Jesús tsipaeba pijajiwi penayajiwitaenexa fariseowi petsipaebiliwaisianë
12
Paepatowajëto abaxë Jesús tsipaebanuca bo-ënëalia, jiwi patapona wayafotarena, pepo-ayaibitsaëtoxaneto, baitsi miles pajiwibeje. Nexata, bajarapamonae nataxucuetsabataxuabapona, natorobajarabaponanua. Wayafotarena, Jesús taxuxuaba copiaya pijajiwijawabelia liwaisi petsipaebijawa, pejumexaniataeyaniwa fariseowi pepaebiliwaisi, saicaya Dioso pejumeliwaisiwecua. Jumaitsi mapacueniaje:
—¡Xania! ¡Panayajiwitaema fariseowi pijalevadura, tsipaji peyamaxë-itojorobiliwaisi pacatsipaebiana, bepexaniajailiwaisi itajara tsane! Fariseowi bepacatsitapexaniajamatabëcuenewi-ata, pepacuene pibisiajamatabëcuene pexainaewi. Pacuenia levadurajawa fufunaeya-exana pan-matabë, bajarapijinia pacuenia bajarapamonae papecatsipaebiliwaisi yacaëjëpaponaena paxamëjawa, panejumexaniataeyaniwa Dioso peliwaisi.
2 ¡Panayajiwitaema papecacujarubiwi, tsipaji nacuenematayatsiaya pacayajawacujarubapona aeconoxae apopacueneyapëtae-atamë, bajarapaliwaisianë itsamatacabi daxitajiwi yapëtaeponaena xaniawaetsia! Papibisiacuenenua muetsia exana jiwi, itsamatacabi xaniawaetsia yapëtaena daxitajiwi.
3 Xua-ata muetsia merawi pacuaicuaijamë, bajaraxua itsajiwi pacajumewajunupaebiana matacabita daxitajiwijawata. Xua-ata pënëyatu-ucutsibo-ënëta baupa xatatsiaya muetsia wëpaxapaxajaiya pacuaicuaijamë, bajaraxua itsamatacabi itsajiwi pinijijumeta pacajumewajunupaebiana jiwi penacaetuatsijawata —jai Jesús pijajiwijawabelia.
Jesús tsipaeba pijajiwi pecujunawiyaniwa jiwibewi
4 Icatsia, Jesús jumaitsi pijajiwijawabelia:
—¡Paxamë, patane-itaxutuajamatejemawimë, pëtsa pacujunawame jiwibewi-ata! Bajarapamonae saya cuenecaëjëpatsi papecaperabëbeyaxuabinexa. Acuenebi matawëjëa papeca-itsacueniabinexa.
5 ¡Biji rajane, pacujunaware Dioso, tsipaji bajaraPonë cuenecaëjëpatsi papecabeyaxuabicujinae, papecaxuabinexa daxita panejamatabëcuene yajawa apopewerewerecae-isotojawabelia!
6 »¡Pëtsa pacujunawame jiwi, tsipaji Dioso apopacanacofënëtsi tsane caeto-ata! Cinco pabaratsuitoyobeje saya namatamota anijapalatanëyobeje. Bajarapacuenia amatamobi-ata, itsiata, caenëyo-ata Dioso aponacofënëtsi bajarapabaratsuiyajuwënënëxi.
7 Paxamë rabiji bitso Dioso paca-asiwa baratsui matatoxenetsia. Bitso papeca-asiwaxae, panematana̱toxi-ata, caematana̱toyo canacujitsia, baja cajena namata-ëjëta. ¡Bajaraxuata, pëtsa pacujunawame itsacuenejawa-ata!
8 »Daxita pamonae tajajiwi, nawajunupaebiana tajajiwicuene jiwi pitabarata, bajarapamonae juya Xanë-ata, Daxitajiwi Pematapijinënë, wajunupaebianajë tajajiwicuene Dioso pija-ángelewi pitabarata.
9 Itsiata, pamonae nayawajunuaxaina tajajiwicuene itsamonaejawabelia, xanë juya yawajunuaxainaenajë tajajiwicuene Dioso pija-ángelewi pitabarata.
10 »Pajiwi newënëliwaisi baracuaicuaijai pibisiacuenia, Xanë, Daxitajiwi Pematapijinënë, bajarapaneconiwecua itsa najamatabëcuenepënëyorotsiana Diosojawabelia, itsiata wecua-ajibia-exanaenatsi. Itsiata baitsi jane, pajiwi wënëliwaisi baracuaicuaijai pibisiacuenia Espíritu Santo, bajarapaneconi Dioso apowecua-ajibia-exanaetsi tsane.
