Jesús xiꞌin sa xika ñayii xi Ndios
11
Taꞌan en kii tuꞌu kaꞌan Jesús xiꞌin Ndios, san sadaa en ndidaa tsa nchiko ñaꞌan xi ia:—Toꞌo, dakuaꞌa ñaꞌan ni sa kakataꞌvi da duꞌua kuenta Juan dakuaꞌa tsa ndidaa tsa nchiko ñaꞌan s-tsa.
2 San Jesús sadaa ia:
—Duꞌua kaꞌan yo ndidaa yo xi Ndios:
Ta, io ni ndidaa andivi,
sa nani ni na keñuꞌu,
na kixi sa tastuni ni ñayii,
na kada sa nchoj ni kuenta andivi duꞌua na kada nuꞌu ya.
3 Ita taj ni ndikii, taj ni vita.
4 Koo ni sakaꞌnu-ini sa saꞌa x-kuachi da ndidaa da, kuenta mee da ndidaa da sakoo da sakaꞌnu-ini sa saꞌa tsa kida kuachi d̶a ndidaa da,
ma kuemani ni sa kototuni ñaꞌan sa kuiꞌia da san natavi ñaꞌan ni da ndidaa da ndasa ma kada da sa kuiꞌia.
5 San sadaa ia tuku:
—Na kachi ndo sa en tsa mani xiꞌin yo, kuaꞌan yo dagua niñu san sadaa yo: “Xanii, taj noo ni uni ita-stila da, 6 kuan saa en tsa mani xiꞌin da xeꞌe da, sa atuu dana sa kuañaꞌan da s-tsa.” 7 San tsa yaꞌa kachi tsa ntsa xiti veꞌe kuaan: Naku dakuu yo san sa ntsadi ndieꞌe ya san ku daꞌa lin ntsu ya xidi nu xiꞌin ntsu san ma kachi ndukoo ntsu sa taj ntsu yo? 8 San tu yoꞌo intsee ni yo xika yo, san tsa mani xiꞌin yo ndukoo tsa san taj tsa sa nandeꞌe yo san adi sa mani yo xiꞌin tsa sa intsee ni yo xika yo juan kida. 9 Kachi ntsu yo ndidaa yo, kaka xi Ndios, san niꞌi yo, nanduku san naniꞌi yo, dakaꞌan ndieꞌe san nakaan yo. 10 Kuan ndidaa nu nakaka niꞌi nu, san nu nanduku naniꞌi nu san nu dakaꞌan ndieꞌe nakaan nu.
11 Na tadeꞌe kuu tsa tu d̶aꞌa tsa xika nu ita-stila, san sañaꞌan tsa en yuu nu adi xika nu chaka san sañaꞌan tsa en koo nu? 12 Adi xika nu en ndivi, San sañaꞌan tsa en ndiduꞌma nu? 13 Tu yoꞌo kuu yo ñayii kuiꞌia san guaꞌa ni sañaꞌan yo sa guaꞌa xi d̶aꞌa yo, vika tuku s-Tata yo ia io andivi ma taxi Espíritu Santu tu nakaka yo.
Sadaa tsa ndidaa tsa sa sa saꞌa sakakuiꞌia kuu kida Jesús ndidaa sa naꞌnu yaꞌa
14 Jesús kineꞌen ia tachi kuiꞌia xi en tsa ñeꞌe. San kuenta kée tachi kuiꞌia san tsa yaꞌa kaꞌan tsa, san ndidaa ñayii io jukua oni sanaa, 15 doko uu tsa io jukua kachi tsa:
—Sa saꞌa Beelzebú sa tastuni ndidaa tachi kuiꞌia, kineꞌen nu tachi kuiꞌia.
16 San uu ka tsa xítotuni ñaꞌan tsa xi ia, san xíka tsa sa na kada Jesús en señal ntsaa andivi. 17 Doko xini ia nasa sani-ini ndidaa tsa yaꞌa, san sadaa ia:
—Ndidaa tsa tastuni taꞌntsadagua san naa ndidaa mee xita, san veꞌe taꞌntsadagua san naa ndidaa mee xita tuku. 18 San tu sakakuiꞌia taꞌntsadagua na modo koo ndaa sa tastuni tuda? Tu kachi ni sa sa saꞌa beelzebú kineꞌen da tachi kuiꞌia. 19 San tu sa saꞌa beelzebú duꞌua kida da andu sañaꞌan sa tastuni ndidaa nu nchiko ñaꞌan ni sa na kineꞌen nu tachi kuiꞌia tuda? Juandiku nuyaꞌa da kuidokuachi ñaꞌan ni ndidaa ni. 20 Doko tu xiꞌin sa tastuni Ndios niꞌi da sa kineꞌen da tachi kuiꞌia, san sa ndaa nchisa kuu sa sa saa sa tastuni Ndios ñayii, sa io ni ndidaa ni.
