Fariseowi, saduceowibeje, Jesús picani itorobatsi Dioso pesaëta pinijicuene petsita-exanaenexa
16
Jesús pepatsicujinae Magdala nacuata, fariseowi, saduceowiyajuwënëwi-ata, pata bajaraponëjawaberena, pejamatabëcuene-ëjëbinexatsi, peyapëtaenexatsi pepacuene itsa Dioso pitorobinëtsi. Bajaraxuata, itorobatsi picani pinijicuene petsita-exanaejawanexa Dioso pesaëta.
2 Nexata Jesús jumaitsi bajarapamonaejawabelia:
—Pamatacabi caniwiyo itaboxo tsobia, paxamë pajumaitsimë tsabiabi: «Merawia pexaniamatacabi tsane», pajamë tsabiabi.
3 Pamatacabi pijinia bajayacunua itaboxo itacaënanuca, pajumaitsimë tsabiabi: «Ajena aponacuaxanepanaejitsia daxita matacabi», pajamë tsabiabi. Paxamë panataeyabiabame bepaneyapëtaewi. Xaniawaetsia matacabipijicuenejawanë payapëtae-atamë, itsiata xua Dioso pacatsita-exanapona maparucaeje, pecopiapataponaejawanë, xanë tajamatabëcueneta, apopacanaëjëtsicapanepaemë.
4 Paxamë bitso pibisiacuene pane-exanaewi. Dioso cajena apopanejamatabëcuene-ewetsiwi. Bajarapanejamatabëcuene-itsiwixae, pane-itorobame picani Dioso pesaëta pinijicuene patacatsita-exanaejawanexa, pataneyapëtaenexamë Dioso pepacuene athëbëwetsica tane-itorobinëcuenetsica. Itsiata baitsi jane, apopacatsita-exanaetsi tsane Dioso pesaëta pinijicuene ta-exanaejawa. Saya papinijicuenejawa Dioso pesaëta bajayata to-exanatsi profeta Jonás-pijinë, bajara-ëpitsicuene tane-exanaejawanexa, pacatsitajëtsianatsi —jai Jesús petëpaecujinae icatsia Dioso piasaëya-exanaejawanexatsi yabara. Bajaraxuacujinae, Jesús baja wecuapona.
Jesús pijajiwi muxujioba fariseowi pecujarubiliwaisi pejumexaniataeyaniwa
5 Jesús, pijajiwi yajawa, nicabalia Galilea pucaxaneto itsapanabelia. Bajarapamonae, Jesús pijajiwi, nacofënëta pemarue pan pecaponaejawanexa.
6 Bajarapitsijawata, Jesús jumaitsi pijajiwijawabelia mapacueniaje:
—¡Panejumetaema! ¡Xania baja! ¡Panayajiwitaema fariseowi, saduceowi-ata, pijalevadura! —jai Jesús pijajiwijawabelia.
Bajarapacuenia Jesús jumaitsi fariseowi, saduceowi-ata pecujarubiliwaisi yabara, Jesús pijajiwi pejumexaniataeyaniwa.
7 Itsiata, Jesús pijajiwi apojumeyapëtaetsi. Siwabëjai saya ëpemarue yabara. Bajaraxuata, jamatabëcuenenawëxaniabiaya ëpamonae najume-anaenota Jesús pejumaitsijume yabara:
—Bajarapacuenia Jesús nacajumaitsi tsaena, pan wajanacofënëtsixae —najai bajara-ëpamonae jamatabëcuenenawëxaniabiaya.
8 Jesús, pijajiwi jamatabëcueneyapëtane bajarapacuenia jamatabëcuenenawëxaniabiaya penajume-anaenotsijawa levadura yabara. Nexata jumaitsi pijajiwijawabelia:
—¿Detsa xuajitsia panajume-anaenotame: «Baja raeta pacuenia Jesús nacajumaitsi pan apowajacaponaexae», panajamë? ¿Apopayapëtaemë tsaja tanecuenecaëjëpaejawa ta-exanaenexa pan itsa namatawenonatsi?
9 Paxamë abaxë apopanejumeyapëtaemë. ¿Apopanajamatabënapitsimë tsaja pacuenia exanajë pamatacabi pan namatawenonatsi? Tsicobetsanajë cinco papan-bëmibejejawata cinco mil ponëbeje pexaenexa. ¿Detsa xuabeje pawënëbame peyajuwënëcopabijawanë pecuejawanë beyoxobocuenia?