11-12 »¡Itsa pacacaponaelia tomara-ewetsiwijawabelia, judíowi pasinagogabonëjawabelia-ata nacaetuatabiaba, papecayanijobinexa, pëtsa panasiwajamatabëcuenebëjamë panenayajiwi cuaicuaijaijawanexa, tsipaji raja bajarapaepatota, Espíritu Santo pacacuaicuaijaiya-exanaena pacuenia panayajiwi cuaicuaijamëjitsia! —jai Jesús pijajiwijawabelia pecuene-itoyawitsi pecujunawiyaniwa.
Jesús tsipaeba jiwijawabelia, bitso pesiwabëjaiyaniwa, ayaijawa pecobecowë pexainaejawanexa
13 Jiwi ayaibitsaëtoxanetoyajuwënënë jumaitsi Jesús-jawabelia:
—Jesús, taxapijinë picani petëpaewajënae netocopata pewënamuto tapitsinexa pecobecowëyajuwënëjawanë. Itsiata, tamatapijinë pita bajaraxuanë. ¡Nexata, itorobare tamatapijinë tanetocanawiatsinexa taxapijinë tanerajutsiapaebijawanë! —jai bajaraponë Jesús-jawabelia.
14 Nexata, Jesús jumaitsi bajaraponëjawabelia:
—Itsajiwi-ata cajena aponitorobi juez-nënexanë, tananeconitsia-exanaenexa ponë naneconita. Aponitorobinua axapijinë pecobecowë patacatsicobetsatsinexabeje —jai Jesús.
15 Nexata, icatsia Jesús jumaitsi daxitajiwijawabelia:
—¡Xania, pataema! ¡Pëtsa bitso panajamatabëxainame ëpaxamënexa ayaijawa panexainaenexa, tsipaji jiwi jamatabëcuenexanepanaeya apojinawanapae, ayaijawa pecobecowë pexainaejawa yabara! —jai Jesús.
16 Nexata, xaniawaetsia pecanaëjëtsia-exanaenexa pecobecowë yabara, Jesús tsipaeba mapapecuenecataeliwaisicueniaje bajarapamonaejawabelia:
—Itsanë, bitso pecobecowë pexainaenë, pijapabianë tocapitsapabiabatsi ayaijawa pexainaecuene.
17 Nexata, bajaraponë jamatabëjumaitsi: «¿Demeta pacuenia exanaenajë? Neto-ajibi baja ta-etaponaenexa tacaetuatsijawanë, xuanë netonaweretapona», jamatabëjai.
18 Xuacujinae, icatsia jamatabëjumaitsi: «Yapëtaniji rajane baja pacuenia exanaejitsianë. Paboxita jebabiabajë tacaetuatsijawanë, penetsianicajë, juya ta-exanaenexa icatsia ayaiboxanetonë bajarapacowëta. Nexata, bajarapaboxanetonëta jane baja, jebianajë daxita tacaetuatsijawanë, daxita tacobecowë yajawa.
19 Bajarapacuenia xainaenajë baja bajayajebinexa daxitacuene xua namatawenonajë. Nexata jane baja, xuacujinae nacuera-ewetsianajë. Pexaniacuene xaeyabiabianajë. Pexaniawiria vinoranënua matawëjëa apaeyabiabianajë taitajibinexa. Barëyanë tsabiabi tsane», jamatabëjai bitso pecobecowë pexainaenë.
20 Nexata bajarapaepatota, Dioso jumaitsi bitso pecobecowë pexainaenëjawabelia: «¡Xamë baja cajena aponeyapëtaenë! Ajena baja, mapamerawije, tëpaename. ¿Jipatsa nexata newënamuto pitsiana daxita nexaniawaetejebijawanëmi?», jai Dioso bitso pecobecowë pexainaenëjawabelia.
21 »Xanë pacatsipaebatsi: Bajarapijinia pacuenia, tocopiapatsianatsi pajiwi jamatabëcuene-enatsi ayaijawa penatocaetuataponaenexa, ëpajiwi penaxainaeyabinexa. Ayaijawa pecobecowë xainae-ata, itsiata bajarapamonae bitso bejiobi Dioso pijacuenejawalia, asiwaya petaexae pecobecowë Dioso pijacuenewecua. Bajaraxuata, daxitacuenejawabelia ajamatabëcuenecowëbi bajarapamonae —jai Jesús bajarapamonaejawabelia.
