Jesús jiwi liwaisi tsipaeba petsutoyenepanajawata
5
Jesús itsa tane bajarapajiwibitsaëtoxaneto pepënaponaejawatsi, junaya petsutoyenepanabetsia, pe-ecajopaenexa. Bajarajotatsia, Jesús pijajiwi, doce ponëbeje, imoxoyorenatsi pejumetaenexatsi.
2 Nexata Jesús taxuxuaba liwaisi petsipaebijawa pijajiwijawabelia.
3 Jumaitsi mapacueniaje:
—Jamatabëcuenebarëya tsawanapae tsane pamonae natoyapëtane bepejamatabëcuenejiobijawaa picani Dioso pitabarata, tsipaji bajarapamonae xaina baja pejonejawanexa Dioso, athëbëtatsia pe-ecaenë, peyanacua-ewetsijawata.
4 Jamatabëcuenebarëya tsawanapae tsane pamonae jamatabëcuenenuewanapa mapanacuata pibisiacuene pexanaexae,b tsipaji Dioso jamatabëcueneyawenonaenatsi pejamatabëcuenebarëyanexa.
5 Jamatabëcuenebarëya tsawanapae tsane pamonae beweliajamatabëcuene penataewi, apopecuenecanawiatsiwi, itsamonae itsacueniababiabi-atatsi, tsipaji canacopatsiana Dioso pa-ira najumecapanepaeya rajutsiapaebatsic mapanacuataje.
6 Jamatabëcuenebarëya tsawanapae tsane pamonae mapanacuata bepiajaniwi, mera bepejitsipaewi, daxitacuene matatoxenetsia pejitsipaewi pexanaenexa Dioso pitorobicueniatsi, tsipaji bajarapamonae Dioso jamatabëcueneyawenonaenatsi nawitsia pexaniacuenejawanë pexanawanapaenexa.
7 Jamatabëcuenebarëya tsawanapae tsane pamonae mapanacuata jiwi itaxutotsoniataeyabiaba, tsipaji bajarapamonae Dioso juya itaxutotsoniataeyabiabianatsi.
8 Jamatabëcuenebarëya tsawanapae tsane pamonae mapanacuataje ëpexaniacuene najamatabëxainabiaba pexanaenexa, tsipaji bajarapamonae taena Dioso.
9 Jamatabëcuenebarëya tsawanapae tsane pamonae mapanacuataje jamatabëcueneyawenonabiaba jiwi aliwaisijibia penajuajinawanapaenexa, tsipaji bajarapamonae yabara, Dioso: «Taxi», jai tsane.
10 Jamatabëcuenebarëya tsawanapae tsane pamonae mapanacuataje bejiobia-exanabiabatsi Dioso pejitsipaecuenia pexanawanapaexae, tsipaji bajarapamonae tocopatsianatsi pejinawanapaenexa Dioso, athëbëtatsia pe-ecaenë, peyanacua-ewetsijawatatsia.
11 »Pajamatabëcuenebarëyamë tsawanapae tsane pacujinae itsamonae pibisiacuenia pacabaracuaicuaijai, pacabejiobia-exanaena, najumetsënëtsiayanua pacabaracuaicuaijai tsane, patajajiwixaemë.
12 Bajarapacuenia pacato-exanae-ata, pajamatabëcuenebarëyamë tsawanapae tsane, tsipaji athëbëtatsia pacatoxaina papecabejiobia-exanaejamatabëcuene itsamatacabi Dioso papecarajutsijawanexa bitso pexaniacuenejawa. Pacuenia paxamë-ata pacato-exana patajajiwixaemë, bajayata panewajënaeyapijiwimi-ata, Diosojumepaebiwimi, profetawi-ata, bejiobia-exanabiabatsi Dioso pijajiwixae —jai Jesús pijajiwijawabelia.
Jesús yapëtaeya-exana pacuenia Dioso pijajiwi bejinawanapa mapanacuataje
13 Icatsia, Jesús pepaebijawata petsutoyenepanata jumaitsi:
—Paxamë raja bepayajomë tsawanapaed mapanacuapijiwijawataje. Baitsi, pacuenia jiwi yajobenota pewi exaba piabejeyaniwa, bajarapijinia pacuenia paxamë bepayajomë tsawanapae Dioso peliwaisi panepaebijawata, panecuenecaranatsinexa mapanacuapijiwi bitso pibisiacuene pexanaeyaniwa. Itsiata, yajo itsa axaebi tsipae, ¿detsa nexata pacuenia pewi naxaicaeya-exanaejitsipa? Ajibi tsipae. Itsacuenejawayonexa-ata baja apoxanepanae tsipae. Saya xanepanaejitsipa, pexuabinexa wayafuabelia, jiwi petaxunanonobinexa. Bajarapijinia pacuenia, paxamë-ata pa-amatamobimë tsipae, itsa apopacuenejëpawanapaemë panetsipaebiliwaisi. Pacato-acuenebi tsipae panetsitajëtsinexa xua Dioso apopejitsipaecuene.
