Jesús pijajiwi tsipaeba pacuenia wajëcaejitsia Diosojawabelia
11
Pamatacabi, Jesús najumewereta pewajëtsijawa Diosojawabelia, pijajiwiyajuwënënë jumaitsi Jesús-jawabelia:
—¡Patajatuxanenë, panejumecujarubare pacuenia pawajëtabiabijitsianë Diosojawabelia, pacuenia Juan, jiwibautizabinëmi, jumecujaruba pijajiwijawabelia! —jai Jesús pijajiwiyajuwënënë.
2 Nexata, Jesús jumaitsi pijajiwijawabelia:
—Itsa pawajëtabiabianame Diosojawabelia, pajumaitsimë tsabiabi mapacueniaje:
«Taxamë, athëbëtatsia ne-ecaenë, jitsipajë caenëmë, daxitacuene matatoxenetsia, pecayaiyataejawa. Jitsipajë naxatsiayo pecopiapatsijawa daxita nijajiwi neyanacua-ewetsijawa mapanacuataje. Jitsipajë daxitajiwi mapanacuata nejitsipaecuenia pecato-exanabiabijawa, pacuenia baja athëbëtatsia nijajiwi nejitsipaecuenia cato-exanabiaba.
3 »¡Caematacabi canacujitsia panerajure pataxaejawanexa, pacuenia panamatawenonajë!
4 »¡Patajaneconi panesiwajamatabëcuenecaeware! ¡Panebarajamatabëcuenexanepanarenua, tsipaji paxanë-ata pasiwajamatabëcuenecaewajë, pabarajamatabëcuenexanepanajënua, pamonae paxanëjawaberena pibisiacuene paneto-exana! ¡Pëtsa panecopatame patanejamatabëcuene-amoneyabinexa pibisiacuene, patanejamatabëcuene-ëjëbijawata! ¡Biji rajane, panecapanepare dowathi patanejamatabëcuene-ëjëbisaëwecua, pibisiacuene pata-exanaeyaniwa!», pajamë tsane mapacueniaje itsa pawajëtabiabianame Diosojawabelia —jai Jesús pijajiwijawabelia.
5 Xuacujinae, Jesús tsipaeba pijajiwijawabelia mapapecuenecataeliwaisije pematatsënëa, pecujarubinexa pacuenia wajëcabiabijitsia Diosojawabelia. Jumaitsi:
—Paxamëyajuwënënë merawituatuajëta ponaejitsipa bitso peyapëtaenëtsi pijaboyabelia. Nexata, jumaitsi tsipae: «Cacowaetatsi acueyabi papan-bëyobeje,
6 tsipaji raja, itsanë, taneyapëtaenë, tajëwerena peponaenë, aeconoxae tajabota netopata. Nexata, bitso piajani. Itsiata, xanë apoxainaenë itsacuenejawayo-ata pexaejawa tarajutsinexa», jai tsipae paxamëyajuwënënë peyapëtaenëtsijawabelia.
7 Nexata, bo-ënëwerena bajaraponë jumepitsipatsi. Jumaitsi tsipae: «Nejamatabë-itonotsipame. Baupa rabaja xaniawaetsia xatatanutajë. Taxi raja barëmajitanucajë caecamata. Nexata, acuenebi tanonotapunaejawa, tacarajutsinexa xua newajëtame. Itsa nonotapunaejitsipajë, ya-itawabijitsipajë taxi», jai tsipae peyapëtaenëtsi. Itsiata baitsi jane, bajaraponë perajutsinexatsi ajumesaëya wajëcaponaejitsipa.
8 Xaniajanë pacuenia pacatsipaebijitsiatsi. Bajaraponë apojamatabënonotapunae-ata, itsiata, peyapëtaenëtsi pewajëcaponaexaetsi, nonotapunaejitsipa perajutsinexa daxita xua namatawenona pecowaebijawatsi.
