Jesús yii ia Jerusalén
11
Kuyachi ia jnu ñuu Jerusalén, sa io ñuu Betfagé xiꞌin Betania, jnu tinduu nani Olivos; san Jesús tsandaꞌa ia ubi tsa nchiko ñaꞌan xi ia 2 san sadaa ia:—Kuaꞌan ñuu io ichi jnu xi xan san saa yo san naniꞌi yo en burru luchi yiten san vita en ka kodo te, dañu te san kuntsaka yo te kixi. 3 San tu andu na ndukutoꞌon yo: Naku dakaa sa kida yo? san kadaa yo: Nandeꞌe te xi ku Toꞌo ndo san danduu kij s-tsa ndintsaka tsa te.
4 San saꞌan tsa yaꞌa san naniꞌi tsa burru luchi yiten te ndieꞌe; san dayaa tsa te.
5 Uu tsa io juan sadaa tsa:
—Naku dayaa yo burru luchi xan?
6 San tsa yaꞌa sadaa tsa sa sadaa Jesús sa na kadaa tsa, san ti kaꞌan ka tsa ndukutoꞌon. 7 Ntsaka tsa burru luchi sa io Jesús san sakindodo tsa d̶oo tsa sata te, san sakodo ia te. 8 Kuaꞌa ntseꞌe ñayii saki d̶oo xi ichi, san dagua tsa saꞌntsa tsa ndaꞌa yutu kuii san taxuku tsa ichi.
9 Ndidaa tsa ndodonuu jnu Jesús xiꞌin ndidaa tsa nchiko kana tsa, san kachi tsa:
—Hosanna, na kukaꞌnu tsa vaxi xiꞌin sa nani Ndios. 10 Na kukaꞌnu na kuduku tsa vaxi tastuni kuenta tástuni rey David na kukaꞌnu ia ntsa nino yukua.
11 Kuyii Jesús Jerusalén san kuaꞌan ia sa io templu, san tuꞌu ntsaꞌa ia ndidaa xichi, san kuaꞌan ia Betania xiꞌin ndi uxi-uu tsa nchiko ñaꞌan xi ia, kuan sa ñini.
Jesús sadaa ia xi tu tichikaꞌakuxi sa ma kee ka x-kuiꞌi xi
12 Ndu enka kii kee ia xiꞌin tsa ndidaa tsa ñuu nani Betania, san kuita ia. 13 San xika xini ia en tu tichikaꞌakuxi sa io vixi xi, san saꞌan yachi ia sa ntsaꞌa ia tu io x-kuiꞌi xi. San saa ia jnu xi, san ti niꞌi ia nisadana meni vixi io kuan adi x-kii xi kuu. 14 Danduu Jesús sadaa ia xi tu tichikaꞌakuxi:
—¡Ma en ka ñayii kaxi x-kuiꞌi yo!
San tsaku xi ndi uxi-uu tsa nchiko ñaꞌan xi ia.
Jesús ndadandoo ia templu
15 Saa ia xiꞌin tsa ndidaa tsa Jerusalén san Jesús kuyii ia templu. San kesaꞌa ia kineꞌen ia ndidaa tsa diko xiꞌin ndidaa tsa seen io xiti templu. Dakana ia j-mesa ndidaa tsa nadama tuini xiꞌin s-titsayu ndidaa tsa diko data. 16 San ti semani ia sa yaꞌia ñayii xiti templu xiꞌin sa kuyaꞌvi. 17 San dakuaꞌa ñaꞌan ia san sadaa ia:
—Ama ti xini yo sa yodotuni s-tutu ii Ndios sa ku kueꞌe ntsu kunani veꞌe ndatoꞌon ñayii xiꞌin ntsu? Doko yoꞌo ndidaa yo ndada yo xavi ñaduꞌu.