21 Vixi ntseꞌe io sa duꞌu xeꞌe en tsayee ntsee ntseꞌe tu io sa tavi tsa mee tsa. 22 Doko tu io enka tsa ntseꞌe ka sa kuxi tsa yaꞌa, san naa tsa nduu tsa san dita tsa ndidaa sa ñoꞌon xanaa tsa sa tavi ñaꞌan s-tsa, san duꞌu tsa ndidaa sa io s-tsa yaꞌa.
23 Ñayii ti io xiꞌin ntsu san ñayii yaꞌa io ku kontra ntsu, san ñayii ti nachii xiꞌin ntsu, ñayii yaꞌa satsaniꞌno.
Ora naxikokagua tachi kuiꞌia
24 San duꞌua kida en tachi kuiꞌia kee xi en ñayii san ndinoo desiertu san nanduku ami ndexavi san ti naniꞌi san kaꞌan: “Nanuꞌu ntsu ku kueꞌe ntsu ami kee ntsu.” 25 San ora nayii nituku xanaa ñayii lugar kee, san naniꞌi sa io ndoo xiꞌin ku kutu. 26 San saꞌan sa kuaka usa ka tachi kuiꞌia ka sa kuxi. San nayii, san sakoo juan; san ñayii yaꞌa kuiꞌia ka nduu tsa sa kuxi diꞌna.
Sa kida sa ku-iꞌni nchisa ñayii
27 San neni kaꞌan Jesús, san ndukuin en ñadeꞌe san kána ña niꞌi ntseꞌe san kachi ña:
—¡Guaꞌakuxi ñadeꞌe kaku ñaꞌan xiꞌin dakadi ñaꞌan ni!
28 San Jesús sadaa ia:
—Guaꞌa kuxi ka ñayii tsaku xi s-toꞌon Ndios san kida sa nchoxi ia.
Ñayii kuiꞌia xika sa naꞌnu na kada Jesús
29 Neni ndidaa ñayii yaꞌa nakuxukuyachi sa io ia san sadaa ia toꞌon yaꞌa:
—Ndidaa ñayii io vita kuu ñayii kuiꞌia, san xika en sa kaꞌnu, doko ma kini, kuan señal kida Ndios xi Jonás jaꞌa kini ñayii sa kada ntsu. 30 Kuan Jonás kuu tsa señal sa kida Ndios xi ñayii ío Nínive duꞌua ku kuu ia nduu ñayii ñuyii yaꞌa xi ndidaa ñayii yaꞌa. 31 Kii na ndakakuachi Ndios san reina ío sur da kuidokuachi ñaꞌan xi ndidaa ñayii yaꞌa kuan xika ntseꞌe kée ña kij xan, sa kunini ña sa kaꞌan Salomón ¡Sa vita, jaꞌa io enka tsa kaꞌnu ntseꞌe ka sa kuxi Salomón! 32 San ñayii ío Nínive ndukoo ndakakuachi xi ñayii io vita, kuan ndidaa sa kaꞌan Jonás kida sa nata-uꞌu tsa, ¡Sa vita jaꞌa io enka tsa kaꞌnu ntseꞌe ka sa kuxi Jonás!
Sa dayeꞌe io xi yikikoño
33 Ti en ton en kandil san chiguaꞌa ñaꞌan xi x-kaꞌa en makila, maska sa sani ndodo duku ndasa na tuu jnu ñayii yii veꞌe. 34 Nduchinuu ni ndidaa ni xan kuu kuenta en sa dayeꞌe xi xikikoño ni. Juandiku, tu nduchinuu ni io guaꞌa, san nee xikikoño yo dayeꞌe xi. Doko tu nduchinuu ni kuu sa kuiꞌia nee xuyii ni koo naa. 35 Doko guaꞌa ni kuan na kada sa dayeꞌe ni xan ku sa naa. 36 Tu nee ni yeꞌe san ti io sa naa, san kini ni guaꞌa ntseꞌe kuenta kida sa xiko en kandil, sa dayeꞌe guaꞌa ntseꞌe.