9 Bajaraxuata, pacatsipaebatsi mapacueniaje. ¡Xua panamatawenoname pawajëre Diosojawabelia payabaracueranaenejewamë! Nexata, bajaraPonë juya pacarajutsiana panewajëtsicuenia. Pacuenia jamatabënajinaeya pajaitsipame papecatonaxuabijawa panecaxitajarabijawabelia, bajarapacuenia pawajëtaponaename Diosojawabelia panenamatawenonaejawa papecarajutsijawabelia. Pacuenianua bajayajebi pabaupadocodocotsipame pacopabinejewamë papecatobaupatsijawabelianexa, bajarapijinia pacuenia Diosojawabelia asaëyata pawajëtabiabianame papecajumecanawiatsijawabelia xua pawajëtame.
10 Asaëyata itaxutuajamatejemaya pawajëtabiabianame Diosojawabelia, tsipaji pajiwi wajëtabiaba, rajutabiabatsi. Pajiwi jaitabiaba penamatawenonaecuene, caxitajarababiaba. Pajiwi-ata baupa docodocotabiaba, tobaupatabiabatsi —jai Jesús pijajiwijawabelia.
11-12 Icatsia, Jesús jumaitsi pijajiwijawabelia, pecanaëjëtsia-exanaenexa pacuenia paxa Dioso asiwaya eweta jiwi:
—Paxamë, papebijiwimë, panexi panexainaewi, panexënatonëyo itsa pacawajëtsipa panbë, apopanacoxirajutsimë tsipae iboto. Itsa pacawajëtsipa dujuainëyo, apopanacoxirajutsimë tsipae jomo. Itsa pacawajëtsipa wacaratobëto, apopanacoxirajutsimë tsipae aqueto.
13 Paxamë pane-ajamatabëcuenebejewi-ata, payapëtaneme panenacoxirajutsinexa pexaniajawa. Bitso biji cajena, pane-axa, athëbëtatsia pe-ecaenë, pexaniajamatabëcuenenë paxamë matatoxenetsia. Nexata, bajaraPonë rajutsiana Espíritu Santo daxita pamonae wajëtatsi —jai Jesús pijajiwijawabelia.
Itsamonae Jesús pibisiacuenia cuenebaracuaicuaijaitsi, dowathi pecapitsapaejawa yabara
14 Itsamatacabijawa, Jesús wecuacapitsapa dowathi, ponë apopenatsipaebinëmi dowathi pejamatabëcueneta. Nexata, dowathi pewecuacapitsapaecujinae, bajaraponë baja natsipaeba. Jiwibitsaëtoxaneto, bajarapacuene petaewi, bitso jamatabëcuenenabenajaca.
15 Itsiata baitsi jane, bajarapamonaetuatuajëta nanubena itsamonae fariseowi. Nexata, bajarapamonae Jesús baracuaicuaijaitsi pibisiacuenia. Jumaitsi mapacueniaje:
—Maponë, Jesúsje, dowathi jiwiwecua capitsapabiaba dowathiwi pepopenamatacaitorobinë, Beelzebú,a pesaëta —jai Jesús yabara, pecuene-aebixaetsi Dioso pitorobinëcuenetsitsica.
16 Nexata, itsamonae fariseowiyajuwënëwi, Jesús picani jamatabëcuene-ëjëbiaya itorobatsi petsita-exanaenexa pinijicuene Dioso pesaëta, peyapëtaenexa pepacuene Dioso pitorobinëcuenetsitsica.
17 Itsiata, Jesús jamatabëcueneyapëtane pacuenia bajarapamonae siwanajamatabëxainatsi. Nexata, bajarapamonaejawabelia jumaitsi pecanaëjëtsia-exanaenexa mapacueniaje:
—Nacaenacuapijiwi-ata itsa nasiwanawajabitsaëtsipa, nexata namata-enetsia nawerebiabijitsipa daxita bajarapamonae. Bajarapijinia pacuenia, nacaemonae-ata, itsa nasiwanawajabitsaëtsipa, nexata namata-enetsia nawerebiabijitsipa.