Dioso pijajiwi pewetsijawa mapanacuataje
22 Jesús nexata jumaitsi pijajiwijawabelia:
—Xaniajanë pacuenia pacatsipaebijitsiatsi. ¡Pëtsa pasiwanajamatabëcuenebëjamë tsawanapae panejinawanapaecuene yabara, panexaejawa yabara, panenaxatabijawanexa-ata yabara!
23 Apojinawanapaetsi cajena ëwajaxaejawanexa, ëwajanaperabëxatabinexanua. Biji rajane, juya itaxutuajamatejemaya bejinawanapatsi Dioso, wajanacarajutsinexa daxita wajanamatawenonaecuene.
24 ¡Pacuenecanaëjëre baratsuimonae! Bajaraponëxi apo-ubi, pexaejawanexa. Aponotsi penaweretaponaejawa. Apoxainaenua pe-etsibonexa pecaetuatsijawa. Itsiata, Dioso rajutabiabatsi pexaejawanexa. ¡Paxamë rabiji, bitsoyo Dioso paca-asiwa baratsuimonae matatoxenetsia, papecarajutsinexa daxita xua panamatawenoname caematacabi canacujitsia! ¡Bajaraxuata, pëtsa pasiwanajamatabëxainame ëpanexaejawanexa, panenaxatabijawanexa-ata!
25 ¿Detsa jane ponë paxamëyajuwënënë penasiwajamatabëcuenebëjaixae, cuenecaëjëpatsi pijacujiruta penatotixitsijawa webeliayo piasaëtsaponaponaenexa? Ajibi.
26 Nexata, panenasiwajamatabëcuenebëjaijawata, itsa apopacacuenecaëjëpae bajarapatsiquiricueneyo pane-exanaejawa, ¿detsa xuajitsia panasiwajamatabëcuenebëjamë tsabiabi itsacuenejawanë yabara? Pajamatabëcuenenacueratame cajena.
27 »¡Pacanaëjëre pacuenia bitso papexaniamatono juwa wayafojawa! Bajarapamatono pijacuata aponatsijumanacuenebi. Penaxatatsijawanexa-ata aponato-exanae. Bajayata, nacua-ewetsinë Salomón-pijinë bitso pexainaenëmi. Naitabëtsiaya naxatababiaba bitso pexaniawiriajawanë. Itsiata baitsi jane, bajaraponë penaitabëtsijawa matatoxenetsia bitso aitabë mapamatonotoxije.
28 ¡Pacanaëjëre mapacueneje! Dioso bitso pexaniacuenia aitabëya-exana pematonotoxi wayafota. Cae-epatoyonexa saya naitabëtanubena. Xuacujinae, bajarapamatono petsewicujinae, po̱na yajawatajuita, itsajota pan sebabiaba. Paxamë bitso panenamatamotsixae Diosojawabelia pematonotoxiwecua, matatoxenetsia pexaniacuenia paca-eweta. Panenasiwajamatabëcuenebëjaijawata, panajamatabëcuene-itajëtame bewelia Dioso pane-itaxutuajamatejemajawa, papeca-ewetsijawa-ata.
29 ¡Bajaraxuata, pëtsa pasiwanajamatabëxainawanapame ëpanexaejawanexa, ëpanematawëjëa-apaejawanexa-ata! ¡Biji rajane, pa-itaxutuajamatejemamëre Dioso papeca-ewetsinexa!
30 Pamonae Dioso apopeyapëtaewi, bitso siwanajamatabëxainabiaba bajaraxuanë yabara. Itsiata baitsi jane, pane-axa Dioso yapëtane cajena daxita xua panamatawenoname.
31 Bajaraxuata, bajarapajamatabëcuenianëwecua, Dioso pijacuene bitso pasiwanajamatabëxainabiabianame paneto-exanawanapaenexa. Nexata, bajaraPonë pacarajutsiana daxita xua panamatawenoname caematacabi canacujitsia —jai Jesús pijajiwijawabelia.
Jesús tsipaeba pijajiwi papexaniacuenejawa xainaejitsia athëbëtatsia
32 Icatsia, Jesús jumaitsi pijajiwijawabelia:
—¡Tajamonae, paxamë patajajiwimë pacaejiwiyomëbeje-ata, pëtsa pajunawame, tsipaji pane-Axa papeca-asiwajamatabëcueneta paca-itapeta panecobena-ewetsinexa, pamatacabi bajaraPonë yanacua-ewetsiana daxitacuene!