14 »Paxamë pijinia bepapecotiamë mapanacuapijiwinexa. Pacuenia pitayotsicotia itayota pitaquirijawata, xaniawaetsia jiwi penatsiwajënaetaenexa, bajarapijinia pacuenia paxamë-ata pajamatabëcuene-itayotame paneyapëtaeya-exanaejawata Dioso peliwaisi piajamatabëcuene-itaquiriwimijawabelia, xaniawaetsia penayajiwiyapëtaenexa Dioso apopejitsipaecuene. Nexata, pacuenia petsutojumata pe-ecaetomara acuenebi penacaranatecaejawa jiwi petaeyaniwa, bajarapijinia pacuenia daxita jiwi xaniawaetsia pacacuenetaena Dioso pejitsipaecuenia panejinawanapaejawa.
15 Itsajiwi-ata pitanojotsicujinae lámparabë, apo-etsi cajonibëxëpanalia. Biji rajane, athëbëyo etsia, pitayotecaenexa daxitabo-ënë.
16 ¡Bajarapijinia pacuenia, paxamë-ata pa-itsimëre tsawanapae tsane! ¡Xaniawaetsia patsitajinawanapare daxitajiwi pitabarata, papecacuenetaewi pexaniacuenia pewënëxaniatsinexa pane-axa Dioso, athëbëtatsia pe-ecaenë! —jai Jesús pijajiwijawabelia.
Jesús pijajiwi muxujioba petaeyaniwa piamatamobicuenia Dioso penajumecopatsiliwaisi Moisés-pijinëta, profetawi, peyaquinaeliwaisianë-ata
17 Icatsia, Jesús jumaitsi petsutoyenepanata pe-enaewijawabelia:
—¡Tapatajopaejawa yabara, pëtsa jamatabëcuenenawëxaniabiaya panesiwajamatabëjumaitsimë ta-ajibia-exanaejawanexa Dioso penajumecopatsiliwaisi Moisés-pijinëta, paliwaisi-ata bajayata tsipaebapona! Biji rajane, patajopajë ta-exanaenexa jane baja daxita pacuenia tajëwelia newajunupaeba bajarapaliwaisianëta.
18 Xaniajanë pacuenia pacatsipaebijitsiatsi. Paepatowajëto abaxë itaboxo, ira-ata tsitecaena,e pewajënaeyabelia liwaisinamatamotsiana Dioso penajumecopatsiliwaisi Moisés-pijinëta, pecopiapatsijawabelia daxita Dioso pajamatabëcuene yabara najumecopata. Epatua apo-aliwaisimatamobi tsane, cae-itanetoyo-ata.
19 Daxita Dioso penajumecopatsiliwaisi Moisés-pijinëta, tsiquiriliwaisiyo-ata, liwaisimatamota. Nexata, pajiwi apojumecowënëtsi bajarapayajuwënëliwaisi, itsa cujarubanua tsajiwijawabelia Itsaliwaisicuenia pejumecowënëtsiyaniwa, bajarapajiwi naneconitsiana Diosojawabelia. Nexata, bajarapaneconi yabara, bajarapajiwi daxitajiwiwecua beweliajamatabëcuenejiwi taenatsi Dioso, athëbëtatsia pe-ecaenë, peyanacua-ewetsimatacabita. Itsiata baitsi jane, pajiwi jumecowënëta daxita bajarapaliwaisi, itsa cujarubanua itsajiwijawabelia bajarapaliwaisi pejumecowënëtsinexa, nexata bajarapajiwi ayaijamatabëcuenejiwi taenatsi Dioso, athëbëtatsia pe-ecaenë, peyanacua-ewetsinacuata.
20 Bajaraxuata, pacayapëtaeya-exanatsi mapacueniaje. Paxamë, patanejumetaewimë, matatoxenetsia pexaniacuene itsa apopa-exanawanapaemë tsane fariseowiwecua, itsamonae papecacujarubiwi-ata, pexanaecuenewecua,f nexata apopajonemë tsane Dioso, athëbëtatsia pe-ecaenë, peyanacua-ewetsijawatatsia, pacuenia bajarapamonae —jai Jesús pijajiwijawabelia.