18 Bajarapijinia pacuenia, itsi tsipae Satanás. Itsa nawecuajucaejitsipa peyanacua-ewetsiwi, tocopiarucaejitsipatsi peyanacua-ewetsicuenemi pijajiwi. Bajaraponë itsa wecuacapitsapaponaejitsipa dowathiwi jiwiwecua, nexata bepijawajabitsaënë taejitsipatsi pijajiwi. Towerewerecaejitsipatsinua baja peyanacua-ewetsicuenemi bajarapadowathiwi. Bajarapacuenia pacatsipaebatsi, xanë yabara panejumaitsixae: «Jesús raja dowathi jiwiwecua capitsapabiaba Beelzebú pesaëta», patanejamëxae. Pajamatabëcuenenawëxaniabame cajena.
19 Itsa xaniajai, xanë Beelzebú pesaëta dowathi jiwiwecua capitsapabiabijitsipajë, ¿detsa nexata ponë pesaëta panijajiwi-ata, dowathi jiwiwecua capitsapabiaba? Nexata, paxamë itsa panejumaitsimë tsipae: «Dioso raja pesaëta» itsa panejamë, nexata peneta xanë yabara pajamatabëcuenenawëxaniabame.
20 Itsiata baitsi jane, xanë Dioso pesaëta itsa capitsapabiabajë dowathi jiwiwecua , bajaraxua itajëta Dioso baja petaxuxuabijawa pijajiwi peyanacua-ewetsijawa paxamëtuatuajëta —jai Jesús fariseowijawabelia.
21 Orijibia, fariseowi pecanaëjëtsinexa Jesús bitso piasaënëcuene dowathi matatoxenetsia, pecuenecataeliwaisicuenia jumaitsi mapacueniaje:
—Acuenebi peyacajërëtsijawatsi pecobecowë ponë bitso piasaënë,b paepatota aitatsacaya pijanae cobena-ewetaponapona pijabo. Daxita pecobecowë xaniawaetsia tobobenaejitsipatsi.
22 Itsiata baitsi jane, itsa najetarucaejitsipa itsanë bitso piasaënëc boxainaenë matatoxenetsia, nexata cuene-amoneyabijitsipatsi. Aitatsacaya pijanae cobena-ewetabiabi-ata tsipae, itsiata wecuapitsipatsi, daxita pecobecowëjawaxi yajawa —nayabarajai Jesús pijacuata pecuenecataeliwaisicuenia, dowathi pejamatabëcuene-amoneyabijawa yabara.
23 Icatsia, Jesús jumaitsi fariseowijawabelia:
—Pajiwi caejamatabëcuene apoxainaed xanëjawaberena, bajarapajiwi betajawajabitsaëjiwicuenia necuenecaranatabiaba. Pajiwi aponeyawenonaeyacaetuatsi jiwi Dioso pijajiwinexa, bajarapajiwi betanewecuayorotsijiwi, tanesiwanajamatabëcuenecopatsiyaniwa xanëjawaberena —jai Jesús fariseowijawabelia.
Jiwitonë pewecuapitsapaecujinaetsi dowathi, icatsia caewëa nawiarena petsijamatabë-ecaenexatsi
24 Icatsia, Jesús jumaitsi fariseowijawabelia:
—Dowathi itsa wejamatabëpitsapa jiwitonë, nexata jinaruta petsewi-iranëjawa penacuera-ewetsinexa. Jaitaponanua itsanëjawabelia petsijamatabëjonenexa picani. Itsiata, apopecaxitajarabixae, jamatabëjumaitsi: «Nawiatsianajë meta cajena icatsia tajabomijawabelia, pabowerena pitsapajë», jamatabëjai dowathi, ponëjawawerena pitsapa icatsia petsijamatabëjonenexatsi.
25 Dowathi baja caewëa itsa nawiarena, caxitajaraba peyajawaponaponaenëmitsi, pejamatabë-ëthëto, bepe-ënësajinecaebo, bepe-ënëxaniawaetetsibo, bepiracajuetetsibo-ata.