33 ¡Bajaraxuata, pacanajere panexainaeyajuwënëjawanë, bajarapapalata panerajutsinexa bitso bepejiobiwijawabelia! Bajarapacuenia itsa pa-exanaename, juya Dioso athëbëtatsia pacatoxaniawaetaponaena bitso penamatamotsijawa papecarajutsinexa, apopewerewerecaejawa. Bajarajotatsia, acuenebi pejonejawa tsane penacobetoxotsiwi, papecayacajërëtsinexa. Ajibinua tsane pamonae pacato-ucubaxaejitsia.
34 Itsajota paxaniawaetabuatsipame penamatamotsijawa, nexata panejamatabë-ëthëtota pajamatabënaponaponaejitsipame. ¡Bajarapijinia pacuenia, Dioso pijanacuatsia panatoxaniawaetaponare pexaniacuenejawanë panacofënëtsinejewamë! —jai Jesús pijajiwijawabelia.
Jesús icatsia pepatsiwajënaetsica, pijajiwi najamatabëcuenexaniawaetsiaya becopia-ewetawanapa
35-36 Jesús tajëwelia nawajunupaeba pepatsijawanexatsica. Jumaitsi pijajiwijawabelia mapacueniaje:
—Paxamë baja najamatabëcueneweretsiaya pajinawanapaename, pacuenia petuxanenë penacojiobifiesta penataenë, pacuenia petuxanenë pijajiwi najamatabëcueneweretsiaya copia-ewetawanapatsi, penacojiobifiesta penataenë, penawiatanajetarucaenë bepijiayo petobaupatsinexatsi. Bajarapijinia pacuenia panecopia-ewetawanapaename jamatabëcuene-aitawaya, tsipaji jemata icatsia patsianicajë mapanacuajawabetsicaje.
37 Xaniajanë pacuenia pacatsipaebijitsiatsi. Petuxanenë, itsa caxibajaraba pijajiwi, pamonae wajënae-ewetawanapatsi, majitsinejewa pepatsijawabelia pijabojawaberena, nexata siwajamatabëcuenebarëya tsane, caecuenia petobaupatsixaetsi. BajaraPonë pepatsicujinae, pijacuata xaniawaetsiana mesa. Pijajiwi enaeya-exanaena mesa muxuneneta. Nexata, bepijajiwitonë nataeya rajutsiana pexaejawa pijajiwijawabelia.
38 Petuxanenë patanajetarucae-ata merawituatuajëta, itsa jume, nanianaeta, nexata pijajiwi naëcotsiaya pecopia-ewetawanapaejawata pecaxibajarabixaetsi, pijajiwi siwajamatabëcuenebarëya tsane.
39 »¡Pacanaëjëre mapacueneje! Bo pexainaenë itsa yapëtaejitsipa penacobetoxotsinë paepatota patsijitsia merawi pijabojawaberena penacobetoxotsinexa, nexata apomajitsi tsipae. Wajënae-ewetecaejitsipa merawijebi. Apocopatsi tsipae pijaboyaberena petojonejawatsi.
40 Bajarapijinia pacuenia, najamatabëcueneweretsiaya paxamë-ata panecopia-ewetawanapaename tapatsijawanexatsica, tsipaji Xanë, Daxitajiwi Pematapijinënë, paepatota apopanejamatabënajinaemë tapatsijawanexatsica, jemata icatsia patsianicajë —jai Jesús pijajiwijawabelia tajëwelia penawajunupaebijawata icatsia pepatsijawanexatsica.
Jesús liwaisi tsipaeba pijajiwijawabelia, petuxanenë pijajiwitonëbeje peliwaisi
41 Itsa jumetane bajarapacuenia Jesús pejumaitsijawa, Pedro jumaitsi:
—Tajatuxanenë, ¿paliwaisi aeconoxae panetsipaebame, baja tsaja paliwaisi ëpaxanë panijajiwinexanë? Itsa jume, ¿itsamonaenexa-ata? —jai Pedro.
