndidaa sa kuiꞌia io sa ti nandeꞌe sa koo kuenta chidotuni Daniel x-profeta Ndios (nu kaꞌvi toꞌon yaꞌa na kukuituni xanaa nu) ndidaa nu io Judea, na kono nu yuku tu xíni nu ndidaa jaꞌa. 15 Nu io d̶iki veꞌe nisa ma nayii nu xiti veꞌe sa ku kineꞌen nu sa kuneꞌe nu kiꞌin, 16 san nu io yuku ma naxikokagua nu ku nakeꞌen nu doo nu. 17 ¡Ndaꞌvi ndidaa ñadeꞌe ñoꞌon daꞌa xiꞌin ndidaa ñadeꞌe dakadi d̶aꞌa xi ndidaa kii yukua! 18 Kakataꞌvi xi Ndios, ndasa ma taꞌan ndidaa jaꞌa kii vixi ntseꞌe. 19 Kuan taꞌan ntseꞌe nika ñayii kuenta ti en taꞌan ntsa kesaꞌa ñuyii ya xiꞌin ntsa vita, nisa ma duꞌua ka taꞌan. 20 Tu Ndios ti kida kuita ia ndidaa sa taꞌan kii yukua, san ma en naniꞌitaꞌvi; doko sa saꞌa ndidaa ñayii ndekaxi ia, juandiku kida kuiti ia ndidaa sa taꞌan kii yukua.
21 San tu andu kachi: Adi Cristu tsa kida sa nanitaꞌvi ya yaꞌa, ña adi tsa yukua, ma kininchisa yo. 22 Kuan kixi tsa dandaa ñaꞌan sa kuu Cristu xiꞌin ñayii kachi sa Ndios tsandaꞌa ñaꞌan xi doko ñayii naꞌntsa kuu tsa, san kada tsa kuaꞌa ntseꞌe sa naꞌnu ndasa kuaꞌa ntseꞌe ñayii na dana, san ii io sa ntsa ndeꞌe ñayii ndekaxi Ndios dandaa tsa. 23 Doko guaꞌa yo ndidaa yo kuan sa kachitoꞌon ndaa ntsu yo antika sa taꞌan ndidaa jaꞌa.
Sa ndixi ia nduu ñayii ñuyii yaꞌa
24 Doko na yaꞌia ndidaa sa duꞌua taꞌan ntseꞌe ya, san ora ma dayeꞌe ka san ma dayeꞌe ka yoo tuku. 25 San ndidaa chodini koꞌio, xiꞌin ndidaa sa naꞌnu io andivi kanda. 26 Danduu kini yo ia nduu ñayii ñuyii yaꞌa ndij nu xiti viko xiꞌin sa tastuni nu xiꞌin sa sandutsa. 27 Danduu tsandaꞌa nu ndidaa x-ángel nu, san na dataka ñaꞌan xi ndidaa ñayii ndekaxi Ndios ndidaa ñuu xika ntseꞌe ntsa en saꞌa andivi xiꞌin ntsa enka saꞌa andivi.
28 Ntsaꞌa ncha nduu tu tichikaꞌakuxi: Ora nduu yutsa ndaꞌa xi san kee vixi xi, san xini yo sa sa kuyachi sa ndixi davi. 29 San duꞌua yoꞌo ndidaa yo tuku, tu nakini yo sa taꞌan ndidaa jaꞌa, kunaꞌa sa sa kuyachi, ntseꞌe sa ndij ntsu. 30 Kachitoꞌon ndaa ntsu sa ma ndeꞌe ndidaa ñayii ntsa na taꞌan ndidaa jaꞌa. 31 Andivi ya xiꞌin nuꞌu ya ndeꞌe doko ku toꞌon ntsu ma ndeꞌe.
32 Doko kii xiꞌin ora, ti en xini, nisa ndidaa ángel io andivi, nisa D̶aꞌa Ndios, meni Ndios naꞌa.
33 Ntsaꞌa, koo listo san kakataꞌvi, kuan ti xini yo na ora saa kii yukua. 34 Kuu kuenta en tsayee kuaꞌan xika san dandoo tsa xeꞌe tsa sa sañaꞌan tsa sa tastuni tsa kidachiion jnu tsa ndiden ndiden táꞌvichiion tsa sa na kada tsa, san táꞌvichiion tsa xi tsa ntsaa ndieꞌe sa juan ni na kuin tsa. 35 Guaꞌa yo, kuan ti xini yo na ora ndixi S-toꞌo veꞌe, Tu ñini adi dagua niñu, ña antika sa kana liꞌi adi yeꞌe; 36 kuan na kada ora ndij s-tsa san naniꞌi ñaꞌan tsa yo xidi yo. 37 Sa kaꞌan ntsu yoꞌo ndidaa yo duꞌua ni kaꞌan ntsu xi ndidaa ñayii tuku: ¡Keꞌe d̶iki yo ndidaa yo!