Jesús muxujioba pijajiwi pacuenia exanaejitsia peyawenonaejawata penamatawenonaewi
6
Icatsia, Jesús jumaitsi petsutoyenepanajawata pijajiwi ayaibitsaëtoxanetojawabelia:
—¡Nayajiwitaeya panacuene-ewere paneyawenonaejawa yabara! ¡Pëtsa pexaniacuene pa-exaname saya jiwi papecacuenetaenexa, itsamonae papecataeyaniwa bitso bepapexaniajamatabëcuenewimë pane-exanaejawa yabara! Bajarapacuenia itsa pa-exanaejitsipame, nexata pane-axa, athëbëtatsia pe-ecaenë, apopacarajutsi tsipae pematatsënëa itsacuenejawayo, panexainaejawanexa pijanacuatatsia, pexaniacuene pane-exanaejamatabëcuene.
2 ¡Bajaraxuata, itsa payawenoname penamatawenonaejiwiyo, pëtsa panacuenewajunupaebame daxitajiwijawabelia, pacuenia ba-exana Dioso bepijajiwi itajara penataewi! Bajarapamonae jiwi pitabarata yawenonabiaba penamatawenonaejiwi, judíowi pijasinagogabonëjawa,a callejawa-ata, pecuenetaewitsi pewënëcacuaicuaijainexatsi bepexaniajamatabëcuenewi. Xaniajanë pacuenia pacatsipaebijitsiatsi. Pamonae baja pewënajiwi wënëcacuaicuaijaitsi, xaina baja Dioso perajutsijawaminexatsiwecua. Nexata, apoxainae tsane athëbëtatsia papexaniacuenejawa rajutsiapaebatsi, bepejiobiwi peyawenonaejamatabëcuene.
3 ¡Bajaraxuata, itsa payawenoname penamatawenonaejiwi, pëtsa patsita-exaname daxitajiwi pitabarata! ¡Biji rajane, muetsia payawenonare, itsamonae yapëtaenejewa!
4 Nexata, muetsia paneyawenonaejawa yabara penamatawenonaewi, pane-axa, Dioso, papecacuenetaenë muetsia pane-exanaejawa, juya pexaniacuenejawa pacarajutsiana daxita jiwi pitabarata —jai Jesús pijajiwijawabelia.
Jesús muxujioba pijajiwi pacuenia wajëcaejitsia Diosojawabelia
5 Icatsia, Jesús jumaitsi pijajiwijawabelia:
—¡Itsa pawajëcame Diosojawabelia, pëtsa pa-exaname pacuenia pamonae, pacuenia Dioso bepijajiwi itajara penataewi, nawajëcabiaba! Bajarapamonae jitsipabiaba daxita jiwi pecuenetaenexatsi. Nexata, nubenaeya nawajëcabiaba Diosojawabelia judíowi pijasinagogabonëta, calle pena-epacaxinaejawata-ata, jiwi pewënëcacuaicuaijainexatsi. Xaniajanë pacuenia pacatsipaebijitsiatsi. Pamonae baja wënëcacuaicuaijaitsi pewënajiwi, xaina baja Dioso perajutsijawaminexatsiwecua. Nexata, apoxainae tsane pematatsënëa athëbëtatsia papexaniacuenejawa rajutsiapaebatsi, Diosojawabelia pewajëcaejamatabëcuene.
6 ¡Nexata, itsa pawajëtsijitsiamë Diosojawabelia, pajonemeya panijaboyalia! ¡Pabaupaxatare! ¡Bajaraxuacujinae jane baja, pawajëcare pane-axajawabelia! Nexata, bajaraPonë, apowajataenë-ata, pacayajawa tsane bajarajota. Itsiata, muetsia pane-exanaejawa papecacuenetaenëxae, juya pexaniacuenejawa pacarajutsiana daxitajiwi pitabëta pane-exanaematamo.
7 »¡Itsa pawajëcame Diosojawabelia, pëtsa napëna pajumaitsimë panewajëcaejawata! Payapëtaneme rabaja pacuenia Dioso apopeyapëtaewi napëna jumaitsi tsabiabi pewënajonabiabijawata. ‘Bajarapacuenia itsa ca-exanaenatsi, nejumetaena,’ jamatabëcuenejai tsabiabi nawëxaniabiaya.