42 Jesús nexata jumaitsi Pedrojawabelia:
—Mara pejamatabëcuene-itsiwi yabara pacatsipaebatsije. Petuxanenë pijajiwitonë, ponë, xaniawaetsia petonacuenebaponaponaenë, caejamatabëcuene pexainaenënua, najamatabëcuene-itajëta mapacueniaje: Petuxanenë pecowëta xaniawaetsia tonacuenebaponapona, itsajamatabëcuene xainaenejewa. Copia-ewetaponaponanua pijatuxanenë pepatsimatacabijawabelianexa. Pecowëta pijajiwi xaniawaetsia to-ewetaponapona. Abataponaponanua pexaejawa, caematacabi canacujitsia, pitorobicueniatsi.
43 Bajaraponë bitso barëya pamatacabi pijatuxanenë pata, pecaxitajarabixaetsi xaniawaetsia pijajiwi pecowëta peto-ewetaponaponaexae.
44 Xaniajanë pacuenia pacatsipaebijitsiatsi. Ponë bajarapacuenia xaniawaetsia tonacueneba pijatuxanenë pecowëta, bajaraponë icatsia ewetsia-exanatsi daxita xua xaina pijatuxanenë.
45 Itsiata, pijajiwitonë itsa jamatabëjumaitsi tsipae: «Tajatuxanenë ajibi tsarucae tsane, tsipaji pona tajënacuayabelia bajayajebinexa», itsa jamatabëjai tsipae, nexata pamonae pebijiwi, petiriawi-ata ewetsia-exanatsi, taxuxuabijitsipa petoconibabeyabiabijawa. Bajara-ëponë ayaijawa pexaejawa wecuaxaeyabiabijitsipa. Aitajibinua tsabiabi tsipae.
46 Nexata, paepatota apojamatabënajinae tsipae pijatuxanenë pepatsijawanexa, jemata itsa patsipa. Nexata, bajaraponë pijatuxanenë pinijicuenia naneconitsia-exanaejitsipatsi. Bajarapijinia pacuenia, itsamatacabi, Dioso pinijicuenia naneconitsia-exanaena pamonae caejamatabëcuene apoxainae, peto-exanawanapaenexa pitorobicueniatsi.
47 »Ponë pijajiwitonë, yapëtae-ata pijatuxanenë pitorobijawatsi peto-exanaenexa, itsiata itsa apo-exanae, bajaraponë ayaicuenia jumaconibabejitsipatsi pejumaconitabiabimacata.
48 Ponë-ata pijinia, itsa apojumeyapëtae pacuenia pijatuxanenë itorobatsi, xaniawaetsia peto-exanaenexa, nexata saicayacuenia itsa to-exanaejitsipa, bajaraponë-ata jumaconitsi-atatsi tsipae, ayaicuenia apojumaconibabe tsipaetsi. Pajiwi pijinia ayaijawa rajutatsi, bajarapajiwi tsicarucatsi petocanawiatsinexa perajutsijawatsi matatoxenetsia. Pajiwi pijinia ewetsia-exanatsi ayaijawa, bajarapajiwi tsicarucatsi ayaijawa petocapitsapaenexa —jai Jesús pijajiwijawabelia.
Jiwi apopenajuasiwanajamatabëcuenecopabixae Jesús-jawabelia, nacaemonae-ata, caejamatabëcuene aponajuaxainae tsane
49 Icatsia, Jesús jumaitsi pijajiwijawabelia:
—Xanë raja capatajopajë Dioso pija-isotoa mapanacuajawabetsicaje. Bajarapa-isotota canacuenebijitsianë, tatsatsinexa mapanacuapijiwije, pijaneconi pexainaewi, Dioso pijajiwiwecua. Canacuenebijitsianënua tawecua-ajibia-exanaenexab Dioso pijajiwi pibisiacuene pexanaejawa. Bajaraxuata, bitso jitsipajë picani baja bajarapa-isoto petajuenajetarucaejawa.
50 Itsiata baitsi jane, bajaraxua pecopiapatsijawanexa abaxë netosajina betajiobicueneta tanebeyaxuabijawanexa. ¡Bitso baja cajena najamatabëxainajë! ¡Matapania nebeyaxuabiana, jamatabëcuenecaewianajë!
51 ¿Paxamë tsaja pacana-ëjëtame, xanë tapatajopaejawa yabara, najamatabëcuenejëpaeya jiwi pejinawanapaejawanexa? Bajaraxuanexa apopatsinëtsica. Biji rajane, xanë tapatsixaetsica mapanacuayabetsicaje, jiwi aponajamatabëcuenejëpae tsane. Pamonae, tanesiwanajamatabëcuenecopabiwi Xanëjawaberena, apotanesiwanajamatabëcuenecopabiwi-ata, namata-enetsia aponajamatabëcuenejëpaebeje tsane. Biji rajane, napijawajabitsaë naexanaena, nacaemonae-ata.
