Malaquías
1
Mapaliwaisije Jehová tonajumecopata profeta Malaquías-jawabelia, petsipaebinexa Israel nacuapijiwi.Jehová ayaicuenia asiwa pijajiwi israelitawi
2-3 Nexata profeta Malaquías jumaitsi israelitawijawabelia:
—Jehová raja pacajumaitsi: «Xanë rabaja paca-asiwatsi», pacajai. Paxamë itsiata pajumaitsimë tsabiabi: «¿Depacuenia waxaitsi yapëtanetsi Jehová wajanaca-asiwajawa?», pajamë tsabiabi. Nexata, bajaraPonë pacajumecanawiata mapacueniaje: «¡Pacanaëjëre! Esaú, Jacob-beje, nacaemonaenë-atabeje picani, itsiata «asiwanë juyapijinë Jacob, matapijinë Esaú matatoxenetsia». Bajaraxuata, Jacob papemomoximë pacatanetsi patajajiwimëcuenia. Juya, Esaú pemomoxi pejinawanapaenacuanëmi petsutonëjawa tobijianajë. Bajarapanacuanëmi tocopatajë ënamomonae pejinawanapaenexa jiwi pecowëta», pacajai Jehová —jai Malaquías.
4 Icatsia profeta Malaquías jumaitsi Esaúpijinë pemomoxi yabara:
—Edóm nacuapijiwi jumaitsi-ata tsipae: «Patajinawanapaetomaranë Jehová panetobijianae-ata tsipae, apo-itsacuene. Xaniawaetsia icatsia payanacuenebianajë», jai-ata tsipae, itsiata Jehová, pepopiacuenesaënë daxitawecua, pacajumecanawiatsipa mapacueniaje: «Payanacuenebanutsimë-ata tsipae, xanë icatsia pacatobijianaenatsi. Patacatobijianaecujinae, itsanacuanëpijiwi wënërubiana panijanacua, ‘ëpibisiacuene pexanawanapaenacua jiwi’, pejaiwënëcuenia. Bajarapanacuata panejinawanapaewi pijinia pacawënërubiana, ‘Jehová pebara-anaepanae-bitsaëto pibisiacuene pexanawanapaexae,’ pejaiwënëcuenia», jai tsipae Jehová Edóm nacuapijiwijawabelia. 5 Paxamë pa-israelitawimë panijacuata pataename bajarapacuenia Jehová pexanaejawa Edom nacuapijiwijawabelia. Nexata payabarajumaitsimë tsane: ¡Cuaë, Jehová bitso ayaijamatabëcuenenë saëyacaëjëpa itsanacuanëpijiwijawabelia-ata Israel nacuawecua!», pajamë tsane —jai Malaquías Esaúpijinë pemomoxi yabara.
Jehová cuenexanebiaya muxujioba sacerdotemonae
6 Icatsia profeta Malaquías jumaitsi:
—Jehová pepopiacuenesaënë daxitawecua pacajumaitsi paxamë pasacerdotemonaemëjawabelia: «Paxajiwi yaiyataeyabiabatsi pexijiwi. Petuxanewi yaiyataeyabiabatsi pijajiwi, amoneya petonacuenebawanapaewitsi. Nexata, paxamë itsa panetaneme pane-axanëcuenia, ¿detsa xuajitsia nexata apopaneyaiyataemë? Itsa panetaneme panijatuxanenënëcuenia, ¿detsa xuajitsia nexata apopanajamatabëcuene-itajëtsimë pataneyaiyataejawamë, patanejumecowënëtabiabinexamë pataca-itorobicuenia? Bajarapacuenia bijiaya paneto-exanawanapae-atamë, itsiata panejumaitsimë: ‘¿depacuenia bijiaya patajacanaëcotabiabi?,’ panejamë. 7 Paxamë saya panetocapatabiabame pibisiapexaejawanë, altar-jumata xanëjawaberena. Bajarapacuenia pa-exanae-atamë, itsiata panejumaitsimë: ‘¿detsa xuajawalia paxanë pacato-exanatsi aponejitsipaejawanë?’ panejamë. Xanë juya pacajumaitsitsi mapacueniaje: ‘Itsa paxamë pasiwanajamatabëxainame taja-altar natsiquejemacuenia panetaejawanexa, bajarapajumata pibisiajawanë panetajuitsinexa, bajaraxuanë apotajitsipaecuene pataneto-exanaejawamë. 8 Pacujinae pacapatame pibisiadajubinë panetajuitsinexa altar-jumata, pacuenia pitaxutotsëcënaenë, pejayujayunaenë, piawitanenë-ata, bajarajota bewelianënëcuenia panetaneme. ¿Bajarapacuenia itsa pa-exaname, apopacatsitapiabejecuene tsaja? ¡Jica jane, ëjëtsiaya patocaponare bajarapitsidajubinëyo, panerajutsinexa papecayanacua-ewetsinëjawabelia! Bajarapacuenia itsa pa-exanaejitsipame, apopacasiwajamatabëcuenebarëya tsipae», pacajai Jehová, Ponë daxitawecua bitso piacuenesaënë tsaponaponae—.
