Jesús tsipaeba jiwijawabelia pecuenecataeliwaisi, pijatuxanenë pecobecowë bijiaya peto-ewetsinëtsi peliwaisicuenia
16
Jesús pijajiwijawabelia tsipaeba pecuenecataeliwaisicuenia, mapaliwaisije:
—Itsamatacabi, ponapona petuxanenë, bitso pexainaenë. Bajaraponë xaina pijajiwitonë peto-ewetsinënexatsi pecobecowë. Itsiata, belia wënëtane pijajiwitonë pepëya pecobecowë petoweretaponaejawatsi.
2 Nexata, petuxanenë junata pijajiwitonë. Jumaitsi: «Xanë cawënëliwaisitanetsi tapëya tanetoweretaponaejawamë taca-ewetsia-exanaejawa. ¡Netsitajëre pabaxutota matamoyaquinarubame xuanë canajetaponame tacobecowë, xuanënua netocomuataponame! Nexata baja, itsa netocanawiatsianame bajarapabaxuto, matawëjëa aponeto-ewetsimë tsane tacobecowë», jai pijajiwitonëjawabelia.
3 Nexata, pesiwaponaejawata bajarapabaxuto petsitajëtsinexa, pijajiwitonë jamatabëjumaitsi: «¿Detsaeta xua exanaenajë? Tajatuxanenë baja necapitsapaejitsia tanacuenebijawawecua. Aponecaëjëpae tsane tanacuenebinexa pabi, tajacuata tana-ewetsinexa. Bitso auranënua tsipae itsamonaejawabelia palata amoneya tawajëcaejawa, tana-ewetsinexa.
4 Yapëtaniji baja pacuenia exanaejitsianë, itsa necapitsapaena tanacuenebijawawecua, itsamonae tanecopiapitsinexa pijabota ».
5 Bajaraponë jane baja penajamatabëcueneweretsicujinae, bajaraponë junatapona daxita pamonae abaxë amoneyaba petuxanenë. Nexata, bajarapamonae, caenë canacujitsia, patapona bajaraponëjawaberena. Copiaya petopatsinëtsijawabelia jumaitsi: «¿Detsa pacuenia amoneyabame abaxë, xua tajatuxanenë pijajawa catsicopatatsi?», jai bajaraponë.
6 Nexata, piamoneyabinëtsi jumaitsitsi: «Amoneyabajë abaxë tarajutsinexa ochocientos pagalón-beje aceiteranë», jaitsi. Nexata, bajaraponë jumaitsi piamoneyabinëtsijawabelia: «¡Taema mapabaxutotaje xuawajëto amoneyabame! Ayaijawa raja picani. Itsiata, bewelia saya catocopatsianatsi. ¡Bepijiayo yaquinare itsabaxutojawabelia cuatrocientos pagalón-bejecuenia niamoneyabijawa! Bajarapacuenia saya tajatuxanenë rajutsianame», jai bajaraponë.
7 Bajaraxuacujinae, icatsia itsanë topatatsi. Nexata, icatsia jumaitsi bajaraponëjawabelia: «¿Jica xamë? ¿Detsa pacuenia amoneyabame?», jai. Nexata, bajaraponë jumaitsitsi: «Amoneyabajë abaxë tacarajutsinexa cien pabultobeje trigoxu», jaitsi. Nexata, bajaraponë jumaitsi piamoneyabinëtsijawabelia: «¡Taema mapabaxutotaje xuawajëto amoneyabame! Ayaijawa raja picani. Itsiata, bewelia saya catocopatsianatsi. ¡Bepijiayo yaquinare itsabaxutojawabelia ochenta pabultobejecuenia niamoneyabijawa! Bajarapacuenia tajatuxanenë rajutsianame», jai bajaraponë. Bajarapacuenia exanapona daxita piamoneyabiwitsijawabelia, pesiwajamatabëcuenexanepanaenexatsi, xaniawaetsia pecopiapitsinexatsi pijabota penaponaponaenexa, pijatuxanenë itsa nawecuacapitsapatsi. Nexata jane baja, daxita pamonae amoneyaba tocanawiabatsi. Bewelia matamota peto-itanerutaponaebaxutonëtsi.