26 Nexata, dowathi itsa tane jiwitonë pejamatabëcuenesajinaejawa, icatsia siwapona peyajawapatsinexarena itsamonae, siete ponëbeje, bitso piacujirubejewi bajaraponë matatoxenetsia. Daxita bajarapadowathiwi pebi tsijamatabëjunuatsi peyajawaponaponaenexa. Belia jane baja, bajarapadowathiwi bitso bejiobia-exanatsi copiayanë matatoxenetsia. Nexata, pebi bitso bepejiobicuenia ponapona —jai Jesús fariseowijawabelia.
Xua yabara jiwi pepacuene jamatabëcuenebarëya tsawanapaejitsia
27 Itsa abaxë Jesús liwaisi tsipaeba fariseowijawabelia, petiriwa, bajarapajiwibitsaëtoxanetoyajuwënëwa, pinijijumeta wawajai tsaxuabi Jesús-jawabelia:
—¡Jamatabëcuenebarëya baja cajena powa cayacotaponapona, camirajutanua! —jai petiriwa Jesús-jawabelia.
28 Nexata, Jesús jumaitsi bajarapowajawabelia:
—Xaniajamë rabaja. Itsiata baitsi jane, bitso jamatabëcuenebarëya tsawanapae tsane matatoxenetsia, pamonae jumetane Dioso pejumeliwaisi, jumecowënëtanua —jai Jesús petiriwajawabelia.
Jesús, pecuene-aebiwitsi itorobatsi Dioso pesaëta pinijicuene petsita-exanaenexatsi
29 Jiwi, ayaibitsaëtoxaneto, Jesús itsa matatoyorotsia nacaetuatatsi, nexata Jesús jumaitsi:
—Pamonae aeconoxae jinawanapa, bitso pibisiajamatabëcuenewi. Tanecuene-aebabiabixae, nitoroba Dioso pesaëta pinijicuene tatsita-exanaenexa, taneyapëtaenexa Dioso pepacuene athëbëwetsica tane-itorobinëcuenetsica. Itsiata baitsi jane, bajarapacuenia apotsita-exanaenë tsane. Caejawa saya tsita-exanaenajë bajarapamonae tanejumexaniataenexa. Bajayata, pacuenia profeta Jonás-pijinëe exanatsi, bajara-ëpitsicuene tsitajëtsianajë tane-exanaejawanexa.
30 Bajayata, daxita Nínive tomarapijiwi yapëtane profeta Jonás-pijinë Dioso pitorobinëcuenetsi, ayaicuene Dioso peto-exanaexaetsi.f Bajarapijinia pacuenia, Xanë-ata, Daxitajiwi Pematapijinënë, pinijicuene Dioso neto-exanaena,g daxita pamonae aeconoxae jinawanapa, taneyapëtaenexa pepacuene Dioso athëbëwetsica tane-itorobinëcuenetsica.
31 »Pamonae aeconoxae jinawanapa, tanecuene-aebiwi, pamatacabi Dioso naneconitsia-exanaena daxita pijaneconi pexainaewi, bajarapamatacabi, bajayata, powami ponapona, Saba nacuapijiwimi pewetsiwami,h nonotapunaena Diosojawabelia peneconitsinexa, apotanenamuxuna-ewetsixae tatsipaebiliwaisi. Bajayata, bajarapowami tajë nacuatabuwerena-ata muxunanajetaruca, pejumetaenexa Salomón-pijinë, bitso daxitaliwaisi peyapëtaenëmi, petsipaebiliwaisi. Itsiata, xanë ponaponae-atanë majotaje, bitso ayaijamatabëcuenenënë Salomón-pijinëmi matatoxenetsia, pamonae aeconoxae jinawanapa mapanacuataje, aponenamuxuna-ewetsi. Bajaraxuata, ayaineconi xaina Diosojawabelia
32 Orijibia, bajarapamatacabita Nínive tomarapijiwimi-ata nonobapunaena Diosojawabelia peneconitsinexa pamonae aeconoxae jinawanapa mapanacuataje, apotanenamuxuna-ewetsixae tatsipaebiliwaisi. Bajayata, Nínive tomarapijiwi, itsa jumetane Jonás-pijinë petsipaebiliwaisi, copaba pibisiacuene pexanaejawa. Najamatabëcuenepënëyoroba Diosojawabelia. Itsiata, xanë majota ponaponae-atanëje, bitso ayaijamatabëcuenenënë Jonás-pijinëmi matatoxenetsia, tsipaebi-atanënua Dioso pejumeliwaisi, aponajamatabëcuenepënëyorobi Diosojawabelia, pibisiacuene pexanaejawawecua. Bajaraxuata, Dioso naneconitsia-exanaenatsi bajarapamonae —jai Jesús pewajunupaebijawata itsamatacabi Dioso jiwi penaneconitsia-exanaejawanexa.