Jesús da kuidokuachi ia ndidaa fariseu xiꞌin ndidaa Maestru dakuaꞌa ñaꞌan ley
37 San tuꞌu kaꞌan Jesús, san en fariseu sakondaꞌvi tsa jnu ia sa na kiꞌin ia ku kaxi ia xeꞌe tsa, san kuyii Jesús ya san kukoo ia. 38 San fariseu ya sani-ini tsa naku ti ndaꞌa Jesús ya kuenta senchiion tsa ndidaa tsa antika sa kaxi ia. 39 Danduu Jesús sadaa ia:
—Ndidaa dini fariseu nakatsa ni ichi sata vasu adi koꞌo, doko xanaa ni chitu ndidaa sa duꞌu ni xiꞌin sa kuiꞌia. 40 Tsa doꞌo, Tsa kídaguaꞌa sata xi ya, ti kídaguaꞌa tsa xiti xi tuku ña? 41 Kuañaꞌan ni sa nandeꞌe xi ñayii nandeꞌe xi, san duꞌua kini ñayii sa guaꞌa xanaa ni.
42 ¡Ndaꞌvi ndidaa dini fariseu! Kuan sañaꞌan ni xi Ndios en ndiden uxi mino ndikutu, ruda xiꞌin ndidaa yukukuii, doko dana ni sa ndaa xiꞌin sa kinimani ni kuenta xinimani Ndios. San nandeꞌe sa kada ni jaꞌa, san ma dana ni sa kada ni enka juan.
43 ¡Ndaꞌvi ndidaa dini fariseu! Kuan taꞌan ntseꞌe xanaa ni sa kuntsaku ni sa sakuntsaku ndidaa tsa kunaꞌnu ora saꞌan ni veꞌe sinagoga, xiꞌin sa kaꞌan guaꞌa ñayii ni ndidaa jnu yaꞌvi.
44 ¡Ndaꞌvi ni ndidaa ni! Kuan ndee ni yavi yenduxi en ndii, sa ti danaꞌa ka san xikandodo ñaꞌan xi kuan ti en xini.
45 San kaꞌan en tsa dadana ñaꞌan ley, san sadaa tsa:
—Toꞌo, ndidaa toꞌon kaꞌan ni xan, san ntsandeꞌe dan ndidaa da kaꞌan kuiꞌia ni xi.
46 San Jesús sadaa ia:
—¡Ndaꞌvi ndidaa dini maestru ley tuku! Kuan taꞌvichiion ni sa vixi ntseꞌe xi ndidaa ñayii, san dini ndidaa ni nisa en d̶ikindaꞌa ni ti dakani ni sa chintsee ñaꞌan ni.
47 ¡Ndaꞌa vi ni ndidaa ni! Kuan kidaguaꞌa ni capilla yiki lin sa yenduxi ndidaa x-profeta Ndios doko s-tadeꞌe ni saꞌni ñaꞌan stsa. 48 San duꞌua nchukachi sa na taꞌan xanaa ni sa duꞌua kída ndidaa tsa yaꞌa, kuan kidaguaꞌa ni capilla yiki lin sata yavi tsa.
49 Juandiku sa kutuni xi Ndios kachi: “Tsandaꞌa ntsu ku profeta ntsu xiꞌin nu na kaꞌan sa kuu ntsu san uu nuyaꞌa kaꞌni yo san uu nu taꞌan ntseꞌe nu kada yo.” 50 San ndidaa ñayii io vita ndakakuachi xi sa saꞌa niñi tsa yaꞌa ndidaa tsa ntsa kukagua ñuyii ya; 51 ntsa niñi Abel xiꞌin ntsa niñi Zacarías tsa saꞌni tsa j-naꞌma xeꞌe Ndios xiꞌin altar, san niñi yukua Ndios ndakakuachi ia xi ndidaa ñayii io vita.
52 ¡Ndaꞌvi ndidaa dini tsa dadana ñaꞌan ley! Kuan ti nchoj ni sa ndidaa ñayii yaꞌa na kukuituni xanaa xi sa kutuni xi Ndios, san ti yii ni san nisa ti nchoj ni sa yii enka ñayii.