Pacuenia Habacuc wajëca Diosojawabelia, yabara peliwaisi
3
Profeta Habacuc wajëca Jehovájawabelia peyawenonaenexatsi. Jumaitsi naxëanaeya:2 «Cawënëliwaisitanetsi xamë, Jehovámë, daxita ne-exanaecuenemi bajayatami. Bajarapacuenia tacawënëliwaisitaexae, nejamatabëcuenenabenajacaeya-exaname. Bajaraxuata, ayaicuenia cayaiyatanetsi. Nexata, ajena cawajëtatsi icatsia papinijicuenejawanëmi to-exaname patajasalinaiwimi, bajarapijinia pacuenia paxanë-ata pataneyawenonaenexamë bitso patanamatawenonaejawata. Bitso patane-anaepanae-atamë patajaneconijamatabëcuene, pëtsa itsiata nacofënëtame patane-itaxutotsoniataejawamë», jai Habacuc pewajëtsijawata Jehovájawabelia.
3 Nexata Habacuc wajunupaeba Dioso petsitajëtsijawatsi bemajitsinaebocuenia, peyawenonaejawanexa israelitawi. Jumaitsi:
«Taniji Dioso penajetarucaejawa Temán-tsutonëa nacuajawawerena. Ponë pepopianeconijibinë najetaruca Parán-tsutowerena».b (Selah)c
Penajetarucaejawata peniweniwenaecotia yacaëjëpa daxita itaboxoya. Daxitanacuanëjawa pejinanawapaewi ayaicuenia wënëxaniatapona Dioso.
4 »Peniweniwenaecotia butujai yamaxëcuenia. Bajarapacotia xua xaina pecobeta, tsitajëta pesaë pexainaejawa, jiwi pecanaëjëtsijawawecua.
5 »Dioso pepatsiwajënaeya, copiapatapona piayaidomaejawanë, jiwi petëpaenexa. Itsaxuayo najetarucua, petaxucowëya pitatsajawijawa nacopatapona.
6 »Penucaejawata ira najëaba. Daxitanacuanëpijiwi neconecojai pecajunawi. Perujutsutonë othopaeya-exana. Beweliatsutonë-ata ajibia-exana. Itsiata, bajaraPonë tsiteca daxitamatacabijawabelia peponaponaenë.
7 »Taniji Cusánd nacuapijiwi, Madián nacuapijiwi-ata, jamatabëcuenebëjaiya pejinawanapaejawa, patanebejiobia-exanaewimi paxanë paIsrael-nacuapijiwinë. Nexata, bajarapanacuapijiwimibeje neconecojai pecajunawi.
8 »¿Xamë, Jehovámë, bara-anaepaname tsaja menianëjawabelia? ¿Bara-anaepaname tsaja manuamenianëjawabelia? ¿Bajaraxuata tsaja, najetarucame nijacarrozamota, nebarënawajabitsaëtsinexa? ¡Jume cajena! Bajarapacuenia najetarucame necapanepaenexa nijajiwi. 9 Nexata, cobenanajetarucame nijabitsabi. Tsiwajënaexaniawaetame nijaxuatabonë. (Selah.)
»Menianë penawotsijawata, petsewi-ira ucubame, fotonë penaexanaenexa. 10 Daxita petsutonë najëaba pecataejawata. Itaboxojawawetsica emaxanetonë runa. Manuamenepijimalataca ayaicuenia najumetabiaba. Bajarapamalataca apia athëbëabetsia.e
11 »Petaejawata necotia piapiacotiajawanë peniweniwepajonejawata, matacabipijijuameto, merawipijijuametobeje, athëbëyo rucajopabeje.
12 »Nebara-anaepanaejawata, najetarucame daxitanacuanëjawa, benecuetsabataxuabanajetarucae bajarapanacuanëpijiwi, penaneconitsixae xamëjawabelia.
13 »Bajarapacuenia pitsapame necapanepaenexa nijajiwi, nitapetsinë-ata peyanacua-ewetsinënexa. Nexata, cuene-amoneyabame piajamatabëcuenebejewi pijatuxanenë,f daxita pijajiwiwajabitsaë yajawa. (Selah.)
14 »Bajarapamonae ayaijamatabëcuenewi nataeya panetsimaxëpata. Canaëjëta picani bejowibocuenia patanecayajatsinexa, patanewerebiabinexanua, apopatanecuenecaëjëpaexae. Itsiata, xamë, Jehovámë, bajarapamonae pijapecanawajabitsaëtsijawanëta pijatuxanenë tomatathinaxuabame.
15 »Xamë jamatejema manuamenejumawerca najetarucame nijacarrozamota, malatacaxanetonëtuatuajëjawa-ata.
16 »Bajarapacuenia tacawënëliwaisijumetaejawata, anaeya nenaneconitsia-exanaejawanexa patanebejiobia-exanaewi, bitso jamatabëcuenenabenajacajë. Nexata, cotoyucuyucujanë, upiyucuyacujanë, nesicuenobanua tajamatabëcuenebenajacaexae. Daxitanënë asaëjibinëreca. Itsiata baitsi jane, jamatejema ca-ewetaponaponaenatsi, pamatacabi xamë, Diosomë, ayaicuenia bejiobia-exanaename, pawajabitsaëwi panebejiobia-exanawanapa maparucaeje.
17-18 »Bajaraxuata, ayaicuenia siwajamatabëcuenebarëyanë tsaponaponae Jehová, tsipaji bajaraPonë raja tanecapanepaenë. Nexata, higonae aponamatonotsi-ata tsipae, uvabacabo, olivonaenë-ata, aponacuaitsi-ata tsipae, tajapabianë apocapitsapae-ata tsipae itsacuenejawa tanotsinexa, netowerewerecae-ata tsipae tajadajubi, oveja, vaca-ata, xanë tsiteca siwajamatabëcuenebarëyanë Dioso.
19 »Tsitecaeya siwajamatabëcuenebarëyanë tsaponaponae, tsipaji Jehová raja pesaë tanerajutsinë tajamatabëcuenesaënexa. Nerajuta tataxusaë taxainaenexa, tajopaeyaniwa tacujinaejinaejawata. Neyawenonanua bepijiayo tapatsinexa petsutojumajawabetsia, tawecuapanepaenexa tajawajabitsaë», jai Habacuc pecuenewënëxaniatsijawata Dioso bajarapacuenia-ata penaxëanaewi penaxëanaenexa.