10 ¿Apopanajamatabënapitsimënua tsaja pacuenia tsicobetsanajë siete papan-bëmibeje cuatro mil pajiwibeje pexaenexa? ¿Detsa xuabeje bajarapamatacabi pawënëbame peyajuwënëcopabijawanë pecuejawanë beyoxobocuenia?
11 Bajarapacuenia patanecuenetaexaemë, bepanejumeyapëtaneme picani apopatacajumaitsijawa pan yabara, itsa pacajumaitsitsi: «¡Xania baja! ¡Panayajiwitaema fariseowi, saduceowi-ata, pijalevadura!», itsa pacajaitsi, pan yabara apopacajumaitsitsi —jai Jesús pijajiwijawabelia.
12 Nexata jane baja, Jesús pijajiwi xaniawaetsia jumeyapëtanetsi apopejani-itawetsijawa pexaeyaniwa fariseowi, saduceowi-ata, pijalevadura. Biji rajane, itawetatsi pejumexaniataeyaniwa bajarapamonae pecujarubiliwaisi.
Pedro cuenewajunupaeba Jesús Cristocuene yabara
13 Jesús, pijajiwi yajawa, itsa najetaruca Cesarea de Filipo tomaramuxunenia, pijajiwijawabelia jumaitsi mapacueniaje:
—¿Detsa jiwi jumaitsi tsabiabi xanë, Daxitajiwi Pematapijinënë yabara? ¿Detsaeta xanë ponënë? —jai Jesús pijajiwijawabelia.
14 Nexata bajarapamonae jumaitsi:
—Itsamonae xamë yabara jumaitsi tsabiabi: «Juan raeta, jiwibautizabinëmi, icatsia asaë», jai tsabiabi. Itsamonae pijinia: «Diosojumepaebinëmi raeta, profeta Elíasa raeta, ponëmi bajayata ponapona, icatsia asaë», jai tsabiabi. Itsamonae pijinia: «Profeta Jeremías-pijinë raeta, ponëmi bajayata ponapona, icatsia asaë. Itsa jume, nexata meta bajayata Diosojumepaebiwimi, profetawiyajuwënënë, icatsia raeta asaë», jai tsabiabi itsamonae xamë yabara —jai Jesús pijajiwi.
15 Nexata Jesús jumaitsi pijajiwijawabelia:
—¿Detsa pacuenia paxamë panesiwanajamatabëxainame xanë yabara? ¿Detsa xanë pacatsitaponëtsi? —jai Jesús pijajiwijawabelia
16 Simón Pedro jumaitsi Jesús-jawabelia:
—Xamë cajena Mesíasmë,b athëbëwetsica Dioso peca-itorobinëtsica, jiwi necapanepaenexa. Xamë, Dioso pexënatomë, Ponë peyamatacabiatsitecaponaponaenë —jai Pedro Jesús-jawabelia.
17 Nexata, Jesús jumaitsi Pedrojawabelia:
—Simón, Juan pexënatomë, xamë jamatabëcuenebarëyamë, tsipaji itsajiwi-ata apocayapëtaeya-exanae xanë taneyapëtaenexamë Mesías-nënëcuene. Biji rajane, taxa Dioso, athëbëtatsia pe-ecaenë, cayapëtaeya-exana.
18 Bajaraxuata, aeconoxae cawënërubianatsi Pedro.c Nexata, ibopanaxanetojumata,d xanë nubianajë tajajiwi, tawënëta penacaetuatsiwi.e Nexata, bajarapamonae bajayajebi ajamatabësaë tsane pejumexaniataejawa Mesías-nëcuene. Petëpaejamatabëcuenef apojamatabëcuenematatoxenetsitsi tsane, pewerebiabinexatsi, tsipaji pewajënaeyabelia jiwi jumexaniataeponaena bajarapaliwaisi.
19 Pacuenia baupa-ewetsinë ewetsia-exanatsi llavianë, bajarapijinia pacuenia caewetsia- exanaenatsi llave bene-ewetsinëcueniag Dioso, athëbëtatsia pe-ecaenë, pijajiwi peyanacua-ewetsijawa peliwaisi. Nexata, xua itawetsianame mapanacuataje, bajaraxua-ata Dioso athëbënacuatatsia itawetsiana. Xua tocopatsianame pexanaenexa mapanacuataje, bajaraxua-ata Dioso athëbënacuatatsia tocopatsiana pexanaenexa —jai Jesús Pedrojawabelia.