8 Petocanawiatsicujinae, pabaxutojawata matamoyaquinapona xuanë comuaca, xuanë-ata canajeta, nexata pijatuxanenë siwa-itaxutuanabenajacatsi, penatsiwajënaejaitsixae pamonae copiapitsijitsiatsi; piacujirubejenë-ata petsiyapëtaenëcuenia penacuenebixae. Mapanacuapijiwije, bitso batsiyapëtane pacuenia exanaejitsia, Dioso pexi pexanaecuenewecua Dioso pijajiwiwecua —jai Jesús pijajiwijawabelia.
9 Icatsia, Jesús jumaitsi pijajiwijawabelia:
—Bajaraxuata, pacamuxujiobatsi. Mapanacuapijipalatata xaniawaetsia pacanacuenebianame paneyawenonaejawata itsamonaejawabelia, panexainaenexa ayaibitsaëto papecasiwajamatabëcuenexanepanaewi. Pacuenia pijatuxanenë pecobecowë peto-ewetsinë, pesiwajamatabëcuenexanepanaewitsi xaina, xaniawaetsia pecopiapitsinexatsi pijabota penaponaponaenexa, bajarapijinia pacuenia, paxamë-ata athëbëtatsia paxainaename papecacopiapitsiwinexa papecasiwajamatabëcuenebarëyawi. Nexata, pamatacabi patëpaename, itsajota apopanamatawenonaemë tsane palata, Dioso pacacopiapitsiana apopewerewerecaebonëjawatatsia —jai Jesús pijajiwijawabelia.
10 Icatsia, Jesús jumaitsi pijajiwijawabelia:
—Pajiwi nacobecowë eweta xaniawaetsia, tsiquirijawayo-ata, nexata pecunuacuenejawa-ata xaniawaetsia ewetsiana. Pajiwi itsanë pecobecowë bijiaya to-eweta, tsiquirijawayo-ata, pecunuacuenejawa-ata bijiaya to-ewetsiana.
11 Bajaraxuata, paxamë mapanacuapijipalata bijiaya itsa pa-ewetsipame, ¿detsa nexata pacuenia xaniawaetsia pacacuenecaëjëpaejitsipa panenacuenebijawa Dioso pijapexaniajaicuene, xua picani bitso namatamota matatoxenetsia, mapanacuapijicuenewecuaje?
12 Itsa paxamë xaniawaetsia apopato-ewetsimë tsipae itsajiwi pijajawa mapanacuata, xua pacatsicopata papecato-ewetsinexa, ¿jipatsa nexata pa-ewetsia-exanaejitsipa bitso penamatamotsijawa, xua picani pacatoxaina panijajawanexa?
13 »Itsajiwi-ata acuenebi caecuenia petonacuenebijawa anijanëbeje pijatuxanenëbejejawabelia, tsipaji caenëjawabelia bitso jitsipaejitsipa petonacuenebijawa. Itsanëjawabelia apojitsipae tsipae petonacuenebijawa. Bajarapijinia pacuenia, apoxanepanae caecuenia pejitsipaejawabeje anijacuenebeje, Dioso pijacuene, palatacuene-ata, bajarapacuenebeje pataeyaniwa bepijatuxanenëbeje. Belia bitso asiwa tsipae Dioso. Itsa jume, asiwa tsipae palata. Nexata, tonacuenebijitsipa xua bitso asiwa —jai Jesús pijajiwijawabelia.
14 Bajarajota, fariseowi, bitso palata pejitsipaewi, jumetaeyena Jesús petsipaebiliwaisi pijajiwijawabelia. Nexata, bajarapamonae jumecapo̱capo̱natsi.