Pacuenia waja-itaxuto belámparabë wajaperabëtonexa
33 Icatsia, Jesús jumaitsi jiwibitsaëtoxanetojawabelia:
—Itsajiwi-ata lámparabë pitanojotsicujinae, apomata-acatetsi itsacuenejawata. Cajoni-ënëalia-ata, apo-etsi. Biji rajane, athëbëyo etsia, pejonewi bo-ënëaberena petsiwajënae-itayotecaenexa.
34 Nexata, pane-itaxuto belámparaxae, xaniawaetsia panatsiwajënaetaeyabiabame. Bajarapijinia itsi panejamatabëcuene-ata. Itsa panetaejawata pacueneca-ëbame, be-ayaijamatabëcuenejiwinua panataneme, nexata pajamatabëcuenewënëcame pitaquirijamatabëcuene. Itsa paxamë pataneme Dioso peliwaisi pexaniajaijamatabëcueneta, piasiwajamatabëcueneta, nexata pacajamatabëcuene-itayotsiana panexainaenexa pitawajamatabëcuene.
35 ¡Nexata, panayajiwitaema panenajamatabëcueneyamaxë-itojorobiyaniwa! Paliwaisi picani panatocanaëjëtame papecajamatabëcuene-itayotsijawanexa, belia pacatonaexanaejitsipa papecajamatabëcuene-itaquiria-exanaeliwaisinexa.
36 Pacujinae Dioso peliwaisita pacajamatabëcuene-itayota, nexata apopaxainaemë tsane tsiquirijawayo-ata panejamatabëcuene-aitaquirijawa. Daxita papecajamatabëcuene-itayotsixae, xaniawaetsia panatsiwajënaetaneme, Dioso pejitsipaecuenia pane-exanawanapaenexa. Pacuenia lámparabë daxita bo-ënë xaniawaetsia itayoteca pecotiata, bajarapijinia pacuenia, pacaejiwimë canacujitsia xaniawaetsia pacajamatabëcuene-itayota Dioso peliwaisita —jai Jesús jiwi ayaibitsaëtoxanetojawabelia.
Jesús yapëtaeya-exana fariseowi, judíowi pecujarubiwijawabelia-ata, penaneconitsijawa Diosojawabelia
37 Itsa baja Jesús najumewereta liwaisi petsipaebijawa, nexata fariseonë junatatsi Jesús penaxaenexa pijabota. Jesús nexata najoneya bajaraponë pijaboyalia. Mesa muxuneneta na-eca penaxaenexa.
38 Fariseonë itsa tane Jesús penaxaejawa anijatonë nacobequiatsinejewa pacuenia fariseowi exanabiaba, jamatabëcuenenabenajaca.
39 Nexata, Jesús jumaitsi fariseowijawabelia:
—Paxamë, pafariseowimë, panecaxaewajënae xaniawaetsia paquiatabiabame naniawelia plato, taza, panecobe-ata, panijasalinaiwimi pijacujirucuenia. Pasiwajamatabëcuenebëjamë tsabiabi-ata naniapijicuene, itsiata, Dioso pacatane pane-ajamatabëcuenebejewicuene. Paxamë apopanasiwajamatabëcuenebëjamë panejamatabë-ëthëtota pibisiacuene panajamatabëxainabiabame. Nexata, pacajamatabëcuene-enabiaba itsanë pecobecowë paneyacajërëtsinexa, itsacuenejawanë-ata pibisiacuene pane-exanabiabinexa. Bajaraxuata, Dioso pacatane bepanenaxuirabiwi tsawanapae.