Jesús muxujioba pijajiwi, pecopabinexa penabara-anaepanabiabijawa
21 Icatsia, Jesús jumaitsi petsutoyenepanata pe-enaewijawabelia:
—Paxamë rabaja pajumetaneme bajayata pacuenia Dioso najumecopata Moisés-pijinëjawabelia, panijasalinaiwimijawabelia pejumaitsinexa mapacueniaje: «¡Pëtsa pabeyaxuabame jiwitonë! Pajiwi beyaxuaba jiwitonë, bajarapajiwi pabeyaxuabianame penaneconitsixae»,g pejaijawa.
22 Itsiata baitsi jane, xanë pacajumaitsitsi mapacueniaje: Pajiwi bara-anaepanaena pijamonaejiwijawabelia, bajarapajiwi Dioso naneconitsiaya-exanaenatsi. Pajiwi itsajiwi bijatane pibisiacuenia, bajarapajiwi caponaenatsi, penutsinexatsi peneconicanaëjëbiwi pitabarata. Bajaraxuacujinae, penaneconitsia-exanaenexatsi. Pajiwi pijinia pijamonaejiwi anaeya jumaitsi tsane: ‘Xamë ra saya apopecajamatabëcuenejiwibinë’, itsa jai tsane, bajarapajiwi bitso tsiayai tsanetsi. Bajarapaneconi yabara Dioso naneconitsiaya-exanaenatsi apopewerewerecae-isotojawabelia.
23 »¡Bajaraxuata, panecapatsijawata dajubi altar-jawata panetajuitsinexa Diosojawabelia panijaneconijamatabëcuene, bajarapaepatota itsa panajamatabënapitsipame panijamonaejiwijawabelia itsacuene pane-exanaejawa, pëtsa abaxë sacerdotenë patajuitsia-exaname!
24 ¡Panecapatsijawa papuenere abaxë altar-jawa pitabarata! ¡Paponare caecuenia pajiwiyojawabelia pananeconitame, panenabarajamatabëcuenexanepanaenexabeje icatsia! Bajaraxuacujinae, icatsia panawiatsiaremena altar-jawaberena, panecapatsidajubi jane baja panetajuitsia-exanaenexa Diosojawabelia panijaneconijamatabëcuene.
25 »¡Bajarapijinia pacuenia, panijamonaejiwibeje itsa panatoxainamebeje liwaisi, nexata namutua panenajetarucaejawatabeje, panajumejairebeje panenatoxanetsinexabeje, juez-nëjawabelia panepatsiwajënaeyabeje panijaliwaisibeje papecatoxanebiwajënaeyabeje! ¡Bajarapacuenia pa-exanare, papecanutsiyaniwa jueznë pitabarata, tsipaji raja jueznë itorobijitsipa policíawi, nijaneconi yabara pecacaponaenexa penaneconitsiwi pejebabiabiboyabelia, bajarajota pecananeconitsia-exanaenexa!
26 Bajarapacuenia jueznë itsa pacananeconitsia-exanaejitsipa, pepacuene bepijia apopawecuapitsapaemë tsipae papecananeconitsia-exanaejawawecua, matapania panematamoweretsijawabelia daxita pacuenia cawajëta panenaneconitsijamatabëcuene —jai Jesús pijajiwijawabelia.
Jesús pijajiwi muxujioba penacojiobinë itsawa pejaitsiyaniwa pijawawecua
27 Icatsia, Jesús jumaitsi pijajiwijawabelia, petsutoyenepanata:
—Paxamë rabaja pajumetaneme Dioso penajumecopatsiliwaisi Moisés-pijinëta pejumaitsijawa mapacueniaje: «¡Pëtsa jaitame itsawa nijawawecua!»,h pejaijawa.
28 Itsiata baitsi jane, xanë pacayapëtaeya-exanatsi mapacueniaje: Ponë petaejawata petiriwa, siwanajamatabëxaina pewitota pibisiacuene pexanaejawa, bajaraponë naneconita Diosojawabelia, tsipaji Dioso pitabarata pepacuene bepexanaejawa pibisiacuene pijawawecua.
29 »¡Bajaraxuata, panecujua-itaxutota panetaejawata pibisiacuene itsa paca-exanaeya-exana, pana-itaxutocajure!i ¡Tajë baja paxuare, tsipaji baja xanepana bajarapacuenia panenawecuaxuabinexa, padaxitaperabëtojiwimë Dioso papecaxuabiyaniwa apopewerewerecae-isotojawabelia!