8 ¡Pëtsa bajarapajamatabëcuene-itsimë pane-axa Dioso yabara, tsipaji bajaraPonë panewajëtsiwajënaeya-ata, yapëtane xua panamatawenoname!
9 Bajaraxuata, itsa pawajëcame Diosojawabelia, pajumaitsimë tsane mapacueniaje:
«Diosomë, pataxamë, athëbëtatsia ne-ecaenë, pajitsipajë caenëmë daxitajiwi pecayaiyataejawa, daxitacuene matatoxenetsia.
10 »Pajitsipajë naxatsiayo pecopiapatsijawa daxita nijajiwi neyanacua-ewetsijawa mapanacuataje. Pajitsipajë daxitajiwi mapanacuataje nejitsipaecuenia pecato-exanabiabijawa, pacuenia baja athëbëtatsia nijajiwi nejitsipaecuenia cato-exanabiaba.
11 »¡Ajena pamatacabi, pataxaejawanexa panerajure pacuenia panamatawenonajë!
12 »¡Pacuenia paxanë pasiwajamatabëcuenecaewajë, pamonae pibisiacuene paneto-exana, bajarapijinia pacuenia paxanëjawaberena panesiwajamatabëcuenecaeware pata-exanaeneconi yabara!
13 »¡Pëtsa panecopatame patanejamatabëcuene-ëjëbijawa pibisiacuene patanejamatabëcuene-amoneyabinexa! ¡Biji rajane, panecapanepare dowathi patanejamatabëcuene-ëjëbisaëwecua, pibisiacuene pata-exanaeyaniwa! Bajarapacuenia pacawajëtatsi, tsipaji raja xamë nijajiwi neyanacua-ewetsinë tsaponaponae, daxitacuenesaë nexainaenënua daxitamatacabijawabelianexa. Bajaraxua yabara jiwi toxanepanatsi pecawënëxaniatabiabijawa daxitamatacabijawabelianexa. Bajara-itsi tsane», pajamë tsane mapacueniaje, itsa pawajëcame Diosojawabelia —jai Jesús pijajiwijawabelia.
14 Icatsia, Jesús jumaitsi:
—¡Pasiwajamatabëcuenecaeware pamonae pibisiacuene papecato-exanaewi! ¡Pabarajamatabëcuenexanepanarenua! Nexata, pane-axa-ata, athëbëtatsia pe-ecaenë, pibisiacuene pane-exanaejawa pacasiwajamatabëcuenecaewiana. Pacabarajamatabëcuenexanepanaenanua.
15 Itsiata, paxamë itsa apopasiwajamatabëcuenecaewimë tsipae itsamonae pibisiacuene papecato-exanaejawa, itsa apopabarajamatabëcuenexanepanaemënua tsipae, nexata pane-axa-ata apopacasiwajamatabëcuenecaewi tsane.b Apopacabarajamatabëcuenexanepanaenua tsane, pibisiacuene pane-exanaejawa yabara —jai Jesús pijajiwijawabelia.
Jesús pijajiwi yapëtaeya-exana pacuenia jinawanapaejitsia Dioso pitabarata japasa pamatacabibejejawa nato-itapeta
16 Icatsia, Jesús jumaitsi pijajiwijawabelia:
—¡Pamatacabibejejawa panato-itapetame japasac panejinawanapaenexa Dioso pitabarata, pëtsa pacuenejëpame Dioso bepijajiwi itajara penataewi! Bajarapamonae raja najamatabëxainaeya jinawanapabiaba, na-itabaraquiatsinejewa, namatatiatsinejewanua, itsamonae peyapëtaenexatsi japasa pejinawanapaejawa. Jitsipabiaba pewënëcacuaicuaijainexatsi penacueratsijawa Dioso pewënëta. Xaniajanë pacuenia pacatsipaebijitsiatsi. ¡Pamonae pewënajiwi wënëcacuaicuaijaitsi, xaina baja Dioso perajutsijawaminexatsiwecua! Nexata, apoxainae tsane athëbëtatsia papexaniacuene rajutsiapaebatsi, japasa peponaponaejamatabëcuene Dioso pitabarata.
17 ¡Paxamë juya pamatacabibejejawa japasa pajinawanapame Dioso pitarata, pana-itabaraquiare! ¡Panamatatiarenua xaniawaetsia!