40 ¡Dioso baja cajena pijacuene apopaneyapëtaewi! BajaraPonë raja daxitacuene pexanaenë. Naniawelia pacaperabë-exana. Bëpënëa-ata pacajamatabë-ëthë-exana.
41 Nexata, apopanamatawenonaemë panecatsitecaejawa naniapijicuene pane-exanawanapaejawa. ¡Biji rajane, asiwaya bëpënëa panejamatabë-ëthëtojawawetsina parajure panecobecowëyajuwënëjawanë bepejiobiwijawabelia,i Dioso papecataenexa bepane-axuirajibiwi!
42 »¡Paxamë pafariseowimë ayaineconi panatsi-exaname Diosojawabelia! Xaniawaetsia Diosojawabelia ofrendacuenia caejawayo, parajutabiabi-atamë diez xuabejeyajuwënëjawa, panenacanabipalatayajuwënëjawa, pane-ubijawaxi-ata, itsiata, apopanajamatabëcuene-itajëtsimë itsamonae pane-asiwajawa, Dioso pewënëta. Pexaniacuene apopato-exanaemënua. Bajaraxuata, neconi panatsixainame Diosojawabelia. Bitso pacatoxanepanaejitsipa itsamonae pane-asiwajawa, pexaniacuene paneto-exanaejawanua, panacofënëtsinejewamë ofrenda panerajutsijawa Diosojawabelia.
43 »¡Paxamë, pafariseowimë, ayaineconi panatsixainame Diosojawabelia! Pananeconitame, tsipaji bepa-ayaijamatabëcuenewimë panataeyabiabimë itsamonaewecua, judíowi pijasinagogabonëjawaj itsa panajoneyabiabame, pajitsipabiabame pane-enaejawa peyaiyataewitsi petsinubijawanëta. Pajitsipabiabamenua bitso jiwi yaiyataeya papecabajacobinexa callejawa.
44 »¡Paxamë, judíowi panecujarubiwi, paxamë-ata pijinia pafariseowimë, ayaineconi panatsixainame Diosojawabelia! Paxamë itajara jiwi bepatsitapexaniajamatabëcuenewimë tsabiabi, pibisiajamatabëcuene panexainaewi-ata. Pacuenia itsamonae pona jiwi pemëthëanëmatatsënëa, apopeyapëtaexae bëpënëareca patsabanaecuene xaina, bajarapijinia itsi pamonae pacayaiyatane apopapecajamatabëcueneyapëtaexae pacuenia bëpënëa pajamatabëcuene-itsimë —jai Jesús judíowi pecujarubiwijawabelia, fariseowijawabelia-ata.
45 Nexata, bajarapacuenia Jesús pejumaitsijawata, itsanë bitso peyapëtaenë Dioso penajumecopatsiliwaisi Moisés-pijinëta, jumaitsi Jesús-jawabelia:
—Necujarubinë, itsa mapacuenia jumaitsimëje, paxanë yabara-ata pibisiacuenia jumaitsimë —jai Jesús-jawabelia.
46 Jesús nexata jumaitsi bajaraponëjawabelia:
—¡Paxamë-ata, judíowi paneyapëtaeya-exanaewi pajamatabëcueneliwaisi xaina Dioso penajumecopatsiliwaisi Moisés-pijinëta, ayaineconi panatsixainame Diosojawabelia! Pananeconitame, tsipaji paliwaisianë mataropotsia pajucame bajarapaliwaisiwecua, bitso piayapëbejeliwaisianë jiwi pejumecowënëtsinexa. Bajarapaliwaisianëta pa-itorobabiabi-atamë itsamonae pejumecowënëtsinexa, paxamë itsiata apopanajamatabëxainaemë tsiquiriliwaisiyo-ata panejumecowënëtsinexa —jai Jesús bajaraponëjawabelia.