15 Jesús nexata jumaitsi fariseowijawabelia:
—Paxamë pajitsipabiabame jiwi papecataejawa bepapexaniajamatabëcuenewimë itsamonae pitabarata. Itsiata baitsi jane, Dioso pacajamatabëcueneyapëtane pexaniajamatabëcuene apopanexainaewicuene. Pacuenejawanë yabara jiwi bitso tsitapexaniacuenetsi, bajarapacuene juya Dioso apotsitapexaniacuenetsi —jai Jesús fariseowijawabelia.
Paepatota Jesús taxuxuaba pepaebijawa Dioso pijajiwi peyanacua-ewetsijawanexa, bajarapaepatota aliwaisimatamobi Dioso penajumecopatsiliwaisi Moisés-pijinëta jiwi pejonejawanexa Dioso peyanacua-ewetsinacuajawabelia
16 Icatsia, Jesús jumaitsi fariseowijawabelia:
—Juan, jiwibautizabinëmi, peponaponaematacabita copiaruca peliwaisimatamotsijawami Dioso penajumecopatsiliwaisi Moisés-pijinëta, profetawi pepaebiliwaisianë-ata. Itsiata, Juan-pijinë pepatsicujinae, pexanialiwaisi tsipaebaponajë, Dioso pijajiwi peyanacua-ewetsijawanexa. Nexata, daxitajiwi bitso jitsipa penajonenexa Dioso pijanacuayabetsia.
17 »Mapanacuaje, itaboxo, ira yajawa, jemata werewerecaena. Itsiata baitsi jane, apojumenaxuabi tsane caejumeyo-ata, Dioso paliwaisi najumecopata Moisés-pijinëta. Daxita pacuene yabara tajëwelia wajunupaeba bajarapaliwaisita, pepacuene copiapatsiana —jai Jesús fariseowijawabelia.
Jesús liwaisi tsipaeba penacojiobinë pijawa pewecuanawiatsiyaniwa
18 Icatsia, Jesús jumaitsi fariseowijawabelia:
—Ponë pijawa wecuanawiata, icatsia itsawa itsa pita, bajaraponë pibisiacuene exana. Nexata, naneconita Diosojawabelia, tsipaji pepopijawawecua jaita itsawa. Dioso cajena abaxë bajaraponë pexuabiwa pepopijawacuenia totanetsi. Ponë-ata itsanë pexuabiwa pita, pibisiacuene exana. Nexata, naneconita Diosojawabelia, tsipaji itsanë pijawa yacajërëta, powa abaxë Dioso tanetsi itsanë pepopijawacuenia —jai Jesús fariseowijawabelia.
Pecobecowë bitso pexainaenë, Lázarobeje peliwaisi
19 Icatsia, Jesús tsipaeba daxitacuene bitso pexainaenë, Lázarobeje peliwaisi fariseowijawabelia:
—Bitso pexainaenë ponapona. Caematacabi canacujitsia, pecobecowë naxatababiaba pexaniawiriajawanë, bitso penamatamotsijawanë. Nawitsia pexaniawiria pexaejawa xaeyabiaba.
20 Bajaraponë pijabo matatoyorotsia peyacaranatsi-ibopanaxanetojumawelia baupamuxuneneta, bepejiobinë, Lázaro, boquecabiaba. Daxitanëreca perabëtsabana.
21 Jamatabëxaeyabiaba picani bitso pexainaenë pexaeyabiabijawata piothopaepërë mesabëxëpanareca. Awirixi-ata patabiaba itsajota bocabiaba, petsabanaejawa peraebinexatsi.
22 Belia baja, Lázaro tëpa. Petëpaecujinae, ángelewi caponayatsi itsajotatsiaa Abraham-pijinë petëpaecujinae ponapona. Bajaraxuacujinae, bitso pecobecowë pexainaenë-ata baja tëpa. Mëthëtatsi.
