Jesús dadana ñaꞌan ia sa na kada ndo sa guaꞌa
6
Ma kadavaa yo ndidaa yo sa guaꞌa kida yo jnu ndidaa ñayii ndasa na kini tsa ndidaa tsa sa ntseꞌe guaꞌa kida yo;a kuan tu duꞌua na kada yo san ma niꞌi yo sa taxi s-Tata yo ia io andivi.2 Juandiku ora na chintsee yo tsa nandeꞌe xi, ma kadavaa yo kuenta kida ndidaa ñayii uu jnu xi, saꞌan tsa veꞌe sinagoga xiꞌin ndidaa ichi io ñuu sa kadavaa tsa ndasa ndidaa ñayii na kadakaꞌnu ñaꞌan s-tsa. Kachitoꞌon ndaa ntsu sa tsa yaꞌa sa niꞌi tsa xaꞌvi tsa xiꞌin jaꞌa. 3 Doko yoꞌo ndidaa yo ora sañaꞌa yo limosna, ma kini ndaꞌa ichi yo xan sa kida ndaꞌa kuaꞌa yo xan, 4 kadi vini kuañaꞌa limosna san ma kada vaa yo. San s-Tata yo ia xini sa kida yo san ti kida vaa yo, taxi ia en sa guaꞌa xo jnu ndidaa ñayii.
Duꞌua dadana ñaꞌan Jesús sa na kakataꞌvi ndo
5 Ora kaꞌan yo xi Ndios san ma kada yo kuenta ndidaa ñayii uu jnu xi, kuan taꞌan ntseꞌe xanaa tsa sa kaꞌan tsa xi Ndios sa kuin tsa veꞌe sinagoga, adi sa naniꞌi taꞌan ichi, ndasa na kini ñayii, san na kuetoꞌon ñaꞌan ndidaa ñayii s-tsa.b Kachi ndaa ntsu xo sa sa niꞌi tsa yaꞌvi tsa. 6 Doko yoꞌo ndidaa yo tu na kaꞌan yo xi Ndios, kunayii xiti xeꞌe yo, nakadi ndieꞌec san kaꞌan xi s-tata yo sa yedaꞌvi; san ku Tata ndo ia xini sa yedaꞌvi taxi ia en sa guaꞌa xo jnu ndidaa ñayii.
7 San ndiden kaꞌan yo xi Ndios ma dini dini toꞌon yukua kaꞌan yo, kuan duꞌua kida ndidaa ñayii ti kuu ñuu Israel, kuan sani-ini tsa sa tu vaa ntseꞌe na kaꞌan tsa san kama ka tsaku xi Ndios. 8 Juandiku yoꞌo ma duꞌua kada yo ndidaa yo kuenta kida tsa yaꞌa ndidaa tsa, kuan ku Tata ndo sa xini ia nasa nandeꞌe xo san kuani vita kaka ka yo. 9 Duꞌua kaꞌan yo ndidaa yo xi Ndios:
Ta, ia io ndidaa andivi:
Sa nani ni na keñuꞌu,
10 na kixi sa tastuni ni ñayii,
na kada sa nchoj ni, kuenta andivi duꞌua na kada nuꞌu ya.
11 Ita taj ni ndikii, taj ni vita.
12 Koo ni sakaꞌnu-ini sa saꞌa x-kuachi da ndidaa da, kuenta mee da ndidaa da sakoo da sakaꞌnu-ini sa saꞌa ñayii kida kuachi d̶a.
13 Ma kuemani ni sa kototuni ñaꞌan sa kuiꞌia d̶a sa kada da kuachi san natavi ñaꞌan ni d̶a ndasa ma kada da sa kuiꞌia.
Kuan xaꞌan mee ni kuu sa tastuni, sa ntsee xiꞌin sa kunaꞌnu d ndidaa ndituꞌu tiempu. Duꞌua na kuu.
14 Kuan tu io yo sakaꞌnu-ini sa kida ñayii xo, san duꞌua ni S-tata yo ia io andivi koo ia sa kaꞌnu-ini sa saꞌa yo ndidaa yo. 15 Doko tu ti sakoo yo sakaꞌnu-ini sa saꞌa ndidaa ñayii, san duꞌua ni s-Tata yo ma koo ia sakaꞌnu-ini sa saꞌa x-kuachi yo ndidaa yo tuku.e
Duꞌua dadana ñaꞌan Jesús sa nakoo nchitsa ndo
16 Tu sakoo nchitsa yo, ma nantsaꞌa ndaꞌvi jnu yo, kuenta ndidaa ñayii uu jnu xi, kuan danaꞌa ndaꞌvi jnu nu ndidaa nu ndasa na kini ndidaa ñayii sa io nchitsa nu. San kachi ndaa ntsu sa ndidaa nuyaꞌa sa niꞌi nu xaꞌvi nu. 17 Doko yoꞌo ndidaa yo, tu sakoo nchitsa yo, chido aceite d̶iki yo xiꞌin ndaꞌa nuu, 18 ndasa ma en kini sa io nchitsa yo, maska sa meni s-Tata yo ia xini sa yedaꞌvi. San s-Tata yo ia xini sa yedaꞌvi taxi ia sa guaꞌa xo.