18 ¡Bajarapacuenia pa-exanare, jiwi papecacueneyapëtaeyaniwa japasa panejinawanapaejawa! Caenë, pane-axa, papecayajawanë, yapëtaena. Nexata, bajaraPonë itsamatacabi pacarajutsiana pexaniacuenejawa panexainaejawanexa, japasa panejinawanapaejamatabëcuene Dioso pitabarata —jai Jesús pijajiwijawabelia.
Jesús yapëtaeya-exana pijajiwi xua be-exanawanapa, itsamatacabi ayaijawa pexainaejawanexa athëbëtatsia
¡Pëtsa pasiwabëjamë, ayaijawa mapanacuapijijawanë panenatocaetuatsinexa!
19 Icatsia, Jesús jumaitsi pijajiwijawabelia:
—¡Pëtsa pacaetuataponame ayaijawa panexainaejawanënexa mapanacuataje, tsipaji pacatobijianaejitsipa pe-ucubaxaewi! Pacatotasibijitsipatsinua. Pacatonacobetoxotsipanua penacobetoxotsiwi.
20 ¡Biji rajane, panatoxaniawaetaponare pexaniacuenejawanë Dioso pijanacuatatsia, xaniawaetsia pejitsipaecuenejawanë bajaraPonë paneto-exanawanapaexae! Bajarajotatsia, apopacatobijianae tsane pe-ucubaxaewi. Apopacatotasibitsinua tsane. Penacobetoxotsiwi-ata apopacatonacobetoxotsi tsane.
21 Itsajota panatoxaniawaetame panexainaejawanexa, bajarajota pajamatabënajinawanapame panejamatabë-ëthëtota —jai Jesús pijajiwijawabelia.
Waja-itaxuto raja belámparabë wajaperabëtonexa. Nexata, wajajitsipaejawata siwabëjaitsi wajapitsinexa.
22-23 Icatsia, Jesús jumaitsi pijajiwijawabelia:
—Lámparabë bo-ënëtuatuajëta itayoteca xaniawaetsia wajataenexa pitaquirijawata. Bajarapijinia itsi pane-itaxutobeje-ata paneperabëtonexa. Nexata, itsa pa-itaxutoxanepaname, xaniawaetsia panatsiwajënaetaneme. Itsa pa-itaxutobejemë tsipae, nexata xaniawaetsia apopanatsiwajënaetaemë tsipae. Pacatsita-aitaquiri saya tsipae. Bajarapijinia itsi panejamatabëcuene-ata. Itsa Dioso pijacuene panajamatabëcuene-enaeyabame, nexata bepane-itaxutoxanepanaewi tsawanapae, tsipaji Dioso peliwaisita pacajamatabëcuene-itayota. Itsa pijinia ëmapanacuapijicuene panajamatabëcuene-enaeyabame, bepane-aitaxutobejewi tsawanapae, tsipaji mapanacuapijicuene pacajamatabëcuene-itaquiriaya-exana. Nexata, bitso bepanejamatabëcuene-aitaquiriwi tsawanapae —jai Jesús pijajiwijawabelia.
Pacuenia jiwi to-acuenebitsi caecuenia anijatuxanenëbeje petonacuenebijawa, yabara peliwaisi
(Lc 16:13)
24 Icatsia, Jesús jumaitsi pijajiwijawabelia:
— Jiwi acuenebi caecuenia anijatuxanenëbeje petonacuenebijawa. Caenëjawabelia, ponë jitsipa petonacuenebinexa, tonacuenebijitsipa. Ponëjawabelia apojitsipae petonacuenebijawa, apotonacuenebi tsipae. Bajarapijinia itsi pajiwi bitso jitsipa Dioso petonacuenebijawa. Acuenebi peyajawajitsipaejawa palatacuene. Nexata, apoxanepanae jiwi caecuenia anijajawabeje, penajua-asiwajawabeje, tsipaji xua matatoxenetsia bitso asiwa, bajaraxua yabara siwabëjai tsipae pexainaenexa —jai Jesús pijajiwijawabelia.
Dioso xaniawaetsia eweta pijajiwi
25 Icatsia, Jesús jumaitsi pijajiwijawabelia:
—¡Nexata, panenajamatabëcuene-enaeyabiwixae Dioso pijacuene, pëtsa panasiwajamatabëcuenebëjamë panexaejawa, pane-apaejawa, panenaxatabijawanënexa-ata yabara, xaniawaetsia panejinawanapaenexa! Apojinawanapaetsi cajena bajara-ëxuanënexa. Biji rajane, jinawanapatsi Dioso pijacuene waja-exanawanapaenexa.