20 Nexata, pijajiwi jume-itaweta pewajunupaebiyaniwatsi itsamonaejawabelia Jesús, Mesías-nëcuene, Dioso athëbëwetsica pitorobinëtsica jiwi pecapanepaenënexa.
Jesús tajëwelia nawajunupaeba pebeyaxuabijawanexatsi
21 Pedro pewajunupaebicujinae Jesús Mesías-nëcuene yabara, Jesús jane baja tajëwelia yapëtaeya-exana pijajiwijawabelia pitoyawitsi pebeyaxuabijawanexatsi. Jumaitsi mapacueniaje:
—Xanë netsicaruca taponaejawa Jerusalén tomarabelia. Bajarajotalia ayaicuenia nebejiobia-exanaena judíowi pija-ancianowi, sacerdotewi penamatacaitorobiwi, judíowi pecujarubiwi-ata. Bajaraxuacujinae, nebeyaxuabiana. Itsiata baitsi jane, tatëpaecujinae, acueyabimatacabita, icatsia asaënë tsane —jai Jesús tajëwelia pijajiwijawabelia.
22 Nexata, Pedro junata Jesús pebarëponatabinexa pesaicayojawabelia. Nexata jumaitsi Jesús-jawabelia:
—¡Tajatuxanenë! Dioso ca-itaxutotsoniataena bajarapamonae peca-exanaeyaniwah daxita pacuenia tajëwelia nawajunupaebame —jai Pedro.
23 Nexata Jesús napënëyorotaxuaba Pedrojawabelia, itabarataeya pejumaitsinexatsi:
—¡Satanás, newecuanatixire! Xamë saya jamatabënecuenecaranatame, ta-exanaeyaniwa Dioso tane-itorobicuenia. Saya jitsipame pacuenia jiwi jitsipa ta-exanaejawa —jai Jesús.
24 Nexata Jesús jumaitsi daxita pijajiwijawabelia:
—¡Pajiwi jitsipa tanepënaponaejawa, nawecuacopatsi pejitsipaecuenia penajamatabëxainabiabijawami, juya pexanaponaponaenexa ta-itorobicuenia! ¡Najamatabëcueneweretsinua penatocopiapitsijawa pebejiobia-exanaejawanexatsi, pebeyaxuabijawanexatsinua, tanepënaponaejawata tajajiwitonëcuenia! ¡Matapania jane baja, nepënaponae!
25 Itsiata, pajiwi apo-exanaponaponae tsane bajarapacuenia, itsajiwi pebeyaxuabiyaniwatsi tajajiwitonëxae, apoxainae tsane matacabi apopewerewerecaejawa. Pajiwi pijinia nacopatsiana xanë yabara pebeyaxuabinexatsi tajajiwitonëxae, bajarapajiwi xainaena matacabi apopewerewerecaejawa.
26 ¡Pacanaëjëre mapacueneje! ¿Detsa xua yabara toxanepanatsi jiwi pexainaejawa daxita mapanacuapijijawanë, itsa Diosowecua naxuabijitsia, matacabi apopewerewerecaejawa xainaenejewa? ¿Detsa xua rajutsipa Diosojawabelia mapanacuapijiyajuwënëjawa, pexainaenexa matacabi apopewerewerecaejawa, penaxuabiyaniwa Diosowecua? ¡Ajibi cajena!
27 Ayapëbeje tsane, tsipaji Xanë, Daxitajiwi Pematapijinënë, yajawapatsianicajë taxa Dioso pijapeniweniwenaecotia, taja-ángelewinua. Nexata tacuenecanaëjëtsicujinae, matapania matamotaponaenajë caejiwi canacujitsia pexanawanapaecuene mapanacuataje.
28 Xaniajanë pacuenia pacatsipaebijitsiatsi. Paxamëyajuwënëwi, ajena panenubenaewi, patëpaenejewamë pataename Xanë, Daxitajiwi Pematapijinënë, tajajiwi tayanacua-ewetsijawa —jai Jesús pijajiwijawabelia.