Sa kuika io andivi
19 Ma choguaꞌa yo sa kuika yo ndidaa yo ñuyii yaꞌa, sa yii tikidi xiꞌin xido tata,f sa yii ñaduꞌu sa duꞌu tsa. 20 Guaꞌa ka, choguaꞌa sa kuika yo ndidaa yo andivi, sa ti yii tikidi nisa ti xido tata, xiꞌin nisa ñaduꞌu ti kachi yii sa duꞌu. 21 Kuan ami io sa nchoj ntseꞌe yo juan koo xanaa yo ndidaa yo tuku.
Sa dayeꞌe io xi yikikoño
22 Nduchinuu yo ndidaa yo xan kuu kuenta en sa dayeꞌe xi xikikoño yo. Juandiku, tu nduchinuu yo io guaꞌa, san nee xikikoño yo dayeꞌe xi. 23 Doko tu nduchinuu yo kuu sa kuiꞌia, san nee xikikoño yo io sa naa. San tu sa dayeꞌe xo kuu sa naa ¡ndaꞌvi yo kuan ntseꞌe naa io yo!
Ndios xiꞌin tuini
(Lc 16.13)
24 Ti en kachi kuinokuachi xi ubi tsa toꞌo; kuan kini uꞌu tsa en tsa, san enka tsa kada ini tsa, ña kuinokuachi tsa xi en tsa san enka tsa ma kuinokuachi tsa xi, juandiku ma kachi kuinokuachi yo xi Ndios xiꞌin kunchiko yo sa kuika.
Ndios ntsaꞌa ñaꞌan ia xi ndidaa d̶aꞌa ia
25 Juandiku kachi ntsu xo ndidaa yo: Ma keꞌe d̶iki yo xuyii yo, nasa kaj yo adi nasa koꞌo yo; san nisa sa saꞌa sa ndukutu xikikoño yo. kuan xuyii yo xaꞌvi ka xi sa kuxi sa kaj yo, san xikikoño yo xaꞌvi ka xi sa kuxi d̶oꞌno yo. 26 Ntsaꞌa ndidaa tidaa xiko jnu tachi, ti choꞌon te tata, san nisa ti nakeꞌen te, san nisa ti nachoꞌon guaꞌa te; doko S-tata yo ndidaa yo ia io andivi sañaꞌan sa sas te. ¡San yoꞌo ndidaa yo xaꞌvi ntseꞌe ka yo jnu Ndios sa kuxi ndidaa tidaa ya! 27 San nasa niꞌi yo sa kani-ini ntseꞌe yo, ama guaꞌa ni kuaꞌnu ka yo en babu tu na kani-ini yo ña?
28 Naku sani-ini yo sa saꞌa doꞌno tuda? Ntsaꞌa ndidaa ita io yuku, na modo saꞌnu, ti kidachiion san nisa ti kiku doꞌno; 29 san kachi ntsu sa nisa rey Salomón, xiꞌin ndidaa sa kuika tsa ti káchi ndukutu tsa duꞌua. g 30 Tu Ndios duꞌua dandukutu ia ita io yuku, vita io san nduyutsa dakayu ñaꞌan xi xiti ñuꞌu, ti sani-ini yo nasa kuu sa kada ia sa saꞌa yo ndidaa yo, ñayii taꞌa ni xininchisa? 31 Juandiku, ma kani-ini yo san kachi yo: Nasa kaj ndo? adi nasa koꞌo ndo? adi nasa ndukutu ndo? 32 Kuan ndidaa ñayii ti kuu ñuu Israel nduku ndidaa jaꞌa, doko s-Tata yo ndidaa yo ia io andivi xini ia sa nandeꞌe ndidaa jaꞌa xo. 33 Diꞌna ka nanduku sa tastuni Ndios ñayii xiꞌin sa nandada ndaa ñaꞌa ia yo, san ndidaa ka sa nandeꞌe xo taxi ia. 34 Ma kani-ini yo sa kuu yutsa, kuan tuku tuku sa taꞌan ndiden kii. Juandiku kani-ini sa taꞌan vita.