30 ¡Panecujuacobeta pibisiacuene itsa pa-exaname, panacobecaucure! ¡Tajë baja paxuare, tsipaji baja xanepana bajarapacuenia panenawecuaxuabinexa, padaxitaperabëtojiwimë Dioso papecaxuabiyaniwa apopewerewerecae-isotojawabelia! —jai Jesús pijajiwijawabelia.
Jesús pijajiwi muxujioba, penacojiobinë pijawa pexuabiyaniwa
31 Icatsia, Jesús jumaitsi pijajiwijawabelia:
—Paxamë rabaja pajumetaneme Dioso penajumecopatsiliwaisi Moisés-pijinëta pejumaitsijawa mapacueniaje: «Ponë pijawa jamatabëwecuanawiata, toyaquinae pewecuanawiatsiliwaisi. Nexata, xuacujinae xuabi pijawa»,j pejailiwaisi.
32 Itsiata baitsi jane, xanë pacayapëtaeya-exanatsi mapacueniaje: Ponë pijawa xuaba, bajarapowa pewitota pibisiacuene apowecua-exanae-ata pamonawecua itsanëjawabelia, bajaraponë naneconita Diosojawabelia. Petiriwa pamona pexuabicujinaetsi, itsa nacojiobijitsipa itsanëjawabelia, nexata jane baja, bajarapowa pewitota pibisiacuene wecua-exanaejitsipa itsanëjawabelia, tsipaji abaxë bajaraponë pijawacuenia Dioso totanetsi. Nexata, pijinia, ponë pitsipa itsanë pexuabicowëwami, bajaraponë-ata pibisiacuene exanaejitsipa pewitota bajarapowajawabelia, tsipaji abaxë itsanë pijawacuenia Dioso totanetsi —jai Jesús pijajiwijawabelia.
Jesús pijajiwi muxujioba, pecacuaicuaijaiyaniwa penamatamotsijumenë, jiwi pejumexaniataenexatsi
33 Icatsia, Jesús jumaitsi pijajiwijawabelia:
—Paxamë rabaja pajumetaneme Dioso penajumecopatsiliwaisi Moisés-pijinëta pejumaitsijawa panijasalinaiwimijawabelia mapacueniaje: «¡Pëtsa epatua pacopabame najumecapanepaeya pane-exanaeyapaebijawak Diosojawabelia! ¡Biji rajane, panejumaitsicuenia pa-exanare!»,l pejaijawa.
34 Itsiata baitsi jane, xanë pacajumaitsitsi mapacueniaje: «¡Pëtsa yamaxë-itojorobiaya najumecapanepaeya pajumaitsimë Diosojawabelia, jiwijawabelia-ata, pane-exanaejawanexa itsacuenejawa! ¡Pexaniajaicuenia saya pajumaitsimëre pane-exanaejawanexa yabara!», pacajaitsi. ¡Bajaraxuata, jiwi yamaxë-itojorobiaya papecajumexaniataenexa, pëtsa pawënëcacuaicuaijamë athëbëpijicuene, tsipaji bajaraxua Dioso pijatronojawa, bajarawetsica pitorobinexa pijajiwi! Nexata, itsa apopa-exanaemë tsipae panejumaitsicuenia bajaraPonë pacananeconitsia-exanaejitsipa.
35 ¡Pëtsa pawënëcacuaicuaijamë irapijicuene-ata, tsipaji raja Dioso pijajawa! ¡Pëtsa pawënëcacuaicuaijamë Jerusalén tomara-ata, tsipaji Dioso, pepopeyanacua-ewetsinë, pijatomara!
36 ¡Pëtsa pacacacuaicuaijamë panematabocoto-ata, tsipaji raja paxamë apopacacaëjëpae caematana̱toyo-ata panenamatananiojaiya-exanaenexa, panenamatanatsaejaiya-exanaenexa-ata! Caenë Dioso pacamataboco-eweta. Nexata, daxita bajarapacuenia pawënëcacuaicuaijamë-ata tsipae, itsa apopa-exanaemë panejumaitsicuenia, Dioso pacananeconitsia-exanaejitsipa.
37 ¡Bajaraxuata, itsa pepacuene pa-exanaejitsiamë itsacuenejawa, «Jãjã, exanaenajë», pajamëre rowialia! ¡Itsa apopajamatabë-exanaemë, «Jume, apo-exanaenë tsane», pajamëre rowialia! Pematatsënëa itsa pajumaitsimë tsipae itsajumeyo-ata jiwi papecajumexaniataenexa, belia dowathi pejamatabëcueneta pajumaitsimë tsipae —jai Jesús pijajiwijawabelia.