18 Tsaku xi ndidaa dutu kunaꞌnu xiꞌin ndidaa tsa dadana ñaꞌan ley, san nduku ichi tsa sa kaꞌni ñaꞌan tsa, doko yuꞌu ñaꞌan tsa xi ia, kuan ndidaa ñuu ku-iꞌni xiꞌin ndidaa sa dakuaꞌa ñaꞌan ia. 19 San ñini, Jesús kee ia xiꞌin ndi uxi-uu tsa nchiko ñaꞌan xi ia ñuu yukua.
Tu tichikaꞌakuxi ti io x-kuiꞌi xi yichi
20 San datsa ñuꞌu ni yaꞌia tsa ndidaa tsa ichi yukua san xini tsa tu tichikaꞌakuxi yichi ntsa xoꞌo xi. 21 San danduu nakaꞌan Pedru sa sadaa Jesús xi yutu kuan, san sadaa tsa:
—Maestru, ntsaꞌa ni tu tichikaꞌakuxi sa kaꞌan kuiꞌia ni xi ya yíchi.
22 San sadaa Jesús:
—Kininchisa ñaꞌan xi Ndios. 23 Kuan kachi ndaa ntsu san andu na kadaa xi tinduu yaꞌa: Xikokuin san kukee xiti mar xan, san na kininchisa san Ndios kada ia. 24 Juandiku kachi ntsu yo sa ndidaa sa na kaka yo xi Ndios san na kininchisa yo sa niꞌi yo san duꞌua kada. 25 Doko ora na kaꞌan yo xi Ndios koo sakaꞌnu-ini sa saꞌa enka ñayii tu nasa neyeka ñayii yo, ndasa Ndios ia io andivi nakoo ia sakaꞌnu-ini sa saꞌa ndidaa x-kuachi yo. 26 Kuan tu yoꞌo ti sakoo yo sakaꞌnu-ini, san Ndios ia io andivi ma koo ia sakaꞌnu-ini sa saꞌa x-kuachi yo tuku.
Sa tastuni Jesús
27 Naxikokagua ia xiꞌin tsa ndidaa tsa Jerusalén. Danduu neni ndinoo ia ndikeꞌe templu, kixi ndidaa dutu kunaꞌnu xiꞌin ndidaa escriba, xiꞌin ndidaa tsa nisaꞌnu, 28 san sadaa tsa ndidaa tsa xi ia:
—Andu táꞌvichiion sa kada yo ndidaa jaꞌa? Ña andu taxi sa tastuni yo sa kada yo ndidaa jaꞌa?
29 Danduu Jesús sadaa ia:
—Ntsuꞌu na ndukutoꞌon ntsu en toꞌon yo ndidaa yo tuku. San kachitoꞌon, san ntsuꞌu kachitoꞌon ntsu andu táꞌvichiion sa kada ntsu ndidaa jaꞌa tuku: 30 Sa dakuendutsa ñaꞌan Juan, andu sañaꞌan sa tastuni tsa sa dakuendutsa tsa, Ndios ña ñayii? Kachitoꞌon.
31 Danduu ndidaa tsa yaꞌa ndatoꞌon tsa ndidaa mee tsa, san kachi tsa:
—Tu na kadaa ndo sa Ndios sañaꞌan sa tastuni tsa sa dakuendutsa ñaꞌan tsa san kachi nu: Naku ti xíninchisa ñaꞌan ni tuda? 32 Ma kachi kadaa ndo sa ñayii sañaꞌan sa tastuni tsa sa dakuendutsa ñaꞌan tsa.
Duꞌua kachi tsa ndidaa tsa kuan yuꞌu tsa ñayii ñuu, kuan ndidaa tsa xini sa Juan kuu en x-profeta Ndios. 33 San danduu sadaa tsa xi Jesús:
—Ti xini ntsu ndidaa ntsu.
San Jesús sadaa ia:
—Nisa ntsuꞌu ma kachitoꞌon ntsu andu táꞌvichiion sa kada ntsu ndidaa jaꞌa tuku.