47 Icatsia, Jesús jumaitsi bajaraponëjawabelia:
—¡Paxamë paneyapëtaeya-exanaewi pajamatabëcueneliwaisi xaina Dioso penajumecopatsiliwaisi Moisés-pijinëta, ayaineconi panatsixainame Diosojawabelia, tsipaji apopa-exanawanapaemë pacuenia itorobabiaba profetawi, panijasalinaiwimi! Panenajamatabëcuene-itajëtsinexa picani asiwaya paneyaiyataejawa bajarapamonaemi, panutabiabame pemëthëjumawereca pitajëtanubijawanë, itsajota pemëthëanë bobena. Itsiata, apopanejumecowënëtsixae pepaebiliwaisi bajarapaprofetawimi, pacuenejëpame panijasalinaiwimi, pamonaemi beyejeba bajarapaprofetawimi.
48 Bajarapacuenia pane-exanaexae, panajamatabëcuene-itajëtame panejamatabëcueneyanatsijawa panijasalinaiwimi. Panijasalinaiwi bajayata beyajebi-ata profetawimi, paxamë itsiata bepanetsimëthëcuewi panaexaname —jai Jesús judíowi pecujarubinëjawabelia.
49 Icatsia, Jesús jumaitsi judíowi pecujarubiwijawabelia:
—Bajaraxua yabara, Dioso daxitacuene peyapëtaenëxae, bajayata, tajëwelia jumaitsi mapacueniaje: «Tajajiwi Israel-pijinë pemomoxijawabelia to-itorobaponae-atanëk profetawi, apóstolewi-ata, itsiata, bajarapamonaeyajuwënëwi beyabiabiana, itsamonaeyajuwënëwi pijinia bejiobia-exanabiabiananua», jai baja cajena bajayata tajëwelia Dioso bajarapacuenia paxamë pane-exanaejawanexa yabara.
50 Nexata, paxamë panijasalinaiwimi panecuenejëpaexae, Dioso pacayajawatsijumaxuaba bajarapamonaemi pijaneconi, pebeyajebaponaexae Diosojumepaebiwimi, Dioso nacua pexanaejawaweliacujinae, mapamatacabijawaberena-ataje.
51 Nexata, payajawananeconitame panijasalinaiwimi Abel-pijinëjawaweliacujinae, profetanëmi, Zacarías-pijinëmijawaberena, ponë beyaxuabatsi templobo, altar-jawabejetuatuajëta. Xaniajanë pacuenia pacatsipaebijitsiatsi. Bajarapaneconi yajawa Dioso pacananeconitsia-exanaena paxamë, aeconoxae mapamatacabitaje panejinawanapaewi, xanël ponënëcuene apopatanenamuxuna-ewetsixaemë, Dioso tane-itorobinë paxamëjawabelia.
52 »¡Paxamë, bitso paneyapëtaewi Dioso penajumecopatsiliwaisi Moisés-pijinëta, ayaineconi panatsixainame Diosojawabelia! Payapëtaneme picani xaniawaetsia pacuenia jiwi caejamatabëcuene xainaejitsia Diosojawabelia. Itsiata, bajarapacuenia panijacuata apopa-exanaemë. Orijibia, mataropotsia panejucaeliwaisianë Dioso pejumeliwaisiwecua panecujarubijawata, apopatocopatabiabimë itsajiwi-ata peyapëtaenexa pacuenia caejamatabëcuene xainaejitsia Diosojawabelia. Bajaraxuata, paxamë, panecujarubiwi-ata, najëpaeya apopajonemë tsane Dioso pijajiwi peyanacua-ewetsinacuajawabelia —jai Jesús judíowi pecujarubiwijawabelia.
53-54 Bajarapacuenia Jesús pejumaitsicujinae, pitsapa baja fariseonë pijabowecua. Bajarapamatacabijawaweliacujinae, judíowi pecujarubiwi, fariseowi yajawa, Jesús pitoyaxaetsi, taxuxuaba ayaicuenia pejamatabë-itonotabiabijawatsi. Jamatabëcuene-ëjëbiaya liwaisi yanijobabiabatsinua. Bijiaya itsa jumecanawiata, peneconitsinexatsi picani judíowi pewetsinëjawabelia.