Jesús pijajiwi muxujioba pecuenecanawiatsiyaniwa itsajiwi itsacueniabi-atatsi
38 Icatsia, Jesús jumaitsi pijajiwijawabelia:
—Paxamë rabaja pajumetaneme Dioso penajumecopatsiliwaisi Moisés-pijinëta pejumaitsijawa mapacueniaje: «Pajiwi itsanë itaxutobijianatsi, juya bajarapajiwi namatamo-itaxutobijianae. Pajiwi-ata itsanë wonotanabiabatsi, juya bajarapajiwi namatamowonotanabiabi»,m pejaijawa pajumetaneme. Nexata, papecacujarubiwi paca-itorobabiaba bajarapacuenia pane-exanaenexa.
39 Itsiata baitsi jane, xanë bajaraxua yabara pacayapëtaeya-exanatsi mapacueniaje: ¡Pëtsa pajaitame panenayamatamotsijawanexa pajiwi paca-itsacueniaba! ¡Nexata, itsajiwi itsa paca-itabarapacabiaxuaba anaeya panecujuanenia, nexata itsanenia-ata patonaitabaracaewere papeca-itabarapacabiaxuabinexa!
40 ¡Itsajiwi itsa pacaneconita juez-nëjawabelia pane-amoneyabijamatabëcuene, papecawecuapitsinexa panijacamisa, patoyajawacoparenua panijacamisajumawelia panenaxatatsijawa!
41 »¡Wajabitsaë itsa paca-itoroba panetocaponaenexa pijajawa anijakilómetrobejecuenia, patocaponare pematatsënëa itsa-anijakilómetrobejecuenia!
42 ¡Pajiwiyo, bitso penamatawenonaejiwiyo, itsa pacawajëta itsacuenejawayo, parajure! ¡Itsa jamatabëpacacowaeta, pëtsa pawecua-asiwamë! ¡Patsicopare saya! —jai Jesús pijajiwijawabelia.
Jesús pijajiwi muxujioba piasiwanexa pitoyawi-atatsi
(Lc 6:27-28, 32-36)
43 Icatsia, Jesús jumaitsi pijajiwijawabelia:
—Paxamë rabaja pajumetaneme Dioso penajumecopatsiliwaisi Moisés-pijinëta mapejumaitsijumeje: «¡Pa-asiwamëre papecayapëtaenë bitso!n ¡Pa-itoyamëreo papeca-itoyawi!», pejaijawa. Nexata, papecacujarubiwi paca-itoroba bajarapacuenia pane-exanaenexa.
44 Itsiata baitsi jane, xanë bajaraxua yabara paca-itorobatsi mapacueniaje. ¡Pa-asiwamëre panijawajabitsaëwi! ¡Patowajëtabiabare Diosojawabelia, pamonae papecabijataewi pibisiacuenia! ¡Pexaniacuene pato-exanare pamonae paca-ataejitsibi! ¡Patowajëre Diosojawabelia pexaniacuenia peyawenonaenexatsi pamonae-ata papecaliwaisi-itoyawi!p
45 Bajarapacuenia itsa paexanawanapaename, pane-axa, athëbëtatsia pe-ecaenë, papeximëcuenia patsitajinawanapaename. BajaraPonë, pane-axa, yawenonabiaba najëpaeya daxitajiwi, pexaniajamatabëcuenewi, pibisiajamatabëcuenewi-ata. Nexata, najëpaeya tocopata icotia, ema-ata, pijapabianë petonaxaniabinexatsi.
46 Itsa pasiwamë tsipae ëpapeca-asiwawi, ¿denexata papexaniacuenejawa Dioso pacarajutsipa pijanacuatatsia, panexainaenexa pane-asiwajamatabëcuene? Ajibi tsipae, tsipaji saya pacuenejëpaejitsipame pamonae impuestojamatabëcuene papecamatamoyanijobabiabiwi. Paxamë pamonae bitso pibisiacuene pacatsita exanawanapa, itsiata bajarapamonae-ata asiwa tsabiabi piasiwawitsi.
47 Xaniawaetsia itsa pacopiapitsipame ëpaneyapëtaewi, nexata apopa-acuene-itothiamë tsipae Dioso apopeyapëtaewiwecua, tsipaji bajarapamonae-ata xaniawaetsia copiapitabiaba peyapëtaewitsi.
48 Daxita bajarapacuenia paca-itorobatsi, pane-axa Dioso panecuenejëpaenexa.q ¡Baitsi, pacuenia pane-axa, athëbëtatsia pe-ecaenë, pejamatabëcuenexanepanaenë, bajarapaxamë-ata pajamatabëcuene-itsimëre! —jai Jesús petsutoyenepanata pe-enaewi, pijajiwijawabelia.