23 »Bitso pecobecowë pexainaenëmi petëpaecujinae, pata itsajotalia petëpaewi jinawanapa nawixaetaeya. Nexata, bajaraponë athëbëa benaëcotsia. Taenutsia Abraham pewaetabanucaejawa namipabëcataitsiaya Lázarojawabelia.
24 Nexata, bitso pecobecowë pexainaenëmi wawajai. Jumaitsi Abraham-jawabelia: «¡Amo, Abraham, nitaxutotsoniataema! Neto-itorobimica Lázaro. Nacobe-upijabutsi merata ne-ebarëtocainejebia-exanaejitsia, tsipaji raja bitso jamatabëfaenajë mapatajutaje», jai bitso pecobecowë pexainaenëmi.
25 Nexata, Abraham jumaitsi bajaraponëmijawabelia: «¡Tamomo, najamatabënapire! Pamatacabi abaxë asaëmë tsaponaponae nenaexanae-irata, ëpexaniacuene picani xainame. Lázaro pijinia pamatacabi abaxë asaë tsaponaponae, bitso picani bejiobi. Itsiata juya, mapamatacabije pexaniacuenia majotaje catsuponapona. Xamë pijinia nawixaetaeya ponaponame.
26 Orijibia, waxaitsi nacanawecuanatsia-exana piniji-itapajanitoxaneto. Bajaraxuata nacato-ayapëbeje namata-enetsia wajanicabijawa. Paxanë-ata paneto-acuenebi pataponaejawa bajarabereca, paxamë-ata pijinia pacato-ayapëbeje panepatsinexa paxanëjawabetsina», jai Abraham.
27 »Nexata, icatsia bitso pecobecowë pexainaenëmi jumaitsi Abraham-jawabelia: «Amo Abraham, pexaniacuene cawajëtatsi. Tonajume-itorobianame Lázarota taxa pijaboyabelia.
28 Bajarajotalia, xainajë cinco ponëbeje tajuyapijiwi. Bajarapamonaejawabelia Lázaro tsipaebiana, muxujiobiananua, pepatsiyaniwa mapanawixaetaeyabiabinacuayaberenaje», jai bitso pecobecowë pexainaenëmi.
29 Nexata, icatsia Abraham jumaitsi bajaraponëjawabelia: «Bajarapamonae baja xaina Moisés-pijinë, profetawi-ata peyaquinaeliwaisianë. Nexata, nejuyapijiwi itsa apojitsipae tsane peponaenexa bajarapanacuayabelia, jumecowënëtsiana bajarapamonaemi peyaquinaeliwaisianë», jai bitso pecobecowë pexainaenëmijawabelia.
30 Bitso pecobecowë pexainaenëmi icatsia jumaitsi Abraham-jawabelia: «¡Jume raja! Tajuyapijiwi apojumecowënëtsi tsane cajena bajarapaliwaisianë. Itsiata, itsajiwi itsa asaë tsane petëpaecujinae penawiatsinexa pecowëyabelia, tsipaebiana bajarapamonaejawabelia. Nexata, copabiana pibisiacuene pexanabiabijawa. Najamatabëcuenepënëyorotsiananua Diosojawabelia», jai Abraham-jawabelia.
31 Nexata, icatsia Abraham jumaitsi bajaraponëmijawabelia: «Nejuyapijiwi itsa apojumecowënëtsi Moisés-pijinë, profetawi-ata peyaquinaeliwaisianë, nexata pajiwi asaë petëpaecujinae, mawelia ponae-ata tsipaeje petsipaebinexa nejuyapijiwijawabelia, itsiata, apojumexaniatae tsipae bajarapajiwi-ata petsipaebiliwaisitsi», jai Abraham bitso pecobecowë pexainaenëmijawabelia —jai Jesús fariseowijawabelia, peyapëtaeya-exanaejawata bijiata pecanaëjëtsixae palatacuene yabara.