52 Bajaraxua yabara, ajena mapamatacabijawaweliacujinaeje, cinco pajiwibeje, nacaemonae-ata, caebota pejinawanapaewi-ata, aponajamatabëcuenejëpae tsane, Xanëjawaberena apotanenajuasiwanajamatabëcuenecopabixae. Nexata, acueyabi pajiwibeje apotaneliwaisijitsipaewi tsane. Anijajiwibeje pijinia taneliwaisijitsipaejiwibeje tsane. Itsa jume, anijajiwibeje apotaneliwaisijitsipaejiwibeje tsane, acueyabi pajiwibeje pijinia taneliwaisijitsipaewi tsane. Nexata, bajarapaliwaisi yabara, nacaemonae-ata, najume-anaenotabiabiana namata-enetsia.
53 Caebopijiwi-ata, paxa, pexënatobeje, pena, pexënatoyobeje-ata, bajarapijinia pacuenia pame, pecopenabeje-ata, aponajamatabëcuenejëpae tsane, xanë yabara —jai Jesús pijajiwijawabelia.
Jesús asaëya jiwi muxujioba, xaniawaetsia apopecanaëjëtsixae bajaraponë pexanaecuene yabara
54 Jesús icatsia jumaitsi jiwi ayaibitsaëtoxanetojawabelia:
—Mapanacuataje, itsa pataneme waëwetsica itarërëbo pepitsapaejawa, nexata pajumaitsimë tsabiabi: «Ajena raja emajitsia», pajamë tsabiabi. Nexata, bajarapamatacabi ema jopabiaba.
55 Itsa pataneme jowibo pepitsapaejawa epatajërëtsiarena, sur-jawawerena, pajumaitsimë tsabiabi: «Ajena raja icotia-ataju tsane,» pajamë tsabiabi. Nexata, bajarapamatacabi icotia-ataju tsabiabi.
56 Itsiata baitsi jane, xua pa-exanaponajëbeje, Juan-pijinëmibeje, bajaraxuanë patae-atamë pajamatabëcuene xaina apopayapëtaecapanepaemë, pacuenejawanë Dioso pacatsitajëtapona. Paxamë itajara bepaneyapëtaewi panataneme, itsiata cajena apopayapëtaemë. Payapëtaeyabiabame picani pacuenia matacabipijicuene, itsa emajitsia, itsa jume, atajujitsia, panecanaëjëtsijawata mapanacuapijicuene. Itsiata baitsi jane, patae-atamë daxita xua Juan, jiwibautizabinëmi, xanë-ata, pa-exanaponajëbeje, apopayapëtaemë caranata, pajamatabëcuene xaina bajarapacuenia Dioso papecatsitajëtaponaejawa —jai Jesús jiwi ayaibitsaëtoxanetojawabelia.
Pajiwi naneconita pewënajiwijawabelia, pewajënaeya benaliwaisixaneta, peneconitsiyaniwatsi juez-nëjawabelia
57 Jesús icatsia jumaitsi jiwi ayaibitsaëtoxanetojawabelia:
—¿Detsa xuajitsia namata-enetsia pananeconitabiabame juez-nëjawabelia? Pacacuenecaëjëpa picani panijacuata panecanaëjëtsijawata panenato-itapetsijawa, pexaniacuene pane-exanaejawanexa.
58 ¡Pajiwi neconita pewënajiwi juez-nëjawabelia, nexata itsa capona bajarapajiwi peneconitsinexa jane baja juez-nëjawabelia, namutua penajetarucaejawatabeje benaliwaisixanetajopabeje, pepatsiwajënaeyabeje juez-nëjawabelia! Itsa capatsipatsi juez-nëjawabelia, nexata bajaraponë itorobijitsipa policíawi, pecaponaenexa penaneconitsiwi pejebabiabibojawabelia, pijaneconi yabara.
59 Xaniajanë pacuenia pacatsipaebijitsiatsi. Penaneconitsiwi pejebabiabibota itsa pacananeconitsia-exanetsipa, bajarawerena bepijia apopapitsapaemë tsipae. Matapania pamatamotsipame daxita xua yabara pacananeconitsia-exaneta, papitsapaejitsipame —jai Jesús jiwi ayaibitsaëtoxanetojawabelia.