9 »Orijibia, xanë, Malaquíasnë, pacatsipaebatsi pasacerdotewimëjawabelia. Panatowajëcaename Diosojawabelia, pexaniacuenia papeca-itaxutobejiobiataenexa. Itsa baitsi jane, panewajëcaejawata bajaraPonëjawabelia, tsitecaeya itsa patajuitabiabame altar-jumata bajarapapibisiadujubinëanë, apobepajamatabëcuene-ewetsimë Dioso ayaijamatabëcuenenë papecasiwajamatabëcuenebarëyanexa.
10 »Jehová pepopiacuenesaënë pacajumaitsi: ‘Xanepana picani paxamëyajuwënënë tajatemplobo pebaupaxatatanutsijawa, bajarapacuenia pane-exanabiabiyaniwa. Baitsi, xuanë patajuitabiabame taja-altar-jumata, pepacuene pacato-amatamobi. Apoxanepanae panenacuerotsijawa bajarapapiamatamobicuene pane-exanawanapaejawa. Baitsi, apopacasiwabarëyatsi. Pematatsënëa apopacatocopiapitsitsinua tsane patanerajutaponaejawanëmë tajuitsiaya altar-jumata,’ pacajai Jehová.
11 »Orijibia, pacajumaitsi Jehová, Ponë daxitawecua bitso piacuenesaënë tsaponaponae: ‘Daxitanacuanëjawa pejinawanapaewi itsamonae xaniawaetsia neyaiyataeyabiaba paxamë matatoxenetsia. Inciensopërëjawanë-ata tajuitabiaba tawënëta. Pexaniacuenejawanënua tajuitabiaba tawënëta. 12 Paxamë itsiata pa-acuene-itothiamë tsabiabi bajarapamonaewecua. Apotajitsipaecuene paneto-exanabiabame, tsipaji natsiquejemacuenia panetotaeyabiabame taja-altar-jawa. Xua taeyabiabajë picani pepotajamesacuenia, bajarapa-altar-jawa bijiaya panetoyaiyataeyabiabame. Baitsi, itsa pibisiajawanë panetojebame tajamesajumata, natsiquejamecuenia panetotaneme bajaraxua. Nexata, pexaniajaicuenia apopanetoyaiyataemë tajamesa, xua-ata pejumata bobenabiaba. 13 Paxamë pasacerdotewimë saya panajumaitsimë tsabiabi: «Xua Jehová nacatocaëjëta waja-exanabiabinexa, acuenejitsibitsi saya», panajamë tsabiabi. Pepacuene paxamë saya pane-ataejitsibimë, itsiata panatocanaëjëtame patacasiwabarëyajawanexa pacapatsi-atamë panenacobetoxotsidajubinë, vaca pejayujayunaenë, piawitanedajubinë-ata, panetajuitsinexa taja-altar-jumata. 14 ¡Bitso pibisiacuene cuenewajunupaebajë petocopiapatsinexatsi taneyamaxë-itojorobijiwi! Bajarapamonae nerajutsiapaebi-ata pija-ovejabitsaëtoyajuwënënë pexanianë, itsiata netocapatabiaba piabejenë, petajuitsinexa altar-jumata. Apoxanepanae pataneto-exanaejawamë bajarapacuenia, tsipaji paxamë bepanerajutame ëpexaniajawanë, Xanë Pepotayanacua-ewetsinëxae daxitawecua. Bajaraxua daxitanacuanëpijiwi ayaicuenia tanewënëyaiyataenë paxamëwecua’», pacajai Jehová, Ponë pepopiacuenesaënë daxitajawa —jai Malaquías sacerdotewijawabelia.