Ma kodo ndaꞌa ndo enka ñayii
(Lc 6.37-38, 41-42)
7
Ma kodondaꞌa yo enka ñayii, ndasa ma kodondaꞌa ñaꞌan Ndios xi mee yo. 2 Kuan tu sa kodondaꞌa yo ñayii san duꞌua ni kodondaꞌa ñaꞌan Ndios xi mee yo, san xiꞌin sa tekuꞌua ñaꞌan yo xi ñayii san xiꞌin juan tekuꞌua ñaꞌan Ndios xi mee yo.a 3 Naku ntsaꞌa yo miꞌin kaniꞌno nduchinuu xani yo, san ti ntsaꞌa yo tinduꞌu kaꞌnu kaniꞌno nduchinuu mee yo xan? 4 Na modo kadaa yo xi xani yo: “Kuntsatu, na tagua ntsu miꞌin kaniꞌno nduchinuu yo xan” san kaniꞌno en tinduꞌu kaꞌnu nduchinuu mee yo? 5 ¡Ñayii uu jnu xi! Tagua diꞌna ka tinduꞌu kaꞌnu kaniꞌno nduchinuu mee yo xan, san duꞌua kini yo sa tagua yo miꞌi yiki kaniꞌno nduchinuu xani yo.6 Ma kuañaꞌan yo sa ii xi ina, nisa ma chido yo sa xaꞌvi ntseꞌe xib jnu kuchi, kuan na kada kuañuniꞌno te san na naxikokagua te san kaxaꞌan te xo.
Kaka, nanduku xiꞌin dakaꞌan ndieꞌe
(Lc 11.9-13; 6.31)
7 Káka xi Ndios, san niꞌi yo. Nanduku san naniꞌi yo. Dakaꞌan ndieꞌe san nakaan xo. 8 Kuan ndidaa nu na kaka niꞌi nu, nu nanduku naniꞌi nu, san nu dakaꞌan ndieꞌe nakaan jnu.
9 Daa yo, tu d̶aꞌa yo xika nu ita-stila, san sañaꞌan yo en yuu sa kaj nu? 10 Adi xika nu en chaka, san sañaꞌan yo en koo jnu? 11 Ti en duꞌua kida, tu yoꞌo kuu yo ñayii kuiꞌia san xini yo sa kuañaꞌan yo sa guaꞌa xi d̶aꞌa yo, vika ku Tata ndo ia io andivi ma taxi ia ndidaa sa guaꞌa io andivi tu na kaka yo?
12 San vita ndidaa sa nchoj xo sa na kada ñayii xo ndidaa yo, san duꞌua kada sa saꞌa tsa ndidaa tsa tuku, kuan jaꞌa kuu ndidaa sa nchukachi sa táꞌvichiion Ndios ley xiꞌin ndidaa sa chídotuni ndidaa x-profeta ia.
Nakani ia sa io en ndieꞌe yiki kaa
(Lc 13.24)
13 Kuyii ichi ndieꞌe yiki ka; kuan ndeka ntseꞌe ndieꞌe, xiꞌin kaꞌnu xichi xi sa sakuntsaka ñaꞌan sa uꞌu sa ndaꞌvi, san kuaꞌa ntseꞌe tsa kuu sa yii ichukua. 14 Doko kuiñi ka ndieꞌe xiꞌin kuiñi ka ichi sa sakuntsaka ñaꞌan ñuyii ma ndeꞌe! San uu ni ñayii kuu sa naniꞌi ichi yukua.
Ndidaa tukuiꞌi na kini na tukuiꞌi kuu sa saꞌa x-kuiꞌi xi
15 Guaꞌa yo xiꞌin ndidaa tsa naꞌntsa, tsa kixi sa io yo san danaꞌa tsa kuenta ndikachi, doko kuu tsa kuenta ndikuaan den ntseꞌe. 16 Doko modo senchiion tsa nakini ñaꞌan yo. Ama nakeꞌen ndo tinchiꞌio xi tu yiki, ña tichikaꞌakuxi xi tu iñu? 17 San duꞌua tuku, ndidaa yutu guaꞌa kee kuiꞌi guaꞌa, doko yutu kuiꞌia kee kuiꞌi kuiꞌia. 18 Yutu guaꞌa ti kee kuiꞌi kuiꞌia, san nisa yutu kuiꞌia ti kee kuiꞌi guaꞌa. 19 Ndidaa yutu ti kee kuiꞌi guaꞌa saꞌntsa ñaꞌan xi san dakayu ñaꞌan xi.c 20 Juandiku, sa saꞌa x-kuiꞌi xi na kini ñaꞌan yo xi.d
Adii ndidaa ñayii yii sa tastuni Ndios ñayii
21 Adii ndidaa nu kaꞌan ku ntsu “Toꞌo, Toꞌo”, yii sa tastuni Ndios ñayii, maska sa ndidaa nu kida sa nchoxi ku Tata ntsu ia io andivi. 22 Kuaꞌa ntseꞌe nu kachi ku ntsu kii yukua: “Toꞌo, Toꞌo, xiꞌin sa tastuni ni káꞌan da sa kuu ni, san xiꞌin sa tastuni ni xíko da tachi kuiꞌia, san xiꞌin sa tastuni ni kída da kuaꞌa ntseꞌe milagru”, 23 danduu ntsuꞌu kadaa ntsu: “Oni kuu sa ti xini ñaꞌan ntsu xo. Ti kee sa io ntsu, kuaꞌan juan ndidaa yoꞌo ñayii kida meni sa kuiꞌia.”e
Jesús nakani ia sa taꞌan ubi tsayee kídaguaꞌa veꞌe
24 Andu kuu mee sa na tsaku xi toꞌon dakuaꞌa ñaꞌan ntsu ya san kida, san kuu kuenta en tsayee kutuni xi dáma tsa saꞌa xeꞌe tsa sata totoxio. 25 San kuenta koon davi, kee ndutsañuꞌun, san kana tachi san ñani ntsaa saꞌa veꞌe. Doko veꞌe yaꞌa ti ndugua, kuan sanindodo ñaꞌan xi sata totoxio. 26 Doko ndidaa nu tsaku xi toꞌon dakuaꞌa ñaꞌan ntsu ya san tu ti kida nu, ndee nu en tsayee chuu kídaguaꞌa xeꞌe xi sata ñuꞌunkuchi. 27 Koon davi, san kee ndutsañuꞌun, san kana tachi, san ñani ntsaa saꞌa veꞌe. San ndugua, san kuaꞌa ntseꞌe xíta s-tsa.