26 ¡Pacanaëjëre pacuenia Dioso eweta baratsuimonae, itaboxojawa pejinawanapaewi! Paxamë payapëtaneme bajarapamonae apo-ubi pexaejawanexa. Aponotsinua penaweretaponaejawa, pe-etsinexa bota. Itsiata, Dioso, pane-axa, athëbëtatsia pe-ecaenë, rajutabiaba pexaejawanexa. ¡Paxamë rabiji bitsoyo Dioso paca-asiwa baratsuimonae matatoxenetsia, papecarajutsinexa daxita xua panamatawenoname! ¡Bajaraxuata, pëtsa bitso pasiwajamatabëcuenebëjamë panenamatawenonaejawanë yabara!
27 ¿Detsa jane ponë paxamëyajuwënënë cuenecaëjëpatsi pijacujiruta caemetro-epatua matawëjëa pena-apiaya-exanaenexa? Ajibi. Bitso jamatabëbëjai-ata tsipae pena-apiaya-exanaenexa, itsiata apocuenecaëjëpaetsi tsipae pijacujiruta.
28 »Bajarapacuenia Dioso itsa eweta baratsuimonae, apopapecacuenecaëjëpaejawa-ata panijacujiruta panena-apiaya-exanaejawa, ¿detsa xuajitsia bitso panasiwajamatabëcuenebëjamë panenaxatabijawanë yabara? ¡Pacanaëjëre pacuenia witsabapona wayafopijimatono! Bajarapamatono aponatsijumanacuenebi penaxatatsijawanexa. Aponatsijumajorocae-ata, itsiata bitso pexaniacuenia aitabë.
29 Xaniajanë pacuenia pacatsipaebijitsiatsi. Bajayata, peyanacua-ewetsinëmi, Salomón-pijinë, bitso naitabëtsiaya naxatababiabi-ata pexaniawiriajawanë, itsiata, bajaraponë pena-itabëtsijawawecua matatoxenetsia bitso mapamatonotoxi aitabëje.
30 Bajarapacuenia Dioso itsa itabëta wayafopijipo̱na pematonojawanëta, bepijia petsaquenaejawanënexa-ata, xuanë xanepana isotonexa, ¿detsa xuajitsia panasiwajamatabëcuenebëjamë panenaxatabijawanë yabara? BajaraPonë raja cuenecaëjëpatsi matatoxenetsia pexaniacuenia papeca-ewetsijawa. Paxamë saya juya beweliacuenia pa-itaxutuajamatejemamë Dioso papeca-ewetsijawanexa.
31 ¡Bajaraxuata, pëtsa jamatabëbëjaiya pajamatabëjumaitsimë: «¿Detsaeta xua xaenatsi? ¿Detsaeta xua matawëjëa apaenatsi? ¿Detsaeta xua naxatabianatsi?», pajamatabëjamë pëtsa!
32 Pamonae, apojudíowi, Dioso apopeyapëtaexae, bajarapacuenia bitso siwajamatabëcuenebëjai tsabiabi bajaraxuanë yabara. Itsiata baitsi jane, bajarapacuenia paxamë apobepa-exanaemë, tsipaji pane-axa, athëbëtatsia pe-ecaenë, yapëtane daxita bajaraxuanë panenamatawenonaejawa. Cuenecaëjëpatsinua papecarajutsijawa.
33 ¡Bajaraxuata, pajaire copiaya daxitacuenewecua Dioso pijacuene papecajamatabëcuenenamatacaitorobijawa, pejitsipaecuenia pa-exanawanapaenexa! Bajarapacuenia itsa pa-exanawanapaename, nexata bajaraPonë pacarajutsiana daxita xua panamatawenoname.
34 ¡Bajarapacuenia Dioso papecayawenonaexae, pëtsa pasiwajamatabëcuenebëjamë merawiapijicuene yabara! Caematacabi canacujitsia copiapatabiaba wajanacajamatabëcuenebëjaiya-exanaejawanë. Nexata, aponamatawenonaetsi itsacuenejawa pematatsënëa wajasiwajamatabëcuenebëjaijawanexa. Bajaraxuata, ajena pitsijawata apobesiwajamatabëcuenebëjaitsi xua merawia pitsijawata nacatocopiapatsijitsia —jai Jesús pijajiwijawabelia, pe-enaewi petsutoyenepanata.